2
1 Mewaliꞌ, kutiꞌi i lalingku: inioꞌkei dulu ako kukadoroꞌi, alaꞌ hawaꞌi kulei mampomaporiꞌ womo lalimi, hibali to mewali hampiha i tempomi kukadoroꞌi. 2 Alaꞌ ane kupomasusa womo lalimi, hihimoreꞌi to kupohinaru hingkiꞌ mampododoliꞌa? Bateꞌnalu ingkei to kahampihamo kupomasusa lalimi. 3 Iomo tungkaihangka hinaꞌ kupokatumo haꞌanu suraꞌ pe ingkei hampiha,a hingkeꞌna ane mehupaꞌa, hamboaꞌmo ipomasusakei lalingka. Alaꞌ kotuꞌuana, ingkei wae to hangangaa mampomotanaꞌ lalingku. Hei kupoꞌohi, ane motanaꞌa, ingkei woꞌo hingkiꞌ motanaꞌ. 4 I tempona kuꞌukiꞌ suraꞌ tiꞌo hampiha, maporiꞌ mpololeke kuhori hei kupohanondoiha; tidoꞌmo uwai matangka. Hawaꞌi kuꞌukiꞌ suraꞌ tiꞌo hingkeꞌna kupomasusa lalimi, angkana suraꞌ tiꞌo kuꞌukiꞌ hingkeꞌna ibahaꞌkei hohumbo kokodeꞌne rimangku pe ingkei.Hi Paulu merapiꞌ hingkeꞌna tokorintus
5 Hinewowoꞌena kukodokoꞌi moꞌukiꞌ noniuꞌ i haduo toaꞌ i lumbumi to masalaꞌ mpololeke. Waliana tiꞌo handoꞌiolu aku to nopomasusa, angkana mampomasusa woꞌo lekiꞌna lalimi ba hadolaꞌ ka ingkei. Hawaꞌi kulei motambai-tambai hapo to mewali. 6 Woriꞌkei to mobutusi toaꞌ tiꞌo hangangaa nihuku, hei kutiꞌikikei, ganaꞌmo pehukumi i io. 7 Hinewowoꞌena hangangaa niꞌampuni hei ipododoli laline toaꞌ tiꞌo, hingkeꞌna hawaꞌi rahi masusa pekirine wute hamboaꞌmo uwaꞌ pepohinaruane. 8 Iomo horiana kuperapiꞌ hingkeꞌna ipotongawakei komarimami pe io. 9 I lali suraꞌku to kupokatumo pe ingkei,b hawaꞌkei kurumbaꞌ mohuku toaꞌ tiꞌo. Tungkaihangku moꞌukiꞌ suraꞌ tiꞌo, kupampeꞌeleikei, ba hingkiꞌ ipetuntuikei lekiꞌ-lekiꞌna hawaꞌka ba hawaꞌi. 10 Angkana hinewowoꞌena kutiꞌikikei: ane iꞌampunikei salaꞌne awami, aku woꞌo hingkiꞌ moꞌampuniꞌi. Ane uwaꞌ salaꞌna pe aku, kuꞌampuni i hinarona Kerisitu! Kuwali hatoꞌo alaꞌ koꞌingkeina. 11 Iomo horiana kutiꞌi, hangangaa toꞌampuni toaꞌ to masalaꞌ, hingkeꞌna hawaꞌi uwaꞌ tempone Belisiꞌ monaniki, alaꞌ tobahaꞌ: Belisiꞌ tiꞌo mapande moꞌakalai toaꞌ hingkeꞌna monawuꞌhi pe lali dosa.
Lalina hi Paulu hawaꞌi tinto,
12 Kololiuhana halali-halali, hampiha i kopolaingku ka kota Epesu, nolouꞌa pe kota Troas mampowute Kareba Moromiꞌ noniuꞌ i Kerisitu. I kohupaꞌku i Troas, Pueꞌ mampaniꞌa lala hingkeꞌna majamaꞌa itoꞌo. 13 Angkana kehapoꞌi hatoꞌo, hawaꞌi tinto lalingka, alaꞌ hi Titus handoaꞌi tene mahuliꞌ mampowute kareba ka ingkei tokorintus. Iomo horiana mesabiꞌmoꞌa pe halali hampepoꞌohingku to uwaꞌ i Troas, hingkeꞌna humeiꞌa iseꞌe i woiꞌ Makedonia mampaliꞌ hi Titus.
Hi Paulu mampololita pajamana
14 Angkana kutiꞌi woriꞌ komoromiꞌna pe Pueꞌ Ala, alaꞌ pohintuwuꞌki hante Kerisitu, penanika, hei Io mewali tadulakongki to morandaka nturusi. Pueꞌ Ala mampowute Kareba Moromiꞌ moliu i ingka pe lekiꞌ-lekiꞌna toaꞌ i imbo-imbolu, hingkeꞌna wadihi woꞌo pobahaꞌ Pueꞌ Ala. Kareba Moromiꞌ tiꞌo wadi nipandiriꞌ hibali bokaꞌ to mewowau. 15-16 Nokomi pampowutengki kareba noniuꞌ i Kerisitu, iomo horiana mewowauka i pampeꞌelena Pueꞌ Ala, hei i lumbura lekiꞌ-lekiꞌna toaꞌ. I toaꞌ to mampoꞌohi Kareba Moromiꞌ, nipandiriꞌka hibali dupaꞌ to mewowau, alaꞌ kipowutekihi kareba to mangkomihi pe kotuwuꞌ to wolaꞌ to hawaꞌi mokoꞌukoa. Angkana i toaꞌ to mosapuaka Kareba Moromiꞌ, ingka to mampowute Kareba Moromiꞌ tiꞌo, nipandiriꞌka hibali wau to mahi, alaꞌ kipowutekihi kohingkiꞌ nohukure Pueꞌ Ala wute nantolou-louna.
Uwaꞌreꞌi to pobiaꞌ mampopatengkaꞌ jama hieꞌe hante rohona hadoduona? 17 Ingka hieꞌe, hawaꞌka hibali toaꞌ to mampaliꞌlu rasiꞌ ka pampowuteki hawaꞌna Pueꞌ. Angkana, alaꞌ kibahaꞌ Pueꞌ Ala to moꞌuwiꞌka mampopatengkaꞌ jamaNa, hei Io mampeꞌele pajamangki tiꞌo, iomo horiana kipowute hawaꞌne Pueꞌ ka lalingki mpololeke alaꞌ pohintuwuꞌki hante Kerisitu.