5
1 Dɩ wɩ kɔɔ daan mɩɩr nɔ iiro Jerajedaraa dʋɔ.
2 Dɩ ɔbɔɔkɛ Jeju thenɩ gboroona, dapaara kũu bɩɛlɩkɛ hananɩ kɔ̃tɛɛbu hɔ̃hɔl ther khi dʋ paar da-n caanʋʋ.
3 Kuunile khi dʋ paar a-n cɔ dɩ dakha tibil na-n puno dɩ lii 'lo bã, jɔrkɔrakɛ na-n puno dɩɩ liə';
4 gɩdonɩ wa-n bʋʋ lirə', sɩ wɩ-n kɔɔ baraanɛ na ther dɩ wɩ linəə dakha jɔrkɔ, sɩ a-n kɔɔ hallɛ jɔrkɔ dɩ phʋ̃ dɩ bɛɛna therɩle dɩ khaar, sɩ tibillakɛ na hale dɩ punooə'.
5 Bɔɔ fɛʋ, dɩtɩnɔ na dɩwɩlʋ, khi dʋ paarsɔ na gɔ̃gʋɔna a-n ha da-n hulẽ, sɩ dɩ gba bokana da-n liirena tomɩr.
6 Dɩ mɔ̃ a 'laanɩ yɩ Jeju ƴɔɔ, a car a caanʋʋ a gburõkuraa,
7 sa hulẽ nʋɔ dɩɩ khɩɩr ka ayɩ: Anye fɛrɛ na mɛrɛ ha kha, fɛr Jeju Thãgba Kəkəədaarɩ Bikuun? Mɩ-n phʋʋr fɛr na Thãgbaa i, fa-n hʋɔl mara'.
8 A sor thale gɩdonɩ Jeju kɔɔ sʋʋraarɛ: Thɛ kuunnaale, fɛr kɔ̃tɛɛbu hɔ̃hɔl.
9 Dɩ Jeju bulee: Mɔ̃ afɩ i n do? Dɩ tu: Ɩ̃ i n dʋɔn dajɔ gɩdonɩ sɩ jɔrɛ.
10 Sɩ a-n phʋʋrɛ Jeju dɩɩ ka ayɩ, a na-n wee kɔ̃tɛɛbi hɔ̃hɔlala a faa dɩ khuirə ga.
11 Sɩ dabulo sɩthɔ jɔɔ wɛ a kɔɔ hale gɔ̃gɔ̃ khʋra dɩ wa-n khʋʋl.
12 Dɩ kɔ̃tɛɛbiirə phʋʋr Jeju ayɩ: Thɔna sɩ sɩ jal sɩ lõ sɩthɔrara.
13 Dɩ ha wɩ hʋɛ wɩ jala, dɩ kɔ̃tɛɛbi hɔ̃hɔla ther a jal a lõ sɩthɔsɔra bɩnɔ, a tinə wi dɩ wɩ ca birbirbir na gɔ̃gɔ̃ horʋ, a jiir mɩɩr nɔɔra; wɩ kɔɔ daan sɩthɔ gbɩlanɩ yenyɔ a kɔɔ mʋʋlɛ nyʋɔnɔ a khiir.
14 Dɩ wɩrɛ n khɛ wɩnɩ, wɩ kɔɔ caar kɔ̃ a mɩɩ dɩɩra na dɩ biisɔra mɔ̃ thɩ̃ɛɛle hanɩ, dɩ tɩbɩla ther jal a hɩɩn mɔ̃ gɩ hanɩ.
15 Dɩ wɩ pɔr Jejura a yɩ ʋrɛ kɔ̃tɛɛbii kɔɔ harɔnɩ, kɛ kɔɔ hananɩ dajɔ, dɩ too, a to kɩ̃kɩɩn a hanana dakha yʋ bʋɔ, dɩ maar kɔɔ fʋlɛ wɛr fɛʋ.
16 Wɩrɛ kɔɔ yɛnɩ thɩ̃ɛɛkɛ cʋɛnɩ kɔɔ mɩɩ wɛr gɩrɛ kɔɔ dananɩ ʋrɛ kɔɔ hananɩ kɔ̃tɛɛbii, na gɩrɛ kɔɔ dananɩ sɩthɔsɔ.
17 Dɩ le wɩ kɔɔ ma dɩ wa-n phʋʋr Jeju a thɛ wɩ dɩɩra.
18 Mɔ̃kɛ Jeju n lonɩ gboroona, kuunile kɔɔ hananɩ kɔ̃tɛɛbii phʋʋrʋʋrɛ a dɔ ɩnɩ-n do ɔɔ totoo.
19 Sɩ Jeju bor sa sʋʋraa: Kɔna afɩ cɔ afɩ too thɩ̃thɩɩn, a mɩɛnɛ wɩ thɩ̃ɛ fɛʋʋkɛ Kɔ̃tɩn kɔɔ cʋʋ farnɩ, na mɔ̃ a kɔɔ jɩ fɩnɩ bʋɔra.
20 Dɩ mɛ̃ a kɔɔ jal a be da-n wɩɛl paarɩkɛ wɩ-n wenɩ Dekapol gɩrɛ fɛʋʋkɛ Jeju kɔɔ cʋʋraanɩ, dɩ nʋɔ kɔɔ kpaarɛ tɩbɩla fɛʋ.
