13
1 Ga bɔraalera wɩ̃ tibilsɔ kɔɔ pɔr a mɩɩ Jeju gɩrɛɛkɛ kɔɔ dananɩ Galiledaraakɛ Pɩlatɩ kɔɔ kʋʋrnɩ, ɔbɔɔkɛ wɩ hanɩ bonɩ jiro.
2 Dɩ Jeju birse wi: Nɩ-n kpɩɛrɛ dɩ Galileda wele kɔɔ dʋɔn sopugodara a jɔ wɩ̃ Galiledarasɔ fɛʋ, gɩdonɩ wɩ kɔɔ gaarɛ bʋɔ thalaa bɛ?
3 Ǝ̃'ə̃, mɩ so narɛ, ga do mɛ̃ ga; nɛrɛ dakha ado na debi haara', mɛna na khiir fɛʋ.
4 Dɩ agɩbo tɩbɩla yʋɔr makõtherɩkɛ cɔ gbãakɛ hanɩ Siloe kɔɔ jironi a kʋʋr, nɩ-n kpɩɛrɛ dɩ wɛr kɔɔ dʋɔn sopugodara a jɔ Jerujalɛmdara fɛʋaa bɛ?
5 Ǝ̃'ə̃, mɩ so narɛ, ga do mɛ̃ ga; nɛrɛ dakha, ado na debi haara', mɛna na khiir fɛʋ.
6 Dɩ Jeju so warɛ sokpaakɛ ayɩ: Kũu bɩɛl gɩ, a kɔɔ hana thɩrʋ ɔɔ lɔɔ. Ɔbɔɔkɛ se bɔɔ danɩ, a pɔr a khʋ̃, aa yɩɩraa thɩ̃a'.
7 Dɩ a sor ɔɔ lɛ hɩɩndaarra: Hɩnɛ, yɛna yẽther ha gɩrɛ mɩ ɩnɩ kɛ a ƴaal ɩ̃ khʋ̃ be, sɩ ma yɩ thɩ̃a'. Kuro kpɛa. Anye a na harɔ kɛ a na-n kʋɛ thɩɩ mɔlɔ?
8 Dɩ ɔɔ lɛ hɩɩndaar birsee: Kɔ̃tɩn, sɩɛraa dɛʋʋkɛ wo, ɩ̃ cɩɩn ɩ̃ finə sɩ ɩ̃ pɛr beethɩn;
9 agakpaana a na ser na yɩɛrɩkɛ na ɩnanɩ, sɩ ado aa sa', fɩ kur dɩphã fɩ kpɛɛ.
10 Hɩɩr wi bɩɛl, Jeju kɔɔ hale Juifisɔɔ Thãgba fʋɔr cɔ bɩɛlla da-n dɩɩr tɩbɩla.
11 Dɩ hɩnɛ, khɛ bɩɛl gɩ, a halera dɩ kɔ̃tɛɛbuu hanaa a pɩɛraa taan kɛkɛkɛ, dɩ cʋʋna yɛna yʋɔr makõther. A khar, aa kɔɔ puno na 'lamɩsɛ kpɩɩ bã.
12 Dɩ ɔbɔɔkɛ Jeju yɩɩnɩ, a wɩɩrɛ dɩ pɔ dɩ sʋʋraa ayɩ: Khɛr, fɩ 'lɛr taarɛ afɩ tanaakɛra fɩ hananɩ.
13 Agɩpɩ Jeju dɛɛnaa nyɛ̃ɛ; dɩ dapaara dɩ 'lamɩsɛ, da-n dʋbɩ Thãgbaa i.
14 Sɩ nĩkhii kɔɔ fʋrɛ ʋrɛ dɔnɩ kɔ̃tɩn Juifisɔɔ Thãgba fʋɔr cɔra, gɩrɛraakɛ Jeju kpɛɛnɩ khɛrɩle hɩɩr wire. Dɩ a sor tibil jɔraale: Wire maadõ hale kɛ dʋɔnnɩ thɔ̃ do wire, gɛr gɩ nɩ ɩna wa-n kpɛɛ nɩ khoo ga wisɔraale. Sɩ na-n do ga-n do hɩɩr wirə'.
15 Dɩ Kɔ̃tɩn birsee: Nɛr bɩnɛ yenyɔdara, nɛrɛ fɛʋ bɩɛlbɩɛl na-n khɛr anɩ nake, agɩbo anɩ kũkə̃ hɩɩr wire na barana a jalna dɩ yɔ nyʋɔnaa?
16 Sɩ khɛrɩkɛ dʋɔnnɩ Abɩrahamɩ bikhɛrɩkɛ Satã kɔɔ lini ɩɩrɔ kɛkɛkɛ dɩ cʋʋna yɛna yʋɔr makõther, ga teena gɩ do hɩɩr wire mɩ thʋbʋʋ lirikɛra gaa?
