17
1 Jeju sor ɔɔ kpãkpãadarara ayɩ: Ka paar na hale sɩ gɩ do nɛ baradaasɔ na halaa ga, sɩ ga puure ʋrɛraakɛ n cʋɛ gɩnɩ dɩ ga-n hale.
2 A wɩ gba nã kɔ̃tɩ̃ɩ tə̃ə, a li tibilləəle fʋɔrɔ sa dʋnaa lanyʋɔnɔ, ga baar gɩrɛɛkɛ a na kanɩ na cʋʋ bɩsã biikɛra bɩɛl dɩ na bara.
3 Na-n jɩɛ dʋ bʋrɛ. Ado afɩ omi cʋʋrɛ sopugo, phaanɛɛ, dɩ ado a debi haar faa hanaa.
4 Dɩ adorakɛ a cʋʋ fɩ puure wi bɩɛl nyɛ̃be makonyɔ, sa bir pɔ far nyɛ̃be makonyɔra a so far ayɩ, ɩnɩ debire haar, dɔ fɩ faa fɩ haa.
5 Dɩ thɔ̃thɔna so Kɔ̃tɩnna: Dɛba sar ha pɛrɛ.
6 Dɩ Kɔ̃tɩn birse wi: Ado nɩ kɔɔ hananɛna ha pɛrɛ dɩɩ ho seneve bireekɛ n hanɩ fɩɩʋ, na punone na sona thɩrʋraakɛ nayɩ: Ǝlə a jala thera lanyɔ̃ bɩnɔ dɩbara, dɩ a na nɩ nɛr nũu.
7 Amɛ nɛrɛɛ thɩ̃thɩɩn na hana thɔ̃daar a na-n kʋʋlʋʋ, agɩbo a na-n khɩɩ nʋma, a a the lɔɔ na ɩ̃ gɩ do a sʋʋraarɛ waa ayɩ, a ɩna kɔrɔ a tɔɔ khɔ dɩkor?
8 Ga do a na ka na sʋʋraarɛ nayɩ: Cʋɛ mɩ dɩkor, sa gbɛbɩrɛ ɩ̃ dɩko thɩɩn gbɛbɩrɩ. A mɩ kho dɩphã a yɔna a pɩ, fɩ kho fer fɩ yɔna gaa?
9 A na fʋɔrɛ ɔɔ thɔ̃daar, gɩdonɩ a kɔɔ cʋʋrɛ gɩrɛɛkɛ a kɔɔ pɩɛraanɩ ya?
10 Mɛ̃ gɩ ha na nɛrɛ dakha. Ɔbɔɔkɛ nɩ cʋʋnɩ gɩrɛ fɛʋʋkɛ wɩ pɛ narnɩ pɩ, nɩ sɔ ayɛwɔɔ: Mɔlɔ thɔ̃ dona ha sɩ, dɩ gɩrɛɛkɛ teananɩ sɩ cʋɛ sɩ cʋʋ.
11 Mɔ̃kɛ Jeju hanɩ hʋɛra da-n jal Jerujalɛm, a kɔɔ kanaɛ hʋɛɛkɛ hanɩ Samarɩ na Galile thɩ̃thɩɩn.
12 Dɩ mɔ̃kɛ a pɔnɩ da-n lõ dɩ bɩɛlla, gbulo yʋɔr gbaar dɩ wa-n caanʋʋna sa jɩɩl ƴɔɔ gbe;
13 sɩ wa-n hulẽ: Jeju Dɩɩrdaar, jɛ sɩ bʋɔra.
14 Dɩ ɔbɔɔkɛ Jeju y wɩnɩ a so warɛ: Nɩ jala nɛna Thãgbaa bonɩ jidara mɔ̃ nɩ hanɩ. Dɩ ɔbɔɔkɛ wɩ kɔɔ gbanɩ hʋɛ dɩ wa-n jal, awɩ gbuul pɩ warɛ hʋɛrara.
