14
1 Hɩɩr wi bɩɛl Jeju kɔɔ lʋʋn jɔfʋ bʋ dʋdaar kɔ̃tɩ̃ bɩɛlɩ cɔ a kho dɩkor. Dɩ wɩrɛɛkɛ kɔɔ hanɩle n kɔɔ jʋrʋʋrɛ.
2 Dɩ hɩnɛ, kũu bɩɛl gɩ, a hale Jejuu ƴɛra a hana khookɛ n 'laanɛnɩ tomɩ mʋɔrɛ.
3 Dɩ Jeju bule jɔfʋ dɩɩrdara na jɔfʋ bʋ dʋdarasɔ ayɩ: Hɩɩr wire n sãsɩrɛ kho kpɛɛrɛ yaa, ga-n sãsa?
4 Dɩ wɩ pɩr pɔɔpɔɔ. Dɩ Jeju fʋ khodaarɩle a kpɛɛ ɔɔ kho sa sɩɩraa dɩ bir kɔ̃.
5 Agɩpɩ Jeju bule wi: Ʋmɔ̃ɔ tibil nɛrɛra ado ɔɔ bi ji birera, agɩbo ɔɔ nake gɩ, a na tii dapaara khə̃khə̃ hɩɩr wirəə?
6 Dɩ wa kɔɔ puno a na birsee gelela bã.
7 Agɩpɩ a sor wɩrɛraakɛ wɩ kɔɔ wenɩ dɩkorra sokpa bɩɛl, gɩdonɩ a yɩrɛ mɔ̃kɛ wɩ-n phiirni ƴɛ kʋʋl too pa. Dɩ a so warɛ:
8 Ɔbɔɔkɛ tibil we fɩnɩ dɩkorra dɩ fɩ jal, fa-n gba too paar ƴɛ kʋʋlɔ afɩ dɩbara ga. Agakpaana tibil kpɩɩkɛ kɔ̃tɩnanɩ a jɔ fɩ hale, kɛ wɩ wenɩ dakha;
9 dɩ ʋrɛɛkɛra kɔɔ wɛ nɩnɩ fɛʋ na pɔr na so far: Hana ʋrɛ too paarɩkɛra. Le yicuru na fʋ fɩ mɔ̃kɛ fa-n birni pɩpɩɩ too paarra.
10 Sɩ ɔbɔɔkɛ wɩ we fɩnɩ dɩkorra dɩ fɩ jal, tɔɔ pɩpɩɩ too paarra, dɩ ɔbɔɔkɛ ʋrɛɛkɛ kɔɔ wɛ fɩnɩ na lonɩ a na so farɛ: Ɩ̃ kuun, ɩrɛ a ɩna tɔɔ kɛkɛ ƴɛ kʋʋlɔ. Le ga do far cʋrɛ wɩrɛ fɛʋraakɛ fɩ hananɩ kha dɩko kho paar.
11 Gɩdonɩ ʋrɛɛkɛ n kanɩ ire wa wuruure, sɩ ʋrɛɛkɛ n wuroni dɩbara, ɔr wa ɩɩr.
12 Dɩ Jeju so ʋrɛraakɛ kɔɔ wɩɛnɩ dakha ayɩ: Dabɔɔkɛ fɩ-n wenɩ tɩbɩla nɩ khɔ kha dɩkor, a ʋlkhɔɔ gɩ, a dɩtɩnɔ gɩ, fa-n we afɩ kuunsɔ, agɩbo afɩ õkuunsɔ, agɩbo afɩ toosɔ, agɩbo afɩ cɔ khu lẽledarasɔa'. Gɩdonɩ agakpaana wa we fer dakha wer, gɩ ho wɩ lɩmɩ fɛr.
13 Sɩ ɔbɔɔkɛ fɩ-n wenɩ tɩbɩla dɩkorra, wɛ wɩrɛ dɔnɩ bɔdara, na tãdara, na nɛ kʋɛdarasɔ, na yarasɔ.
14 Dɩ ga da farɛ gɩdonɩ wa hana thɩ̃ɛ a na lɩmɩ fa', sɩ Thãgba gɩɩkɛ na lɩma fɩnɩ wireekɛ tɩɩ sara na ɩɩrnɩ na the khirera.
15 Dɩ tibil bɩɛl wɩrɛraakɛ kɔɔ tɔɔnɩ dɩko kho paarɩle, ɔbɔɔkɛ a nɩɛnɩ thɩmɩɩrɩle pɩ, a sor Jejura: Ga dar ʋrɛraakɛ na khɔnɩ dɩkor Thãgba fãgadaarɩ dɩra.
16 Dɩ Jeju sʋʋraa: Kũu bɩɛl gɩ, a kɔɔ cʋʋ fɛtɩ kɔ̃tɩ̃ɩ a wena tɩbɩla jɔɔ.
17 A dɩko kho bɔɔ dã, a thʋɔn ɔɔ thɔ̃daar a jala a wɛ wɩrɛɛkɛra a kɔɔ wenɩ wɩ pɔ, gɩdonɩ thɩ̃ɛ fɛʋ gbɛbɩrɛ pɩ.
18 Sɩ wɛr fɛʋ bɩɛlbɩɛl mar dɩ wa-n ther thɩ̃ɛsɔ dɩɩdɩɩ: Cacadaar sʋʋraarɛ: Mɩ kɔɔ ther lɛ phaa dɩɩ teena ɩ̃ jala hɩnɛ. Mɩ-n bɩɛl fɛr ma 'lɛ na pɔa'.
