5
1 Mɔ̃kɛ Jeju hanɩ Jenejarɛtɩ mɩɩr nɔ nʋɔra, dɩ tibil jɔ kpa jɩɛraa dɩ wa-n cɔ kha wɩ nɩɛ Thãgbaa thɩmɩɩ,
2 a yɩrɛ mɩɩr nɔ nʋɔra gborõo yenyɔ, dɩ thʋ̃ phera gbuno wa-n cɔcɔɔ awɩ thʋ̃ pherdasɔ.
3 Dɩ a lʋʋn gborõ bɩɛllaakɛ dʋɔnnɩ Sɩmɔ̃ɔda, sa bɩɛlɛɛ ayɩ a tɔ gboroona, a hʋnɔnɛna thɩɩ gbe. Agɩpɩ dɩ too le gborõ bɩnɔ da-n dɩɩr tibil jɔ.
4 Ɔbɔɔkɛ a dɩɩr wɩnɩ pɩ, a sor Sɩmɔna: Tɔ jala yɔ hulõ paar, nɩ dʋna anɩ thʋ̃ pherda gɩ fʋ thʋma.
5 Dɩ Sɩmɔ̃ birsee: Dɩɩrdaar, sɩ kɔɔ dor thɔma na dɩtɩnɛ fɛʋ dɩɩ khɩɩr ka, sɩ sa kɔɔ fʋ thɩ̃a'. Sɩ gɩdonɩ fɛr sɔ, ma dʋnanɛ thʋ̃ pherdasɔra.
6 A wɩ kɔɔ cʋʋ mɛ̃, wɩ 'lɛr thʋma tə̃tə̃tə̃, dɩ awɩ thʋ̃ pherdasɔ na-n kuur.
7 Dɩ wɩ kɔɔ kher awɩ kuunsɔɔkɛ hanɩ gborõ kpɩɩra, wɩ pɔ a bulo ni. Dɩ wɩ pɔ a hi gborõo yenyɔɔle a tha thʋnɔ dɩ wa-n mʋʋ nyʋɔnɔ.
8 Ɔbɔɔkɛ Sɩmɔ̃ Pɩɛr yɩnɩ gele, a jire Jejuu ƴɛra sa sʋʋraa: Hʋnɔnɛna mɩ Kɔ̃tɩn, gɩdonɩ sopugodaar ha mɩ.
9 Gɩdonɩ nʋɔ kɔɔ kpagʋʋrɛ, ɔr nakha wɩrɛ fɛʋʋkɛ kɔɔ hanaanɩ thʋmanaakɛ wɩ kɔɔ fʋnɩ.
10 Mɛ̃ gɩ kɔɔ ha dakha na Jakɩ, na Jã Jebedee bikuunsɔɔkɛ n buloni kha thɔma na Sɩmɔ̃. Sɩ dɩ Jeju so Sɩmɔna: Fa-n do maar n fʋ fa'. Nɛnɛ̃ dɩphã tɩbɩla fa-n ƴaal mar thʋ̃ khaa.
11 Ɔbɔɔkɛ wɩ kɔɔ dananɩ gborõo thɩɩ, wɩ faarɛ thɩ̃ɛ fɛʋ sɩ dɩ wa-n kpaaraa.
12 Mɔ̃kɛ Jeju kɔɔ hanɩ dɩ bɩɛlla, hɩnɛ kũu bɩɛl haleekɛ pala teenɩ tomɩr. Ɔbɔɔkɛ a yɩnɩ Jeju, a jire ɔɔ ƴɛra a sumo thɩɩra da-n phʋʋrʋʋ thakɛ ayɩ: Kɔ̃tɩn, ado fɩ ture, fɩ punone cʋʋ mɩ dɩ ɩ̃ gbuul pɩ.
13 Dɩ Jeju 'laa nyɔ̃ɔ a thaaraa sa so: Mɩ ture afɩ gbuul n pɛ. Dɩ dapaara gbuule pɩɩraa.
14 Agɩpɩ dɩ kpãkpaanaa a na-n so tibillə ga, sɩ a jala nɛna Thãgbaa bonɩ jidaar mɔ̃ a hanɩ, a 'laana phɔphʋɔl thɩ̃ɛɛkɛ Mʋɩjɩ kɔɔ sonɩ, gɩ nɩna tɩbɩla fɛʋ dɩ a kpɛɛrɛ.
15 Dɩ Jejuu i n kpaarɛ paar fɛʋ dɩ a-n pɛr, dɩ tibil jɔjʋɔ bərəəm pʋɔraarɛ wɩ pɩɛ nũu, wɩ 'lɛna dakha kho kpɛɛrɛ.
16 Sɩ a sɩ warɛ sa the jal bəənnə a bɩɛl Thãgba.
17 Wi bɩɛl Jeju kɔɔ hale da-n dɩɩr tɩbɩla. Dɩ jɔfʋ bʋ dʋdara na jɔfʋ dɩɩrdaraakɛ thɛnɩ Galile dɩɩra, na Jude dɩɩra, na Jerujalɛm dɩɩra fɛʋ, kɔɔ hale a too. Dɩ Kɔ̃tɩnɩ fãga n cʋʋrɛ Jeju da-n kpɛɛ khodara.