15 Sɩ bɩɛl wɛrra ɔbɔɔkɛ a kɔɔ yɩɛnɩ dɩ ɔɔ gbuul pɩrɛ, a kɛrrɛ bir dapaara da-n dʋbɩ Thãgbaa i na nɔ kheu.
16 Dɩ a jire Jejuu ƴɛra a sumo da-n fʋɔrʋʋ; Samarɩdaar bɩɛl gɩ.
17 Dɩ Jeju so: Ga do tɩbɩla yʋɔr gbuule kɔɔ pɩrɔaa? Sɩ yʋɔr phebireekɛ sɛnɩ ka wɩ ha?
18 Agado kpakpalɩle ga, tibil bɩɛllakɛ na kɔɔ hale a bir a dʋbɩ Thãgbaa iə'.
19 Agɩpɩ dɩ sʋʋraa: Ɩrɛ birə kɔna, afɩ ha pɛ taa fɩ.
20 Dɩ jɔfʋ bʋ dʋdarasɔ bule Jeju wɩ jɩ bɔɔkɛ Thãgba na gbani fãga, dɩ Jeju birse wi: Thãgbaa fãgadaar do na ɩ̃ gɩ do tibil yɩɛra'.
21 Dɩ wa puno na so nayɩ: Nɩ hɩnɛ kɩɛr gɩ, agɩbo pal ga, gɩdom Thãgbaa fãgadaar do anɩ thɩ̃thɩɩn gɩ ha.
22 Dɩ a sor ɔɔ kpãkpãadarara wo: Bɔ bɩɛl na daan dɩ na ƴaal mɛr tibili Bikuuni wi n phana, sɩ na yɩ ga.
23 Wa so narɛ nayɩ: Nɩ hɩnɛ kɩɛr a ha, agɩbo pal a ha. Na-n jala', dɩ na-n ca na kpa wara'.
24 Gɩdonɩ mɔ̃kɛ thãgba n lenɩ dɔɔ ʋ̃ gɛllɔ dɩɩ hɩrɛ a carbara a ka thʋ ʋ̃ gɛl, mɛ̃ mɛr tibili Bikuun na ha ɩ̃ wirə.
25 Sɩ gɩ teenanɛ ɩ̃ kɔɔ gaar bʋɔ ɓo nĩdaraakɛ n bo mɩ.
26 Gɩrɛɛkɛ kɔɔ dananɩ Noee bɔɔ, oti ga dã tibili Bikuuni bɔɔ dakha.
27 Tɩbɩla n kɔɔ khor dɩkɔ dɩ wa-n yɔna, dɩ wa-n hena kha dɩ wa-n 'laana awɩ bisɔ herra phaphapha dɩɩ ba dana Noee bato lõ wi waa dɩphã, dɩ nyʋɔn kɔɔ phã a gbʋma wɩ dɩ wɩ khiir fɛʋ.
28 Ga har mɔ̃kɛ gɩ kɔɔ hanɩ Lɔtɩɩ bɔɔ. Wɩ-n kɔɔ khor dɩkɔ dɩ wa-n yɔna, dɩ wa-n thena thɩ̃ɛsɔ dɩ wa-n dolona thɩ̃ɛ, dɩ wa-n diirnə, dɩ wa-n mɩna cɔna.
29 Sɩ wireekɛ Lɔtɩ kɔɔ thenɩ Sɔdɔm, gɛr dɔɔ na girbi kɔɔ the ƴũ a gbũ a thii wi fɛʋ.
30 Mɛ̃ ga ha wireraakɛ mɛr tibili Bikuun na nɩnanɩ ɩ̃bara.
31 Dawiilera, ʋrɛɛkɛ na hanɩ nãsʋrɔ sɩ dɩ ɔɔ thɩ̃sɔ ha cɔ bɩnɔ, a na gbũ na gba bã, dɩ ʋrɛɛkɛ dakha na hanɩ lɔɔ, a na kɛr na hir bã.
32 Na-n jɛna Lɔtɩɩ khɛrɩda.
33 Ʋrɛɛkɛ n ƴaalɛnɩ ɩna-n tɛba ɩnɩ yi, ga ka na buurəəre, sɩ ʋrɛɛkɛɛ yi kanɩ bu, ɔr na ka na 'lɛ.
34 Mɩ so narɛ, ga dɩtɩnɔɔlera tɩbɩla yenyɔ na hale phɩ̃ pa bɩɛl, Thãgba na gbaar bɩɛl sɩ na faa bɩɛl.
35 Dɩ khɛra yenyɔɔkɛ na hanɩ kha jʋ nã paar, Thãgba na gbaar bɩɛl sɩ na faa bɩɛl.
36 [Kona yenyɔ na hale lɛ bɩɛlla, Thãgba na gbaar bɩɛl sɩ na faa bɩɛl.]
37 Dɩ kpãkpãadara bulee: Kɔ̃tɩn, kana gɩrɛɛkɛra na dã? Dɩ Jeju birse wi: Kãkɛ thɩ̃ khire hanɩ, le dũusɔ na caan kha.