Suraꞌ To Noꞌukiꞌ Hi
Yudas
1
1 Tabea ka aku hi Yudas. Suraꞌ hieꞌe ka aku hawiꞌna Yesu Kerisitu hei aku hieꞌe hineeꞌna hi Yakobusa. Kupokatu suraꞌ hieꞌe pe ingkei halali hampepoꞌohi to noꞌuwiꞌ Pueꞌ Ala Umoꞌta mewali toaꞌNa. Pueꞌ Ala mampokarimakei, hei Yesu Kerisitu hingkiꞌ mampoꞌodaꞌkei nturusi wute ikohupaꞌaNa huliꞌ. 2 Kuperapiꞌ pe Pueꞌ Ala hingkeꞌna Nopantidoꞌkikei komarimaNa, hei mampaꞌanikei romiꞌ ngkotuwuꞌ hante rimaNa. Lekiꞌna tiꞌo Nopaꞌanikikei hante maganaꞌ-ganaꞌ.Tungkaihana suraꞌ hieꞌe
3 Halali-halali to kupokarima! Uluꞌ-uluꞌna kukodokoꞌi mpololeke mampoꞌukiꞌkikei suraꞌ hieꞌe, hingkeꞌna kupowutekikei noniuꞌ i kotehompoꞌa to ka Pueꞌ Ala i ingkiꞌ, to totorimomo moꞌawa-awa. Angkana tewolihi pekiringka moꞌukiꞌ noniuꞌ tiꞌo, iomo hinaꞌ kuꞌukiꞌkikei hingkeꞌna ipokarohokei nturusi pepoꞌohimi i lali poturuꞌ to tuꞌu to hawaꞌi uwaꞌ kotewolihiane. Poturuꞌ tiꞌo nopowutemo Pueꞌ Ala pe lekiꞌ-lekiꞌna toaꞌ to mewali toaꞌNa.
4 Kuꞌukiꞌ lekiꞌ-lekiꞌne hieꞌe alaꞌ uwaꞌhi toaꞌ to mekaloi i lumbumi to mampowute poturuꞌ to masalaꞌ. Tongawa kohawaꞌre mengkoruꞌ pe Pueꞌ Ala, alaꞌ moroahi koholangkoa mampopodumbuꞌhi komoromiꞌna Pueꞌ Ala hingkeꞌna mowalihi walia to mekokomaꞌi hei mosapuakahi Pueꞌta Yesu Kerisitu to makuasaꞌ moparentaki. Toaꞌ to mepokonawuꞌ tiꞌo, hingkiꞌ nihukuhi, hei hukuara tiꞌo nopokonontomo umbiꞌ Pueꞌ Ala.
Pehukuna Pueꞌ Ala i toaꞌ to kodake waliara
5 Halali-halali, kehapoꞌi ibahaꞌmokei lekiꞌ-lekiꞌna to kutiꞌikikei hieꞌe, kukodokoꞌi mampakaꞌingaꞌikei huliꞌ hohumbo pehukune Pueꞌ Ala i toaꞌ to kodake waliara. Hampiha Pueꞌ Ala mampohente toSaraeli ka konipohawiꞌra i woiꞌ Masiri. Angkana uko tiꞌo, uwaꞌhi to hawaꞌi mepoꞌohi, mewali toaꞌ tiꞌo Norokoꞌhi i popada lori. 6 Ibahaꞌmokei woꞌo noniuꞌ i malaꞌeka to meꞌohaꞌ i suruga. Hampiha hadolaꞌ malaꞌeka, hawaꞌi mampohampaꞌ jama to nopaꞌanikihi Pueꞌ Ala, iomo hinaꞌ molaihi mampolihi peꞌohaꞌara to i suruga. Malaꞌeka tiꞌo nohiluꞌhi Pueꞌ Ala hante rante to maroho mpololeke, hei Nipolontuhuhi i lali pebolaꞌa to mokorindi, wute tempora nihukuhi i ando pobutusi. 7 Hatoꞌo woꞌo toaꞌ to meꞌohaꞌ i kota Sodomo hante Gomora uluꞌana, hei kota-kota ntaniꞌna to dodungku itoꞌo, pahuahi woꞌo pehuku alaꞌ waliara kodake mpololeke. Mebualosihi, mowalihi walia to mekokomaꞌi, hei woriꞌ tene waliare to mekokomaꞌi. Iomo hinaꞌ kotara nihunu, hei lekiꞌ-lekiꞌna toaꞌ niporopuꞌ. Pehukuna Pueꞌ Ala pe toSodomo hante toGomora tiꞌo mewali pepaꞌingaꞌi i lekiꞌ-lekiꞌna toaꞌ, alaꞌ lekiꞌ-lekiꞌna toaꞌ to kodake waliara hingkiꞌ nihuku i lali api to makiꞌ nturusi to hawaꞌi mokoꞌukoa.
