Hi Paulu mepoturuꞌ noniuꞌ i adaꞌ kohamoko
7
1 Halali-halali, hinewowoꞌena hingkiꞌ kuhoniꞌ peꞌitanomi to niꞌukiꞌ i lali suraꞌmi to nipakatukiꞌa, alaꞌ uwaꞌkei to mantiꞌi, moromiꞌ ane tomaꞌani hawaꞌi mohantambi. 2 Angkana kutiꞌi, hingkeꞌna hawaꞌhi uwaꞌ to mowali to kodake, moromiꞌ ane tomaꞌani uwaꞌ hantambine, hei hatoꞌo woꞌo towoweꞌe hangangaa uwaꞌ maꞌanine. 3 Tomaꞌani hangangaa mobuhoꞌi peleihana hantambina, hatoꞌo woꞌo towoweꞌe pe maꞌanina. 4 Towoweꞌe hawaꞌi makuasaꞌ i wotana hadoduona, angkana maꞌanina. Hatoꞌo woꞌo tomaꞌani hawaꞌi makuasaꞌ i wotana hadoduona, angkana hantambina. 5 Ingkei tohamoko, inioꞌkei poko momehoha. Angkana, ane rapaꞌna moliwokei hingkiꞌ momekohelaꞌ hampaiꞌ hingkiꞌ uwaꞌ tempomi mekokae, hei mohintuwuꞌkei mahuliꞌ hingkeꞌna hawaꞌkei nokeloi Belisiꞌ alaꞌ kohawaꞌna nibiaꞌ morii peleihana lalimi. 6 To kutiꞌi hieꞌe, handoꞌio hawaꞌ angkana kupoliukei hatoꞌo. 7 Kotuꞌuana, kulei mpololeke ane ingkei lekiꞌ-lekiꞌmi hibali hante aku, hawaꞌkei mohantambi. Angkana haduo-haduoki pahua rima pepaꞌani to moꞌori-ori ka Pueꞌ Ala. Haduo pahua rima pepaꞌani hingkeꞌna hamoko, hei haduo pahua rima pepaꞌani hingkeꞌna hawaꞌi hamoko, angkana lekiꞌ-lekiꞌna rima pepaꞌani tiꞌo ka Pueꞌ Ala.8 Mewaliꞌ toaꞌ to handoaꞌi tene hamoko ba tobembaꞌ, kutiꞌikikei: moromiꞌ ane hawaꞌkei hamoko hibali hante aku. 9 Angkana ane hawaꞌi nibiaꞌ morii peleihana lalimi, aginamo mohamokokei hingkeꞌna hawaꞌkei nokomi peleihana lalimi i walia to salaꞌ.
10 Lekiꞌ-lekiꞌna toaꞌ to hamokomo, hinewowoꞌena kupaꞌanikei lolita. Kotuꞌuana, hawaꞌ hieꞌe ka Pueꞌ Yesu, handoꞌiolu ka aku. Ingkei towoweꞌe, inioꞌkei mampokaꞌaki maꞌanimi. 11 Angkana ane nipokaꞌakikei, inioꞌkei womo moroa tomaꞌani ntaniꞌna. Ane ileikei momaꞌani huliꞌ, hangangaa mahuliꞌlukei huliꞌ pe maꞌanimi. Hei ingkei tomaꞌani, inioꞌkei woꞌo mampokaꞌaki hantambimi.
12 Kololiuhana, halali-halali, hieꞌemo lolitangku hadoduongku, handoꞌio parentana Pueꞌ Yesu: ane uwaꞌ tomaꞌani toSarani to hamokomo hante towoweꞌe to handoꞌio toSarani, inioꞌ nopokaꞌaki ane towoweꞌe tiꞌo hiniꞌlu tene hamoko hante io. 13 Hatoꞌo woꞌo ane towoweꞌe toSarani to momaꞌanimo hante tomaꞌani to handoꞌio toSarani. Inioꞌ nopokaꞌaki, ane tomaꞌani tiꞌo hiniꞌlu tene hamoko hante io. 14 Alaꞌ towoweꞌe toSarani tiꞌo mampomangkolehi kohamokora, hatoꞌo woꞌo tomaꞌani toSarani tiꞌo mampomangkolehi kohamokora. Ane hawaꞌi hatoꞌo, anaꞌra handoꞌio toaꞌna Pueꞌ Ala. Angkana ane haduo ka tomotodira mepoꞌohi pe Pueꞌ Yesu, anaꞌra tiꞌo toaꞌna Pueꞌ Ala.
