8
1 Agɩpɩ Jeju kɔɔ jaal da-n kpaar dɩ kɔ̃tɩnana na dɩ biisɔra, da-n dɩɩr tɩbɩla da-n mɩɩna tutugo bʋɔɔ thɩmɩɩkɛ dɔnɩ Thãgbaa fãgadaar doda.
2 Dɩ yʋɔr yenyɔ kɔɔ har kha na ɔr, na wɩ̃ khɛrsɔɔkɛ a kɔɔ weeronɩ kɔ̃tɛɛbi hɔ̃hɔlasɔ a faa a kpɛɛna khoosɔ. Marɩɩkɛ wɩ-n wenɩ Magɩdala, kɛ kɔ̃tɛɛbii makonyɔ kɔɔ thɩɩrɔnɩ gɩ,
3 na Janɩkɛ dʋɔnnɩ Kuja, Ɛrɔɔdɩɩ thɔ̃daraa hɩɩndaarɩ khɛr, na Sujan, na wɩ̃ khɛrsɔ bərəəmkɛ n kɔɔ buloni Jeju na ɔɔ kpãkpãadara na awɩ thɩ̃sɔ.
4 Tɩbɩlaakɛ thɛnɩ dɩɩsɔra fɛʋ bɩɛlbɩɛl pɔr Jejura. Mɔ̃ tibil jɔjʋɔɔle kpanɩ kha a jɛ, a so warɛ sokpaakɛ ayɩ:
5 Bi jaldaar gɩ, a the da-n jal be. Dɩ mɔna a-n jalnɩ yɛ̃ bi jire hʋɛra, dɩ tɩbɩla saar na nɛɛ, dɩ 'lominə pɔ uul.
6 Yɛ̃ bi ji gbãgbã nã thɛrɛɛra. Ɔbɔɔkɛ gɩ phuni pɩ, gɩ khire gɩdonɩ ga-n yɩ thɩ mɩ̃a'.
7 Yɛ ji wo uu thɩ̃thɩɩn a gbɛbɩna uusɔ, a phu dɩ uu sɩlã gɩ.
8 Yɛ ji thɩ bʋɔra. Ɔbɔɔkɛ gɩ phuni pɩ, gɩ ɩnɛ a bɩ̃ dɩ a-n kakɛ tamaa. Ɔbɔɔkɛ Jeju sonɩ thale pɩ, a hulene ayɩ: Ntɛɛkɛ hananɩ nũu dɩ nɩna, dɔ a na-n pɛ nũu.
9 Dɩ ɔɔ kpãkpãadara bulee sokpaalee kɩrra.
10 Dɩ birse wi ayɩ: Nɛr Thãgba kɔɔ ha nɩ jɛ thɩ̃ gbulikɛ dʋɔnnɩ ɔɔ fãgadaar doda. Sɩ ʋkhasɔ sokpaa wɩ-n sona war, dɩ mɛ̃ «wa-n hɩɩn sɩ wa yɩ ga, wa-n nɩɛ dakha sɩ wa jɩ kɩrʋa'.»
11 Sokpaakɛɛ kɩrra ha gɩrɛ: Thãgbaa so dʋɔn be.
12 Wɩrɛ hɔnɩ hʋ nʋɔ wɛr dɔ wɩrɛ na-n nɩɛnɛnɩ, agɩpɩ Satã n pɔ dɩ ti sorɩle awɩ hara, gɩ do nɔɔ wa pɛr haar wɩ 'lɛna dakha taara'.
13 Wɩrɛ hɔnɩ gbãgbã nã thɛrɛɛ wɛr dɔ wɩrɛ na-n nɩɛnɛnɩ Thãgbaa so, dɩ wɩ tu na daʋ, sɩ wa-n sɩrɔ Thãgbaa so dɩɩ yɩ nɛ gɔ paara', dɩɩ do bɔɔ gbe wɩ pɛr haar dɩbara. Dɩ ɔbɔɔkɛ fifiləle n dã wɩnɩ, wɩ-n kɛrnanɛ khiru.
14 Sɩ gɩrɛɛkɛ jenɩ u ballɔ hʋɔn wɩrɛɛkɛ n nɩɛnɛnɩ Thãgbaa so, sɩ mɔ̃ wɩ-n ɩɩrnɩ hʋɛrara, dɛr na ler, na gɩrɛ n danɩ tibil haar n sɩlã wɛr, dɩ wa-n se beekɛ leana'.
