9
1 Dɩ Jeju wer yʋɔr yenyɔ a ha wɩ fãga na punone kɔ̃tɛɛbiisɔra fɛʋ, wa-n kpɛɛna khodara dakha.
2 A thɔ̃ wɛr wɩ jala a na mɩa Thãgbaa fãgadaar doda a na kpɛɛna khodara.
3 Sɩ a so warɛ: Na-n gba thɩ̃ɛ fʋrɔ jalna kpaar paar, dɩ gbʋʋl gɩ, dɩ kpakpaar lokaar gɩ, dɩ buru gɩ, dɩ war ga. Na-n fʋrɔ dakha kẽkena yenyɔa'.
4 Dɩ cʋɔr wo cʋɔrɩkɛ na lonɩ, nɩ tɔɔ le a kɔnana.
5 Sɩ ado pa dɔɔkɛ wa tee nɩna', a na the le dɩ dɔɔraale, nɩ kpɛɛnɛ thɩlãkobeekɛ ma nɩnɩ nɛɛ a faa war gɩ nɩna wɩ thɩmɩɩr.
6 Dɩ kpãkpãadara jaal dɩ wa-n kpaar dɩɩra dɩɩra, dɩ wa-n mɩɩ tutugo bʋɔɔ thɩmɩɩ, dɩ wa-n kpɛɛna khodara paar fɛʋ.
7 Ɔbɔɔkɛ Ɛrɔɔdɩ fãgadaar buu kɔɔ nɩɛnɩ dɩ wa-n mɩɩ thɩ̃ɛɛkɛ fɛʋ n cʋɛnɩ, ɔɔ kpɩɛr nyanyaanɛ fɛʋ, gɩdonɩ wɩ̃ tibil n sor ayɩ: Jã Batɩsɩtɩ gɩ, ɔr ɩrɛ the khirera.
8 Ɩkhasɔ n yɩ wo: Elɩ gɩ, a nɩna ɔɔbara. Wɛ n yɩ: Mama Thãgbaa bobon bɩɛl ɩrɛ a the khirera.
9 Dɩ Ɛrɔɔdɩ sor: Mee mɩ kɔɔ kʋrɛ Jã a kur yʋʋ, sɩ amɛ ha ʋrɛ mɩ-n nɩɛrɔnɩ ga thɩ̃sɔɔkɛ? Dɩ mɛ̃ a ƴaal ɩnɩ-n yɩɩ.
10 Dɩ ɔbɔɔkɛ thɔ̃thɔna kɛrnɩ bir, wɩ mɩɩrɛ Jeju gɩrɛ fɛʋʋkɛ wɩ kɔɔ cʋʋnɩ. Dɩ kpa wɩ kana pa kpɩɩ Bɛcaɩda dɩ khʋra.
11 Sɩ ɔbɔɔkɛ tibil jɔɔle nɩɛnɩ wɩ kpaanɛ. Dɩ Jeju tee wer a mɩɩ wɩ Thãgbaa fãgadaar doda, a kpɛɛna dakha wɩrɛɛkɛ n ƴaalɛnɩ kho kpɛɛrɛ.
12 Dɩ ɔbɔɔkɛ dɩɩ n dʋɔrnɩ, yʋɔr yenyɔɔle pɔr a sʋʋraa aa: Bɩlanɛ tibil jɔɔkɛ wɩ jal dɩ biisɔra na kõgosoraakɛ wɔrɔnɛnɩ, wɩ cɔ wɩ ƴaalna dakha dɩkɔ wɩ kho, gɩdonɩ kɩɛrɩkɛ sɩ hanɩ bəənnə gɩ.
13 Dɩ Jeju so war: Nɛrɛɛ thɛthɛ n hana wɩ dɩkɔ wɩ kho; sɩ dɩ wɩ birsee: Buru yemɔɩ dɩbara sɩ hana na thʋma yenyɔ, agado sɛrɛɛ thɛthɛ jala a the dɩkɔ a ha tɩbɩla fɛʋʋka'.
14 Sɩ tɩbɩlaale kɔɔ thɔɔrɛ gbɩlanɩ yemɔɩsɔ. Dɩ Jeju so ɔɔ kpãkpãadarara: Nɩ cʋɛ wɩ wɩ der der paar kpalanyɔ yʋɔr yʋɔr.
15 Dɩ wɩ cʋʋ oti a cʋʋ wɩ fɛʋ dɩ wɩ der.
16 Dɩ Jeju gba buru yemɔɩɩle na thʋma yenyɔɔle, a gba ƴɩɛ ƴũ a bɩɛl Thãgba a pɛr, sa kuur buru a ha kpãkpãadara wɩ gba tɩnɛnɛ tibil jɔɔlera.
