7
1 Ɔbɔɔkɛ Jeju kɔɔ mɩɩnɩ ɔɔ thɩmɩɩsɔɔkɛ fɛʋ tɩbɩlalaakɛ n pɩɛnɩ nũu dɩɩ pɩ, a jaal Kapɛrnayʋm.
2 Dɩ sɔrasɛ tamaa kɔ̃tɩ̃ bɩɛl gɩ, a kɔɔ hale dɩ ga-n kho ɔɔ thɔ̃daar bɩɛlɩkɛ a-n nanɩ dɩɩ ka, dɩ dã khir.
3 Dɩ ɔbɔɔkɛ sɔrasɛ tamaa kɔ̃tɩ̃ɩle nɩɛnɩ Jejuuda, a thʋɔnaanɛ wɩ̃ Juifi kɔ̃tɩnasɔ, wɩ jala a bɩɛlnɛɛ a pɔ a kpɛɛnɛ ɩnɩ thɔ̃daar.
4 Dɩ wɩ pɔ dã Jeju a phʋʋrʋʋ dɩ wa-n gbɛ̃gbɛrɛna thakɛ ayɩ: Kuunikɛ teenanɛ fɩ cʋʋraa gele.
5 Gɩdonɩ a-n nar asɩ ca, dɩ ɔr gɩɩkɛ kɔɔ mɛnɩ asɩ Thãgba fʋɔr cɔ.
6 Dɩ Jeju jal nakha wɛr. Dɩ mɔ̃kɛ a-n wɔrɔnɩ cʋɔr, sɔrasɛ tamaa kɔ̃tɩ̃ɩle thʋɔn ɔɔ kuunsɔ wɩ sʋɔraa ayɛ: Kɔ̃tɩn, fa-n thʋ̃ vɔɔ mã', gɩdonɩ ma teena dɩ fa lõ ɩ̃ cɔa'.
7 Gelela dɔ nɔɔ dɩ ma kɔɔ teena ɩ̃ pɔ dɩbara afɩ pa ga; sɩ sɔ thɩmɩɩ bi bɩɛl dɩbara, ɩ̃ thɔ̃daar na kpɛɛrɛ.
8 Gɩdonɩ mɛrɛɛkɛ, mɩ hananɛ ɩ̃ kɔ̃tɩ̃sɔɔkɛ jɔ mɩnɩ, dɩ mɩ hananɛ dakha sɔrasɛsɔɔkɛ mɩ jɔnɩ. A mɩ so bɩɛlla: Jala, dɩ jal. A mɩ so bɩɛlla wo ayɩ, a ɩna, dɩ ɩ̃. A mɩ so ɩ̃ thɔ̃daarra: Cʋɛ gɩrɛ, dɩ cʋʋ.
9 Dɩ ɔbɔɔkɛ Jeju kɔɔ nɩɛnɩ ga thɩmɩɩle, nʋɔ kɔɔ kpagʋʋrɛ sɔrasɛ tamaa kɔ̃tɩ̃ɩdaraale. Dɩ Jeju kɩɩl a so tibil jɔraale n kpaaraanɩ ayɩ: Mɩ so narɛ Ɩjɩrayɛl dɩɩrarakɛ ma kɔɔ yɩ tibil dɩ hana ha pɛrɛ thaka'.
10 Dɩ mɔ̃kɛ thɔ̃thɔnaale kɔɔ kɛrnɩ na bir cʋɔrɔ, wɩ yɩrɛ thɔ̃daarɩle dɩ hana tomɩ kheu.
11 Agɩpɩ Jeju jaal dɩ bɩɛllaakɛ wɩ-n wenɩ Naɩn, dɩ ɔɔ kpãkpãadara na tibil jɔ kɔɔ cʋrrɛ kha dɩ wa-n jal.
12 Dɩ ɔbɔɔkɛ Jeju n wɔrɔnɩ dɩ lõfonʋɔ, hɩnɛ wɩ gbaar khire dɩ wa-n jalna dʋ paar. Khikhɛr bɩɛlɩ bi bɩɛlla gɩ 'lẽ'lẽ'lẽ dɩ hana, dɩ dɩdara jɔɔ kɔɔ har kha na khikhɛrʋʋle.
