18
1 Dɩ Jeju so war sokpa bɩɛl, a nɩna wɩ mɔ̃kɛ wɩ teenanɩ wa-n bɩɛlnɛ Thãgba wire fɛʋ sɩ wa-n vɔa', ayɩ:
2 So kɩɩldaar bɩɛl gɩ, a kɔɔ hale dɩ bɩɛlla. Aa-n ma Thãgba ga, aa-n therna tibil dakha ga.
3 Dɩ khikhɛr bɩɛl kɔɔ hale dɩɩraalera dakha, kɛ n pʋɔnnɩ ɔɔ pa da-n sʋʋraa: Wɛ ɩ̃ sodaar a ɩ̃ fɩ gʋʋr sɩ sor.
4 A a pɔ dɩ so kɩɩldaarɩle n bo, a a pɔ dɩ bo, sɩ agɩpɩ a bire so ɔɔbara: Sobɔr gɩ wer, ma-n ma Thãgba ga, dɩ tibil gɩ dɩ ɩ̃ therna ga.
5 Sɩ gɩdonɩ khikhɛrʋʋkɛra n vɔɔ mɛr thakɛ, ma gʋʋrɛ ɔɔdara, a mɛ̃ gaa a na ɩnɛ a na-n vɔɔ mɩ ƴɛrr.
6 Dɩ Kɔ̃tɩn so: Nɩ nɛ gɩrɛɛkɛ gõgolõ so kɩɩldaar kɔɔ sonɩ pal;
7 sɩ Thãgba a na ka na nɩna wɩrɛɛkɛ a kɔɔ phiirni ɔɔ fɩl sar, kɛ n hulenenaanɩ dɩwɩlʋ na dɩtɩnɔ fɛʋaa? A na pʋɔrɛ sa a nɩna wɩ ya?
8 Mɩ so narɛ a na nɩna wɛr dapaara ɔɔ fɩl sar. Sɩ ɔbɔɔkɛ mɛr tibili Bikuun na birni na ɩ̃, ma yɩrɛ ha pɛrɛ thɩɩra bɛ?
9 Jeju sor sokpa bɩɛl wo wɩrɛraakɛ n kpɩɛrɛnɩ ɩnɩ dor fɩl sardara, sɩ dɩ wa-n beesi ʋkhasɔ, a sor ayɩ:
10 Tɩbɩla yenyɔ wɛ, dɩ wa-n jal Thãgba fʋɔr cɔ kɔ̃tɩɩna wɩ bɩɛl Thãgba. Bɩɛl do jɔfʋ bʋ dʋdaar, sɩ bɩɛl do war gbadaar.
11 Dɩ jɔfʋ bʋ dʋdaar jɩɩl ƴũ jɩɩlɔ da-n bɩɛl ɔɔ thɛthɛɛ dɩbara thakɛ: Ɩ̃ Thãgba, mɩ-n fʋɔr fɛr gɩrɛraakɛ ma honanɩ tibil ɩkhasɔa', kɛ dɔnɩ tɩɩ tagɩrɩdara', agɩbo wɩrɛ na saranaa ga, dɩ khɛ kpɩɩ ƴaaldara gɩ woa', dɩ war gbadaarɩkɛ gɩrakɛ woa'.
12 Mɩ-n lire nʋɔ balanyɔ wire makonyɔra, mɩ-n 'laarɛ dakha bɩɛl yʋɔr thɩ̃ɛ fɛʋraakɛ mɩ n 'lɛnɩ.
13 Sɩ war gbadaarɩle jɩɩlɛ ƴɔɔ gbe, aa 'la na hɩɩn ƴũə' sa gʋɛ ƴɩɛ thɩɩra a so: Pha Thãgba, jɛ mɛr sopugodaarɩkɛ bʋɔra.
14 Mɩ so narɛ, tibililera ka fire kɔna so hɛllɛ, sɩ ole wer, kpei. Gɩdonɩ ʋrɛɛkɛ n kanɩ ire, wa wuruure, sɩ ʋrɛɛkɛ n wuroni dɩbara, ɔr wa ɩɩr.
15 Dɩ tɩbɩla kɔɔ gbaar awɩ bisɔ a pɔna Jejura a dɛɛnɛ war nyɛ̃ɛ, sɩ mɔ̃ kpãkpãadara yɩnɩ gelela, wɩ kɔɔ phaanɛ wɩrɛ pɔna wɩnɩ.
16 Dɩ Jeju we wɩ wɩ pɔna wɩ, sɩ a sor: Nɩ dɔ bɩsana na-n ɩ̃ mar na-n pɩɛr wa', gɩdonɩ wɩrɛ hɔnɩ bɩsana, wɛr Thãgbaa fãgadaar do mana.
17 Sobɔr mɩ so nar, ʋrɛɛkɛ na-n tuonni Thãgbaa fãgadaar do bɩsanaa khaaka', a na puno na lono kpɩɩraka'.
18 Kɔ̃tɩ̃ bɩɛl gɩ, a kɔɔ bule Jeju thakɛ ayɩ: Dɩɩrdaar bʋɔ, anye ma cʋʋ na 'lɛ yire khorr?
19 Dɩ Jeju sʋʋraa: Mɔ̃gɩdo dɩ fɩ we mɩ dabʋɔ? Tɩɩ bʋɔ na hala', Thãgba dɩbara bʋɔnɔ.
20 Fɩ jɩrɛ Thãgbaa jɔfʋ: «Fa-n hana khɛ kpɩɩ ƴaala', fa-n hana kũu kpɩɩ ƴaala', fa-n kʋ tibilə', fa-n yuə', fa-n sõso pɛ tibilə', na cɔ afɩ thɩ na afɩ nɩ.»