18 Dɩ hɩnɛ, tɩbɩla kɔɔ gbaar kũu bɩɛlɩkɛ gbãgbarnɛnɩ na jɔ̃ a pɔna, dɩ wa-n ƴaal wɩ lonaa wɩ pɛ Jejuu ƴɛra.
19 Sɩ mɔ̃kɛ wa jɩnɩ ka wa lonaana', gɩdonɩ tɩbɩla jɔrɛ ka, wɩ jʋʋnaanɛ nãsʋrɔ a tona kaar na ɔɔ jɔ̃ Jejuu ƴɛra tɩbɩlaa thɩ̃thɩɩn.
20 Ɔbɔɔkɛ Jeju yɩnɩ awɩ ha pɛ a sor: Ɩ̃ kuun, afɩ sopugosɔ hɛl farɛ.
21 Dɩ jɔfʋ dɩɩrdara na jɔfʋ bʋ dʋdarasɔ mar dɩ wa-n so na awɩ bɩ̃ ayɩ: Amɛ ha ʋrɛ n kʋɛanɩ Thãgbaa i thakɛ? Amɛ n punone dɩ faa sopugosɔ saagado Thãgba gɩ dɩbara ga?
22 Dɩ Jeju jɩ mɔ̃ wɩ-n kpɩɛrnɩ awɩ bɩnɔ, a bule wi: Mɔ̃gɩdo dɩ nɩ hana kpɩɛr caakɛ anɩ bɩnɔ?
23 Gɩmɔ̃ yɔɔnɛ sorra: Afɩ sopugosɔ hɛl farɛ gɩ yaa, agɩbo: Ɩrɛ a jala gɩ?
24 Sɩ mɔ̃ na fʋnɩ sɩ na jɩ, dɩ mɛr tibili Bikuun hananɛ hʋɛ thɩɩra dɩ ɩ̃ faana sopugosɔ, mɩ so farɛ gbãgbarʋ, ɩrɛ gba afɩ jɔ̃ na kɔna.
25 Dɩ dapaara dɩ ɩɩr awɩ ƴɛra a gba jɔ̃ɔkɛ a-n kɔɔ phɩnɔnɩ, a dʋbɩna Thãgbaa i da-n kɔna.
26 Dɩ nʋɔ kpaa tɩbɩla fɛʋ dɩ wa-n dʋbɩ Thãgbaa i, dɩ maar fʋlɛ wɩ dɩ wa-n sona: Sɩ yɩrɛ nɔ kpaa thɩ̃ɛsɔ nĩ waa.
27 A gele pɩ, Jeju ther a yɩ war gbadaar bɩɛlɩkɛ wɩ-n wenɩ Levɩ, dɩ too war gba paar da-n tee war. Dɩ Jeju sʋʋraa: Na kpa mar.
28 Dɩ Levɩ faa thɩ̃ɛ fɛʋ sa ɩɩr da-n kpaaraa.
29 Dɩ Levɩ cʋʋraarɛ fɛtɩ kɔ̃tɩ̃ɩ ɔɔ cɔ. Dɩ war gbadara jɔɔjɔɔ kɔɔ hale na wɩ̃ tibilsɔ dɩko kho paarra na wɛr.
30 Dɩ jɔfʋ dɩɩrdara na jɔfʋ bʋ dʋdara na-n hũhuun sa so ɔɔ kpãkpãadarara: Mɔ̃gɩdo dɩ nɩ kho na-n yɔna na war gbadara nakha sopugodara?
31 Dɩ Jeju birse wi: Ga do tɩɩ khena n kɔɔ ƴaalɛ dɔtɔrɔa', sɩ wɩrɛ gɩ-n khonɩ gɩ.
32 Ga do fɩl sardara mɩ ɩ̃ ɩ̃ ƴaala', sɩ sopugodara wɛ dɩ wa debi haar.
33 Dɩ tɩbɩlaale sʋʋraa ayɩ: Jãa kpãkpãadara n lire nʋɔ tɔ̃tɔ̃tɔ̃ dɩ wa-n bɩɛlna Thãgba jɔfʋ bʋ dʋdaraa kpãkpãadarasɔɔ kha, sɩ dɩ afɩ too wer n kho dɩ wa-n yɔna.
34 Dɩ Jeju so war: Na punone na cʋʋ wɩrɛ wɩ wenɩ herra dɩ wa li nʋɔ, ɔbɔɔkɛ wɩ hanɩ kha na khɛr he ya?
35 Sɩ wiresɔ na hale wa hɛl warnɩ khɛr he, dɩ dawisɔɔlera wa li nʋɔ dɩphã.
36 Dɩ a so warɛ sokpa bɩɛl wo: Tibil na ɓəər kẽkẽ phaa a bɛbɩna kẽkẽ tɩ̃a'. A a cʋʋ mɛ̃, ga dor a ɓəəre kẽkẽ phaale, sɩɩ do dakuruule a ɓəərni a bɛbɩna datɩ̃ɩ, ga ma kha ga.
37 Dɩ tibil na gba thʋʋrɩkɛ dɔnɩ daphaa na pɛr bʋla tɩɩna ga. A a cʋʋ mɛ̃, thʋ phaa na wɩɛlɛ bʋlaa sɩ na deer, gɩ do bʋlaale kʋɛrɛ mɛ̃.
38 Sɩ dɔ fɩ pɛ thʋ phaa bʋla phaara oti.
39 Tibilikɛ n dɛnɩ thʋ tɩ̃ɩ, a na ƴaal daphaa bã, gɩdonɩ a na sor nayɩ, thʋ tɩ̃ɩ n daanɔ.