2
1 A wire gbe kɔɔ ka, Jeju bire pɔ Kapɛrnayʋm, dɩ wɩ nɩɛrɛ a hale cʋɔrɔ.
2 Dɩ tibil jɔ kɔɔ gbɛbɩ kha der le dɩ a do too paar na yɩrɛ bã, dɩ phiilo gɩrakɛ lõfonɔa'. Dɩ mɔ̃kɛ a-n mɩɩ wɩnɩ Thãgbaa thɩmɩɩ,
3 tɩbɩla pɔr na gbãgbaʋʋkɛ tɩbɩla yenã heennɩ.
4 Sɩ ga do wa punone na dana Jejuu thɛtha', gɩdonɩ tɩbɩla jɔrɛ ka, gɛr gɩ dɩ wɩ hɩɩnɔ ka Jeju hanɩ sa cu kaar le nãsʋrɔ, sa gba gbãgbarʋra na ɔɔ jɔ̃ a tona kaarra.
5 Ɔbɔɔkɛ Jeju yɩnɩ awɩ ha pɛ, a sor gbãgbarʋra ayɩ: Ɩ̃ kuun, afɩ sopugosɔ hɛl farɛ.
6 Sɩ wɩ̃ jɔfʋ dɩɩrdarasɔɔkɛ hanɩle n sor na awɩ bɩ̃ aa:
7 Anyee tibil ca ha ʋrɛ a mɩɩ da-n kʋɛna Thãgbaa i thakɛ? Amɛ n punone dɩ faa sopugo saagado Thãgba gɩ dɩbara ga?
8 Dɩ dapaara Jeju jɩ na ɔɔ ha mɔ̃ wɩ-n kpɩɛrnɩ awɩ bɩnɔ a so war: Mɔ̃gɩdo dɩ nɩ hana kpɩɛr caar thale anɩ bɩnɔ?
9 Gɩmɔ̃ yɔɔnɛ sorra gbãgbarʋra: Sopugo hɛl farɛ gɩ yaa, agɩbo: Ɩrɛ, gba afɩ jɔ̃ na jala gɩ?
10 Sɩ mɩ ƴaalɛ nɩ jɛ dɩ mɛr tibili Bikuun hananɛ hʋɛ thɩɩra dɩ ɩ̃ faana sopugo, sa bir so gbãgbarʋra:
11 Mɩ so farɛ, ɩrɛ gba afɩ jɔ̃ na kɔna.
12 Dɩ dapaara dɩ ɩɩr gba ɔɔ jɔ̃, dɩ tɩbɩla fɛʋ yɩɩ dɩ sa da-n the, dɩ nʋɔ kpaa wɩ dɩ wa-n khɩɩ Thãgba dɩ wa-n sona ayɩ: Sɩ kɔɔ thenɩ dɩɩra, sa kɔɔ yɩ thɩ̃ɛ thakɛ kpɩɩa'.
13 Dɩ Jeju bire kɛr bir mɩɩr nɔɔra, dɩ tibil jɔ na-n pʋɔraa da-n dɩɩr wɩ.
14 Sɩ a-n kar a yɩ Levɩ, Alfee bikuun dɩ too war gba paar da-n tee war, dɩ sʋʋraa: Na kpa mar; dɩ ɩɩr da-n kpaaraa.
15 Mɔ̃kɛ Jeju toonɩ dɩko kho paar Levɩɩ cɔ, war gbadara na sopugodara jɔɔ toonaanɛ na ɔɔ kpãkpãadara dakha, gɩdonɩ wa tibil casɔɔle n kpaaraanɩ wɩ jɔrɛ.
16 Dɩ wɩrɛ dɔnɩ jɔfʋ dɩɩrdarasɔ a bir dona jɔfʋ bʋ dʋdarasɔ kɔɔ yɩrɛ mɔ̃kɛ Jeju n khonɩ dɩkor na sopugodara na war gbadara, wɩ sor ɔɔ kpãkpãadarara: Mɔ̃gɩdo da-n kho dɩkor na war gbadara na sopugodara?