8 Hatoꞌo woꞌo hinewowoꞌena, uwaꞌ tene toaꞌ i lumbumi to mampoꞌohihi nturusi pepototurura. Koꞌukoana mokokomaꞌiluhi wotara hante waliara hadoduora. Mosapuakahi woꞌo kuasaꞌna Pueꞌ Ala, hei mosalaꞌihi lekiꞌ-lekiꞌna malaꞌeka to makuasaꞌ i suruga. 9 Hawaꞌhi hibali hante hi Mikael, haduo malaꞌeka to motadulakoi lekiꞌ-lekiꞌna malaꞌeka. Io hawaꞌi podehoꞌ mopakeꞌ kuasaꞌna mosalaꞌi Belisiꞌ tempora mamposisalaꞌi wotalokaꞌna nabi Musa, ba hihimo to hingkiꞌ moroa, angkana nopantiꞌikilu hi Mikael, “Kuperapiꞌ hingkeꞌna Pueꞌ hadoduoNa to hingkiꞌ mokamorokiko!” 10 Angkana toaꞌ to mepokonawuꞌ tiꞌo, mosalaꞌiluhi lekiꞌ-lekiꞌna to hawaꞌi robahaꞌ. Toaꞌ tiꞌo hibalihi pinatuwuꞌ, alaꞌ motuntuniluhi peleihana lalira hadoduora, hawaꞌhi mampekiri ba moromiꞌi ba kodake. Hei nokomi waliara to hatoꞌo, iomo horiana hingkiꞌ pahuahi pehuku to mampomanasa.
11 Hurewuꞌhi, alaꞌ mampetuntuiluhi waliana hi Kai hampiha, hei mangkodokoꞌiluhi pahua porasiꞌara moliu waliara to salaꞌ hibali hante hi Bilea. Moꞌewahi Pueꞌ Ala hibali hi Kora hampiha, hei bateꞌna hingkiꞌ noporopuꞌhi Pueꞌ Ala hibali woꞌo hi Kora.
12 I tempomi morampu mangka-mangka mamponindi rimana Pueꞌ, toaꞌ to mepokonawuꞌ tiꞌohi mangkahi woꞌo moꞌawa-awa hante ingkei hibalihi halalimi, angkana melolongkoꞌi loleke waliare, lolutuluhi mampekiri wotara hadoduora.
Toaꞌ tiꞌohi hawaꞌi modumbuꞌ.
Hibalihi kini to nokomi parowo,
angkana hawaꞌi mangkomi ura.
Hibalihi loti to hawaꞌi mowuaꞌ
i tempona mowuaꞌ.
Hei hibalihi woꞌo loti to mowuko hante wakaꞌ-wakaꞌna,
to hamboaꞌmo hingkiꞌ tuwuꞌ.
13 Hibalihi balumba tahiꞌ to makaja pewowiriꞌne, to mampohente komaꞌ i bota ntahiꞌ,
watoꞌo woꞌo waliara to mepokohili.
Iohi hibalihi betueꞌ to hawaꞌi mononto patengkaꞌna.
Pueꞌ Ala mampatimomokihi peꞌohaꞌa to mokorindi mpololeke. Konihukuara intu wute nantolou-louna.
