4
1 A Jeju hinə Thu Phuu, a ther Jʋrdɛ̃ mɩɩrɔ, dɩ Thu Phuu thɔgʋʋ a jalna bəənnə.
2 Le Satã fifiləə a cʋʋna wire kpalanyɔ. Dɩ Jeju na kɔɔ kho dɩkor ga wisɔraala'; a ga wiile ka pɩ kɔmɛr fʋʋrɛ.
3 Dɩ le Satã sʋʋraa aa: Ado fɛr dʋɔn Thãgbaa Bikuun, sɔ bokaarraakɛ gɩ debi gɩ do dɩkor.
4 Dɩ Jeju birsee: Gɩ kherere Thãgbaa sɛbɛra ayɩ: «Ga do dɩkor dɩbara na hana tibil yirə'.»
5 Dɩ Satã kpaa a jʋʋnna ƴũ, a nɩɩraa dapaara fãgadaar dɩɩsɔ fɛʋʋkɛ hanɩ thɩɩra,
6 sa sʋʋraa: Fɛr ma ha fãga fãgadaar dɩɩsɔraakɛ fɛʋ na awɩ nyɔ̃kor bɔ, gɩdonɩ wɩ kɔɔ ha mɛr, dɩ ma har ntɛɛkɛ mɩ pɛrnɩ haar ɩ̃ ha.
7 Dɩ gɛr gɩ ado fa gburõkure na fʋɔr mɩ, afɩda ga do fɛʋ.
8 Dɩ Jeju sʋʋraa: Gɩ kherere ayɩ: «Kɔ̃tɩn, afɩ Thãgba fa fʋɔr, dɩ ɔrra dɩbara fa doro thɔma.»
9 Dɩ Satana kpaa wo, a jalna Jerujalɛm a jʋʋnna Thãgba fʋɔr cɔ kɔ̃tɩɩna ƴũ, sa sʋʋraa: Ado fɛr dʋɔn Thãgbaa Bikuun, bɩna kɩɛr a je thʋnɔ, gɩdonɩ gɩ kherere ayɩ:
10 «A na pɛrɛ ɔɔ thɔ̃thɔ̃daar thusɔ dɩ wa hɩɩn fɩ»
11 dɩ «wa tɛ fɛr, agado mã' fa ber nɔɔ bokaarra.»
12 Sɩ Jeju birsee: Gɩ kherere ayɩ: «Fa-n fifilə Kɔ̃tɩn afɩ Thãgba a hɩɩna'.»
13 Dɩ ɔbɔɔkɛ Satã kɔɔ fifiləəni na fɩlɛ fɛʋʋle pɩ, a fagʋʋrɛ phaphapha a yɩ hʋ kpɩɩ wo.
14 Dɩ mɛ̃ Jeju bir na Thu Phuu fãga Galile, dɩ ɔɔ i kpaar dɩ khuirəəle fɛʋ.
15 Dɩ a-n dɩɩrɛ tɩbɩla awɩ Thãgba fʋɔr cɔnana, dɩ wɛr fɛʋ n dʋbʋʋrɛ.
16 Dɩ Jeju jal Najarɛtɩ kãkɛ wɩ kɔɔ haanʋʋnɩ; dɩ hɩɩr wire a lʋʋn Juifisɔɔ Thãgba fʋɔr cɔra mɔ̃kɛra a-n kɔɔ cʋʋnɩ.
17 Dɩ mɔ̃ a ɩɩrnɩ a so sɛbɛ, Thãgbaa bobon Ejaɩɩ sɛbɛ wɩ haa. Dɩ a phubire sɛbɛra a yɩ kãkɛ gɩ kherenɩ ayɩ:
18 «Kɔ̃tɩnɩ Thu Phuu ha marɛ, gɩdonɩ a phiir mer ma-n mɩa tutugo bʋɔɔ thɩmɩɩ bɔdarara. A thɔ̃ mɛr ma-n mɩa deara wɩ 'lɛ taarɛ, na wɩrɛraakɛ na-n yɛna' dɩ wa yɩ. A thɔ̃ mɛr ɩ̃ taa wɩrɛɛkɛ wɩ-n kpooronɩ,
19 a na mɩana Kɔ̃tɩnɩ bɔ jɩ yɛ.»
20 Agɩpɩ dɩ khaan sɛbɛ a bir ha thɔ̃daar sa too. Dɩ tɩbɩla fɛʋʋkɛ hanɩle Juifisɔɔ Thãgba fʋɔr cɔ bɩnɔɔle gaaraarɛ yire.
21 Dɩ a mar da-n mɩɩ wɩ: Nĩkɛ ga Thãgbaa sɛbɛ thɩmɩɩkɛ nɩ nɩɛnɩ daan pɩ.
22 Dɩ tɩbɩla fɛʋ n mɩɩrɛ ɔɔda bɔ, dɩ dakha nʋɔ kpaa wɛr bɔ jɩ thɩmɩɩraakɛ n thɛnɩ ɔɔ nɔra, dɩ wa-n so: Ga do ɔr dʋɔn Jojɛfɩɩ bikuunaa?
23 Sɩ Jeju so warɛ: Gellakɛ na so marɛ sokpaakɛ anayɩ: Dɔtɔrɔ, kpɛɛnɛ afɩ khora dɩbara bɛɛ, gɩrɛ fɛʋʋkɛ fɩ kɔɔ cʋʋnɩ Kapɛrnayʋm dɩ sɩ nɩɛ, cʋɛ gɩ kɩɛr afɩ dʋɔ.
