JEREMƖƖ BƆ WAAL NƖSƆ
Be nɩɛ Jerujalɛmɩdara
1
1 Hu! Aɲaa!A toore dakhɩɩ,
Jerujalɛm dɩ kɔ̃tɩ̃ɩkɛra
Kɔɔ jʋɔnɔnɩ tɩbɩla bərəəm!
A fire ho khikhɛrʋ!
Dɩɩkɛra kɔɔ thɛnɩ ire
Ca kpɩɩsɔɔ thɩ̃thɩɩn ga do kpãkpalã ga,
Dɩɩkɛra kɔɔ ɓɔnanɩ a jɔ dɩ gbulonasɔ fɛw,
Sɩ ɔr ha ʋrɛ n cʋɛnɩ pɔtɔrɔ thɔma nɛnɛ̃!
2 A n bɩrɛ dɩ wɩlna dɩɩ,
Dɩ yilẽbe na n cel kʋ̃kanana.
Wɩrɛ kɔɔ naanɛɛnɩ,
Bɩɛlakɛ na n ƴɔlʋʋ haar bã.
Ɔɔ kũusɔ fɛw fɩɩlʋlɛ,
Wɩ fire dʋʋraa lãlaardara.
3 Wɩ fʋlɛlɛ Juda bə̃dara a jalna dɩ kpɩɩra
Dɩ wɩ ha bʋɔra,
Na dee thɔ̃ kɔ̃tɩɩna.
Wɩ hale ca kpɩɩsɔɔ thɩ̃thɩɩn,
Wa n yɩ too paara'.
Awɩ kpõkpoodara fɛw 'li wer ɔbɔɔkɛ fãga pɩ wɩnɩ a fʋlɛ wɩ.
4 Sɩyɔ̃ dɩ hʋɛsɔ fɛw khɩrɛ,
Tibil na n kana le bã'
Gɩdonɩ tibil na n pɔ le kpa jɛ kɔ̃tɩnasɔɔra bã.
Ɔɔ kpa jɛ pasɔ khɩrɛ fɛw,
Tibil na n too le bã',
Ɔɔ bonɩ jidara n ser.
Ɔɔ khebiirsɔ har ha kʋɛrɛra,
Dɩ Sɩyɔ̃dara fɛw har kharɛra.
5 Sɩyɔ̃ɔ sodara 'lire kəəre,
Ɔɔ lãlaardara faarɛ haar dɩphã.
Gɩdonɩ Thãgba Kɔ̃tɩn pɛr Sɩyɔna ha helle,
Dɩɩ do ɔɔ nũ nʋʋra dɔ kɩrʋ.
Lãlaardaar fʋlɛlɛ Sɩyɔ̃ɔ bɩsãsɔ a pɛ ƴɔɔ,
Da n jalna dɩ kpɩɩra.
6 Sɩyɔ̃ dɩ bɔbʋɔra,
Ɔɔ ɓɔ̃ buure fɛw.
Ɔɔ jamanasɔ debire ho jʋwala ʋ̃
thaarsɔɔkɛ na n yɛnɩ khʋʋla',
Dɩ wa n hana fãga
wɩ cana cɔ̃cɔlɩ ƴɛbʋrɔa'.
7 Bɔɔraakɛ Jerujalɛm hanɩ beesirera,
da n fi bililili,
A jɩnanɛ thɩ̃ ɓɔna fɛʋʋkɛ a kɔɔ hananɩ
Mama bɔɔ.
Ɔbɔɔkɛ ɔɔ too lonɩ sodaarɩ ɲɔ̃kɔɔ,
Sɩ ga do tibil hale a na bullua'.
Ɔɔ sodara yɩɩrɛ,
Dɩ wa n kãka ɔɔ bũburona'.
8 Jerujalɛm cʋʋrɛ sopuu dɩɩ kpal ka,
Gɛr dɔ kɩrʋ da n kʋ ƴɔ̃ƴʋɔnɛ.
Dɩ wɩrɛɛkɛ n kɔɔ cʋɔnɛɛnɩ,
Na n beesuu,
Mɔ̃ wɩ yɩnɩ ɔɔ sãɓɔlɔ̃.
Ɔɔ thɛthɛrakɛ n ɩɩrɛ a kpʋʋgana ƴɩɛ.
9 Ɔɔ jiin hale a maar ɔɔ kẽkẽ nɔsɔ,
Aa kpɩɛrna mɔ̃ ɔɔ pɩɩr pa na hana'.
Ɔɔ bũburõ phuroore,
Tibil na hale a ƴɔlʋ haara'.
Dɩ a sor: Pha, Thãgba Kɔ̃tɩn ya, yɛ ɩ̃ gaar!
Lãlar n be kũkune ɔɔ puno hanana.
10 Lãlar khɩɩrɛ thɩ̃ ɓɔna fɛʋʋkɛ
Hanɩ Jerujalɛm dɩ bɩnɔ.
Jerujalɛm dɩɩ torre ca kpɩɩsɔɔra yire,
Dɩ wɩ lona ɔɔ pa phu bɩnɔ,
Sɩrakɛ caarsɔ wɛɛkɛ na kɔɔ hananɩ hʋɛ
A na lõ afɩ too thɩ̃thɩɩna' yaa Kɔ̃tɩn.
11 Jerujalɛmdara fɛw n ser
Dɩ wa n ƴaalna dikor.
Wɩ gbaar awɩ thɩ̃ ɓɔ̃sɔ fɛʋʋkɛ
wɩ hananɩ a debɩna dikor,
Gɩ do nɔɔ wɩ hana yire.
