12
1 Ɔbɔɔlera tibil jɔjʋɔ kɔɔ kpa a jɛ jɛ paar gbɩlanɩ tə̃tə̃tə̃ a thʋ̃ dɩ wa-n saar kha, dɩ Jeju ma da-n so ɔɔ kpãkpãadarara caca ayɩ: Na-n jɩɛ dʋ bʋrɛ jɔfʋ bʋ dʋdarasɔɔ tabɩraakɛ dɔnɩ bɩnɛ yenyɔ fɩlɛ.
2 Thɩ̃ɛ na hale na ker sɩ ga do wɩ cʋʋrɛ dɩɩ thaa ga, dɩ thɩ̃ɛ na hale a na ha gbul sɩɩ do wa jɩ gaaga.
3 Dɩ gɛr gɩ thɩ̃ɛ fɛʋʋkɛ na mɩɩnɩ pa birə paar, dahɩrɛra wa nɩ gɩ, dɩ gɩrɛ na bʋ̃bʋʋnɩ du bɩnɔ, nãsʋrɔ wa hulẽ gi.
4 Mɩ so narɛ nɛrɛɛkɛ dʋɔnnɩ ɩ̃ kuunsɔ: Na-n ma wɩrɛɛkɛ n kɔnɩ tomɩr, sɩ agɩpɩ wa-n puno cʋʋ dɩkha ɓaan bãa ga.
5 Ma nɩ narɛ ntɛɛkɛ nɩ teenanɩ na-n ma. Na-n ma ʋrɛɛkɛ hananɩ punone a a kʋ pɩ, sɩ dɩ dʋna dɔɔra. Ɔɔ mɩ so narɛ, ɔr gɩɩkɛ teananɩ na-n ma.
6 Ga do war be yenã wɩ-n dolõ 'lominə yemɔɩaa? Sɩrakɛ bɩɛl na hale dɩ Thãgba na diinə ga.
7 Dɩ anɩ yʋsũsɔrakɛ, Thãgba ther ger fɛʋ. Gɛr gɩ na-n do maar na-n fʋ na', anɩ the nɔ khɩɩrɛ a jɔ 'lomĩ jɔjɔjʋɔ.
8 Sɩ mɩ so narɛ, tibil wo tibilikɛ n tuon mini tɩbɩlaa ƴɛra, mɛr tibili Bikuun na tuure dakha Thãgbaa thɔ̃thɔ̃daar thusɔɔ ƴɛra.
9 Sɩ ʋrɛɛkɛ bɔ mɩnɩ tɩbɩlaa ƴɛra, ma bor ntɛɛle dakha Thãgbaa thɔ̃thɔ̃daar thusɔɔ ƴɛra.
10 Dɩ tibil wo tibilikɛ na mɩanɩ thɩmɩɩ puu na pɛ mɛr tibili Bikuunna, Thãgba na faarɛ ga sopugo caale na ha ntɛ. Sɩ tibilikɛ na kʋɛanɩ Thu Phuu i, Thãgba na faa ga sopugo caale kpɩɩraka'.
11 Dɩ ɔbɔɔkɛ wa kpa nɩnɩ wa-n jalna kɩɩl paar Juifisɔɔ Thãgba fʋɔr cɔnana, na kɔ̃tɩnasɔɔ ƴɛra, na fãgadarasɔɔ ƴɛra, na-n hana dɛ mɔ̃kɛ na mɩɩnɩ gɩ taa na', agɩbo gɩrɛɛkɛ na sona';
12 gɩdonɩ Thu Phuu na dɩrɛ nɩ gɩrɛɛkɛ teananɩ sor dɩ na so dabɔɔlera.
13 Dɩ kũu bɩɛl tibil jɔɔlee thɩ̃thɩɩn sor Jejura: Dɩɩrdaar, sɔ ɩ̃ õkuunna sɩ tɩnɛ thɩ̃ɛɛkɛ asɩ thɩ khini sa faa sar, dɩ Jeju birsee:
14 Kuun, amɛ kɔɔ pɛ mar ɩ̃ dɔ anɩ so gʋʋrdaar agɩbo anɩ khĩdi thɩ̃ tɩnɛdaar?
15 Agɩpɩ dɩ so war: Na-n jɩɛ dʋ bʋrɛ bɔɔbɔɔ ha pɩɛr caarsɔra dɩɩdɩɩ fɛʋ, gɩdonɩ tibil na puno na 'lɛ yire ɔɔ lẽle thɩ̃ jɔ hanana ga, a a lerakɛ dɩɩ ha mɔ̃.