24 Dɩ a bire so war wo: Sobɔr mɩ so nar, wa-n bu Thãgbaa bobon bɩɛllakɛ ɔɔ dʋɔ bɔɔbɔa'.
25 Sobɔr mɩ so nar: Khikhɛra jɔɔjɔɔ kɔɔ hale Ɩjɩrayɛl dɩɩra Elɩɩ bɔɔ, ɔbɔɔkɛ thãgba kɔɔ kurni yɛna yẽther na pora maadõ, dɩ kɔmɛ kɔ̃tɩ̃ɩ ji dɩɩra fɛʋ.
26 Sɩ ɔbɔɔlerakɛ Thãgba na kɔɔ thɔ̃ ɔɔ bobon Elɩ khikhɛraraale bɩɛllakɛ, saagado khikhɛr bɩɛlɩkɛ hanɩ Sarɛpɩta Sɩdɔ̃ dɩɩraa pa gaaga.
27 Dɩ dakha gbulo bərəəm kɔɔ hale Ɩjɩrayɛl dɩɩra Thãgbaa bobon Elijee bɔɔ, sɩ bɩɛl wɛrrarakɛ na kɔɔ kpɛɛ, saagado Naamãakɛ dɔnɩ Siridaar gaaga.
28 Dɩ ɔbɔɔkɛ wɩrɛ fɛʋʋkɛ hanɩ Juifisɔɔ Thãgba fʋɔr cʋɔrɔɔle nɩɛnɩ gelela, nĩkhii fʋlɛ wɛr.
29 Dɩ wɛr fɛʋ ɩɩr a tʋɔrʋʋ dɩ bɩnɔ thena, a jalna phaphapha a dana gɔ̃gɔ̃ horʋ wɩ dʋnaa ɓɛlɛnɔ, gɩdonɩ gɔ̃gɔ̃ yʋɔ awɩ dɩ ha.
30 Sɩ ɔr thɛthɛ dẽdẽdena a jal awɩ ƴɛ thɩ̃thɩɩn a thena.
31 Dɩ Jeju jaal Kapɛrnayʋm Galile dɩɩra, da-n dɩɩr tɩbɩla hɩɩr wire.
32 Dɩ nʋɔ kpaa wɛr ɔɔ dɩɩrra gɩdonɩ ɔɔ thɩmɩɩ hananɛ fãga.
33 Dɩ le kũu bɩɛl kɔɔ ha Juifisɔɔ Thãgba fʋɔr cɔra, kɛ hananɩ kɔ̃tɛɛbu hɔ̃hɔl, dɩ a hulene dɩɩ khɩɩr ka ayɩ:
34 Ee, anye sɩ ha kha na fɛr Najarɛtɩ Jeju? Fɩ ɩnɛ fɩ kʋɛ sɩ yaa? Mɩ jɩrɛ ntɛ fɩ donɩ: Thãgbaa Tɩɩ phu fɩ do.
35 Sɩ Jeju manaanɛ ayɩ: Pɩra, sa thɛ kuunnaale. Mɔ̃kɛ kɔ̃tɛɛbuurə baanɩ thʋnɔ tibil jɔɔlee thɩ̃thɩɩn, a thɩɩraarɛ dɩphã, sɩ aa cʋgʋʋ dɩkharakɛ dɩɩ puurə'.
36 Dɩ nʋɔ kpaa tɩbɩla fɛʋ dɩ wa-n mɩɩ kha bɩɛlbɩɛl aa: Anyee thɩmɩɩ ca ha ʋrɛ? A-n mar kɔ̃tɛɛbi hɔ̃hɔlasɔrarakɛ na fãga dɩ puno wi dɩ wa-n the.
37 Dɩ ɔɔ i kpaar dɩ khuirəəle fɛʋ.
38 Ɔbɔɔle Jeju thenɩ Juifisɔɔ Thãgba fʋɔr cɔra, a jaal a lõ Sɩmɔ̃ɔ cɔ. Dɩ Sɩmɔ̃ɔ khɛrɩ nɩ gɩ, a ji tomɩ kporre, dɩ wɩ phʋʋr Jeju dɩ wa-n pɩɛ.
39 Dɩ Jeju pɔ gʋɛraa a phaan tomɩ kporre, dɩ tomɩ kporre ɩɩraa. Dɩ dapaara dɩ ɩɩr a tee wɩ kpakpaalɛ.
40 Wi lõ bɔɔ, wɩrɛ fɛʋʋkɛ hananɩ khodaraakɛ kho caar dɩɩdɩɩ fʋnɩ, wɩ pɔna wɛr Jejura dɩ dɛ̃ɛ war fɛʋ bɩɛlbɩɛl nyɛ̃ɛ, dɩ wɩ kpɛɛ.
41 Dɩ kɔ̃tɛɛbiisɔ dakha kɔɔ ther tɩbɩla bərəəmna, a hulẽ dɩ wa-n sona aa: Fɛr dʋɔn Thãgbaa Bikuun. Sɩ Jeju mana wɛr, aa-n tu wɩ mɩa nʋɔa', gɩdonɩ wɩ jɩrɛ ɔr dʋɔn Kirisiti.
42 A dɩɩ wɩl Jeju ther jal khuirə, dɩ tibil jɔ mar dɩ wa-n ƴaalʋʋ. Ɔbɔɔkɛ wɩ yɩɩnɩ, wɩ-n yɩrnaanɛ a na-n faa wa'.
43 Sɩ Jeju so warɛ: Gɩ teenanɛ ma-n mɩɩ tutugo bʋɔɔ thɩmɩɩkɛ dɔnɩ Thãgbaa fãgadaar doda gɩ̃ dɩsɔra dakha, gɩdonɩ gɛrra Thãgba kɔɔ thɔ̃ mɩ.
44 Dɩ a hale Jude dɩɩra da-n mɩɩ Thãgbaa thɩmɩɩ Juifisɔɔ Thãgba fʋɔr cɔra.