3
1 Agɩpɩ Jeju bir lõ Juifisɔɔ Thãgba fʋɔr cɔra wo; dɩ le a yɩ kuunikɛ nyɔ̃ɔ khini.
2 Dɩ wɩrɛ hanɩle jʋʋr Jeju dɩ wa-n hɩɩn ado a na kpɛɛrɛ kuunile hɩɩr wire, gɩdonɩ wɩ-n ƴaalɛ wɩ pɛr Jejura sor.
3 Dɩ Jeju so kuunnaale nyɔ̃ɔ khini ayɩ: Ɩrɛ jɩlɛ thɩ̃thɩɩn.
4 Sa bir bule wi: Hɩɩr wire teana bɔ cʋʋrɛ yaa puu cʋʋrɛ, agɩbo fɩ taa tibil yaa, fɩ kʋ tibil? Sɩ wɩ pɩrrɛ pɔbɩ.
5 Dɩ haar n heluule gɩdonɩ awɩda khɩɩrɛ, dɩ hɩɩn wɩ na nĩkhii da-n finə sa bir so kuunna: 'Laanɛ afɩ nyɔ̃; dɩ 'laa dɩɩ do gɩ kpɛɛrɛ.
6 Dɩjɔfʋ bʋ dʋdara the, a gbɛbɩ kha dapaara na Ɛrɔɔdɩɩ too dɩ wa-n gʋʋr mɔ̃ wa fʋnɩ sɩ wɩ kʋ Jeju.
7 Sɩ Jeju na ɔɔ kpãkpãadara gbaar jal mɩɩr nɔɔra, dɩ tibil jɔ tə̃tə̃tə̃ kɔɔ kpaaraarɛ. Ɩkhasɔ ther Galile, na Jude,
8 na Jerujalɛm, na ldume dɩɩra, na Jʋrdɛ̃ mɩɩr iiro, na Tɩɩr na Sɩdɔ̃ dɩ khʋra. Tibil jɔɔle pɔr Jejura thale gɩdonɩ thɩ̃ɛɛkɛ a-n cʋʋnɩ wɩ nɩɛ.
9 Gɛr gɩ dɩ Jeju so ɔɔ kpãkpãadarara wɩ gbɛbɩrɛ nar too paar gboroona a thɩnɛ, dɩ mɛ̃ tɩbɩla na yɩ nɩ gbʋɔr paara'.
10 Gɩdonɩ a-n kpɛɛrɛ khodara jɔɔ, gɛr gɩ dɩ wɩrɛ gɩ-n khonɩ n hiirəə ɩna-n thaaraa.
11 Dɩ bɔɔ wo bɔɔkɛ kɔ̃tɛɛbi hɔ̃hɔla n yɩɩnɩ, wɩ-n jire thʋnɔ ɔɔ ƴɛ thɩ̃thɩɩn dɩ wa-n be hulẽbe dɩɩ khɩɩr ka, dɩ wɩ yɩ: Fɛr dʋɔn Thãgbaa Bikuun.
12 Sɩ Jeju n kpãkpãa warɛ dɩɩ khɩɩr ka dɩ wa-n so ntɛ ɩnɩ dona'.
13 Agɩpɩ Jeju jʋʋn gɔ̃gʋɔna, sa we tɩbɩlaakɛ a-n ƴaalnɩ dɩ wɩ pʋɔraa.
14 Dɩ a phiire yʋɔr yenyɔ wa-n ha kha na ɔr a thɔ̃ wɩ wɩ jal wa-n mɩɩ Thãgbaa thɩmɩɩ;
15 a ha wɛr dakha punone dɩ wa weena kɔ̃tɛɛbiisɔ.