13 Ɔbɔɔkɛ Kɔ̃tɩn yɩɩnɩ, bʋɔ fʋʋrɛ dɩ sʋʋraa: Fa-n khɩa'.
14 Agɩpɩ dɩ tɔ pɔ a thar khi gbadaara. Dɩ wɩrɛ gbaannɩ khire jɩɩl. Dɩ Jeju so khireraale ayɩ: Daɓolbir mɩ so farɛ, ɩrɛ.
15 Dɩ khire pal ɩɩr a too a ma da-n mɩɩ thɩmɩa. Dɩ Jeju kpaa a ha ɔɔ nɩ.
16 Dɩ maar fʋlɛ tɩbɩla fɛʋ, dɩ wa-n dʋbɩ Thãgbaa i dɩ wa-n sona: Thãgbaa bobon kɔ̃tɩ̃ bɩɛl ɩrɛ asɩ thɩ̃thɩɩn. Dɩ Thãgba ɩnɛ dakha a kher ɔɔ too.
17 Dɩ thɩmɩɩrɩle cʋʋrɛ Jejuuda dɩɩ kpaar paar fɛʋ Judera na dɩ khuirə fɛʋ.
18 Jã kɔɔ nɩɛrɛ thɩ̃ɛsɔɔlera fɛʋ ɔɔ kpãkpãadara mɩgʋʋnɩ, dɩ a wer ɔɔ kpãkpãadarara yenyɔ,
19 a thɔ̃ wɩ Kɔ̃tɩnna wɩ bulenee ayɛ: Fɛr dʋɔn ʋrɛɛkɛ na ɩnanɩ yaa, agɩbo dɔ sa-n pɩɛr tɩɩ kpɩɩ?
20 Dɩ ɔbɔɔkɛ tɩbɩlaale danɩ Jejuu pa, wɩ sʋʋraarɛ: Jã Batɩsɩtɩ thɔna sɩ sɩ bulene fi ayɛ: Fɛr dʋɔn ʋrɛɛkɛ na ɩnanɩ yaa, agɩbo dɔ sa-n pɩɛr tɩɩ kpɩɩ?
21 Ga bɔraalera Jeju kpɛɛrɛ khodara jɔɔ na wɩrɛɛkɛ hananɩ taansɔ, a weena dakha kɔ̃tɛɛbi hɔ̃hɔla, a khɛrna yarasɔ jɔɔjɔɔ yinə.
22 Dɩ Jeju birse wi: Nɩ kɛra birə a sɔ Janana gɩrɛɛkɛ nɩ yɩnɩ, na gɩrɛɛkɛ nɩ nɩɛnɩ: Yarasɔ n yɩrɛ, nɛ kʋɛdara n sar bɔɔbɔɔ, gbulosɔɔ gbuul pɩrɛ, dɩ nʋrasɔ khɛrrɛ, dɩ khesɔ n ɩɩrɛ dɩ wɩ the khirera, dɩ bɔdara nɩɛrɛ Thãgbaa tutugo bʋɔɔ thɩmɩɩ.
23 Sɩ gɩ da ʋrɛraakɛ ma doronɩ nɛ baradaa ga.
24 Ɔbɔɔkɛ wɩrɛ Jã thɔnɩ kɔnɩ pɩ, Jeju mar da-n mɩɩ tibil jɔɔle Jãadara: Anye nɩ kɔɔ jal a hɩɩn bəənnə? Poo balãsɩɩkɛ n khəəfəneni gɩ ya?