16 Dɩ a so warɛ sokpaakɛ ayɩ: Lẽle kũu bɩɛl gɩ, a kɔɔ hale dɩ thɩ̃ɛ bʋɔraa lɔɔ dɩɩ ka.
17 Dɩ a kpɩɛrɛ ɔɔ hara sa so: Anye ma cʋʋ ya fɛ? Gɩdonɩ ma hana thʋ̃ khɩɩ a na urro ɩ̃ jʋ bã.
18 Sɩ agɩpɩ dɩ so: Hɩnɛ gɩrɛ ma cʋʋnɩ dɩphã. Ma tʋɔrɛ ɩ̃ thʋ̃sɔ a na kpɛɛ, sɩ ɩ̃ bir ɩ̃ mɩ dakɔ̃tɩna gɩ jɔ mɛ̃; agɩpɩ le ma ur ɩ̃ jʋ ɩ̃ thɩɩnna ɩ̃ lẽle thɩ̃sɔ fɛʋ.
19 Dɩ ma sor ɩ̃barara nayɩ: Mɛrɛ, mɩ hananɛ lẽle thɩ̃ɛ a thɩɩn dɩɩ jɔr a na cʋʋ yɛna jɔɔjɔɔ. Ma toore ma-n hɩɩr ɩ̃ kho ma-n yɔna ma-n kãkana.
20 Sɩ Thãgba sʋʋraa: Fɛr də̃bəəlu, nĩ dɩtɩnɔɔkɛ ma teere afɩ thu, sɩ gɩrɛɛkɛra fɛʋ fɩ kɔɔ gbɛbɩnɩ amɛɛda ga do wo?
21 Mɛ̃ gɩ ha na tibilikɛ n thɩnɛnɩ thɩ̃ɛ gɩ dɔ ɔɔ thɛthɛɛda, sɩ dɩɩ do Thãgbaa pa wer, aa do lẽledaara'.
22 Agɩpɩ Jeju sor ɔɔ kpãkpãadarara: Gɛr gɩ dɩ ɩ̃ so nar ayɩ: Na-n dɛ anɩ yirə dɩko thɩmɩɩrra, anye na kho yaa, dɩ tomɩrɩdara gɩ, anye na to yaa ga.
23 Gɩdonɩ yire dor thɩ̃ kɔ̃tɩ̃ɩ a jɔ dɩkor, dɩ tomɩr dakha dor thɩ̃ kɔ̃tɩ̃ɩ a jɔ kɩ̃kɩɩn.
24 Na-n kpɩɛrna 'lominəsɔ na hɩnɛ, wa-n diirə', wa-n kha ga, wa-n hana dɩko thɩɩn paar dɩ thʋnɛ ga, sɩ Thãgba n haanɛ wɩ. Anɩ the nɔ ga khɩɩr a jɔ 'lominəəda fĩiəə?
25 Amɛ nɛrɛɛ thɩ̃thɩɩn na punone a na tɔ ɔɔ yɛ nɔ na dɛɛnɔ dɛrra?
26 Dɩ mɔ̃ na-n marnɩ na cʋʋrakɛ thɩ̃ buə', sɩ mɔ̃gɩdo dɩ na-n dɛna gɩrɛɛkɛ sɛnɩ?
27 Na-n kpɩɛrna naporsɔ wo na hɩnɛ mɔ̃kɛ wɩ-n phuni. Wa-n kpar kẽkẽ wiirə', wa-n le kẽkena ga. Sɩ mɩ so narɛ Salomɔ̃ɔ thɛthɛrakɛ kɛ dɔnɩ fãgadaar, na ɔɔ nyɔ̃kor bɔ fɛʋ, aa kɔɔ to kɩ̃kɩɩn dɩɩ ho wɛr bɩɛllaka'.
28 Dɩ a Thãgba to hʋɔnɩkɛ hanɩle hʋɔnɔ nĩ dɩɩ ha thaa, sɩɩ do cʋɔ wa to garɛ dɔɔ, a na ka na cʋʋ mɛ̃ nɛrɛra dakha gaa, nɛrɛɛkɛ kanɩ hana ha pɛrɛ gbe?