17 Dɩ wɛr fɛʋ bɩɛlbɩɛl kɔɔ khor a hi phi; dɩ wɩ kɔɔ gbaar dakuruukɛ wɩ tɩnɛnɩ sa sɩ dɩɩ hi kpona yʋɔr yenyɔ.
18 Wi bɩɛl Jeju kɔɔ har dɩbara da-n bɩɛl Thãgba, dɩ a kɔɔ bulele ɔɔ kpãkpãadaraakɛ hanɩ kha na ɔr ayɩ: Amɛ tɩbɩla n yɩ mɩ dor?
19 Dɩ wɩ birsee: Ɩkhasɔ n yɩ Jã Batɩsɩtɩ fɩ do. Wɛ n yɩ Elɩ fɩ do. Wɛ n yɩ wo, mama Thãgbaa bobon bɩɛl ɩrɛ a the khirera.
20 Sɩ Jeju bule wi: Sɩ ner, amɛ nɩ-n yɩ mɩ dor? Dɩ Pɩɛr birsee: Thãgbaa Kirisiti fɩ do.
21 Sɩ Jeju kpãkpãa warɛ dɩɩ khɩɩr ka aa, wa-n so tibillə ga.
22 Dɩ a sor wo a ɓaan ayɩ: Dɔ mɛrkɛ dʋɔnnɩ tibili Bikuun n gaar bʋɔ jɔɔ. Dɩ kɔ̃tɩna, na bonɩ jidaar kɔ̃tɩna, na jɔfʋ dɩɩrdarasɔ na bo mer, sɩ dakha wa kʋ mɛr, sɩ wire yẽther wirera ma ɩɩrɛ na the khirera.
23 Agɩpɩ dɩ so war fɛʋ ayɩ: A ntɛ pɛr haar ɩna-n kpa mar, dɔ a faa dɩbara yɩrnanɛ, sɩ a gba ɔɔ kʋkʋ thɩr dɩwɩlʋ koo a na-n kpana mar.
24 Gɩdonɩ tibilikɛ n kanɩ dɩ hana bʋ dʋr na ɔɔ yi, ga ka na buurəəre. Sɩ ʋrɛɛkɛɛ yi na bonɩ mɛrɛra, ɔr na 'lɛ gɩ waa gel.
25 Anyee bɔ ca ga taa tibil, ado a 'lɛ thɩ̃ɛ fɛʋ thɩɩraakɛ sɩɩ do ɔɔ yi buurəəre, agɩbo dɩ kʋɛ ɔɔ dɩbara?
26 Dɩ a yicuru fʋ tibil mɛrɛra na ɩ̃ thɩmɩɩra, yicuru na fʋrɛ mɛr tibili Bikuun ntɛra, ɔbɔɔkɛ ma birni na ɩ̃ na ɩ̃ i dʋbɩɩkɛ dʋɔnnɩ ɩ̃ Thɩɩda na dakha thɔ̃thɔ̃daar thu phuusɔɔda.
27 Sobɔr mɩ so nar, ɩkhasɔɔkɛ hanɩ kɩɛr na khiir sɩɩ do wa yɩ Thãgbaa fãgadaar doaa ga.
28 Ɔbɔɔkɛ Jeju mɩɩnɩ thɩmɩaakɛ pɩ dɩ a cʋʋ wire makõther, gɛr a kparɔ Pɩɛr na Jã na Jakɩ a jʋʋnna gɔ̃gʋɔna Thãgba bɩɛl paar.
29 Ɔbɔɔkɛ a hanɩ Thãgba bɩɛllɔ, ɔɔ ƴɛ debire dɩ ɔɔ kẽkẽ bulolo phõphõphõ dɩ a-n hɩl phalphalphal.
30 Dɩ hɩnɛ, tɩbɩla yenyɔ wɛ dɩ wa-n khʋɛ kha na ɔr. Mʋɩjɩ na Elɩ gɩ,
31 a the na carbararɛ, dɩ wa-n mɩɩ kha Jejuu khidaakɛ a na khini Jerujalɛm.
