6
1 Hɩɩr wi bɩɛl Jeju n kɔɔ kar a lõ jʋ lɩɛra. Dɩ ɔɔ kpãkpãadara 'laa a kha jɔ a fɔfɔrɔ a kho.
2 Dɩ wɩ̃ jɔfʋ bʋ dʋdara bule wi: Mɔ̃gɩdo dɩ na-n cʋʋ gɩrɛ jɔfʋ yɩnɩ gɩ-n sãsɩrɛ hɩɩr wire?
3 Dɩ Jeju birse wi: Na kɔɔ yɩɛ Thãgbaa sɛbɛra gɩrɛɛkɛ Davɩdɩ kɔɔ cʋʋnɩ, ɔbɔɔkɛ kɔmɛr kɔɔ fʋʋnɩ ɔr na wɩrɛɛkɛ a kɔɔ hananɩ kha gaa?
4 Mee a kɔɔ lʋʋn Thãgba fʋɔr cʋɔrɔ a gba buruukɛ wɩ-n hanɩ Thãgba a kho, sa ha wɩrɛɛkɛ a hananɩ kha, sɩrakɛ Thãgbaa gbõdara teana dɩbara wɩ khɔ gɩ.
5 Sɩ dɩ so war: Mɛr tibili Bikuun dor Kɔ̃tɩn hɩɩr wirerarakɛ.
6 Hɩɩr wi bɩɛl wo, Jeju lʋʋn Juifisɔɔ Thãgba fʋɔr cɔra, a ma da-n dɩɩr tɩbɩla. Dɩ le a yɩ kũu bɩɛlɩkɛ ɔɔ nyɔ̃bɔ nyɔ̃ khini.
7 Dɩ jɔfʋ dɩɩrdara na jɔfʋ bʋ dʋdara jʋʋr Jeju dɩ wa-n hɩɩn ado a na kpɛɛrɛ tibil khoo hɩɩr wire, gɩdonɩ hʋɛ wɩ-n ƴaal wɩ pɩɛraa sor.
8 Sɩ a jɩrɛ mɔ̃ wɩ-n kpɩɛrnɩ awɩ bɩnɔ, a so kuunnaakɛ nyɔ̃ɔ khini ayɩ: Ɩrɛ jɩlɛ kɩɛr thɩ̃thɩɩn. Dɩ pal ɩɩr jɩɩl.
9 Dɩ Jeju so war: Mɩ-n bule ner, hɩɩr wire teana bɔ cʋʋrɛ yaa, puu cʋʋrɛ; agɩbo fɩ taa tibil yaa, fɩ kʋʋ?
10 Sɩ a hɩɩn wɛr fɛʋ da-n finə sa bir so kuunnana: 'Laanɛ afɩ nyɔ̃; dɩ 'laa dɩɩ do gɩ kpɛɛrɛ.
11 Dɩ nĩkhii fʋlɛ wɩ, dɩ wa-n gʋʋr kha awɩ ha mɔ̃ wa cʋʋnɩ Jejura.
12 Ɔbɔɔlera Jeju kɔɔ ther jal gɔ̃gʋɔna a bɩɛl Thãgba; dɩ a kɔɔ toore le a bɩɛl Thãgba dɩ dɩɩ wɩlna.
13 Dɩ ɔbɔɔkɛ dɩɩ wɩlnɩ, a wer ɔɔ kpãkpãadara a phiir yʋɔr yenyɔ. Wɛr a ha ire thɔ̃thɔna:
14 Sɩmɔ̃ ɔr a dʋ ire Pɩɛr, sɩ ɔɔ õkuun n dɔ Ãdire, Jakɩ. Jã, Filipi, Bartelemɩ,
15 Matiə, Tomasɩ, Jakɩ Alfee bikuun,
16 na Sɩmɔ̃ɔkɛ dʋɔnnɩ gbɛ̃gbɛrɛ̃ tibil, Juudi Jakɩɩ bikuun, na Judasɩɩkɛ thɛnɩ Karɩyɔtɩ, kɛ kɔɔ debanɩ do lĩlir.
17 Dɩ Jeju gbũ nakha wɛr a jɩɩl gɔ̃gɔ̃ ɓɛlɛ̃ paar, kãkɛ ɔɔ kpãkpãadara jɔɔ hanɩ, na tibil jɔjʋɔ tə̃tə̃tə̃əkɛ thɛnɩ. Jude dɩɩra fɛʋ na Jerujalɛm, nakha Tɩɩr na Sɩdɔ̃ dɩ khuirə kɛ hanɩ lanyɔ̃ nʋɔra.