16 Yʋɔr yenyɔɔkɛ ha wɩrɛ a phiirni: Sɩmɔ̃ ɔr a dʋ ire Pɩɛr,
17 Jakɩ na ɔɔ õkuun Jã, Jebedee bikona wɛ; wɛr Jeju ha ire Boanɛrjɛsɩ, kɩrʋ dʋɔn wɩrɛ n phaanɛnɩ oro'oro thãgba phɛɛ khaa;
18 Ãdire, Filipi, Bartelemɩ, Matiə, Tomasɩ, Jakɩ Alfee bikuun, Tade, Sɩmɔ̃ɔkɛ dʋɔnnɩ gbɛ̃gbɛrɛ̃ tibil,
19 na Judasɩɩkɛ thɛnɩ Karɩyɔtɩ dɩɩra, kɛ dɔnɩ ʋrɛ lirenanɩ Jeju.
20 Agɩpɩ Jeju kɛr bir kɔ̃ cʋɔrɔ, dɩ tɩbɩla bir wo a gbɛbɩ kha le, dɩ ga do Jeju na ɔɔ kpãkpãadara na ba yɩrɛ ƴɩɛrakɛ na kho dɩkora'.
21 Dɩ ɔbɔɔkɛ ɔɔ too nɩɛnɩ wɩ kɔɔ pɔr wɩ kpaa, gɩdonɩ a thɩɛna gaa wɩ yɩ: Yʋʋ buure.
22 Dɩ jɔfʋ dɩɩrdarasɔɔkɛ thɛnɩ Jerujalɛm a pɔ so ayɩ: Bɛljɛbulikɛ dʋɔnnɩ Satã lʋʋnaanɛ, wo: Ɔrkɛra dɔnɩ yʋʋ kɔ̃tɛɛbiirə n hanaa fãga dɩ weena kɔ̃tɛɛbii.
23 Dɩ Jeju we wɩ a so war sokpaakɛ thakɛ ayɩ: Mɔ̃ Satã na puno na wee dɩbara?
24 A fãgadaarɩ dɩ bɩɛl tɩnɛ a na ke kha, fãgadaarɩ dɩ dɔɔle na jɩɩla'.
25 A cɔ bɩɛl gɩɩkɛ tɩnɛnɛnɩ a na ke kha, cɔ dɔɔle na jɩɩla'.
26 A Satã na kɛ̃kɛrɛ̃ na ɔɔbara dɩ tɩnɛ paar har ɔɔ fãga dɩra, ɔɔ puno na jal bã sɩ ga pɩrɛ.
27 Tibil na puno na lõ na fãga kũu khɩɩ cɔ na taaraa thɩ̃ɛ, saagado ɔr a kɔɔ li ɓoaa ga, a a punoo ɓo dɩphã gɛr a na taaraa thɩ̃ɛ fɛʋ cʋɔrɔ.
28 Sobɔr mɩ so nar gel: Thãgba na faarɛ tɩbɩlaa sopugosɔ fɛʋ na ɔɔ i kʋɛɛkɛ wɩ-n kʋɛnɩ.
29 Sɩ tibilikɛ na kʋɛanɩ Thu Phuu i, Thãgba na faa ga sopugo caale yuuraka', sɩ sor na heenuune khorr.
30 Jeju mɩɩrɛ thakɛ gɩdonɩ wɩ yɩ: Kɔ̃tɛɛbu hɔ̃hɔl lʋʋnaanɛ.
31 Le Jejuu nɩ na ɔɔ õkũu bɩnɔsɔ dã, a jɩɩl phiilo sa thɔ̃ wɩɩ.
32 Sɩ tibil jɔ kɔɔ toore a diirəə dɩ wɩ sʋʋraa: Pɛ nũu, afɩ nɩ na afɩ õkona har phiilo dɩ wa-n bule fi.
33 Dɩ tu wi: Amɛ n dʋɔn ɩ̃ nɩ, na ɩ̃ õkona?
34 Sɩ a mar a hɩɩn wɩrɛ tɔɔnɩ a diirəə da-n finə sa so: Wɩrɛɛkɛ dʋɔn ɩ̃ nɩ na ɩ̃ õkona;
35 gɩdonɩ ɩibilikɛ n cʋɛɩɩɩ gɩrɛ Thãgba n ƴaalnɩ, wa tibilile dʋɔn ɩ̃ õkuun, na ɩ̃ õkhɛr, na ɩ̃ nɩ.