32 Sɩ daan kɔɔ fʋrɛ Pɩɛr na ɔɔ kpakpaarsɔ. Sɩ a wɩ jaa, wɩ yɩrɛ Jejuu carbara na tɩbɩla yenyɔɔle hanɩ kha na ɔr.
33 Ɔbɔɔle tɩbɩlaale n lɔrnɩ kʋɔn, Pɩɛr sor Jejura: Dɩɩrdaar, gɩ bɔrɛ sɩ hanɩ kɩɛr. Sɩ dɔ waa yẽther, bɩɛl n do afɩda, bɩɛl n do Mʋɩjɩɩda, bɩɛl n do Elɩɩda. Gɩdonɩ aa jɩ gɩrɛ a-n sona'.
34 Dɩ mɔna a-n mɩɩnɩ thale, ndɔlɔ̃paar gbune a thi tɩbɩla yẽtheraale. Dɩ mɔna ndɔlɔ̃paarɩle n thi warnɩ, maar fʋlɛlɛ kpãkpãadara.
35 Dɩ nʋɔ kɔɔ ther ndɔlɔ̃paarrara a so: Ʋrɛɛkɛ dʋɔn ɩ̃ Bikuunikɛ mɩ phiirni. Na-n pɩɛ nũu.
36 Dɩ ɔbɔɔkɛ wɩ kɔɔ nɩɛnɩ nʋɔɔle, Jeju sɛ dɩbara. Dɩ kpãkpãadara pɩrrɔrɛ, wa kɔɔ mɩɩ tibil ga bɔɔle gɩrɛ wɩ kɔɔ yɩna'.
37 A dɩɩ kɔɔ wɩl wɩ ther gɔ̃gʋɔna dɩ wa-n gbũ, dɩ tibil jɔjʋɔ caan Jeju.
38 Dɩ hɩnɛ, kũu bɩɛl tibil jɔraale hulene: Dɩɩrdaar, mɩ-n phʋʋr fɛr hɩnɛ mɩ bɩsaanɩkɛ, gɩdonɩ ɔr dɔ ɩ̃ bikũu bɩɛl.
39 Dɩ bɔɔkɛ kɔ̃tɛɛbuulera ɩɩrnaanɩ pɩ, dɩɩ do dapaara a hulene, dɩ kɔ̃tɛɛbuurə n cʋgʋʋrɛ da-n laan da-n thena nyɔ̃thɩ̃ khɔrɔ̃ɔ. A ayɩ, ɩnɩ-n thɩɩraarɛ kɩɛr dɩɩ do gbɔlɔlɔlɔ a sɩraa waa dɩ ha.
40 Dɩ mɩ kɔɔ bɩɛlɛ afɩ kpãkpãadara wɩ wea kɔ̃tɛɛbuurə, sɩ wa kɔɔ punoə'.
41 Dɩ Jeju so war: Nɛr nĩ babala na puu cʋʋdaraakɛɛ, ʋmɔ̃ bɔɔ ma thʋ̃ na toona nɩ gɩ dana? Dɩ ʋmɔ̃ bɔɔ ma thʋ̃ na fʋ nar haarrarakɛ gɩ dana? Kpa afɩ bikuunna a ɛna kɛ kɩɛr.
42 Dɩ mɔ̃kɛ a-n wɔrɔnɩ, kɔ̃tɛɛbuurə gbaarɛ kpɛɛ da-n laan. Dɩ Jeju mananɛ kɔ̃tɛɛbu hɔ̃hɔlɩle, sa kpɛɛ bɩsaan a kpa ha ɔɔ thɩ.
43 Dɩ nʋɔ kpaa tɩbɩla fɛʋ mɔ̃ wɩ yɩnɩ Thãgbaa puno hana. Mɔ̃kɛ nʋɔ kpaanɩ wɛr fɛʋ gɩrɛra fɛʋʋkɛ Jeju cʋʋnɩ, a sor ɔɔ kpãkpãadarara:
44 Nɩ jɩɛ pɛ ga thɩmɩɩkɛ nũu bɔɔbɔɔ, gɩdonɩ wa fʋrɛ mɛrkɛ dɔnɩ tibili Bikuun na ha tɩbɩla.
45 Sɩ ɔɔ kpãkpãadara na kɔɔ jɩ thɩmɩɩrɩle kɩrʋa'. Gɩ kɔɔ ha warɛ gbul dɩ wa-n puno na jɩ kɩrʋa', dɩ maar kɔɔ fʋlɛ wɛr dɩ wa bir 'la na bule ga.
