4
1 Jeju bire a ma wo da-n dɩɩr tɩbɩla thɩ̃ɛ mɩɩr nɔɔra, dɩ tibil jɔ gbɛbɩ pʋɔraa a der, gɛr hɩna dɩ jʋʋn a too gboroona mɩɩr nɔ nyʋɔnɔ, sɩ dɩ tɩbɩla fɛʋ too thɩɩra mɩɩr nɔ nʋɔra.
2 Dɩ a dɩɩr wɛr thɩ̃ɛ jɔɔ na sokpaa, a so warɛ ɔɔ dɩɩrra ayɩ:
3 Nɩ pɛ nũu: Bi jaldaar gɩ, a the da-n jal be.
4 Mɔ̃kɛ a-n jalnɩ yɛ̃ bi jire hʋɛra, dɩ 'lominə pɔ uul.
5 Yɛ ji wo bokanana ka thɩ nʋʋn na jɔrna', a phu dapaara kɔrɔ gɩdonɩ ga jɩɩ mʋʋ a hulõə';
6 sɩ ɔbɔɔkɛ wire phanɩ dɩ ɩtʋɛ hẽ, gɩ ɔ̃'ɔlɔnɛ a khi, gɩdonɩ nɛɛ na hala'.
7 Yɛ ji wo ka u nɛɛ hanɩ, dɩ uu ɩɩr a sɩlã gɩ dɩ ga se bə'.
8 Yɛ ji thɩ bʋɔra, a phu, a khɔ̃, a bɩ̃, bi bɩɛl n bɩnɛ dɩ hana be kpelẽ yʋɔr, ɩkha kpalãther, ɩkha tamaa.
9 Sɩ Jeju so warɛ ayɩ: Ntɛɛkɛ hananɩ nũu dɩ nɩna, dɔ a na-n pɛ nũu.
10 Ɔbɔɔkɛ aa kɔɔ hanɩ kha na tibil jɔɔle bã, wɩrɛ dɔnɩ ɔɔ totoosɔ na kpãkpãadara yʋɔr yenyɔ wɩ buleele sokpaa kɩrra.
11 Dɩ so war: Nɛr Thãgba kɔɔ ha nɩ jɛ thɩ̃ gbulikɛ dʋɔnnɩ Thãgbaa fãgadaar do, sɩ wɩrɛ dɔnɩ tɩɩ khina, sokpaa thɩ̃ɛ fɛʋ do war,
12 dɩ mɛ̃, «Wa-n hɩɩn sɩ wa yɩ ga, wa-n nɩɛ dakha sɩ wa jɩ kɩrʋa', a mɛ̃ gaa, ga hor wa kɛrrɛ na bir Thãgbara a na 'lɛ sopugo faarɛ.»
13 Sɩ Jeju bire so war wo: Dɩ a na jɩ sokpaakɛ kɩrʋa', mɔ̃ na fʋ sɩ na jɩ gɩ̃ sokpasɔ fɛʋ kɩrʋ?
14 Thãgbaa so bi jaldaar n jal.
15 Ɩkhaa tibilsɔ hʋrɛ hʋ nʋɔ ka sor kɔɔ jalnɩ. Ɔbɔɔkɛ wɩ-n nɩɛnɩ, Satã n pɔr dapaara dɩ tiir sorɩkɛ kɔɔ direni awɩ hara.
16 Mɛna gɩ ha na wɩrɛ hɔnɩ boka thɩɩ ka be kɔɔ jalnɩ. Wɛr dɔ wɩrɛ n nɩɛnɛnɩ Thãgbaa so dɩ wɩ tu na daʋ dapaara,
17 sɩ wa-n sɩrɔ Thãgbaa so dɩɩ yɩ nɛ gɔ paar awɩ hara ga. Bɔɔ gbe wɩ-n pər gar dɩbara, sɩ ɔbɔɔkɛ nɩwɛ na kpoore n danɩ, dɩɩ do Thãgbaa soolera dɔ nɔɔ, dɩɩ do dapaara wɩ faarɛ ha pɛrɛ.
18 Wɛ n nɩɛrɛ Thãgbaa so, sɩ dɩ wɩ ho ka uu hanɩ sɩ be jallɔ;
19 sɩ dɩɩ do dɛr bɔɔraakɛra na lẽle thɩ̃ kpɩɛr fifiləle na gɩ̃ ha pɩɛrsɔ, gele n ɩrɛ dɩɩ sɩlã Thãgbaa soolera dɩ ga-n puno na se bə'.
20 Wɩrɛ n nɩɛnɛnɩ Thãgbaa so dɩ wɩ tu, wɛr hʋɔn thɩ bʋɔ, ka be kɔɔ jalnɩ dɩɩ do wɩ-n ser be: Bɩɛl n ser kpelẽ yʋɔr, dɩkha kpalãther, dɩkha tamaa bi bɩɛlla.