17 Dɩ Jeju nɩɛ mɔ̃ wɩ-n sonɩ a so war: Ga do tɩɩ khena n kɔɔ ƴaalɛ dɔtɔrɔa', sɩ wɩrɛ gɩ-n khonɩ gɩ. Ga do tɩɩ sara mɩ ɩ̃ ɩ̃ ƴaala', sɩ sopugodara wɛ.
18 Wi bɩɛl mɔ̃kɛ Jã Batɩsɩtɩɩ kpãkpãadara na jɔfʋ bʋ dʋdarasɔ kɔɔ lini nʋɔ, tɩbɩla jaal a bule Jeju: Mɔ̃gɩdo dɩ Jã Batɩsɩtɩɩ kpãkpãadara na jɔfʋ bʋ dʋdaraa kpãkpãadara na-n li nʋɔ, sɩ afɩ kpãkpãadara wer na-n li nʋɔa'.
19 Dɩ Jeju tu wi: Nɩ-n kpɩɛrɛ dɩ wɩrɛ wɩ wenɩ herra na punone na li nʋɔ ɔbɔɔkɛ wɩ hanɩ kha na khɛr he ya? Kpei. Bɔɔ fɛʋʋkɛ wɩ toonanɩ kha khɛr he wa puno na li nʋɔa'.
20 Sɩ wire na hale wa hɛl warnɩ khɛr he, dawiile wa li nʋɔ dɩphã.
21 Tibil na gba kẽkẽ phaa na coorna kẽkẽ tɩ̃ɩ na bɛba'. A a cʋʋ mɛ̃, daphaa na-n haalɛ datɩ̃ɩ gɩ ɓəər gɩ puuro ga-n pɛr.
22 Tibil na gba thʋʋrɩkɛ dʋɔnnɩ daphaa na pɛr bʋla tɩɩna ga. A a cʋʋ mɛ̃ thʋʋr na wɩɛlɛ bʋla tɩ̃ɩle, gɩ do thʋʋr na bʋlaa kʋɛrɛ fɛʋ, sɩ dɔ fɩ pɛ thʋ phaa bʋla phaara oti.
23 Hɩɩr wi bɩɛl Jeju n kɔɔ kar a lõ jʋ lɩɛra, dɩ mɔ̃kɛ wɩ-n jalnɩ na hʋɛ ɔɔ kpãkpãadara 'laarɛ a kha jɔ a kho.
24 Dɩ jɔfʋ bʋ dʋdara sʋʋraa: Fa yɩ mɔ̃ afɩ kpãkpãadara n cʋʋnɩ gɩrɛ jɔfʋ yɩnɩ gɩ-n sãsɩrɛ hɩɩr wirəə?
25 Dɩ Jeju tu wi: Na kɔɔ yɩɛ sɛbɛra gɩrɛɛkɛ Davɩdɩ kɔɔ cʋʋnɩ, ɔbɔɔkɛ a kɔɔ ƴaalnɩ dɩkor gɩdonɩ kɔmɛr kɔɔ fʋʋrɛ na wɩrɛɛkɛ a kɔɔ hananɩ kha gaa?
26 Mee a kɔɔ lʋʋn Thãgba fʋɔr cʋɔrɔ ɔbɔɔkɛ Abɩataar kɔɔ donɩ Thãgbaa gbõdaar, a gba buruukɛ wɩ-n hanɩ Thãgba kɛ n sãsɩnɛnɩ tɩɩ khɩnana a kho, a ɩɩr wo a ha tɩbɩlaakɛ a hananɩ.
27 Sɩ Jeju bire so war: Tibil Thãgba cʋʋ hɩɩr wire a ha, aa ti tibil a ha hɩɩr wirə'.
28 Gɛr dɔ kɩrʋ dɩ mɛr tibili Bikuun do Kɔ̃tɩn hɩɩr wirerarakɛ.