19
1 Dɩ Jeju lʋʋn Jeriko a kpãsɛ da-n jal.
2 Dɩ hɩnɛ, lẽle kũu bɩɛl gɩ, a hale dɩ wa-n wɩɩ Jase, war gbadaraa kɔ̃tɩ̃ a do.
3 Dɩ a ƴaalɛ a jɩ ntɛɛkɛ Jeju donɩ, sɩ aa puno na yɩɩ tibil jɔraala', gɩdonɩ a gburore.
4 Dɩ a car jal ƴɛ kʋʋlɔ a jʋʋn thɩrʋra a yɩ Jeju, gɩdonɩ le a teena a kana.
5 Dɩ ɔbɔɔkɛ Jeju danɩ paarɩlera, a gbaar hɩɩn ƴũ sa wɩɩ aa: Jase, gbuno kɔrɔ, gɩdonɩ gɩ teenanɛ dɩ ma cɔ afɩ cɔ nĩ.
6 Dɩ Jase gbũ kɔrɔ a teguu kpakpaalɛ na daʋ.
7 Dɩ ɔbɔɔkɛ tɩbɩla fɛʋ yɩnɩ gelela, wɩ-n hũhuune ayɩ: A jaal a cɔ sopugodaarɩ cɔ.
8 Sɩ Jase ɩɩr jɩɩl Kɔ̃tɩnɩ ƴɛ thɩ̃thɩɩn sa sʋʋraa: Hɩnɛ Kɔ̃tɩn, dakuru ɩ̃ thɩ̃sɔra ma-n har bɔdara. A mɩ kɔɔ tee tibil thɩ̃ɛ na fɩɩlɛ, ma bire na haa balanã.
9 Dɩ Jeju sʋʋraa: Taarɛ lʋʋn cʋɔrɔɔkɛ nĩ, gɩdonɩ Abɩrahamɩ bikuun olela do dakha.
10 Gɩdonɩ mɛr tibili Bikuun ɩnɛ wɩrɛɛkɛ bonɩɩ ƴaal pa ɩ̃ taa wɩ.
11 Ɔbɔɔkɛ wɩ kɔɔ hanɩle dɩ wa-n pɛ Jeju nũu, a so warɛ sokpa bɩɛl wo, gɩdonɩ a wɔrɔnɛ Jerujalɛm dɩ wɩ kɔɔ pɛrɛ haar Thãgba na gbaar fãga dapa dapaara.
12 Dɩ a so warɛ: Nũfe kuun gɩ da-n jal dɩ kpɩɩra ƴɔɔ fh wɩ cʋgʋʋ a do fãgadaar, sɩ a bir a ɩ̃.
13 Dɩ a tire ɔɔ thɔ̃darasɔra tɩbɩla yʋɔr a ha wɩ war bɔrɔ bɩɛlbɩɛl sa so war: Na-n ƴabana phaphapha ma ɩnɛ.
14 Sɩ ɔɔ dɩdara n kɔɔ laarʋʋrɛ, dɩ ɔbɔɔkɛ a jalnɩ pɩ, wɩ thʋɔn thɔ̃thɔna wɩ kpaanɛ a sɔ: Sa-n ƴaal olela a dɔ sar fãgadaara'.
15 Dɩ ɔbɔɔkɛ a 'lɛnɩ fãga pɩ, a kɛr bir ɩ̃. A wer thɔ̃daraakɛra a kɔɔ hanɩ war wɩ pɔ, a jɩ gɩrɛɛkɛ wɛr bɩɛlbɩɛl 'lɛnɩ dɩɩ do khor.