21 Sɩ Jeju bire bule wi wo: Wɩ-n gbaar lãphã pɛ a suuro bɩlãkpʋʋn kã? Dɩ agɩbo dɩ wɩ to kakala ballɔ kã? Mee bilela wɩ-n dɛ̃ɛ.
22 Thɩ̃ɛ na hale na ker sɩ ga do wɩ cʋʋrɛ dɩɩ thaa ga; thɩ̃ɛ na hale na ha gbul sɩɩ do ga yɩraa ga.
23 Ntɛɛkɛ hananɩ nũu dɩ nɩna, dɔ a na-n pɛ nũu.
24 A bire so war wo: Na-n jɩɛ dʋ gɩrɛraakɛ nɩ nɩɛnɩ bʋrɛ; mɩɛda caakɛ nɩ kɔɔ mɩɛnanɩ thɩ̃ɛ, ɔr wa mɩɛna na ha nɩ sɩ na dɛbɩna nar kɔ̃dɩ̃.
25 Gɩdonɩ ʋrɛ hananɩ thɩ̃ɛ, Thãgba na bire na haa na dɛbɩrɔ; sɩ ʋrɛɛkɛ na hananɩ thɩ̃a', Thãgba na tiirəərerakɛ phubi gɩrɛɛkɛ a hananɩ.
26 Jeju bire a so wo: Thãgbaa fãgadaar do, gɩ hʋrɛ tibilikɛ n jalanɩ be lɔɔ;
27 sɩ a a-n daarɛ, a a-n ɩɩrɛ, dɩtɩnɔ na dɩwɩlʋ yo, sɩ gɩ-n phaan phulole dɩɩ phu, sɩ aa-n jɩ mɔ̃ gɩ fʋna';
28 faa thɩɩ thɛthɛ n cʋʋ dɩɩ phu ɓo, agɩpɩ dɩɩ pemi sa hana be dɩphã.
29 Dɩ ɔbɔɔkɛ gɩ bɩnɩ pɩ, dapaara dɩɩ do wɩ-n khar gɩdonɩ bɔɔ daan.
30 Jeju bire a so war wo aa: Anye sa gba na mɩɛna mɔ̃ Thãgbaa fãgadaar do hanɩ, anyee sokpa ca sa gba na mɩɛna?
31 Gɩ hʋrɛ beekɛ wɩ-n wenɩ seneve wɩ-n diirni, fɩɩʋ a-n ha dɩ jɔ be fɛʋ thɩɩra.
32 Sɩ ɔbɔɔkɛ wɩ diiruuni pɩ, a-n ɩɩrɛ dɩ wabɩ dɩ jɔ thɩr bii fɛʋ; a-n hananɛ jɛ̃ kɔ̃tɩna dɩ 'lominə n puno dɩ wa-n tɛllɔ.
33 Sokpa caar thakɛ jɔɔ a-n kɔɔ mɩɩna tɩbɩla Thãgbaa so mɔ̃ wa punoni na nɩɛ;
34 aa-n kɔɔ mɩɩna wɩ saagado sokpa gaaga, sɩ a a ha kha na kpãkpãadara dɩbara gɛr a-n mɩɛ war kɩrʋ.
35 Ga wiilera dʋɔsɛʋ Jeju so war: Nɩ dɔ sɩ iir iiro.
36 Dɩ mɛ̃ wɩ faa tɩbɩla sa phɛl gborõokɛ a harɔnɩ a jal, sɩ yɛ̃ gborõ kɔɔ hanaanɛ kha.
37 Dɩ thãgba jɛ kɔ̃tɩ̃ɩ ɩɩr na fãga, dɩ nyʋɔn ubi a lõ gboroona, dɩ wa jɩ dɩɩ do gɩ 'lire dɩ ga-n hi gborõo.
38 Sɩ Jeju ha gborõ sɩkaar, a jəə yʋʋ da-n daar; dɩ wɩ jagʋʋrɛ a sʋʋraa: Dɩɩrdaar fa-n therna asɩ kʋɛra sɩ-n kʋɛnaa?
39 Dɩ mɛ̃ a jaa a mana jɩɛ aa: Pɩra; a sona mɩɩr nɔ nyʋɔnna aa: Jɩlɛ cɔcɔ; dɩ jɩɛ kur dɩ thɩ̃ɛ na hale dɩɩ tutugo bã.
40 Sɩ agɩpɩ dɩ so war: Mɔ̃gɩdo dɩ maar fʋ nɩ thakɛ? Mɔ̃gɩdo dɩ na pɛr Thãgba haara?
41 Maar fʋ wɛr na sobɔr sɩ dɩ wa-n bule kha bɩɛlbɩɛl aa: Anyee tibil ca ha ʋrɛ, dɩ jɩɛrakɛ na mɩɩr nɔ nyʋɔn na-n nɩɩ nũu?