21 Dɩ kuunile birsee: Mɩ kɔɔ mãa nɩ ga jɔfʋraale fɛʋ nũu kɛkɛkɛ ɩ̃ daɓol dĩi bɔɔ.
22 Ɔbɔɔkɛ Jeju kɔɔ nɩɛnɩ gele a sʋʋraarɛ: Thɩ̃ bɩɛl ɓɔr fɛr wo. Jala dolone thɩ̃ɛ fɛʋʋkɛ fɩ hananɩ a hana bɔdara, dɩ mɛ̃ fa 'lɛ lẽle thɩ̃ɛ Thãgbaa dʋɔ, agɩpɩ fɩ ɩ̃ fa-n kpa mar.
23 Ɔbɔɔkɛ kuunile nɩɛnɩ gele a gbure ƴɩɛ, gɩdonɩ lẽledaar gɩ na sobɔr.
24 Ɔbɔɔkɛ Jeju yɩɩnɩ dɩ gbu ƴɩɛ a sor: Thãgba fãgadaar dɩ lʋʋn khɩɩrɛ waa gel wɩrɛraakɛ dɔnɩ lɛ̃lɛ.
25 Gɩdonɩ nyɔɔmɛɛ lõokɛ a na lonɩ mɩsɩmɩ kaar ka yɔɔrɛ jɔ lẽlee Thãgba fãgadaar dɩ lõ.
26 Dɩ wɩrɛɛkɛ kɔɔ nɩɛnɛnɩ so: Dɩ a mɛ̃ gɩ, amɛ na punone na 'lɛ taarɛ?
27 Dɩ Jeju birse wi: Gɩrɛɛkɛ na dɔnɩ thɩ̃ punonaa tɩbɩlala ga, gɛr Thãgba n ka puno.
28 Dɩ Pɩɛr so: Hɩnɛ, sɛrɛ sɩ faarɛ asɩ thɩ̃sɔ fɛʋ sɩ sa-n kpa far.
29 Dɩ Jeju birse wi: Sobɔr mɩ so nar, tibil na faa ɔɔ cɔ, a ɔɔ khɛr gɩ, a ɔɔ õkuunsɔ wɛ, a ɔɔ thɩ gɩ, a ɔɔ nɩ gɩ, a ɔɔ bɩsãsɔ wɛ, gɩ do Thãgbaa fãgadaar do dɔ nɔɔ,
30 sɩɩ do aa 'lɛ thɩ̃ɛ jɔɔ nɛnɛ̃ bɔɔraakɛ dɩɩ jɔ gɩrɛɛkɛ a kɔɔ faanaa ga, dɩ bɔɔkɛ na ɩnanɩ dakha a na 'lɛr yire khorr.
31 Sɩ Jeju kɔɔ kpar yʋɔr yenyɔ dɩ wɩ ha kha, dɩ so war: Nɩ hɩnɛ Jerujalɛm sɩ-n jal gɩrɛ, dɩ thɩ̃ɛ fɛʋʋkɛ Thãgbaa bobona kɔɔ kherenɩ Thãgbaa sɛbɛra mɛr tibili Bikuunna na daan.
32 Gɩdonɩ wa fʋ mɛr na ha ca kpala, dɩ wa mãa mɛr a na kpoona mar, wɩ cɩɩrna nyɔ̃thɩ̃ɩ wa-n pɛ mar.
33 A wɩ ciil mi na khasa pɩ, wa kʋ mɛr. Sɩ wire yẽther wirera ma ɩɩrɛ na the khirera.
34 Sɩ kpãkpãadara na kɔɔ jɩ gar thɩ̃ bɩɛllaka'. Thɩmɩɩ caale kɔɔ ker warɛ, wa jɩ gɩ kɩrʋa'.
35 Mɔ̃kɛ Jeju n wɔrɔnɩ Jeriko, yaar bɩɛl gɩ, a kɔɔ hale a too hʋ nʋɔra da-n bɩɛl thɩ̃ɛ.
36 Dɩ ɔbɔɔkɛ a nɩɛnɩ tibil jɔ dɩ wa-n ka, a bulele a jɩ kɩrʋ.
37 Dɩ wɩ sʋʋraa: Najarɛtɩ Jeju n ka.
38 Dɩ hulẽ: Jeju, Davɩdɩɩ Bikuun, jɛ mɩ bʋɔra.
39 Dɩ wɩrɛɛkɛ kɔɔ hanɩ ƴɛ kʋʋlɔ, wɩ manaanɛ ayɩ a pɩra, sɩ a ka jɩɛ bir hulẽ wo: Davɩdɩɩ Bikuun, jɛ mɩ bʋɔra.
40 Dɩ Jeju jɩɩl sa yɩ wɩ kpaa pɔna. Dɩ ɔbɔɔkɛ a danɩ, Jeju buleele:
41 Anye fɩ-n ƴaal ɩ̃ cʋɛ far? Dɩ birsee: Kɔ̃tɩn, cʋɛ mɩ ma-n yɩ.
42 Dɩ Jeju sʋʋraa: Dɩ khɛra, afɩ ha pɛ taa fɩ.
43 Dɩ dapaara ɔɔ yi khɛr da-n yɩ, a kpa Jejura da-n dʋbɩna Thãgbaa i. Ɔbɔɔkɛ tɩbɩla fɛʋ yɩnɩ gelela wɩ khɩɩrɛ Thãgba.