3
1 Ɔbɔɔkɛ Tɩbɛɛr Sejaar kɔɔ donɩ fãgadaar kɔ̃tɩ̃ɩ dɩ ga cʋʋ yɛna yʋɔr yemɔɩ, ga bɔɔlera Pɔ̃sɩ Pɩlatɩ do dakha gobanɛr Jude dɩɩra, sɩ Ɛrɔɔdɩ do fãgadaar buu Galile dɩɩra, dɩ ɔɔ õkuun Filipi do Ituredara na Tɩrakonɩtɩdaraa fãgadaar bu, sɩ dɩ Lɩjanɩasɩ do Abɩlɛndaraa fãgadaar bu;
2 dɩ ɔbɔɔlera dakha An na Kaɩfɩ do gbõdara, gɛr Thãgba mɩɩna Jã, Jakarɩɩ bikuun, bəənnə.
3 Dɩ a jaal da-n kpaar dɩɩ fɛʋ Jʋrdɛ̃ khʋra, da-n so tɩbɩlala aa: Nɩ deba haar sa 'lɛ yɔ kpɛɛrɛ, sɩ Thãgba n faa anɩ sopugosɔ.
4 Thãgbaa bobon Ejaɩɩdaakɛ a kɔɔ kherenɩ ɔɔ sɛbɛra dana mɛ̃ ayɩ. «Tibil wire gɩ dɩ ga-n hulẽ bəənnə ayɩ: Na-n gbɛbɩrɛ hʋɛ Kɔ̃tɩnna, na-n wɛbɩrɛ ɔɔ hʋ bisɔ gɩ pɔlɔ.
5 Bɛlɛ̃ɛ fɛʋ na hire, dɩ gɔ̃gɔ̃ kɔ̃tɩna na gɔ̃gɔ̃ biisɔ fɛʋ na yɩɩrɛ na mãkha na thɩɩ. Gɩrɛɛkɛ gõgolonenɩ ga bire na telẽ, dɩ hʋɛsɔɔkɛ hanɩ yara yara ga pɔlɔlɛ.
6 Dɩ tibil caar fɛʋ na yɩrɛ taarɛɛkɛ thɛnɩ Thãgbara.»
7 Sɩ Jana n sor tibil jɔraale n pʋɔraanɩ wɩ kpɛɛ nyʋɔnɔ dɩ yɩ: Nɛr sikori bisɔ, amɛ sɔ nar nɩ fuo Thãgbaa nĩkhirəəkɛ na ɩnanɩ?
8 A mɛ̃ gɩ na-n sɛ beekɛ n nɛnanɩ anɩ ha debi, sɩ na-n too na so le anɩ bɩnɔ ayɩ, Abɩraham dʋɔn anɩ mama thɩ kɔ̃tã'. Gɩdonɩ mɩ so narɛ: Bokanaakɛrakɛ Thãgba punone a cʋʋ gɩ dɩ gɩ debi a do bɩsana Abɩrahamna.
9 Dɩrakɛ kpãkpo 'lire leere thɩr nɛ kuur leere. Dɩ thɩr wo thɩrʋʋkɛ na-n sɛnɩ bi bʋɔa', wa kuur ger na dʋna dɔɔra.
10 Dɩ tibil jɔɔle bulee aa: Dɩ a gɩ ha thale, mɔ̃ sa do?
11 Dɩ birse wi: Ʋrɛɛkɛ hananɩ kẽkena yenyɔ, a te bɩɛl hana ʋrɛɛkɛ na hana gɩna'; dɩ ʋrɛɛkɛ hananɩ dɩkor, dɔ a cʋʋna ɔmɛna dakha.
12 Dɩ war gbadaraakɛ pʋɔnnɩ wɩ kpɛɛ nyʋɔnɔ dakha, wɩ bulele Jã: Dɩɩrdaar, dɩ mɔ̃ sa do?
13 Dɩ so war: Na-n taa tɩbɩlala thɩ̃ɛ gɩ kãasɩ gɩrɛraakɛ wɩ pɛrna'.
14 Dɩ sɔrasɛsɔ dakha bulee: Sɩ sɛrɛ, mɔ̃ sa do? Dɩ birse wi: Na-n tagɩrɩ tibillə thɩ̃ɛ na fãga bɩa', agɩbo na-n pɛ war so khɩa', sɩ nɩ dɔ gɩrɛ wɩ-n lɩmɩ nɩnɩ na-n da nar.
15 Mɔ̃kɛ tɩbɩla fɛʋ n pɛnɩ nũu dɩ wa-n kpɩɛr awɩ hara, Jã ba dʋɔn Kirisiti yaa,
16 Jã so warɛ fɛʋ ayɩ: Me wer nyʋɔnɔ mɩ-n kpɛɛ nɩ, sɩ tibil bɩɛl na ɩnɛ kɛ hananɩ fãga a jɔ mɩ, dɩ ma hɩɩrʋʋrakɛ a na thʋbʋʋ nɛfaa pɛ̃a'. Ɔr, Thu Phuurə na dɔɔra a na kpɛɛ nɩ.