Thãgba Kɔ̃tɩn yaa ! Hɩnɛ,
Yɛ mɔ̃ wɩ n beesɩ mɩnɩ.
12 Nɛrkɛ fɛw n kanɩ na hʋɛ,
ga n ha nar thalaa koe!
Nɩ hɩnɛnakɛ
Ado kharɛ hale a hona ɩ̃ kharɩkɛ,
Wɩ cʋʋ mɩnɩ ɓoɓo!
Thãgba Kɔ̃tɩn cʋʋ mɛr kharɛ
ɔɔ nĩkhi kɔ̃tɩ̃ wirə na sobɔr.
13 A hale ƴũu sa kpɛɛ mar dɔɔ,
Dɩɩ lõ mɩ khubərə. Ɔɔ pa gɩ the.
A pher mer kẽkẽ wi pheru nɛ balɔ,
A tɔ mɩ kpɛɛna khiru.
A cʋʋ mɛr dɩ̃ sɩ gelelele,
Dɩ ma n gaar wire fɛw.
14 A fʋrɔrɛ ɩ̃ puu cʋʋsɔ dɩɩ ho kpelele ɔɔ ɲɔ̃kɔɔ,
Gɩ paparɛ kha,
A khɩmɩ mɩ ulebire.
Kɔ̃tɩn pɩ mɛr fãga fɛw,
A gba mɛr to lãlaardaraa ɲɔ̃kɔɔ,
Kɛ hananɩ fãga a jɔ mɩ.
15 Thãgba Kɔ̃tɩn tʋɔrɛ ɩ̃ sɔrasɩ khesɔ fɛʋʋkɛ,
Mɩ kɔɔ hananɩ a kpɛɛlɛ.
A ber ko kɔ̃tɩ̃ɩ ɩ̃ irə,
Ɩnɩ n kʋʋrna ɩ̃ daɓolsɔ.
Thãgba Kɔ̃tɩn naan Judaa too,
Mɔ̃ wɩ n nanɩ dɩvɛ̃ be,
Dɩvɛ̃ ti koro.
16 Gelela fɛw dɔ kɩrʋ dɩ ma n bɩ,
Dɩ yinə do mɩ yilẽbi haar.
Gɩdonɩ ʋrɛra na kɔɔ ƴɔla mɩnɩ haar,
A na cʋʋ mɩ ɩ̃ 'li fãga,
a tɔr hʋnɔ fĩi sa faa mɩ.
Ɩ̃ bikũusɔ fɛw khiire,
Gɩdonɩ lãlar hananɛ fãga ka.
17 Sɩyɔ̃ 'laarɛ ɲɛ̃ɛ da n bɩɛl bulle,
Sɩ tibil na n ƴɔlʋ haara'.
Thãgba Kɔ̃tɩn tire lãlaraakɛ diəni Jakɔbɩra a pɩɛraa,
Jerujalɛm fire do kpɔ̃kpɔrɔ̃ thɩ̃ɛ awɩ thɩ̃thɩɩn.
18 Thãgba Kɔ̃tɩn sarɛ gɩrɛrakɛ a cʋʋnɩ,
gɩdonɩ mɩ nʋʋrɛ nũu ɔɔ nɔ thɩmɩsɔɔra.
Nɛr caar fɛw, nɩ pɛ nũu,
Nɩ yɛ kharɛɛkɛ mɩ yɩnɩ!
Wɩ fʋlɛlɛ ɩ̃ khebi khɔ̃ phasɔ na ɩ̃ daɓolsɔ a jalna dɩ kpɩɩra.
19 Mɩ wer wɩrɛɛkɛ kɔɔ naan mɩnɩ,
Dɩ wɩ fɩɩl mɩ.
Ɩ̃ bonɩ jidara na ɩ̃ dʋɔ kɔ̃tɩ̃sɔ khiire dɩ bɩnɔ,
Bɔɔraakɛ wɩ hanɩ dikor ƴaalɔ,
Gɩ do nɔɔ wɩ hana yire.
20 Thãgba Kɔ̃tɩn wei, hɩnɛ mɔ̃ ɩ̃ nɩwɛ hanɩ!
Kpɩɛrɛ ɲaɲaan mɛr ka,
Dɩ haar kʋɛ mɩ koo,
Gɩdonɩ mɩ kɔɔ ɩɩrnanɛ lãʋ na sobɔr.
Kʋʋr hale jɩɛra da n pɩ mɩ bɩsana,
Dɩ khir hakɛ dɩ bɩnɔ wo da n kʋ.
21 Wɩ nɩɛrɛ ɩ̃ se,
Sɩ tibil bɩɛlakɛ na ƴɔl mɩ haara'.
Ɩ̃ lãlaardara fɛw nɩɛrɛ ɩ̃ thɩlke,
Dɩ wa n kãka mɔ̃ gɩdonɩ fɛr pɩɛr.
Wireekɛra fɩ kɔɔ sonɩ
Fɩ cʋʋrɛ dɩɩ dã otirə,
Cʋɛ gɩ dã wɩ dakha mɔna gɩ dã mɩnɩ.
22 Hɩnɛ awɩ puukɛ wɩ cʋʋnɩ fɛw,
Sa cʋɛ wɩ mɔ̃kɛra fɩ cʋʋ mɩnɩ,
Dɩɩ do ɩ̃ nũ nʋʋr dɔ kɩrʋ!
Gɩdonɩ mɩ n ser jɔɔ,
Dɩ ma n ãga ɩ̃ hara.