25 Dɩ anye nɩ kɔɔ jal yɩ? Kuunikɛ n tɔnɩ kẽkẽ ɓʋ̃ɔ gɩ ya? Nɩ hɩnɛ wɩrɛɛkɛ n tʋɔnnɩ kẽkẽ ɓɔna dɩ wa-n khona dɩko bʋɔ, fãgadaraa cɔ wɩ-n ha.
26 Dɩ anye nɩ kɔɔ jal yɩ? Thãgbaa bobon gɩ ya? Mɩ so narɛ, sobɔr gɩ, bɩɛlɩkɛ jɔnɩ Thãgbaa bobon gɩ.
27 Jã dʋɔn ʋrɛɛkɛ wɩ kɔɔ khereronɩ Thãgbaa sɛbɛra ayɩ: «Hɩnɛ, mɛr Thãgba thɔna ɩ̃ thɔ̃thɔ̃, dɩ na kʋʋl fɩ ƴɩɛ, a gbɛbɩrɩ fɩ hʋɛ afɩ ƴɛ kʋʋlɔ.»
28 Dɩ mɩ so narɛ, wɩrɛ fɛʋraakɛ khɛra n kɔnɩɩ thɩ̃thɩɩn, bɩɛl na hale a kɔ̃tɩ̃ jɔ Jã ga. Dɩ ʋrɛ kanɩ do dabuu fɩɩʋ Thãgba fãgadaarɩ dɩra, a kɔ̃tɩnɛ a jɔ Jã.
29 Ɔbɔɔkɛ tɩbɩla fɛʋ na war gbadara nɩɛnɩ Jãa nɔ, wɩ jɩrɛ dɩ Thãgba sarrɛ, a tu dɩ Jã kɔɔ kpɛɛ wɩ nyʋɔnɔ.
30 Sɩ jɔfʋ bʋ dʋdara na jɔfʋ dɩɩrdarasɔ wer kɔɔ cʋʋrɛ gɩrɛ Thãgba n ƴaal warnɩ dɩɩ debi a do mɔlɔ thɩ̃ɛ wɛrra, mɔ̃kɛ wɩ bonɩ Jãa yɔ kpɛɛ.
31 Ana ma cʋna nĩdaraakɛ dɩphã, dɩ ana wɩ hona ya fɛ?
32 Wɩ hʋrɛ bɩsanasɔɔkɛ n tɔɔnɩ ƴatɔɔ, dɩ wa-n we kha bɩɛlbɩɛl dɩ wa-n so: Sɩ kɔɔ ʋnɛ bɩɩl nɛrɛra, sɩ na kɔɔ sa ga. Sɩ kɔɔ khɩɩrɛ nɛrɛra, sɩ na kɔɔ dea'.
33 Gɩdonɩ Jã Batɩsɩtɩ kɔɔ ɩnɛ, aa-n kho dɩkora', aa-n yɔ taan dakha ga, dɩ nɩ so: Kɔ̃tɛɛbuu hanaanɛ.
34 Dɩ mɛr tibili Bikuun ɩ̃ wo, a thɩ̃ɛ mɩ-n kho, a thɩ̃ɛ mɩ-n yɔ dɩ nɩ so: Hɩnɛ, kũu kɛ̃kɛbɩ gɩ a dona ta yɔn, war gbadara na sopugodaraa kuun gɩ.
35 Sɩ wɩrɛ fɛʋʋkɛ n tuonni Thãgbaa kpɛsɛ n nɩnanɛ dɩ sobɔr har kpɛsɛrɛɛlee pa.
36 Jɔfʋ bʋ dʋdaar bɩɛl gɩ, a we Jeju a pɔ ɩnɩ-n kho kha dɩkor. Dɩ Jeju lõ jɔfʋ bʋ dʋdaarɩlee cɔra, a too dɩko kho paar.
37 Dɩ hɩnɛ, khɛ sopugodaar bɩɛl gɩ, a kɔɔ hale dɩ bɩnɔ. Ɔbɔɔkɛ a nɩɛnɩ dɩ Jeju hale jɔfʋ bʋ dʋdaarɩ cɔ da-n kho dɩkor, a pɔnanɛ latɩkolo na laaso ja bʋlabir;
38 a gulẽgana Jejuu nɛ khʋra da-n khɩɩna, sa ma da-n huro Jejuu nɛ na yilẽbe. Agɩpɩ dɩ pɩɩn na ɔɔ yʋsũ sa pal Jejura nɛɛ, da-n thir latɩkolola.