15 Angkana, ane toaꞌ to hawaꞌi mepoꞌohi pe Pueꞌ mangkodokoꞌi mokaꞌa, tedehimolu. Ane hatoꞌoꞌi, towoweꞌe ba tomaꞌani to mepoꞌohi pe Pueꞌ hamboaꞌmo tehiluꞌ i kohamokona. Alaꞌ Pueꞌ Ala mowowoiki mewali anaꞌNa hingkeꞌna tuwuꞌki i lali pohintuwuꞌ. 16 Ane hawaꞌkei mokaꞌa, ingkei towoweꞌe to mepoꞌohi pe Pueꞌ, uwaꞌ tene tempomi mampaꞌani lala pe maꞌanimi hingkeꞌna mepoꞌohi. Hatoꞌo woꞌo ingkei tomaꞌani, uwaꞌ tene tempomi mampaꞌani lala pe hantambimi hingkeꞌna mepoꞌohihi woꞌo pe Pueꞌ.
Hangangaa tuwuꞌki hibali to nopokonontokiki Pueꞌ Ala
17 Hangangaa tuwuꞌki nturusi hibali kotuwuꞌta i tempota nowowoi Pueꞌ Ala mewali anaꞌNa hibali to Nopokonontomo. Tiꞌomo parentaka to kupepoturuꞌki pe lekiꞌ-lekiꞌna jumaꞌa i imbo-imbolu koꞌakoangku. 18 Rapaꞌna, ane toYahudi to nibulabaꞌmo to mepoꞌohi pe Pueꞌ Yesu, inioꞌ mowowuni konibulabaꞌnamo. Hatoꞌo woꞌo ane toaꞌ to handoꞌio toYahudi to mepoꞌohi pe Pueꞌ Yesu, hampoliꞌmo paralu mampopebulabaꞌ hibali toYahudi. 19 Alaꞌ i pampeꞌelena Pueꞌ, ane nibulabaꞌki ba hawaꞌki nibulabaꞌ, hawaꞌi uwaꞌ poꞌoriana, hibaliluki. I pampeꞌelena Pueꞌ Ala, to paralu mpololeke iomo mampetuntuiki hawaꞌna Pueꞌ Ala. 20 Ingkiꞌ lekiꞌ-lekiꞌta, kehapoꞌi hohumbomo kotuwuꞌte i konowowointa Pueꞌ mewali toSarani, hangangaa tuwuꞌki nturusi hibali to nopokonontomokiki Pueꞌ. 21 Ane rapaꞌna tuwuꞌmi nipohawiꞌ katoꞌo nowowoikei Pueꞌ Ala hingkeꞌna mepoꞌohi pe Pueꞌ Yesu, inioꞌ masusa lalimi mampekiri konipohawiꞌmi. Angkana ane uwaꞌi tempomi hingkeꞌna mengkowahukei ka konipohawiꞌmi, aginamo nipopodumbuꞌ tempo tiꞌo. 22 Nipohawiꞌ tuwuꞌmi ba hawaꞌi, hibobaliluki i pampeꞌelena Pueꞌ Ala, alaꞌ to nipohawiꞌ i tempona nowowoi Pueꞌ Ala mewali tepododoli laline, alaꞌ io mewalimo toaꞌna Pueꞌ Ala. Hatoꞌo woꞌo toaꞌ to hawaꞌi nipohawiꞌ tuwuꞌna to nowowoi Pueꞌ Ala, io mewali hawiꞌna Kerisitu. 23 Nohilimokei Kerisitu hante masuliꞌ. Inioꞌkei tehiluꞌ hante peleihana toaꞌ i duniaꞌ hieꞌe. 24 Mewaliꞌ halali-halali, hibali to kutiꞌi hingkeꞌenia: kehapoꞌi ba hohumbo kotuwuꞌmi i konowowoimi Pueꞌ Ala mewali toSarani, hawaꞌkei paralu mowolihi. Agina ipotanaꞌkei kotuwuꞌmi tiꞌo hante Pueꞌ Ala.
Poturuꞌ i toaꞌ to handoaꞌi tene hamoko
25 Hieꞌemo poturuꞌku pe toaꞌ to handoaꞌi tene hamoko. Hawaꞌ hieꞌe hawaꞌi kutorimo ka Pueꞌ Yesu, angkana kupoturuꞌkei motuntuni pahuangku hadoduongku. Poturuꞌku hieꞌe wadi ipoꞌohikei, alaꞌ noꞌuwiꞌmoꞌa Pueꞌ Yesu mewali suroNa nokomi komarimaNa. 26 Mewaliꞌ, hieꞌemo poturuꞌka: i tempo hinewowoꞌena, ingkiꞌ toSarani norumpaki woriꞌ langkaꞌ komaporiꞌ, iomo horiana kutiꞌi, agina inioꞌ tewolihi kotuwuꞌte to nopokonontomokiki Pueꞌ Ala i duniaꞌ hieꞌe. 27 Rapaꞌna: ane ingkei tomaꞌani to mohantambimo, inioꞌkei mampaliꞌ lala mampokaꞌaki hantambimi. Ingkei to handoaꞌi tene hamoko, hampoliꞌmokei hamoko. 28 Angkana ane uwaꞌ anaꞌntomaꞌani to mangkodokoꞌi mohantambi, moromiꞌlu woꞌo, hawaꞌi madosa. Hei ane uwaꞌ anaꞌntowowalo to mangkodokoꞌi momaꞌani, moromiꞌlu woꞌo, hawaꞌi madosa. Angkana hangangaa ikolowoikei: i tempo komaporiꞌ hieꞌe, toaꞌ tohamoko hingkiꞌ pahuahi woriꞌ komasusa i lali motengkaꞌi kohamokora. Iomo tungkaihane poturuꞌku, alaꞌ peleihangku inioꞌkei pahua komasusa tiꞌo.