14 Uwaꞌ lolitane nabi Henoꞌ uluꞌana noniuꞌ i pehukuna Pueꞌ Ala pe toaꞌ to mepokonawuꞌ to uwaꞌ i tempo hieꞌe. Hi Henoꞌ tiꞌo iomo muleꞌna hi Adama to kopitu lapina. Notiꞌi waheꞌe: “Tuꞌu mpololeke to kutiꞌikikei hieꞌe: Pueꞌ hingkiꞌ mehupaꞌ moꞌawa-awa hante malaꞌekaNa to Mangkolehi to i sabuna koworiꞌre. 15 Io hingkiꞌ mehupaꞌ mobutusi kara-karana lekiꞌ-lekiꞌna toaꞌ, hei hingkiꞌ mohuku lekiꞌ-lekiꞌna toaꞌ to hawaꞌi mengkoruꞌ pe Io. Mowalihi walia to kodake, hei mosapuakahi Pueꞌ Ala moliu pololitara.”b
16 Toaꞌ tiꞌohiꞌo, hawaꞌhi pangkororeina: konunuꞌahi nturusi pe Pueꞌ Ala hei mosalaꞌihi toaꞌ ntaniꞌna. Mampetuntuiluhi peleihana lalira to kodake, mampokokodeꞌhi hei mohohinihi lalira toaꞌ hingkeꞌna pahuahi rasiꞌ.
Lala kotuwuꞌta hangangaa mehupaꞌ ka pepoꞌohinta
17 Angkana ingkei halali-halali to kupokarima, hangangaa ipoꞌilalikei hapo to ropowutemo surona Pueꞌta Yesu Kerisitu. 18 To ropowutekikei iomo: “Ane dodungkumo tempo koꞌukoana duniaꞌ, hingkiꞌ uwaꞌhi toaꞌ to hingkiꞌ mampononaꞌa pepoꞌohinta. Hingkiꞌ motuntuniluhi peleihana lalira tokodake, to hawaꞌi mengkoruꞌ pe Pueꞌ Ala.” 19 Iomohi to mampoꞌuwaꞌ posisalaꞌ i lumbumi. Hawaꞌhi nokuasaꞌi Inohaꞌ Mangkolehi, angkana nokuasaꞌihi peleihana lalira hadoduora to hawaꞌi hintotoꞌ hante peleihana Pueꞌ Ala.
20-21 Angkana ingkei halali-halali to kupokarima! Pueꞌ Ala mampokarimakei. Mewaliꞌ hangangaa ipoꞌilalikei nturusi komarimaNe. Mekokaekei nturusi motuntuni perandana Inohaꞌ Mangkolehi. Ipokarohokei pepoꞌohimio to Mangkolehi, hingkeꞌna pepoꞌohimi tiꞌo mewali tikoa i kotuwuꞌmi. Hei mepohinarukei nturusi hingkiꞌ pahua kotuwuꞌ to wolaꞌ to hawaꞌi mokoꞌukoa ikohupaꞌaNa huliꞌ Pueꞌta Yesu Kerisitu, alaꞌ kodeꞌ rimaNe pe ingkei.
22 Ane uwaꞌhi toaꞌ i lumbumi to mororangko tene pepoꞌohina, hangangaa ipokarimakei. 23 Isulungikei hei ipoturuꞌkei hingkeꞌna mahuliꞌhi womo hei pahuahi kotehompoꞌa, hibali toaꞌ to niꞌoreꞌ ka lali api. Angkana uwaꞌhi woꞌo toaꞌ to motuntunilu peleihana lalira to kodake. Ipokarimakei woꞌo, angkana majaga-jagakei hingkeꞌna hawaꞌkei woꞌo nolihiꞌ dosara hei hawaꞌkei woꞌo motuntuni waliara to mekokomaꞌi.
Pepokodeꞌ i Pueꞌ Ala
24 Ipokodeꞌmokei Pueꞌ Ala
alaꞌ Iolu to makuasaꞌ mampoꞌodaꞌkei
hingkeꞌna hawaꞌkei monawuꞌ i lali dosa,
hei Io hingkiꞌ mangkomikei
hingkeꞌna wadikei metotiꞌi i hinaroNa
hei pangkiꞌ komanobaꞌNa.
Hingkeꞌna hamboaꞌmo uwaꞌ komasalaꞌmi i pampeꞌeleNa,
hei lalimi hingkiꞌ motanaꞌ.
25 Pueꞌ Ala, hawaꞌi uwaꞌ kohibobaliaNe.
Io to mohompoꞌki ka pehukua dosanta
moliu Pueꞌta Yesu Kerisitu.
Topokodeꞌ konaꞌNe alaꞌ Iolu
to manobaꞌ,
to kodeꞌ tuwuꞌNa,
hei to makuasaꞌ.
Hei Io to masipatoꞌ moparenta,
ka uluꞌ-uluꞌna, hei
hinewowoꞌena,
wute nantolou-louna. Amin!