29 Dɩ nɛrɛ na-n ƴaal gɩrɛ na khonɩ na gɩrɛ na yɔna', dɩ na-n too na dɛdɛda'.
30 Gɩdonɩ gele fɛʋ wɩrɛ na jɛnɩ Thãgba ga n ƴaalɛ gɩ, sɩ ado nɛr gɩ, anɩ Thɩ jɩrɛ gɩrɛ n ɓɔra nɩnɩ.
31 Sɩ nɩ ka na ƴaalɛ Thãgbaa fãgadaar do, sɩ ga thɩ̃sɔɔlera fɛʋ Thãgba na ha nɛr na ɓaan.
32 Ɩ̃ bana bi, na-n do maar n fʋ na', gɩdonɩ anɩ Thɩra gɩ da dɩ na ha nɩ Thãgba fãgadaarɩ dɩ.
33 Nɩ dolone anɩ lẽle thɩ̃sɔ a na hana bɔdara. Nɩ yɩrana mũsũ lokanaakɛ na kʋɛana', na lẽle thɩ̃ɛɛkɛ hanɩ Thãgbaa dʋɔ, kɛ na dɔnɩ dapɩnana', kãkɛ yu na dana', dɩ ɔphãkerẽsɔ wɛ a na kʋɛ ga.
34 Gɩdonɩ kãkɛ anɩ lẽle thɩ̃sɔ hanɩ, le anɩ ha na ha dakha.
35 Nɩ gbɛbɩrɛ anɩ dɩbara a cʋɛ anɩ lãphãsɔ ga-n hɩrɛ.
36 Dɩ nɛrɛ, nɩ hɔ tɩbɩlaakɛ tɔɔnɩ dɩ wa-n pɩɛr awɩ kɔ̃tɩ̃ɩkɛ na thɛnɩ herra na ɩ̃, wɩ khɛrʋʋ loo khə̃khə̃ ɔbɔɔkɛ a na danɩ a na-n be.
37 Ga dar thɔ̃darasɔraale, a awɩ kɔ̃tɩ̃ na pɔ a yɩ wɩ dɩ wa jʋʋr. Sobɔr mɩ so nar, a na gbɛbɩrɛ ɔɔbara sa cʋʋ wɩ wɩ too dɩko kho paar, a tɔ a pɔ a na-n tɩnɛ wɩ.
38 Ga dar thɔ̃darasɔraale na ka, ado awɩ kɔ̃tɩ̃ na ɩ̃ a yɩ wɩ dɩ wa jʋʋr thakɛ, a dɩnɩrɔ gɩ, a yɔl ko khɩɩ bɔɔ gɩ.
39 Nɩ jɩɛ jɩ gɩrɛɛkɛ bɔɔbɔɔ, ado cɔdaar kuun jɩrɛ bɔɔkɛ yu na pɔnɩ ɔɔ cɔ, a na-n bɛrɛ a na sɩɩraa a lʋ̃ʋ cʋɔrɔa'.
40 Nɛrɛ dakha nɩ gbɛbɩrɛ pɛ, gɩdonɩ mɛr tibili Bikuun na bire na ɩ̃ bɔɔkɛ na kpɩɛrna gɩna'.
41 Dɩ Pɩɛr bule: Kɔ̃tɩn, sɛr fɩ-n sor sokpaakɛra yaa, agɩbo tɩbɩla fɛʋra gɩ?
42 Dɩ Kɔ̃tɩn birsee: Ʋmɔ̃ dʋɔn thɩ̃ hɩɩndaarɩkɛ dʋɔnnɩ sobɔ cʋʋdaar, kɛ kpɛsɛnɛnɩ, dɩ ɔɔ kɔ̃tɩ̃ na pɛr da do ɔɔ cɔdaraa hɩɩndaar a na-n hana wɩ dɩkɔ ɔbɔɔkɛ gɩ teenanɩ?
43 Ga dar thɔ̃daar ca olela ɔɔ kɔ̃tɩ̃ na-n danɩ a yɩɩ a na-n cʋʋ mɛ̃.
44 Sobɔr mɩ so nar, ɔɔ kɔ̃tɩ̃ na jɩɛ cʋgʋʋ da do hɩɩndaar ɔɔ thɩ̃sɔra fɛʋ.
45 Sɩ ado thɔ̃daarɩle sor ɔɔbarara ayɩ: Ɩ̃ kɔ̃tɩ̃ n pʋɔrɛ, sa ma da-n bɩɩr thɔ̃daar kona na thɔ̃daar khɛra, dɩ khona da-n yɔna dɩ taan na-n kʋʋ;
46 thɔ̃daarɩlee kɔ̃tɩ̃ na phurore dawiikɛ aa-n pɩɛrʋʋna', na bɔɔraakɛ aa kpɩɛrnana'. Dɩ a na cɩɩrɛ yɩra yɩra, sɩ na gbaa na pɛ wɩrɛraakɛ na pɩɛrnɩ haara'.