21 Sɩ Jeju kɔɔ bire iir na gborõo gɩ̃ iiro, dɩ tibil jɔ bir gbɛbɩ wo a pʋɔraa, sɩ mɩɩr nɔ nʋɔra a kɔɔ ha.
22 Dɩ kuunikɛ wɩ-n wenɩ Jaɩrʋsɩ, kɛ dʋɔnnɩ kɔ̃tɩn Juifisɔɔ Thãgba fʋɔr cɔra, pɔr a yɩɩ a jiirəə ƴɛ thɩ̃thɩɩn,
23 sɩ da-n phʋʋrʋʋ ayɩ: Gɩ-n khor ɩ̃ bikhɛr bu da-n ɓɔr; ɩna dɛɛnaa nyɛ̃ɛ a tagaa a le.
24 Dɩ mɛ̃ Jeju na kuunile jal kha, sɩ tibil jɔ hiirəəre a thʋ̃ dɩ wa-n cʋɔrʋʋ mɔ̃ wɩ-n jalnɩ.
25 Dɩ khɛ bɩɛl gɩ, a hale a hana tɩ̃ɩ a cʋʋna yɛna yʋɔr yenyɔ.
26 A kɔɔ gaarɛ bʋɔ jɔɔ ka thɩdara jɔɔ nyɔ̃kɔɔ, dɩ mɛ̃ a kʋɛ thɩ̃ɛ fɛʋʋkɛ a hananɩ, sɩrakɛ ga-n haaraa kpɩa', sɩɩ do gɩ ka dɩ a-n dɛbɩrɔrɛ;
27 dɩ a sor na ɔɔ bɩ̃: A mɩ puno a thar ɔɔ kẽkenanakɛ dɩbara, ma kpɛɛrɛ.
28 Dɩ mɔ̃kɛ a-n kɔɔ nɩɛnɩ Jejuuda, a pɔr a 'lɔɔ tibil jɔraale thɩ̃thɩɩn Jejuu khiro a thaaraa kɩ̃kɩɩnna.
29 Dɩ dapaara ɔɔ tɔmɩ̃ theele kur, dɩ jɩ ɔɔ tomɩra tue dɩɩ do a kpɛɛrɛ.
30 Dɩ le Jeju jɩ na ɔɔ ha dɩ fãga the narɛ gbe, a kɩɩl a bule: Amɛ thaan mar kɩ̃kɩɩnna?
31 Dɩ ɔɔ kpãkpãadara sʋʋraa: Fe yɩ tibil jɔ dɩ wɩ hi far thakɛ sɩ dɩ fɩ yɩ, amɛ thaan farɩ?
32 Sɩ Jeju borrakɛ sa hɩɩn da-n finə ɩnɩ-n jɩ ntɛ cʋɛnɩ thalera.
33 Dɩ maar fʋ khɛr da-n jẽ a jɩnɩ gɩrɛ danaanɩ, a pɔr a ji Jejuu ƴɛra sa sʋʋraa casɩ mɔ̃ gɩ haaraanɩ.
34 Dɩ Jeju sʋʋraa: Ɩ̃ bikhɛr afɩ ha pɛ taa fɩ, kɔna na ha ɩɩ a tɔɔna tomɩ kheu.
35 Mɔ̃ a hanɩ mɩɩrɔ, tɩbɩla ther Jaɩrʋsɩ kɔ̃tɩnɩ cɔ a pɔ a so: Afɩ bikhɛr khire, anye fɩ-n vɔɔrɔ Dɩɩrdaar 'lo?
36 Sɩ Jeju na therna gɩrɛ wɩ sona', sɩ a sor Jaɩrʋsɩra: Fa-n do haar n ubi fa', pɩɛr haar dɩbara.
37 Sɩ Jeju na tu tibil bɩɛl n ɩhɔaa saagado Pɩɛr na Jakɩ na Jã, Jakɩɩ õkuunna gaaga.
38 Dɩ mɛ̃ wɩ kɔɔ dã Juifisɔɔ Thãgba fʋɔr cɔ kɔ̃tɩnɩ pa, dɩ Jeju yɩ mɔ̃ khʋ̃ɛ hanɩ, a yɩna tɩbɩla dɩ wa-n bɩ dɩ wa-n bena hulẽbi khena;
39 dɩ a lʋʋn sa so war: Anye nɩ-n khʋɔn thakɛ, dɩ anye nɩ-n bɩrɔ, bɩsaanɩkɛ na khə', a-n daarɛ.
40 Sɩ wɩ-n maanʋʋnɛ, dɩ agɩpɩ a tire tɩbɩla fɛʋ dɩ wɩ thɩɩr, sɩ dɩ kpa bɩsaanɩlee thɩ na nɩrɛ, na wɩrɛ kɔɔ thɔgɔɔnɩ dɩ wɩ lõ ka bɩsaan hanɩ,
41 dɩ fʋʋ nyɔ̃ɔ sa sʋʋraa: Talɩta kumɩ; kɩrʋ dʋɔn: Khebir, mɩ so farɛ pala ɩrɛ.
42 Dɩ dapaara khebir pal ɩɩr a ma da-n sa, gɩdonɩ a hananɛ yɛna yʋɔr yenyɔ; dɩ nʋɔ kɔɔ kpaarɛ tɩbɩla fɛʋ.
43 Sɩ Jeju kpãkpãa warɛ na sobɔr dɩ wa-n do tibil n jɩ thɩ̃ɛɛla', sɩ a sor wɩ hana khebirile dɩkor a kho.