17 Dɩ jʋ jɛ nyɔ̃kpʋʋn hale dɩ fʋrɔ ɔɔ nyɔ̃kɔɔ. A na jɛr jɔ a gba jʋ be a pɛ ɔɔ thʋ̃ bɩnɔ, sɩ a thii laagbee dɔɔraakɛ na dɔnɩ thɩ̃ khiirnənə'.
18 Thale Jã n kɔɔ mɩɩ tutugo bʋɔɔ thɩmɩɩ tɩbɩlala nakha thɩmɩɩ ƴɩrɛ wo na bulo wini.
19 Sɩ gɩdonɩ Ɛrɔɔdɩ fãgadaar buu kɔɔ gbaar ɔɔ õkuuni khɛr Ɛrɔdɩadɩ, Jã phaanʋʋnɛ ga phaan, na gɩ̃ sopugo jɔjɔraakɛ fɛʋ Ɛrɔɔdɩ kɔɔ cʋʋnɩ.
20 Ɛrɔɔdɩ cʋʋrɛ thɩ̃ɛ dɩɩ puuro ka, sɩ gɩrɛ puuroni a jɔrakɛ dʋɔn mɔ̃ a fʋnɩ Jã a to khaɩra.
21 Ɔbɔɔkɛ Jã kɔɔ kpɛɛnɩ tɩbɩla fɛʋ nyʋɔnɔ na pɩ, a kɔɔ kpɛɛrɛ Jeju dakha nyʋɔnɔ. Dɩ ɔbɔɔkɛ Jeju hanɩ da-n bɩɛl Thãgba, thãgbara ƴũ phubire.
22 Dɩ Thu Phuu gbũ puusɛ̃ khaa gbelẽ gbelẽ a lʋʋnaa. Dɩ le nʋɔ the thãgbara ƴũ ayɩ: Fɛr dʋɔn ɩ̃ Bikuunikɛ mɩ-n nanɩ, fɩ lõ mer haar kpɛ.
23 Jeju kɔɔ hananɛ yɛna dɩɩ thɔɔ kpelẽ yʋɔrsɔ, ɔbɔɔkɛ a fʋnɩ ɔɔ thɔ̃. Dɩ tɩbɩla n kpɩɛrɛ Jojɛfɩɩ bikuun a do na Elɩɩ bikuun,
24 Matatɩɩ bikuun, Levɩɩ bikuun, Mɛlkɩɩ bikuun, Janaɩɩ bikuun, Jojɛfɩɩ bikuun,
25 Matatɩasɩɩ bikuun, Amɔsɩɩ bikuun, Nahʋmɩ bikuun, Esɩlɩɩ bikuun, Nagaɩɩ bikuun,
26 Matɩɩ bikuun, Matatɩasɩɩ bikuun, Semeɩɩ bikuun, Jojɛkɩɩ bikuun, Jodaa bikuun,
27 Joanãa bikuun, Rejaa bikuun, Jorobabɛlɩ bikuun, Salatɩɛlɩ bikuun, Nerɩɩ bikuun,
28 Mɛlkɩɩ bikuun, Adɩɩ bikuun, Kosamɩ bikuun, Ɛlmadamɩ bikuun, Ɛrɩ bikuun,
29 Jejuu bikuun, Elɩɛjɛɛrɩ bikuun, Jorɩmɩ bikuun, Matatɩɩ bikuun, Levɩɩ bikuun,
30 Sɩmɛ̃ʋʋ bikuun, Judaa bikuun, Jojɛfɩɩ bikuun, Jonamɩ bikuun, Elɩakɩmɩ bikuun,
31 Meleaa bikuun, Menaa bikuun, Matataa bikuun, Natãa bikuun, Davɩdɩɩ bikuun,
32 Ɩjaɩɩ bikuun, Jobɛɛdɩɩ bikuun, Boajɩɩ bikuun, Salomɔ̃ɔ bikuun, Nasɔ̃ɔ bikuun,
33 Amɩnadabɩɩ bikuun, Adɩmɛ̃ɛ bikuun, Arnɩɩ bikuun, Ɛsɩrɔmɩ bikuun, Farɛsɩɩ bikuun, Judaa bikuun,
34 Jakɔbɩɩ bikuun, Ɩjakɩɩ bikuun, Abɩrahamɩ bikuun, Taraa bikuun, Nakɔɔrɩ bikuun,
35 Serukii bikuun, Ragoo bikuun, Falɛkɩɩ bikuun, Ebɛɛrɩ bikuun, Salaa bikuun,
36 Kaɩnamɩ bikuun, Arfasaadɩɩ bikuun, Sɛmɩ bikuun, Noee bikuun, Lamɛkɩɩ bikuun,
37 Matujalaa bikuun, Enɔkɩɩ bikuun, Jarɛɛdɩɩ bikuun, Malelɛlɩ bikuun, Kaɩnãa bikuun,
38 Enɔsɩɩ bikuun, Sɛtɩɩ bikuun, Adãa bikuun, na Thãgbaa bikuun a do.