Noniuꞌ pangka to nipopenomba pe lomoa
8
1 Kololiuhana, hingkiꞌ mololitaꞌa noniuꞌ pangka to nipopenomba pe lomoa. Itiꞌikei, “Ingkiꞌ toSarani, mapandeki. Tobahaꞌmo poturuꞌ to tuꞌu.” Tuꞌu mpololeke, angkana kutiꞌikikei: nokomi komapande, toaꞌ mampokokodeꞌ. Angkana rima mampokaroho kotuwuꞌta. 2 Uwaꞌ haduo toaꞌ mantiꞌi, “Mapande” hantaro kotuꞌuana, komapandene hawaꞌi mokonolouha. 3 Angkana toaꞌ to tuꞌu-tuꞌu mampokarima Pueꞌ Ala, Pueꞌ Ala pobahaꞌi.4 Mewaliꞌ, noniuꞌ i pangka to ropopenomba pe lomoa, uwaꞌkei to mantiꞌi wadilu niꞌoka, alaꞌ tobahaꞌ kohawaꞌna uwaꞌ pueꞌ ntaniꞌna, bateꞌnalu Pueꞌ Ala. Hei tobahaꞌ: ka lekiꞌ-lekiꞌna lomoa to ropenombai, hawaꞌi uwaꞌ howeꞌ halangkaꞌ to tuꞌu. 5 Woriꞌ langkaꞌ to ropenombai toaꞌ, to rotiꞌi pueꞌ ba lomoa, moromiꞌ i laniꞌ, moromiꞌ i womboꞌ duniaꞌ. 6 Angkana pe ingkiꞌ to mepoꞌohi, haduolu Pueꞌ Ala, Iomo Umoꞌta, hei lekiꞌ-lekiꞌna to uwaꞌ pongkana ka Io. Nopaꞌaniki kotuwuꞌ hingkeꞌna mampokodeꞌki konaꞌNa. Hei haduolu Pueꞌte, Iomo Yesu Kerisitu. Moliu hi Yesu tiꞌo, Pueꞌ Ala mowali lekiꞌ-lekiꞌna to uwaꞌ i duniaꞌ, hei alaꞌ kohiYesuna, pahuakei kotuwuꞌ to wolaꞌ.
7 Angkana kehapoꞌi hatoꞌo, hawaꞌi lekiꞌ-lekiꞌna toSarani to pobahaꞌ tiꞌo. Uwaꞌhi to menomba pe lomoa ikohandoaꞌara pobahaꞌ Pueꞌ, hei wute hinewowoꞌena, ane pangka to ropopenomba pe lomoa, rotiꞌi i lalira, “Menomba womoki pe lomoa!” Mewaliꞌ, ane mangkahi pangka tiꞌo, rotiꞌi i lalira, “Madosaki,” alaꞌ bata-bata tene lalire ba wadi niꞌoka ba hawaꞌi. 8 Kotuꞌuana, pangka tiꞌo hawaꞌi mangkomiki dodungku pe Pueꞌ Ala hei hawaꞌi woꞌo mangkomiki moꞌela ka Pueꞌ Ala. Ane toꞌokaꞌi, hawaꞌki morasiꞌ, hei ane hawaꞌi toꞌoka, hawaꞌki woꞌo marugiꞌ.
9 Angkana hangangaa moromiꞌ-romiꞌkei. Lekiꞌ-lekiꞌna pangka wadi toꞌoka, angkana inioꞌ ka hapo to toꞌoka topokonawuꞌ awante to handoaꞌi tene maroho pepoꞌohina. 10 Ingko to maroho pepoꞌohimu wadiko mangka hapolu, angkana ane mangkako pangka to nipopenomba pe lomoa i tambi penombahara pe lomoa hei noꞌokiꞌko halali hampepoꞌohimu to handoaꞌi maroho pepoꞌohina, waliamu tiꞌo mamparukuꞌi mangka hante komomaꞌa. 11 Iomo horiana, alaꞌ koꞌibahaꞌnamokei pangka tiꞌo wadi niꞌoka, ipokonawuꞌ halalimi to bata-bata tene lalina. Hei to ipokonawuꞌ tiꞌo, iomo halali hampepoꞌohimi to nosulewotai Kerisitu moliu i konirokoꞌNa. 12 Ane iwalikei to hatoꞌo, masalaꞌkei, alaꞌ ipokonawuꞌ halalimi to hawaꞌi tene maroho pepoꞌohina, hei madosa mpololekekei i pampeꞌelena Kerisitu. 13 Iomo horiana kutiꞌikikei: ane rapaꞌna kupokonawuꞌ halali hampepoꞌohingka alaꞌ kokuꞌokana bouꞌ ba pangka, agina hamboaꞌmo hingkiꞌ kuꞌoka pangka tiꞌo, hingkeꞌna hawaꞌi uwaꞌ halalingka to monawuꞌ alaꞌ waliangku.