19 Dɩ ʋ yɩ: Mɩ kɔɔ ther nakena yʋɔr dɩ ma-n jal ɩ̃ dona wɩ thɔma ɩ̃ hɩɩn. Mɩ-n bɩɛl fɛr ma 'lɛ na pɔa'.
20 Dɩ ʋ so wo: Mɩ her khɛr he phaa, dɩ gɛr gɩ ma 'lɛ na pɔa'.
21 Dɩ ɔbɔɔkɛ thɔ̃daarɩle kɔɔ birni dã cʋɔr, a mɩɩrɛ ɔɔ kɔ̃tɩ̃ thɩ̃ therresɔɔlera fɛʋ. Dɩ nĩkhii fʋ cɔdaar kuun, dɩ so ɔɔ thɔ̃daarra ayɩ: Birə jala khə̃khə̃khə̃ a lona dɩ kɔ̃tɩ̃ ƴatɔɔ na hʋ kɔ̃tɩnana, a kpa bɔdarasɔ, na tãdarasɔ, na yarasɔ, na nɛ kʋɛdarasɔ a ɛna kɛ.
22 Dɩ thɔ̃daarɩle sʋʋraa: Kɔ̃tɩn, gɩrɛɛkɛra fɩ kɔɔ sonɩ mɩ cʋʋrɛ pɩ, sɩ too paar bo sɩrakɛ wo 'lo.
23 Dɩ Kɔ̃tɩn so ɔɔ thɔ̃daarra: Birə gba hʋɛsɔ na jala na hʋ sɔ̃sʋ̃ɔsɔ, a yɩrana tɩbɩla wɩ lõ wɩ hi ɩ̃ cɔ phi.
24 Gɩdonɩ mɩ so narɛ, tibil bɩɛl wɩrɛraakɛ mɩ kɔɔ wenɩ na 'lɛ ɩ̃ dɩkora bã.
25 Tibil jɔjʋɔ n kɔɔ kpar Jejura, dɩ kɛr a so war:
26 A tibil na ɩ̃ mɛrɛra sɩ aa-n laar ɔɔ tha', na ɔɔ na', na ɔɔ khɛra', na ɔɔ bɩsãsɔa', na ɔɔ õkonasɔa', na ɔɔ õkhɛrsɔa', na ɔɔ thɛthɛɛ yə', a na puno na do ɩ̃ kpãkpãadaara'.
27 Dɩ ntɛɛkɛ na-n heenenɩ ɔɔ kʋkʋ thɩr da-n kpana mara', a na puno na do ɩ̃ kpãkpãadaara'.
28 Gɩdonɩ ʋmɔ̃ɔ tibil nɛrɛra ado a ƴaal a mɩ cɔ gbãa, ga do a na toore ɓo a ther gɩrɛɛkɛ a na kʋɛnɩ a hɩɩn, ado a hananɛ gɩrɛ na dananaa?
29 A mɛ̃ gaa, ɔbɔɔkɛ a kpɛɛnɩ go kʋʋ pɩ sɩ aa puno pa', wɩrɛ fɛʋʋkɛ na yɩɛnɩ wa-n maanʋʋnɛ wa-n sonaa wɩ yɩ aa:
30 Hɩnɛ, kuunikɛ kɔɔ fʋrɛ da-n mɩ cɔ gbãa, sɩ aa puno kpoora'.
31 Dɩ agɩbo wo, ʋmɔ̃ɔ fãgadaar na-n jala a ke kʋʋr na ʋ̃ fãgadaar, sɩɩ do aa kɔɔ too ɓo a gʋʋr a hɩɩn, ado a na punone na kona gbɩlanɩ yʋɔr a na caan ole hananɩ kona gbɩlanɩ kpelẽ da-n pɔnanaa ga?
32 Ado a na punoə', mee ɔbɔɔkɛ wa fãgadaarɩle hanɩnakɛ ƴɔɔ, ƴɛƴɛa a na thɔ̃ wɩ caanɛ ƴɛgaa?
33 Mɛ̃ gɩ dakha, ntɛɛkɛ na-n bɔnɩ gɩrɛ fɛʋʋkɛ a hɩna', a na puno na do ɩ̃ kpãkpãadaara'.
34 Thɩ̃ bʋɔ laan do, sɩ a laan bir dasɩ a mɩla bã, mɔ̃ wa fʋ sɩ na cʋʋ dɩ a bir na hana mɩlalɛ?
35 Ga taa thɩɩ bʋɔa', dɩ ga do beethɩn woa'. Khuirə wa dʋna na faa. Ntɛɛkɛ hananɩ nũu dɩ nɩna, dɔ a na-n pɛ nũu.