Nɩwɛɛkɛ na dananɩ na khee ɩɩrda
12
1 Thɔ̃thɔ̃ thuiile so marɛ wo aa: «Dabɔɔle, Mɩsɛlɩkɛ dɔnɩ Thɔ̃thɔ̃ thu kɔ̃tɩn,kɛ dɔnɩ afɩ too teteedaar na ɩɩrɛ.
Sɩ bɔgaar bɔɔ ga do na sobɔr.
Bɔgaar caar thale na kɔɔ hale yuurəkɛ bɔɔraakɛ caarsɔ kɔɔ thenɩ dɩɩra ga.
Ga bɔɔle afɩ too wɩrɛ awɩ i kherenɩ yi sɛbɛra,
Na 'lɛr taarɛ.
2 Tibil jɔjʋɔɔkɛ n daarɛnɩ kaw thɩlãkobera na jaarɛ,
Ɩkhasɔ na jaarɛ a na 'lɛ yire khorr,
Sɩ ɩkhasɔ n jaa wɩ 'lɛ beesire na yicuruukɛ na n pɛnɩ yuuə'.
3 Wɩrɛɛkɛ kɔɔ jɩɛnɩ fɩlɛ, wa n carbararɛ,
Mɔ̃kɛ thãgbara ƴũu n carbarnɩ.
Dɩ wɩrɛɛkɛ kɔɔ dɩɩrɛnɩ tibil jɔjʋɔ fɩl sarʋ, wa n carbararɛ bɔɔ khorr mɔ̃kɛ ƴepələ̃be n carbaranɩ.
4 Fɛr Danɩɛl, kerarɔ thɩmɩaakɛ hanɩ sɛbɛraakɛ a dɔrɔ jɩɩn, phaphapha pɩpɩɩ bɔɔ n dã. Dɩ tibil jɔjʋɔ na n hɩɩnɛ sɛbɛɛle, gɩ cʋʋ awɩ kpɛsɛ ga n dɛbɩrɔ.»
5 Dɩ mɛr Danɩɛl, mɩ n hɩɩnɛ a yɩ tibil kpɩɩsɔ wo yeɲɔ, dɩ bɩɛl jɩɩl mɩɩr gẽgerẽ bɩɛlla, dɩ bɩɛl jɩɩl gẽgerẽ kpɩɩra ʋ̃ʋ seero. 6 Dɩ bɩɛl wɛrra bulele ʋrɛɛkɛ tʋɔnɩ lɛ̃ kɩ̃kɩɩn, kɛ jɩlɛnɩ mɩɩr ɲʋɔna ƴũu aa: «Ʋmɔ̃ɔ bɔɔ wer nɔ kpaa thɩ̃ɛsɔɔlera na dã?» 7 Dɩ mɩ nɩɛrɛ ʋrɛɛkɛ tʋɔnɩ lɛ̃ kɩ̃kɩɩn, kɛ jɩlɛnɩ mɩɩr ɲʋɔna ƴũu, dɩ 'laa ɲɛ̃ɛ yeɲɔ thãgbara ƴũu a ʋlfɛ a wena ʋrɛɛkɛ hananɩ yire khorr aa: «Yɛna yẽther na dakuru thɩ̃ɛsɔɔlera na pʋɔr na dana. Ɔbɔɔkɛ tɩɩ phuusɔɔ fãga na pɩnɩ fɛw, gɛr ga khuro.» 8 Mɩ nɩɛrɛ wer, sɩ ma jɩrɔ kɩrɔa'. Dɩ mɩ bulele mɩɩ: «Ɩ̃ kɔ̃tɩ̃ ya, mɔ̃ thɩ̃ɛsɔɔlera na pɩɩr?» 9 Dɩ a birse mer aa: «Jala yaa Danɩɛl, thɩ̃ɛsɔɔle teenanɛ gɩ too kerera, wɩ dʋrɔ jɩɩn phaphapha pɩpɩɩ bɔɔ n dã.» 10 Tibil jɔjʋɔ na 'lɛr phʋɔlɛ, wɩ pɩɩn wɩ, wɩ phu. Sɩ tɩɩ puusɔ na n jalnanɛ puu cʋʋrɛ, bɩɛllakɛ wɛrra na jɩ kɩrʋ thɩ̃ɛsɔraaka'. Sɩ wɩrɛɛkɛ jɩɛnɩ fɩlɛ na jɩrɔrɛ kɩrʋ. 11 A fʋna bɔɔkɛ wire wo wiree bonɩ ji na jɩɩlnɩ a na jalna na dana bɔɔkɛ wa dɛɛnɩ ƴɔ̃ƴɔ̃ɔ thɩ̃ɛɛkɛ dɔnɩ thɩ̃ kʋɛdaarɩ kpɔ̃kpɔrɔ̃ thɩ̃ bonɩ ji paara ƴũu, wire gbɩlanɩ taɲɔ na kpalanã ɲʋɔra (1 290) ga cʋʋ. 12 Daw n fɔ ʋrɛɛkɛ na jɩlɛnɩ kɩbɩ phaphapha a na dana wire gbɩlanɩ na tãather kpelẽ ɲʋɔr yemɔy. 13 Fe wer Danɩɛl, ɩrɛ phaphapha a dana khu paar, dɩ fa hɩɩrɛ. Agɩpɩ, fa ɩɩrɛ a na 'lɛ afɩ lɩmɩ bɔɔ pɩɩr wiresɔra.