18 Wɩ pɔr wɩ pɛ Jeju nũu wɩ 'lɛna kho kpɛɛrɛ. Dɩ wɩrɛ fɛʋʋkɛ kɔ̃tɛɛbii n hʋɔlɔnɩ kɔɔ kpɛɛrɛ dakha.
19 Dɩ tibil jɔɔle fɛʋ n ƴaalɛ wa-n thaaraa, gɩdonɩ fãga n thɩɩraarɛ dɩ a-n kpɛɛ wɩ fɛʋ.
20 Dɩ Jeju gba da-n hɩɩn ɔɔ kpãkpãadara sa so war ayɩ: Gɩ da nɛr bɔdarara, gɩdonɩ Thãgbaa fãgadaar do dor anɩda.
21 Gɩ da nɛrɛraakɛ kɔmɛr n fʋnɩ nɛnɛ̃, gɩdonɩ na hire phi. Gɩ da nɛrɛraakɛ n khɩanɩ, gɩdonɩ na 'lɛr daʋ.
22 Gɩ da nar ɔbɔɔkɛ tɩbɩla na laar nɩnɩ, ɔbɔɔkɛ wa lee nɩnɩ na faa kpɩɩ, wa-n nɩɩrna nɩ, wa-n kpɔrɔna nɩ ire dɩɩ ho thɩ̃ɛɛkɛ dɔnɩ kpɔ̃kpɔrɔ̃ thɩ̃ɛ tibili Bikuuni sora.
23 Na-n hana daʋ ga wiraalera a na kãkanɛ, gɩdonɩ khaarda kɔ̃tɩ̃ɩ hale Thãgbaa dʋɔ dɩ a-n pɩɛr nɩ. Gɩdonɩ thalera awɩ mama thɩ kɔ̃tɩ̃sɔ kɔɔ cʋʋ Thãgbaa bobonasɔra.
24 Sɩ ga puu narɛ nɛrɛɛkɛ dʋɔnnɩ lẽledara, gɩdonɩ nɩ 'lɛr anɩ ha faa pɩ.
25 Ga puu narɛ nɛrɛɛkɛ n hienni, gɩdonɩ kɔmɛr na fʋ nɛr. Ga puu narɛ nɛrɛɛkɛ n mananɩ nɛnɛ̃, gɩdonɩ na har bɩwɛra na yilẽbera.
26 Ga puu narɛ ɔbɔɔkɛ tɩbɩla fɛʋ n mɩɩnɩ anɩda bɔ, gɩdonɩ thale awɩ mama thɩ kɔ̃tɩ̃sɔ kɔɔ cʋʋ na wɩrɛ kɔɔ dɔnɩ sõso bobonasɔ.
27 Sɩ mɩ so narɛ nɛrɛɛkɛ n pɛ mɩnɩ nũu: Na-n na anɩ lãlaardara, na-n cʋɛ wɩrɛ n laarɛ nɩnɩ bɔɔ.
28 Na-n bɔna wɩrɛɛkɛ n sɔna nɩnɩ, na-n bɩɛlnɛ Thãgba a na pɛ wɩrɛraakɛ n hʋɔlɛ narnɩ.
29 A tibil ɓa fɩ gbʋa bɩɛl, fe gbʋa kpɩɩ a hanaa dakha. Dɩ a tibil gbaan afɩ darã, sɩɛraa a gba afɩ kẽkẽ gburo dakha wo.
30 Tibil wo tibilikɛ n bɩɛlnɛ farnɩ thɩ̃ɛ, hanaa, dɩ tibilikɛ gbaan fɩnɩ thɩ̃ɛ, fa-n lʋʋra'.
31 Gɩrɛɛkɛ nɩ-n ƴaalnɩ tɩbɩla na-n cʋɛ nar, na-n cʋɛ ɔmɛ̃ wɛrra dakha.
32 A na na wɩrɛɛkɛ n naan nɩnɩ, anye dɔ gɩrɛ teronɩ a ha kpɩɩ? Gɩdonɩ sopugodara dakha wɩ-n nar wɩrɛɛkɛ n naan wɩnɩ.
33 Dɩ a na cʋʋ bɔɔ wɛkɛra n cʋɛ nɩnɩ bɔɔ, anye dɔ gɩrɛ teronɩ a ha kpɩɩ? Gɩdonɩ sopugodara dakha thalera wɩ-n cʋʋ.
34 Dɩ a wɩrɛɛkɛ nɩ-n pɛrnɩ haar wa yɩ gɛr na ha nɩ nɩ-n pemi thɩ̃ɛ, anye dɔ gɩrɛ teronɩ a ha kpɩɩ? Gɩdonɩ sopugodara dakha wɩ-n pemine kha awɩ ha, sɩ wa-n kpɩɛrna mɔ̃ wa birni na 'lɛ oti.
35 Sɩ na-n na anɩ lãlaardara, na-n cʋɛ bɔɔ, na-n pema tɩbɩla sɩ na-n kpɩɛr nɩ birə 'lɛrɔ dɩkha ga. Dɩ mɛ̃ na 'lɛ khaarda kɔ̃tɩ̃ɩ, dɩ na dor dakha Kəkəədaarɩ bɩsãsɔ, gɩdonɩ a bɔrɛ tɩɩ kʋɛara na tɩɩ puusɔra.