29 Halali-halali, tungkaihangku waheꞌe: ingkiꞌ tosarani, hangangaa tokolowoi kohawaꞌnamo woriꞌ tempote i duniaꞌ hieꞌe. Iomo horiana kutiꞌi, mepongka hinewowoꞌena, ingkei to hamokomo, inioꞌlu kohamokomi to nipohimpodulu. Hangangaa bateꞌna jamana Pueꞌ to nipohimpodulu. 30 Ingkei to meꞌola, inioꞌ rahi masusa lalimi. Ingkei to motanaꞌ, inioꞌ rahi motanaꞌ lalimi. Ingkei to mehili ba hapo-hapo, inioꞌ medokiꞌ lalimi i parewa tiꞌo. 31 Ingkei to maranaka mampaliꞌ parewa ngkoduniaꞌ, inioꞌ ipekirilu kotuwuꞌmi i duniaꞌ hieꞌe, alaꞌ duniaꞌ to topeꞌohaꞌi hieꞌe hingkiꞌ tutu.
32 Peleihangku, halali-halali, hingkeꞌna inioꞌkei mampekokiri nturusi kotuwuꞌmi i duniaꞌ hieꞌe. Tomaꞌani to handoaꞌi tene mohantambi, wadihi mampopatengkaꞌ nturusi jamana Pueꞌ, hante wadihi mampekiri nturusi hapo peleihana Pueꞌ. 33 Angkana tomaꞌani to mohantambimo, hangangaa mampekirihi woꞌo kotuwuꞌra i womboꞌ duniaꞌ hieꞌe, alaꞌ mangkodokoꞌihi mampomotanaꞌ lalina hantambira. 34 Iomo horiana morodaꞌa lalire. Hatoꞌo woꞌo, towoweꞌe to handoaꞌi momaꞌani,a wadihi mampopatengkaꞌ nturusi jamana Pueꞌ, hei wadihi mampekiri nturusi hapo peleihane Pueꞌ, hingkeꞌna kotuwuꞌra hohumbo ropewei pe Pueꞌ. Angkana towoweꞌe to momaꞌanimo, hangangaa mampekirihi woꞌo kotuwuꞌra i duniaꞌ hieꞌe, alaꞌ mangkodokoꞌihi mampomotanaꞌ lalina maꞌanira.
35 Lekiꞌ-lekiꞌna tiꞌo kutiꞌikikei halali-halali, hingkeꞌna kotuwuꞌmi matengkaꞌ moromiꞌ. Hawaꞌi kulei ane tehiluꞌkei i woriꞌ langkaꞌ hawaꞌ. Tungkaihangku hingkeꞌna iwalikei nturusi hapo to moromiꞌ, hingkeꞌna mampetuntuikei peleihana Pueꞌ, hei hingkeꞌna hawaꞌi uwaꞌ to mosalempori petuntumi pe Io.
36 Ane rapaꞌna uwaꞌ haduo anaꞌntomaꞌani to hawaꞌi nobiaꞌ morii peleihana lalina hei hingkiꞌ mowali walia to mekokomaꞌi hante woliana, aginamo noperapiꞌ hingkeꞌna nipohamokohi hohiꞌ. Peleihana tiꞌo hawaꞌi masalaꞌ, ane umbiꞌ nopekiri tiꞌo masipatoꞌ nowali. 37 Angkana, ane rapaꞌna anaꞌntomaꞌani tiꞌo mantiꞌi i lalina, “Aginamo inioꞌ kukohamokoi,” hei hawaꞌi uwaꞌ to mamparukuꞌi hamoko, hei nobiaꞌ morii peleihana lalina, io wadi motuntuni peleihana hadoduona, moromiꞌ rahimo ane hawaꞌi hamoko. 38 Mewaliꞌ, toaꞌ tohamoko moromiꞌ, angkana meliu tene komoromiꞌne ane toaꞌ hawaꞌi hamoko.b
39 Towoweꞌe tehiluꞌ nturusi i maꞌanina kolentuꞌana tene tuwuꞌ. Angkana ane mahimoꞌi maꞌanine, himpolohoꞌmo ka kotehiluꞌana. Towoweꞌe tiꞌo wadi hamoko huliꞌ, asala mampomaꞌani tomaꞌani to hampepoꞌohina. 40 Angkana meliu komoromiꞌne ane hamboaꞌmoꞌi hamoko. Tiꞌo motuntunilu pahuangku. Angkana kupekiri poturuꞌka hieꞌe nopowutekiꞌa Inohaꞌna Pueꞌ Ala to uwaꞌ i lalingku.