15 Sɩ gɩrɛ jenɩ thɩ bʋɔra hʋɔn wɩrɛɛkɛ na-n nɩɛnɛnɩ Thãgbaa so dɩ wɩ fʋ gɩ na bɩ̃ bʋɔ, na fɩl telẽe a na se be na yɩrrɛ.
16 Tibil na pɛr dɔɔ lãphana sɩ agɩpɩ a gba a suuro bɩlãkpʋʋnna, agɩbo a to kakala ballɔa', sɩ bilela a na dɛ̃ɛ wɩrɛ n lonanɩ n yɩ dahɩrɛ.
17 Gɩdonɩ thɩ̃ɛ na hale na ker sɩ ga do wɩ cʋʋrɛ dɩɩ thaa ga, dɩ thɩ̃ɛ na hale na ha gbul sɩɩ do wa jɩ gaaga, gɩ do dakha wo ga yɩraa ga.
18 Na-n jɩɛ dʋ bʋrɛ mɔ̃kɛ nɩ-n nɩɛnɩ, gɩdonɩ ʋrɛɛkɛ hananɩ thɩ̃ɛ, Thãgba na bire na haa na dɛbɩrɔ; sɩ ʋrɛɛkɛ na hananɩ thɩ̃a', Thãgba na tiirəərerakɛ phubi gɩrɛɛkɛ a-n kpɩɛrnɩ ɩnɩ hananɛ.
19 Dɩ Jejuu õkũu bɩnɔsɔ na ɔɔ nɩ kɔɔ pʋɔraarɛ, sɩ wa puno a na dãa ga gɩdonɩ tɩbɩla jɔrɛ.
20 Dɩ wɩ sʋʋraa aa: Afɩ nɩ na afɩ õkũu bɩnɔsɔ hale phiilo dɩ wa-n ƴaal wɩ yɩ fɩ.
21 Dɩ birse wi: Ɩ̃̃̃ nɩ na ɩ̃ õkona dɔ wɩrɛɛkɛ n pɛnɩ Thãgbaa thɩmɩɩ nũu, dɩ wɩ yɩr dɩ wa-n cʋʋ.
22 Wi bɩɛl Jeju kɔɔ lʋʋn gboroona na ɔɔ kpãkpãadara, sa so war ayɩ: Nɩ dɔ sɩ iir iiro; dɩ wɩ jaal.
23 Mɔ̃kɛ wɩ hanɩ phɛllɔ Jeju daarɛ. Dɩ dapaara jɛkhure ɩɩrɛ na fãga mɩɩr nɔɔra, dɩ nyʋɔn ma dɩ ga-n hi gborõo, dɩ thɩ̃ɛ na-n bɔ war bã.
24 Dɩ wɩ tɔ dã a jaa Jeju a sʋʋraa: Dɩɩrdaar, dɩɩrdaar, sɩ-n buure. Dɩ mɛ̃ a jaa a mana jɩɛ na nyʋɔnɩkɛ n uboni dɩɩ pɩr, dɩ thɩ̃ɛ na-n tutugo bã.
25 Sɩ agɩpɩ dɩ bule wi: Kana anɩ ha pɛ ha? Sɩ maar kɔɔ fʋlɛ wɛr dɩ nʋɔ kɔɔ kpaa wɩ, dɩ wa-n bule khasɔ bɩɛlbɩɛl aa: Anyee tibil ca ha ʋrɛ, dɩ punonakɛ jɩɛ na mɩɩr nɔ nyʋɔnnakɛ dɩ ga-n nɩɩ nũu?
26 Dɩ wɩ kɔɔ daan dɩɩkɛ dɔnɩ Jerajedaraa dʋɔ, kɛ hanɩ ka Galile dɩɩ pɛnɩ ƴɩɛ.
27 Ɔbɔɔkɛ Jeju gbuni thɩɩra, dʋɔdaar bɩɛlɩkɛ hananɩ kɔ̃tɛɛbiisɔ caanʋʋnɛ. Gɩ kɔɔ maanɛ kɛkɛkɛ aa-n kɔɔ tonɩ kɩ̃kɩɩna', aa-n cɔ cʋɔrɔa', sɩ khi dʋ paarsɔ a-n cɔ.
