DANƖƐLƖ SƐBƐ
Danɩɛl na ɔɔ kũusɔ yẽtherɩ thɩmɩ Babɩlɔn dɩɩra
1
1 Juda jamana Yehoyakɩmɩ balãther yɛraakɛ a cʋʋnɩ jamana dʋʋra, Nebukadinejaarɩkɛ dɔnɩ Babɩlɔn jamana pɔr ɩnɩ n kena Jerujalɛmdara. Dɩ a sɔbɩrɛ dɩɩ. 2 Dɩ Kɔ̃tɩn bo Yehoyakɩm a ha Babɩlɔn jamana na Thãgba fʋɔr cɔ thɩ̃bi ɩkha dɩ jalna Babɩlɔn dɩɩra, kɛ wɩ n wenɩ dakha Sɩnear, a thɩɩn ɔɔ thãgbaa thɩ̃bi ɓɔ̃ thɩɩn cɔra.3 Dɩ Nebukadinejaar jamana sor Asɩpenaajɩraakɛ dɔnɩ jamanaa thɔ̃daraa kɔ̃tɩ̃ aa, a phire Ɩjɩrayɛl daɓolbi ɩkha wɩrɛraakɛ thɛnɩ jamanaa mələ, agɩbo tɩɩ cʋnanɛsɔɔ mələ. 4 Wɩ dɔ daɓolminəəkɛ bʋɔnɔnɩ tomɩra, wa n hana taana'. Wɩ dɔ wɩrɛ hananɩ kpɛsɛrɛ na yʋ bʋɔ, kɛ 'lɛnɩ dɩɩrɛ, a hana punone a na do thɔma jamanaa cɔ, wɩ puno wɩ dɩɩr wɩ sɛbɛ na Kaldea ca thɩmɩɩr. 5 Dɩ jamana pɛrɛ wa n hana wɩ ɔɔ dikorsɔ na taanɩkɛ a n ɲɔnɩ wire fɛw. A ƴaalɛ a haan wɩ a dana yɛna yẽther, agɩpɩ wa n do ɔɔ thɔ̃. 6 Wɩrɛra wɩ phiirnɩ Judaa məlsɔɔra ha wɩrɛ: Danɩɛl, Hananɩa, Mɩkayɛl na Ajarɩa. 7 Dɩ jamanaa thɔ̃daraa kɔ̃tɩ̃ dʋ wɛr ie. Danɩɛl n dʋɔn Bɛltɩsajaar; dɩ Hananɩa na n do Sadɩrakɩ dɩ Mɩkayɛl na n do Mesakɩ dɩ Ajarɩa na n do Abɛdɩ-Nego.
8 Sɩ Danɩɛl tire kpɩɛrɛ ɩna ƴɔ̃ƴɔ̃ɔ ɩnɩbara na jamanaa dikorsɔ na taanɩkɛ a n ɲɔna'. Dɩ a bɩɛlɛ jamanaa thɔ̃daraa kɔ̃tɩ̃, a na n fɛrɛ nɩ ɩnɩ n ƴɔ̃ƴɔ̃ɔ ɩnɩbara ga. 9 Dɩ Thãgba cʋʋrɛ jamanaa thɔ̃daraa kɔ̃tɩ̃ dɩ hana bɔ fʋʋr Danɩɛla a jɩɩ bʋɔra. 10 Agɩpɩ dɩ so Danɩɛla aa: «Maar fʋ mɛr ɩ̃ kɔ̃tɩ̃ jamanana. Gɩdonɩ ɔr pɩɛr dikorɩkɛ na n khonɩ na taanɩkɛ na n ɲɔnɩ. Dɩ ado a yɩ nɩ dɩ nɩ kʋɛ tomɩr a jɔ anɩ alãkha daɓolbisɔ, na jɩ jamana na faa maa gaa?» 11 Dɩ Danɩɛl mɩɩna thɔ̃daar bɩɛlɩkɛ jamanaa thɔ̃daraa kɔ̃tɩ̃ pɛrnɩ a na n hɩnɛ ɔr Danɩɛl na Hananɩa na Mɩkayɛl na Ajarɩa aa: 12 «Wa n hana sɩ bi fab haa na ɲʋɔn dɩbara, sɩ fa n jʋʋr sɩ gɩ dana wire yʋɔr. 13 Agɩpɩ fɩ mɩɛ asɩ tomɩr na wɩrɛɛkɛ n khɔnɩ jamanaa dikorsɔ fɩ hɩɩn. Liir fa jɩ gɩrɛ fa cʋʋnɩ sɛraraakɛ dɔnɩ afɩ thɔ̃dara, gɩ mɩɛ kha na gɩrɛra fa yɩnɩ». 14 Dɩ thɔ̃daarɩle cʋʋrɛ gɩrɛra wɩ n bɩɛlnɩ, sa jʋʋr wɩ a dana wire yʋɔra. 15 Mɔ̃ wire yʋɔr kanɩ, awɩ tomɩr bɔrɛ, dɩ wɩ khʋɔnakɛ a jɔ daɓolbi wɩrɛɛkɛ n khɔnɩ jamanaa dikorsɔ. 16 Liir dɩphã, jamanaa thɔ̃daar na n ha wɩ dikorɩkɛ wɩ pɛrnɩ wa n hana wa', faara a n ha wɩ dɩbara.
17 Dɩ Thãgba har daɓolminə yenãale thɩ̃ jɩɩr na thɩ̃ lee jɩɩr ca thɩmɩɩraakɛ wɩ n kherenɩ, a hana wɩ kpɛsɛrɛ. Dɩ Danɩɛl n mɩɛrɛ thɩ̃ yɩrsɔɔ kɩr fɛw na dəəlesɔɔ kɩr fɛw. 18 Mɔ̃ bɔɔkɛ Nebukadinejaar jamana dʋnɩ dɩ wa pɔna wɩ ɔɔ pa danɩ, jamanaa thɔ̃daraa kɔ̃tɩ̃ɩle kpa wɛr a pɔna. 19 Dɩ jamana khʋɛna wɛr, dɩ tibil bɩɛllakɛ na hale daɓolminə fɛʋʋlee thɩ̃thɩɩn a hona Danɩɛl na Hananɩa na Mɩkayɛl na Ajarɩa ga. Dɩ mɛ̃ wɩ lõ jamanaa thɔna. 20 Bɔɔ fɛʋʋkɛ jamana n bule wɩnɩ thɩ̃ɛɛkɛ fɛrɛnɛnɩ wɩ hanana kpɛsɛrɛ na yʋ bʋɔ, a n yɩ wɛr dɩɩ do wɩ kãsɩrɛ dɔdɔɔdarasɔɔra fɛw na wɩrɛraakɛ n jɩɛnɩ thɩ̃ɛ ƴepələ̃bera le ɔɔ jamana dɩra a dɛbɩ ɲẽbe yʋɔr. 21 Dɩ mɛ̃ Danɩɛl too jamanasɔɔ thɔna a dana caca yɩɛrɩkɛ Sirusi gbanɩ jamana dʋʋr.