47 Thɔ̃daarɩkɛ kɔɔ jɛnɩ ɔɔ kɔ̃tɩ̃ɩ tuur sɩ aa gbɛbɩ thɩ̃a', agɩbo aa cʋʋ mɔ̃kɛ ɔɔ kɔ̃tɩ̃ n ƴaalna', a na 'lɛr bɩɩrɛ dɩ a kɔ̃tɩ̃ na sobɔr.
48 Sɩ ʋrɛɛkɛ na jɛna', sa cʋʋ gɩrɛɛkɛ dananɩ bɩɩrɛ, a na 'lɛ bɩɩrɛ jɔa'. Tibilikɛ wɩ hanɩ jɔɔ, mɛ̃ wa bulee jɔɔ dakha, na tibilikɛ wɩ pɛrnɩ a na-n hɩnɛ thɩ̃ɛ jɔɔ, mɛ̃ wa bulee a na kpãkpaanɔ jɔɔ.
49 Dɔɔ mɩ ɩna ɩ̃ pɛ thɩɩra, dɩ anye mɩ-n ƴaal 'lo a gɩ 'li mar?
50 Mɩ teenanɛ ɩ̃ 'lɛ yɔ kpɛɛrɛɛkɛ dɔnɩ bʋɔɔkɛ ma gaarnɩ, sɩ nɩ yɛ mɔ̃ gɩ do marnɩ kpɩɛrɛɛkɛ n 'waan mɩnɩ ɓoɓo phaphapha gɩ dã.
51 Nɩ-n kpɩɛrɛ ha ɩɩ mɩ ɩna ɩ̃ 'laa thɩɩra gaa bɛ? Ǝ̃'ə̃, mɩ so narɛ leere gɩ.
52 Gɩdonɩ a fʋna nɛnɛ̃kɛ, tɩbɩla yemɔɩ cɔ bɩɛlla na leere kha. Yẽther na yenyɔ na ti kha dɔa', dɩ yenyɔ na yẽther dakha na ti kha dɔa'.
53 Thɩrɛ na ti kha dɔɔ na ɔɔ bikuuna', dɩ bikuun na ti kha dɔɔ na ɔɔ thɩ dakha ga. Nɩrɛ na ti kha dɔɔ na bikhɩɛna', dɩ bikhɩɛn na ti kha dɔɔ na nɩrɛ dakha ga. Nɩrɛ na ti kha dɔɔ na ɔɔ bikuuni khɛra', dɩ bikuuni khɛr na ti kha dɔɔ na ɔɔ koo nɩ dakha ga.
54 Dɩ Jeju sor tibil jɔraale wo ayɩ: Ɔbɔɔkɛ nɩ-n yɩnɩ ndɔlɔ̃paar gananɔ dɩɩ birə, mee nɩ-n sor dapaara dɩ nɩ yɩ, thãgba nyʋɔn na daan, dɩɩ dã ger oti.
55 Dɩ ɔbɔɔkɛ nɩ-n yɩnɩ jɩɛ dɩ ga-n the wi phã paar nyɔ̃bɩlana, nɩ-n sor dɩ nɩ yɩ aa: Susuur na kʋrɛ, dɩɩ dã ger oti.
56 Nɛr bɩnɛ yenyɔdara, nɩ-n punone dɩ nɩ jɩ mɔ̃kɛ thɩ̃ɛ n hanɩ thãgbara ƴũ na thɩɩra, sɩ mɔ̃ na-n ka dɩ nɩ jɩ mɔ̃ nɛnɛ̃ bɔɔkɛ wer hana?
57 Dɩ mɔ̃gɩdo dɩ na-n ka nɩ jɩ anɩbara gɩrɛ dɔnɩ dasarʋa?
58 Ado afɩ sodaar we fɩ kɩɩl paar kɔ̃tɩnaa ƴɛra, ɔbɔɔkɛ fɩ hanɩ jaal na afɩ sodaarra, dɔ bʋɔ sɩ nɩ gʋʋr kha sorra gɩ pɩ le hʋɛra; agado mɛ̃ gaa, a na jalna fɛr so kɩɩldaarɩ ƴɛra, dɩ so kɩɩldaar dakha na gba fɩ a na ha gardɩ, dɩ gardɩ na khaan fɩ khaɩra.
59 Sɩ mɩ so farɛ, fa the le kpɩɩraka', phaphapha fɩ lɩmɩ gɩ pɩna.