Wahiu i

Pampeponoꞌokiꞌina

Hi Yesu Kerisitu Pe Hi Yohanes

Pemolukana lolita

Ohi suraꞌ hieꞌe mampowute hapo to nopetidoꞌki hi Yesu Kerisitu pe hi Yohanes, topeguruNa (1:1). Uluꞌ-uluꞌna hi Yohanes pangkiꞌ hi Yesu hibali Anaꞌ Manusiaꞌ to matengkaꞌ i lumbuna peꞌohaꞌa huluꞌ to pitu onu (1:12-18). Noꞌokiꞌ woꞌo hibali Tadulako to melambaꞌ i nara to popuhiꞌ (19:11-16). Hei hi Yesu noꞌokiꞌ hibali Anaꞌ Gimba to mahura i pahura kodatuana Pueꞌ Ala i suruga (5:6-14, 21:22-23, 22:1-5).

Suraꞌ hieꞌe noꞌukiꞌ i tempora tosarani nipoperima-rima alaꞌ pepoꞌohira pe hi Yesu. I tempo tiꞌo, lekiꞌ-lekiꞌna toaꞌ i kodatua Roma nirumbaꞌhi menomba pe Datu Roma to rotiꞌi Datu ngkodeꞌ. Uwaꞌhi tosarani to rorokoꞌ alaꞌ pepoꞌohira, hawaꞌhi hiniꞌ menomba pe Datu ngkodeꞌ. Uwaꞌhi woꞌo to maꞌoruꞌ ka pepoꞌohira alaꞌ morokaꞌhi. Io horiana ohi suraꞌ hieꞌe mampokaroho lalira tosarani, hingkeꞌna inioꞌhi mosapuaka pepoꞌohira pe hi Yesu.

Ohi suraꞌ hieꞌe nipowute i lali haꞌumbora langkaꞌ peponoꞌokiꞌi. Uwaꞌ pandiri' noniuꞌ Boo to ropakeꞌ i lali suraꞌ hieꞌe to handoaꞌi tene mononto palaihane i ingkiꞌ. Angkana kehapoꞌi hatoꞌo, pongkana poturuꞌ i suraꞌ hieꞌe monontomo: i lali duniaꞌ hieꞌe, ingkiꞌ tosarani hingkiꞌ nipoperima-rimaki, angkana inioꞌki maꞌoruꞌ ka pepoꞌohinta, alaꞌ i koꞌukoana duniaꞌ, Pueꞌ Yesu hingkiꞌ monani lekiꞌ-lekiꞌna poniꞌNa, hei moparenta wute nantolou-louna (11:15). Hei ingkiꞌ to metuntu pe Io hingkiꞌ moparentaki woꞌo moꞌawa hante Io.