16 Dɩ cacadaar pɔr a sor: Kɔ̃tɩn, afɩ bɔrɔ bɩɛl bire 'lɛr khor yʋɔɩ a dɛbɩrɔ wo.
17 Dɩ sʋʋraa: Gɩ bɔrɛ, thɔ̃daar bʋɔ ha fɩ. Gɩdonɩ fɩ dor sobɔ cʋʋdaar thɩ̃ gberakɛ, dɔ gobanɛr dɩɩ yʋɔrra.
18 Dɩ balanyɔdaar pɔ a so: Kɔ̃tɩn, afɩ bɔrɔ bɩɛlla bire 'lɛr khor yemɔɩ a dɛbɩrɔ wo.
19 Dɩ sʋʋraa: Na fɛrɛ dakha, fa dor gobanɛr dɩɩ yemɔɩra.
20 Dɩ bɩɛl pɔ a so: Kɔ̃tɩn, yɛ afɩ bɔrɔ bɩɛlla kẽkẽ ballɔ mer kɔɔ to gɩ.
21 Gɩdonɩ afɩdara n kʋ mɛr maar gɩdonɩ fɩ dor nĩkhidaar, dɩ fɩ gba gɩrɛɛkɛ fa kɔɔ thɩɩnna', dɩ fɩ khana gɩrɛɛkɛ fa kɔɔ diirnə'.
22 Dɩ sʋʋraa: Fɛr thɔ̃daar puukɛ, afɩ thɩmɩɩra ma gba a na kɩɩlna fɩ. Fɩ kɔɔ jɩnɩ dɩ nĩkhidaar ha mɩ, dɩ ɩ̃ gba gɩrɛɛkɛ ma kɔɔ thɩɩnna', dɩ ɩ̃ kha gɩrɛɛkɛ ma kɔɔ diirnə'.
23 Dɩ mɔ̃gɩdo dɩ fa kɔɔ 'laa ɩ̃ war kãkɛ ma 'lɛrɔnɩ khor a mɩ bir ɩ̃a?
24 Agɩpɩ a sor wɩrɛraakɛ hanɩle ayɩ: Nɩ taaraa bɔrɔ bɩɛlɩle, a hana ʋrɛ hananɩ bɔrɔ yʋɔr.
25 Dɩ wɩ sʋʋraa: Kɔ̃tɩn, mee bɔrɔ yʋɔr a hana.
26 Mɩ so narɛ, tibil wo tibilikɛ hananɩ thɩ̃ɛ, wa bire na 'laa na dɛbɩraa wo, sɩ tibilikɛ na hananɩ thɩ̃a', wa tiirəərerakɛ phubi gɩrɛɛkɛ a hananɩ.
27 Sɩ ado ɩ̃ lãlaardarasɔɔkɛ na kɔɔ ƴaalɛ mɩnɩ ɩ̃ dɔ war fãgadaara' wɛ, nɩ kpa wɩ ɛna a kʋʋrɛ ɩ̃ ƴɛra.
28 Dɩ ɔbɔɔkɛ Jeju mɩɩnɩ thale pɩ, a kʋʋl wɛr ƴɩɛ da-n jal Jerujalɛm.
29 Ɔbɔɔkɛ Jeju n wɔrɔnɩ Bɛtɩfaje na Betanɩ khʋra, gɔ̃gʋ̃ɔɔkɛ hananɩ olɩvɩ thɩra, le a thɔ̃ ɔɔ kpãkpãadara yenyɔ a so war ayɩ:
30 Nɩ jala dɩɩraakɛ nɩ pɛnɩ ƴɩɛ. A nɩ pɔ na dã, na yɩrɛ kũkə̃ ɓolʋʋkɛ tibil na jʋʋnnɩ pa' dɩ wa li. Nɩ thʋba a kpa ɛna.
31 A tibil bule ni: Mɔ̃gɩdo dɩ na-n thʋbɩ ya? Nɩ sʋɔraa ayɛ: Kɔ̃tɩn n ƴaalɛ.
32 Dɩ wɩrɛɛkɛ Jeju kɔɔ thɔnɩ jaal a yɩ thɩ̃ɛ dɩɩ ha mɔna a kɔɔ so warnɩ.
33 Dɩ mɔ̃ wɩ-n thʋbɩnɩ kũkə̃ ɓolʋ, ɔɔ hɩ̃hɩ̃sɔ bule wer. Mɔ̃gɩdo dɩ na-n thʋbɩ kũkə̃ ɓolʋʋkɛ?
34 Dɩ wɩ birse: Kɔ̃tɩn n ƴaalɛ.
35 Dɩ wɩ pɔnanɛ kũkə̃ ɓolʋ Jejura, a gba awɩ kẽkẽ a dɛ̃ɛ kũkəənə, sa cʋʋ dɩ Jeju jʋʋn.
36 Mɔ̃ a-n jalnɩ, tɩbɩla kɔɔ belle awɩ kẽkẽ kɔ̃tɩ̃sɔ a pɛr hʋɛra.
37 Ɔbɔɔkɛ a thenɩ olɩvɩ thɩr gɔ̃gʋɔna a gbũ da-n dã, daʋ fʋrɛ kpãkpãada jɔjʋɔɔle fɛʋ, dɩ wɩ ma dɩ wa-n khɩɩ Thãgba na nɔ kheu nɔ kpaa thɩ̃ɛsɔ fɛʋraakɛ wɩ kɔɔ yɩnɩ.
38 Dɩ wa-n so: «Bɔnanɛ n hana fãgadaarraakɛ n ɩnanɩ gɩrɛ na Kɔ̃tɩnɩ i. Ha ɩɩ n hana Thãgbaa dʋɔ na i dʋbɩrɛ thãgbara ƴũ pər.»
39 Ɩkhaa jɔfʋ bʋ dʋdarasɔ tibil jɔɔlee thɩ̃thɩɩn kɔɔ sor Jejura: Dɩɩrdaar, phaanɛ afɩ kpãkpãadara.
40 Dɩ birse wi: Mɩ so narɛ a wɩrɛ pɩr nʋɔrakɛ, bokanasɔ na-n hulene.
41 Ɔbɔɔkɛ Jeju n kɔɔ wɔrɔnɩ a 'laa na yɩ dɩɩle, a-n khɩɩrɛ sa so:
42 Fɛrɛ Jerujalɛm dakha, adora fɩ jɩrɛ gɩrɛ nĩ wireraakɛ thɩ̃ɛsɔɔkɛ na hana fɩnɩna ha ɩɩ, sɩ hɩnɛ nɛnɛ̃, gɩ ker farɛ gɩrɛ waa.
43 Wire na phã farɛ kɛ afɩ lãlaardara na kpenɩ koru a na dii far, sɩ na kpala far a na sɔbɩ fɩ paar fɛʋ kpɩkpɩkpɩ.
44 Dɩ wa cɛcɛbɛ fɛr koo na afɩ bɩsãsɔɔkɛ hanɩ afɩ kal ƴɔɔ, dɩ wa sɩ far boka bɩɛl a dɛ̃ɛ bɩɛlla ga, gɩdonɩ fa kɔɔ jɩ bɔɔkɛ Thãgba kher fɩna'.
45 Dɩ Jeju lõ Thãgba fʋɔr cɔ kɔ̃tɩɩna, a ma a weele wɩrɛ n dolonenɩ thɩ̃ɛ,
46 sa so war: Gɩ kherere Thãgbaa sɛbɛra ayɩ: «Mɛr Thãgbaa cɔ na dor ɩ̃ fʋɔr pa», sɩ dɩ ne wer cʋʋ dɩɩ do yu hɔ̃hʋɔldaraa wɔ̃ pa.
47 Dɩ Jeju n kɔɔ hale da-n dɩɩr tɩbɩla wire fɛʋ Thãgba fʋɔr cɔ kɔ̃tɩɩna. Dɩ bonɩ jidaar kɔ̃tɩna na jɔfʋ dɩɩrdara na tɩbɩlaa kɔ̃tɩ̃sɔ n kɔɔ ƴaalɛ wɩ kʋʋ.
48 Sɩ wa jɩ mɔ̃ wa cʋʋnɩ sɩ na fʋʋa', gɩdonɩ tɩbɩla fɛʋ n kɔɔ pɩɛrɛ nũu bɔɔbɔɔbɔɔ.