46 Thɩ̃ banaa kɔɔ ɩɩrɛ awɩ thɩ̃thɩɩn, dɩ wa-n bana kha awɩ ha: Amɛ dɔ kɔ̃tɩn gɩrɛra asɩ thɩ̃thɩɩn ya fɛ?
47 Dɩ Jeju kɔɔ jɩrɛ gɩrɛɛkɛ wɩ-n kpɩɛrnɩ awɩ bɩnɔ, a kpa bɩsã buu pɔna dɩ khunəə sɩ dɩ so war:
48 Ntɛɛkɛ na teanɩ bɩsã buu thakɛ gɩ do ɩ̃ i dɔ nɔɔ, mɛrɛɛ thɛthɛ a tee, dɩ ntɛɛkɛ tea mɩnɩ, ʋrɛɛkɛ thɔna mɩnɩ a tee dakha. Gɩdonɩ ʋrɛɛkɛ dʋɔnnɩ da'lũu fɩɩʋ nɛrɛ fɛʋʋ thɩ̃thɩɩn, ɔr gɩɩkɛ kanɩ do kɔ̃tɩn.
49 Dɩ Jã so Jejura ayɩ: Dɩɩrdaar, sɩ kɔɔ yɩrɛ tibilikɛ n gbaannɩ afɩ i dɩ weena kɔ̃tɛɛbiisɔ da-n faa, dɩ sɩ kɔɔ pɩɛrʋʋ gɩdonɩ aa do asɩ kpakpaardaara'.
50 Dɩ Jeju birsee: Na-n pɩɛrʋa', gɩdonɩ ʋrɛɛkɛ na-n ƴaalɛ nɩnɩ sʋa', nɛrra a-n pɛ.
51 Ɔbɔɔkɛ wireekɛ Jeju teenanɩ a jʋnɛ ƴũ n thɔɔnɩ, Jerujalɛm a ga ƴɩɛ sa yɩ foo ɩnɩ-n thʋ le.
52 Dɩ a thʋɔn tɩbɩla, dɩ wɩ kɔɔ kʋʋlʋʋ ƴɩɛ a jal lõ Samarɩdaraa dɩ bɩɛlla wɩ gbɛbɩraa cɔ paar.
53 Sɩ dɩdaraale na kɔɔ tuə', gɩdonɩ Jerujalɛm khʋra a ga ƴɩɛ.
54 Dɩ ɔbɔɔkɛ ɔɔ kpãkpãadara Jakɩ na Jã yɩnɩ thɩ̃ɛ thale, wɩ buleele ayɩ: Kɔ̃tɩn, fɩ-n ƴaalɛ sɩ wɛ dɔɔ gɩ the ƴũ gɩ gbũ gɩ hɩ̃ wɩ fɛʋ ya?
55 Dɩ Jeju kɩɩl a hɩɩn wɩ sa phaan wɩ dɩɩ khɩɩr ka [ayɩ: Na jɩɩ jɩ fɩl ca ʋrɛ nɩ hanana';
56 gɩdonɩ mɛr tibili Bikuun na ɩ̃ ɩ̃ cʋʋ tibil a jal bu paara', sɩ mɩ ɩnɛ ɩ̃ taa tibil.] Sɩ agɩpɩ wɩ kɔɔ jaal dɩ kpɩɩ.
57 Mɔ̃kɛ wɩ kɔɔ hanɩ hʋɛra, tibil bɩɛl sor Jejura: Ma-n kpa farɛ paar wo paarɩkɛ fɩ-n jalnɩ.
58 Dɩ Jeju birsee: Bãɓoisɔ hananɛ awɩ ka, dɩ 'lominə hananɛ awɩ tɛl, sɩ mɛr tibili Bikuun na hana kãkɛ ma jəəni yʋa'.
59 Sɩ a sor tibil bɩɛlla wo ayɩ: Na kpa mar. Dɩ birsee: Ha mɩ hʋɛ ɩ̃ jal ɩ̃ dʋ ɩ̃ thɩ ɓo.
60 Sɩ Jeju sʋʋraarɛ: Sɛ khesɔra wa-n dʋ awɩ khisɔ, sɩ fɛrɛ jala na mɩa Thãgbaa fãgadaar doda.
61 Dɩ bɩɛl wo sʋʋraa: Ma-n kpa farɛ Kɔ̃tɩn, sɩ ha mɩ hʋɛ ɓo ɩ jal ɩ̃ fʋɔr ɩ̃ cɔdara wɩ tɔɔ bɔɔ.
62 Dɩ Jeju sʋʋraa: Tibil wo tibilikɛ fɔnɩ sũgbure da-n kʋʋl sɩ da-n hɩɩn khiro, a na mar na lõ Thãgba fãgadaarɩ dɩra ga.