Toaꞌ to mampowute Kareba Moromiꞌ
4
1 Ka komarimana laliNa, Pueꞌ Ala moꞌuwiꞌka mewali topajamaNa, iomo horiana hawaꞌka motehuꞌ mampowute Kareba Moromiꞌ. 2 Kikoꞌelai hinangkana walia to mepokohili; hawaꞌi uwaꞌ to kiwowuni; hawaꞌka mampomonawuꞌ toaꞌ; hawaꞌka woꞌo mowolihi hawaꞌna Pueꞌ Ala. I hinarona Pueꞌ Ala, kipowute hapo to tuꞌu, hei kipohinaru lekiꞌ-lekiꞌna toaꞌ hingkiꞌ mampeꞌele waliangki ba maniuꞌmoꞌi!3 Ane Kareba Moromiꞌ to kipowute hawaꞌi tongawa i toaꞌ, alaꞌ tetutuꞌi tene pekirire, toaꞌ tiꞌo to nihuku wute nantolou-louna. 4 Hawaꞌhi mepoꞌohi, alaꞌ nopowulihia Belisiꞌ to mokuasaꞌi duniaꞌ hieꞌe, koꞌukoana hawaꞌhi pobahaꞌ ohina Kareba Moromiꞌ noniuꞌ i komanobaꞌna tuwuꞌna Kerisitu, hei Kerisitu tiꞌo hibali hante Pueꞌ Ala.
5 Hawaꞌka mampowute kareba noniuꞌ i wotangki hadoduongki. To kipowute, kareba to mantiꞌi: Hi Yesu Kerisitu iomo Pueꞌ, hei Io morumbaꞌka ako mosulingikei. 6 Ikonowalina Pueꞌ Ala laniꞌ hante woiꞌ, Notiꞌi, “Ka komokorindiana, mewalimo mobaro!” Hei Pueꞌ Ala to mampomobaro pekirinta, hingkeꞌna toꞌokiꞌ hei tobahaꞌ wantane Pueꞌ Ala moliu Kerisitu.
Hi Paulu mampowute Kareba Moromiꞌ
7 Ingka wadika nipandiriꞌ hibali kiri woiꞌ,b angkana kiri woiꞌ tiꞌo buhaꞌ parewa to masuliꞌ hilina, palaihana, kehapoꞌi toaꞌluka, kibahaꞌ Kareba Moromiꞌ to mampomobaro lalira toaꞌ. Mombaha kokodeꞌna kuasaꞌna Kareba Moromiꞌ to kipowute tiꞌo mowolihi lalira toaꞌ, hei kuasaꞌ tiꞌo handoꞌio ka ingka hadoduongki, angkana ka Pueꞌ Ala.
8 Pe imbo-imbolu koꞌakoangki, pahuaka nturusi woriꞌ komaporiꞌ, angkana hawaꞌka maꞌoruꞌ. Kipowuli, angkana hawaꞌka mampohinte pepohinaruangki pe Pueꞌ Ala. 9 Ropoperima-rimaka, angkana Pueꞌ hawaꞌi mampolihika. Rokondoka, angkana hawaꞌka mahi. 10 Pe imbo-imbolu koꞌakoangki, kibahaꞌ hingkiꞌ rorokoꞌka hibali hante hi Yesu.c Angkana kehapoꞌi hatoꞌo, kipowute nturusi Kareba Moromiꞌ, hingkeꞌna mombaha kotuwuꞌna huliꞌ hi Yesu, hei kotuwuꞌNa tiꞌo tongawa i lali wotangki. 11 Kolentuꞌangki tene tuwuꞌ i duniaꞌ hieꞌe, woriꞌhi toaꞌ to mangkodokoꞌi morokoꞌka alaꞌ petuntuki pe Pueꞌ Yesu. Angkana tiꞌo mewali hingkeꞌna tongawa kotuwuꞌna Pueꞌ Yesu i lali wotangki to hingkiꞌ mahi. 12 Ingka mohinoroika nturusi komahia, alaꞌ nokomi pajamangki mampowute Kareba Moromiꞌ, hingkeꞌna ingkei pahuakei kotuwuꞌ to wolaꞌ to hawaꞌi mokoꞌukoa.
13 I lali Suraꞌ Mangkolehi, teꞌukiꞌ waheꞌe: “Mepoꞌohiꞌa, iomo horiana hawaꞌa motehuꞌ mampowute lolitaMu.” Hatoꞌo woꞌo, ingka mepoꞌohika pe Pueꞌ Ala, iomo horiana hawaꞌka motehuꞌ mampowute Kareba Moromiꞌ. 14 Pueꞌ Ala mampotuwuꞌmo huliꞌ Pueꞌ Yesu. Iomo horiana kipoꞌohi, hampiha tempo Io woꞌo hingkiꞌ mampotuwuꞌka huliꞌ, hei Mangkomika moꞌawa hante ingkei nolou pe hinaroNa. 15 Lekiꞌ-lekiꞌna komaporiꞌ to kihua modumbuꞌ mpololeke i ingkei, hingkeꞌna koworiꞌ-woriꞌa toaꞌ hingkiꞌ mohoriki komarimana Pueꞌ Ala. Iomo horiana ingkiꞌ lekiꞌ-lekiꞌta hingkiꞌ mantiꞌi woriꞌ komoromiꞌna pe Pueꞌ Ala, koꞌukoana konaꞌNa nipokodeꞌ.
16 Mewaliꞌ, iomo horiana hawaꞌka mampohinte pepohinaruangki pe Pueꞌ Ala. Kehapoꞌi komoledeꞌ-ledeꞌa wotangki hieꞌe, angkana ando-ando kihua roho lali to wolaꞌ ka Pueꞌ. 17 Komaporiꞌ to kihua hinewowoꞌena, monangkoꞌ hei hampaiꞌlu, hei hingkiꞌ pahuaka kotuwuꞌ to manobaꞌ mpololeke to hawaꞌi mokoꞌukoa. Komanobaꞌ tiꞌo to hingkiꞌ kihua meliu tene kokodeꞌne ka komaporiꞌ to kilentu hinewowoꞌena. 18 Mewaliꞌ, hawaꞌi kipekiri hapo to hohumbo niꞌokiꞌ hinewowoꞌena. To kipekiri, to handoaꞌi tene niꞌokiꞌ, alaꞌ to niꞌokiꞌ, hawaꞌi hingkiꞌ mantaha wute nantolou-louna, angkana to handoaꞌi tene wadi roꞌokiꞌ, iomo to hingkiꞌ uwaꞌ nturusi wute nantolou-louna.