36 Gɛr gɩ nɩ dɔ bɔ jɩ tɩbɩla, mɔ̃ anɩ Thɩ donɩ bɔ jɩdaar.
37 Na-n fi do kɩɩldara ga, dɩ mɛ̃ Thãgba na do nar Kɩɩldaara'. Na-n heen tibil sora', dɩ mɛ̃ na 'lɛ so heene dakha ga. Na-n faa tɩbɩlaa dɩ pa a na hana wɩ, dɩ mɛ̃ Thãgba na faa anɩ dɩ pa a na ha nɩ dakha.
38 Na-n 'laanɛ, dɩ mɛ̃ Thãgba na 'laa a na ha nɩ dakha. Ga dor mɩɛda bʋɔɔkɛ wa ɩɩnɩ a na yɛyɛɛ gɩ hi ga-n jal wɩ ha nɩ. Gɩdonɩ mɩɛda ca ʋrɛɛkɛ nɩ-n kɔɔ mɩɛnanɩ thɩ̃ɛ, ɔrra Thãgba na mɩɛna a na ha nɩ oti.
39 Dɩ Jeju so warɛ sokpaa wo ayɩ: Yaarʋ na punone na thɔɔ yaarʋ ya? Mee wɛr yenyɔ fɛʋ na jiire kõkorro.
40 Kpãkpãadaar na hale a na kɔ̃tɩ̃ na jɔ ʋrɛ n dɩrɛɛna', sɩ ɔbɔɔkɛ a na dɩɩrnɩ na pɩ, a na har mɔ̃kɛ ʋrɛ dɩrɛɛnɩ hanɩ.
41 Mɔ̃gɩdo dɩ fɩ ka gar yire hɔ̃ phɩɩnaakɛ hanɩ afɩ omii yiro, sɩ fa-n ka dɩ fɩ hɩɩn kparrɛɛkɛ hanɩ afɩ thɛthɛɛ yiroə?
42 Dɩ mɔ̃ fa fʋ sɩ na so afɩ omina nayɩ: Ɩ̃ omi, jɩlɛ ɩ̃ ti hɔ̃ phɩ̃ɩkɛ ha fɩnɩ yiro, fɛrɛɛkɛ na yɛnɩ kparrɛɛkɛ hanɩ afɩ yiroə? Fɛr bɩnɛ yenyɔdaar, te kparrɛɛkɛ hanɩ afɩ yiro ɓo, le fa jɩɩ yɩ hɔ̃ phɩ̃ɩkɛ hanɩ afɩ omii yiro a na ti.
43 Thɩr bʋɔ na puno na se bi puə'. Dɩ thɩrʋʋkɛ na bʋɔnɔna' na puno na se bi bʋɔ dakha ga.
44 Gɩdonɩ be wɩ-n jɩna thɩra fɛʋ bɩɛlbɩɛl. Sobɔr gɩ, wa-n yɛɛ bara usɩɛra ga, dɩ wa-n khʋ̃ ɓãɓar be paabɩrʋra dakha ga.
45 Tɩɩ bʋɔ n tire dabʋɔɔkɛ hanɩ ɔɔ hara dɩ thena, sɩ tɩɩ puu n tire dapuukɛ hanɩ ɔɔ hara dɩ thena. Gɩdonɩ gɩrɛ n henɩ haarra, gɛr n thɛ nɔɔ.
46 Mɔ̃gɩdo dɩ na-n we mɩ Kɔ̃tɩn, Kɔ̃tɩn, sɩ na-n cʋʋ gɩrɛ mɩ-n so narna'.
47 Tibil wo tibilikɛ ɩna marnɩ da-n nɩɛ ɩ̃ thɩmɩɩ dɩ gbuuro yʋʋ da-n cʋʋ, ma nɩ narɛ ntɛɛkɛ a honɩ.
48 A hʋrɛ tibilikɛ n mɛnɩ cʋɔr, a kpe koru dɩɩ hulono dɩ kpɛɛrɔ go kʋʋ boka nã thɛrɛɛra. Dɩ ɔbɔɔkɛ nyʋɔn phanɩ, dɩ poo be dɩ a-n cɩr cʋɔrɩle, sɩ ga puno cʋʋ thɩ̃a', gɩdonɩ kuunile mɩɩrɛ dɩɩ bɔr.
49 Sɩ ʋrɛɛkɛ n nɩɛnɛnɩ sɩ aa-n cʋa', a hʋrɛ tibilikɛ thɛnɩ cʋɔr thɩ bʋraara, sɩ aa kpe koru a kpɛɛrɔ go kʋa'. Dɩ ɔbɔɔkɛ poo benɩ dɩ a-n cɩr cʋɔrɩle, dɩɩ do dapaara gɩ derre, dɩ cʋɔrɩle jire ji puure.