28 Mɔna a yɩnɩ Jeju, a hulene a jinə ɔɔ ƴɛra sa phã nɔ khɩɩr ayɩ: Anye mɩ ha kha na fɛr Jeju, Thãgba Kəkəədaarɩ Bikuun? Mɩ-n phʋʋr fɛr fa-n hʋɔl mara'.
29 Gɩdonɩ Jeju kɔɔ sʋʋraarɛ: A fɩ jɩ thɛ. Kɔ̃tɛɛbu hɔ̃hɔlɩle kɔɔ mãa hana kuunikɛ kɛkɛkɛ, dɩ wɩ linəə jɔrkɔ a baranaa nɛɛ na ther a na bɛr, sɩrakɛ a-n khaarɛ lidaale sɩ kɔ̃tɛɛbuule n halʋʋ dɩ jalna bəənnəsɔ.
30 Dɩ Jeju bulee: Mɔ̃ afɩ i n do? Dɩ birsee: Dajɔ gɩ. Gɩdonɩ kɔ̃tɛɛbi jɔjʋɔ kɔɔ lonanaa.
31 Dɩ wɩ-n phʋʋrɛ Jeju a na-n wee nɩ a faa kõkorʋra ga.
32 Sɩ dabulo sɩthɔsɔ kɔɔ hale jɔɔ gɔ̃gʋɔna dɩ wa-n khʋʋl. Dɩ kɔ̃tɛɛbiirə phʋʋr Jeju a ha nɩ hʋɛ ɩnɩ-n lõ sɩthɔsɔraale bɩnɔ, dɩ ha wɩ hʋɛ.
33 Dɩ kɔ̃tɛɛbiisɔ thɩɩr kuunnaale a jal a lõ sɩthɔsɔraale bɩnɔ a tinə wi le gɔ̃gɔ̃ horo, dɩ wɩ caalɛ a jiir mɩɩr nɔɔra a khiir.
34 Dɩ ɔbɔɔkɛ wɩrɛ n khɛ wɩnɩ yɩnɩ gɩrɛɛkɛ dananɩ, wɩ kɔɔ car kɔ̃ a mɩɩ dɩɩra na kõgosora mɔ̃ thɩ̃ɛɛle hanɩ.
35 Dɩ tɩbɩla the jal hɩɩn gɩrɛɛkɛ kɔɔ dananɩ; dɩ wɩ pɔr Jejura, a yɩ kuunile kɔ̃tɛɛbiisɔ kɔɔ thɩɩrɔnɩ dɩ too Jejuu kal ƴɔɔ, a to kɩ̃kɩɩn a hanana dakha yʋ bʋɔ. Dɩ maar fʋlɛ wɩ fɛʋ.
36 Dɩ wɩrɛɛkɛ kɔɔ yɛnɩ thɩ̃ɛɛle cʋɛnɩ mɩɩ wɛr mɔ̃kɛ Jeju taanɩ kuunile kɔɔ hananɩ kɔ̃tɛɛbii.
37 Dɩ Jerajedara fɛʋ kɔɔ bɩɛlɛ Jeju a thɛ awɩ thɩ̃thɩɩn sa faa wɩ, gɩdonɩ maar kɔɔ fʋlɛ wɛr dɩɩ ka.
38 Dɩ Jeju lõ gborõo a bir da-n kɔ̃. Dɩ kuunilera kɔ̃tɛɛbii kɔɔ thɩɩrɔnɩ phʋʋrʋʋ a dɔ ɩnɩ-n do ɔɔ totoo. Sɩ Jeju bor sa sʋʋraa:
39 Birə kɔna afɩ cɔ a mɩa thɩ̃ɛ fɛʋʋkɛ Thãgba kɔɔ cʋʋ farnɩ. Dɩ mɛ̃ a jal a mɩɩ paar fɛʋ dɩɩraale gɩrɛ fɛʋʋkɛ Jeju kɔɔ cʋʋraanɩ.
40 Ɔbɔɔkɛ Jeju kɔɔ kɛrnɩ bir, tɩbɩla fɛʋ teguure, gɩdonɩ wɩ-n kɔɔ pɩɛrʋʋrɛ fɛʋ.