39 Ɔbɔɔkɛ jɔfʋ bʋ dʋdaarɩle kɔɔ wɛnɩ Jeju yɩɛnɩ, a sor ɔɔbara ayɩ: Ado Thãgbaa bobon kuunikɛ do, a na jɩrɛ khɛrɩkɛ n thaaraanɩ, ntɛ a donɩ na mɔ̃kɛ a hanɩ: Khɛr sopugodaar gɩ.
40 Dɩ Jeju so: Sɩmɔ̃, mɩ hananɛ thɩ̃ɛ a na so far. Dɩ birsee: Dɩɩrdaar, mɩa.
41 Dɩ Jeju so: Tibil bɩɛlɩkɛ wɩ-n kɔɔ peminoni war kɔɔ hale, dɩ tɩbɩla hanaa helu. Cacadaarɩda daan wire taamɔɩ thɔ̃ lɩmɩnɛɛ war; sɩ balanyɔdaarɩda dã wire kpalanyɔ yʋɔr thɔ̃ lɩmɩnɛɛ war.
42 Dɩ mɔ̃kɛ wa-n yɩɛnɩ a na lɩmʋa', a faarɛ a ha wɩ fɛʋ yenyɔra. Ʋmɔ̃ wɛr yenyɔraale na naanɛɛ a na jɔ?
43 Dɩ Sɩmɔ̃ birsee: Mɩ pɛrɛ haar ʋrɛɛkɛɛ hel jʋɔnɔnɩ gɩ. Dɩ Jeju birsee: Sobɔr fɩ so.
44 Agɩpɩ dɩ kɩɩl da-n hɩɩn khɛrɩle sa bule Sɩmɔ̃: Fɩ yɩrɛ khɛrɩkɛɛ? Afɩ cɔ mɩ lõ sɩ fa kɔɔ ha mɩ nyʋɔn ɩ̃ cɔcɔɔnɛ nɛa', sɩ khɛrɩkɛ hurone mi nɛɛ na ɔɔ yilẽbi sa bir a pɩɩnna ɔɔ yʋsũ.
45 Fa kɔɔ pal mɩ a fʋɔr ma', sɩ khɛrɩkɛ a fʋna bɔɔkɛ mɩ lonɩ a dana nɛnɛ̃kɛ, aa sɩrɔrakɛ kpɩɩ ɩ̃ nɛ pala'.
46 Fa kɔɔ bʋl mɩ niin yʋʋra ga, sɩ khɛrɩkɛ a kɔɔ bʋl mɛr latɩkolo nɛɛ.
47 Gɛr gɩ mɩ so farɛ, Thãgba faarɛ ɔɔ sopugookɛ kɔɔ jʋɔnɔnɩnakɛ a haa, gɩdonɩ khɛrɩkɛɛ naʋ jɔrɛ; dɩ ʋrɛɛkɛ Thãgba faanɩ sopugo gbe a ha, gbera ɔɔ naʋ n ha dakha.
48 Dɩ Jeju so khɛrraale: Thãgba faarɛ afɩ sopugosɔ a ha fɩ.
49 Dɩ wɩrɛɛkɛ a kɔɔ hananɩ kha dɩko kho paar mar dɩ wa-n so awɩbarara aa: Amɛ ha ʋrɛ dɩ ba faarakɛ sopugosɔ ya fɛ?
50 Sɩ Jeju so khɛrraale: Afɩ ha pɛ taa fɩ, kɔna na ha ɩɩ.