17 Mɔna a-n mɩɩnɩ gele, yicuru fʋrɛ ɔɔ sodarasɔ fɛʋ, sɩ dɩ tibil jɔɔle wer na-n kãka nɔ kpaa thɩ̃ɛsɔraakɛ fɛʋ a-n cʋʋnɩ.
18 Jeju bire so war wo: Anye Thãgbaa fãgadaar do hona, dɩ anye ma gba a na mɩɛna ya fɛ?
19 Gɩ hʋrɛ seneve bireekɛ n hanɩ fɩɩʋ, kɛ kuun kɔɔ gbanɩ a jal ɔɔ nãkʋɔrra, dɩɩ phu a ɩɩr a do thɩrʋ, dɩ 'lominə na-n tɛl ɔɔ jɛ̃sɔra.
20 A bire so war wo: Anye ma gba na mɩɛna mɔ̃ Thãgbaa fãgadaar do hanɩ ya fɛ?
21 Gɩ hʋrɛ tabɩɩrɩkɛ khɛr kɔɔ gbanɩ a mʋʋ buru mɩ̃ nyɔ̃kpõ khaa yẽtherra, phaphapha dɩ buru mɩ̃ boloola fɛʋ bʋ̃.
22 Dɩ Jeju kɔɔ kpaarɛ dɩ kɔ̃tɩnana na dɩ biisɔra a dɩɩr tɩbɩla da-n jalna Jerujalɛm.
23 Dɩ tibil bɩɛl bulee: Kɔ̃tɩn, sɩɩ do tɩbɩla gbe 'lɛr taarɛ bɛ? Dɩ Jeju birse wi:
24 Nɩ yɩra lonana lõfonʋɔɔkɛ 'luruneni, gɩdonɩ mɩ so narɛ, tɩbɩla jɔɔ na ƴaalɛ wɩ lõ sɩ wa punoə'.
25 Gɩdonɩ ɔbɔɔkɛ cɔdaar kuun na ɩɩrnɩ na khaan loo na pɩ, sɩ dɩ na pɔ na jɩɩl phiilo, le na ma na-n be loo na-n sona: Kɔ̃tɩn, khɛra sɩ loo. Dɩ a na birse ner: Ma jɩ kãkɛ nɩ thena'.
26 Dɩ mɛ̃ na ma na-n so: Sɩ kɔɔ khor dɩ sa-n yɔna afɩ ƴɛ thɩ̃thɩɩn, dɩ fɩ kɔɔ dɩɩr sɛr dakha asɩ dʋɔ.
27 Sɩ a na birse ner nayɩ: Ma jɩ kãkɛ nɩ thena'. «Nɩ tɔ jala mɩ ƴɔɔ, nɛrɛ fɛʋʋkɛ n cʋɛnɩ gɩrɛ na-n sarana'.»
28 Dɩ le na bɩ na-n yɩrna nyɩma ɔbɔɔkɛ na yɩnɩ Abɩraham, na Ɩjakɩ, na Jakɔbɩ, na Thãgbaa bobonasɔ fɛʋ Thãgba fãgadaarɩ dɩra, sɩ dɩ wa faa ne wer phiilo.
29 Tɩbɩla na ther wi phã paar, na wi lõ paar, na gɛlʋ yenyɔra fɛʋ, a na too dɩko kho paar Thãgba fãgadaarɩ dɩra.
30 Sɩ nɩ hɩnɛ sɩka pɩra, wɛr na fien na do ƴɛ kʋla, sɩ ƴɛ kʋla n fi wɩ do sɩka pɩra.
31 Ga bɔɔlera ɩkhaa jɔfʋ bʋ dʋdarasɔ pɔ a so Jejura: Ɩrɛ thɛ kɩɛrra, gɩdonɩ Ɛrɔɔdɩ n ƴaalɛ a kʋ fɩ.
32 Dɩ birse wi: Nɩ jala sɔ fɩfɩllaalera ayɛ: Hɩnɛ, nĩ na cʋɔ ma weere kɔ̃tɛɛbiisɔ a na kpɛɛna khodarasɔ, sɩ ɩ̃ thɔ̃ na pɩrɛ balãther wire.
33 Sɩ nĩ na cʋɔ na gɩbɩ̃ɩ, gɩ teenanɛ ɩ̃ gba ɩ̃ hʋ ma-n jal, gɩdonɩ Thãgbaa bobon na teena a khe a hʋnɔna Jerujalɛm dɩa'.
34 Jerujalɛm, Jerujalɛm, fɛrkɛ n kʋrɛnɩ Thãgbaa bobona, dɩ fa-n dʋʋrna wɩrɛɛkɛ Thãgba kɔɔ thɔ̃ farnɩ bokana, balamɔ̃ balamɔ̃ mɩ kɔɔ ƴaal ɩ̃ gbɛbɩra afɩ too mɔ̃kɛ yɔl nɩɩ n gbɛbɩnɩ ɔɔ bisɔ dɩ thiro gbɛla, sɩ na kɔɔ tuə'.
35 Nɩ hɩnɛ, wa faa narɛ anɩ cɔra dɩ ga do cɔ kpoloo. Sɩ mɩ so narɛ ayɩ, na yɩ mɩ bã phaphapha gɩ dana bɔɔkɛ na sonɩ nayɩ: «Ʋrɛ n ɩnanɩ na Kɔ̃tɩnɩ i hɩna khɩɩrɛ.»