41 Sɩ hɩnɛ, kũu bɩɛlɩkɛ wɩ-n wenɩ Jaɩrʋsɩɩkɛ dɔnɩ kɔ̃tɩn Juifisɔɔ Thagba fʋɔr cɔra pɔr, a ji Jejuu ƴɛ thɩ̃thɩɩn da-n phʋʋrʋʋ a pɔ ɩnɩ cɔ.
42 Gɩdonɩ a hananɛ khebi bɩɛl 'lẽ'lẽ'lẽ dɩ thɔɔ yɛna yʋɔr yenyɔ, kɛ n khenɩ. Dɩ mɔ̃ Jeju hanɩ jaal, tibil jɔɔle thʋnɛ gbʋɔrʋʋ ka.
43 Dɩ khɛ bɩɛl gɩ, a hale a hana tɩ̃ɩ a cʋʋna yɛna yʋɔr yenyɔ, dɩ a kɔɔ kʋɛrɛ thɩdarara ɔɔ thɩ̃sɔɔkɛ a hananɩ fɛʋ, sɩ tibil bɩɛllakɛ na kɔɔ puno a kpɛsɛa'.
44 Dɩ a tɔr pɔ Jejuu khiro a thaaraa kẽkẽ nʋɔra; dɩ dapaara ɔɔ tɔmɩ̃ theele kur.
45 Dɩ Jeju bule aa: Amɛ thaan mar? Mɔ̃kɛ tɩbɩla fɛʋ n bananɩ Pɩɛr sʋʋraarɛ: Dɩɩrdaar, tibil jɔ wer hi far thaa dɩ wa-n cʋɔr fɩ, sɩ dɩ fa-n bule amɛ thaan farɩ?
46 Dɩ Jeju birse: Tibil tha marɛ, gɩdonɩ mɩ jɩrɛ fãga kɔɔ the marɛ gbe.
47 Ɔbɔɔkɛ khɛrɩlera yɩɛnɩ dɩɩ do Jeju jɩnaanɛ, a pɔr na jẽu a ji Jejuu ƴɛra, a so tɩbɩla fɛʋʋ ƴɛ thɩ̃thɩɩn mɔ̃ dɔnɩ kɩrʋ dɩ ɩnɩ kɔɔ thaaraa na mɔ̃kɛ ɩnɩ kɔɔ kpɛɛnɩ dapaara khə̃khə̃.
48 Dɩ Jeju sʋʋraa: Ɩ̃ bikhɛr, afɩ ha pɛ taa fɩ, kɔna na ha ɩɩ.
49 Mɔ̃ a hanɩ mɩɩrɔ, tibil bɩɛl ther Jaɩrʋsɩ kɔ̃tɩnɩ cɔ, a pɔ so Jaɩrʋsɩra aa: Afɩ bikhɛr khire. Fa-n vɔɔ Dɩɩrdaar bã.
50 Sɩ mɔ̃ Jeju kɔɔ nɩɛnɩ gele, a sor Jaɩrʋsɩra: Fa-n do haar n ubi fa', sɩ pɩɛr haar dɩbara dɩ a na ler.
51 Dɩ ɔbɔɔkɛ a kɔɔ danɩ cʋɔr aa tu tibil n lona kha na ɔr, saagado Pɩɛr na Jakɩ na bɩsaanɩlee thɩ na ɔɔ nɩ gaaga.
52 Tɩbɩla fɛʋ n khɩɩrɛ dɩ wa-n bɩna. Dɩ Jeju so: Na-n khɩa' aa khə', sɩ a-n daarɛ.
53 Sɩ wɩ-n maanʋʋnɛ gɩdonɩ wɩ jɩrɛ a khire.
54 Sɩ dɩ fʋʋ nƴɔ̃ɔ sa so nɔ khɩɩr: Bɩsaan, pala ɩrɛ.
55 Dɩ ɔɔ fesu kɛr birəə, dɩ pal dapaara a ɩɩr. Dɩ Jeju so war aa, dɔ wɩ haa dɩkor a kho.
56 Dɩ nʋɔ kpaa khebiri thɩ na nɩrɛ, sɩ Jeju kpãkpãa warɛ wa-n so tibillə gɩrɛɛkɛ kɔɔ danana'.