Tokorintus nipandiriꞌ hibali haꞌanu suraꞌ to noꞌukiꞌ Kerisitu
3
1 Ba ipekirikei mamperenaki womoka alaꞌ kitiꞌiꞌi ingka to noꞌuwiꞌ Pueꞌ Ala mampowute Kareba Moromiꞌ? Hawaꞌka hibali haꞌumbora guru agama ntaniꞌna to mehupaꞌ i ingkei to mampowute pamperenaki ka awara hingkeꞌna nitorimohi, hei ane molaihi, merapiꞌ womohi suraꞌ pamperenaki ka ingkei! Ingka, hawaꞌka mamparaluꞌi suraꞌ to hatoꞌo. 2 Ingkeimo to hibali suraꞌ pamperenaki to teꞌukiꞌ i lalingki, teꞌukiꞌ hante Inohaꞌ Mangkolehi. Alaꞌ kotewolihina lalimi, lekiꞌ-lekiꞌna toaꞌ to pangkiꞌ kotuwuꞌmi pobahaꞌ komoromiꞌna pajamangki mampowute Kareba Moromiꞌ pe ingkei. 3 Nipomombaha pe lekiꞌ-lekiꞌna toaꞌ wuaꞌne pajamangki mampowute kareba noniuꞌ Kerisitu i ingkei. Ingkei hibali haꞌanu suraꞌ to noꞌukiꞌ Kerisitu. Suraꞌ tiꞌo hawaꞌi Noꞌukiꞌ hante tinta ba i watu poꞌukiꞌa, angkana Kerisitu moꞌukiꞌmo lolitaNa i lalimi alaꞌ kuasaꞌna Inohaꞌna Pueꞌ Ala to tuwuꞌ.Pueꞌ Ala mampaꞌaniki komapande
4 Wadi kitiꞌi ingkeimo wuaꞌne pajamangki, alaꞌ mepoꞌohika pe Pueꞌ Ala nokomi pohintuwuꞌki hante Kerisitu. 5 Hawaꞌi kitiꞌi kibiaꞌ mampopatengkaꞌ jamana Pueꞌ ka komapandengki hadoduongki. 6 Pueꞌ Ala to mampaꞌanika komapande mampowute noniuꞌ dandiNa to wolaꞌ. DandiNa to wolaꞌ tiꞌo handoꞌio atura-aturaNa to noꞌukiꞌ hi Musa hampiha angkana ka Inohaꞌ Mangkolehi. Atura to teꞌukiꞌ tiꞌo mangkomiki pe komahia. Angkana Inohaꞌ Mangkolehi mampaꞌaniki kotuwuꞌ to wolaꞌ to hawaꞌi mokoꞌukoa.
7 Hampiha Pueꞌ Ala moꞌukiꞌ Aturana i watu poꞌukiꞌa hei Nopaꞌaniki nabi Musa. Alaꞌ pewantana Pueꞌ Ala, liona hi Musa woꞌo mewanta, horiana hawaꞌi robiaꞌ toSaraeli mampenotoꞌ liona hi Musa tiꞌo. Angkana pewantana tiꞌo hampaiꞌlu. Aturana Pueꞌ Ala tiꞌo to teꞌukiꞌ i watu, mangkomi komahia pe toaꞌ, alaꞌ hawaꞌi tobiaꞌ mampetuntui atura tiꞌo. Angkana kehapoꞌi hatoꞌo, kodeꞌ pewantane Pueꞌ Ala i tempona atura tiꞌo nipepaꞌaniki, 8 hapona tene i dandina Pueꞌ Ala to wolaꞌ to Nopepaꞌaniki Inohaꞌ Mangkolehi, meliu tene pewantane. 9 Ane makuasaꞌi aturaNa to noꞌukiꞌ hi Musa to mangkomi manusiaꞌ pe komahia, meliu tene komakuasaꞌne podandia to wolaꞌ to mampomodame manusiaꞌ hante Pueꞌ Ala. 10 Kodeꞌ kuasaꞌne aturana Pueꞌ Ala to hohaimo. Angkana ane topohibali kuasaꞌ tiꞌo hante kuasaꞌna dandiNa to wolaꞌ, aturaNa to hohaimo tiꞌo rorekeꞌ hibali hamboaꞌmo uwaꞌ kuasaꞌne. 11 Ane dandiNa to hohaimo to hampaiꞌlu tiꞌo umbiꞌ makuasaꞌ, meliu tene kuasaꞌne dandiNa to wolaꞌ to hawaꞌi hingkiꞌ mokoꞌukoa.
12 Mewaliꞌ, alaꞌ pepohinarungki i dandina Pueꞌ Ala to wolaꞌ, iomo horiana hawaꞌka motehuꞌ mampowute Kareba Moromiꞌ. 13 Ingka hawaꞌka hibali nabi Musa hampiha to hangangaa mehampuꞌ mohobiꞌi liona hingkeꞌna toSaraeli hawaꞌi pangkiꞌ pewantana liona to komoholi-holia. 14 Angkana ane toSaraeli hampiha, tetutuꞌi pekirire {alaꞌ hawaꞌhi pobahaꞌ tungkaihana Aturana Pueꞌ Ala}. Wute hinewowoꞌena, ane mobasahi suraꞌ podandina Pueꞌ Ala to hohaimo, tetutuꞌi tene pekirire. Hei Kerisitulu, to wadi mampaꞌanihi pekiri. 15 Wute hinewowoꞌena, ane mobasahi suraꞌ to noꞌukiꞌ nabi Musa, hibali uwaꞌ to motutuꞌi pekirire. 16 Angkana ane mengkatobaꞌmohi pe Pueꞌ, tebungkahimo to motutuꞌi pekirire tiꞌo, 17 alaꞌ Pueꞌ iomo Inohaꞌ Mangkolehi, hei ane Inohaꞌ Mangkolehina Pueꞌ uwaꞌ i ingkiꞌ, hingkiꞌ tepohenteki ka hinangkana to mokaꞌaki ka Pueꞌ. 18 Mewaliꞌ, ingkiꞌ lekiꞌ-lekiꞌta to mepoꞌohi pe Pueꞌ, hamboaꞌmo uwaꞌ to mohida pekirinte. Hibaliki pemororoa to mampomombaha wantana Pueꞌ, hei wantaNa tiꞌo mowolihi pekirinta. Komorue-rueha, tetambai wantane Pueꞌ i lali kotuwuꞌta wute mewaliki hibali hante Io. Inohaꞌ Mangkolehinalu Pueꞌ to mowolihi pekirinta.