Hi Baraba hante hi Saulu roꞌuwiꞌ
13
1 I lumbuna toSarani i Antiokia, uwaꞌ haꞌumbora nabi hante guru to mampowute Pohawaꞌna Pueꞌ. Konaꞌra: Hi Baranaba, hi Simeo to nikokeneꞌi to Moꞌiti,a Lukiu to ka Kirene, hi Menahi to meꞌohaꞌ moꞌawa hante Datu Herode Antipa i tempora tene kokiuꞌ, hante hi Saulu. 2 I hampiha tempo, kolentuꞌara menomba pe Pueꞌ hante maboki, Inohaꞌ Mangkolehi mampatiꞌikihi, “I uwiꞌhi hi Baranaba hante hi Saulu mewali topajamangKu, hingkeꞌna nolouhi mampopatengkaꞌ jama to Kutiꞌikihi.” 3 Katoꞌo koꞌukora maboki hante mekokae, mohinimohi korawera pe hi Baranaba hei hi Saulu mampekokaekihi. Uko tiꞌo, nipopewotumohi nolou mampowute Kareba Moromiꞌ.Hi Baraba hante hi Saulu i Siprus
4 Alaꞌ perandana Inohaꞌ Mangkolehi, hi Baranaba hante hi Saulu noloumohi pe kota Seleukia to i bota ntahiꞌ. Katoꞌo, mehendeꞌmohi pe kapalaꞌ tahiꞌ nolou pe Siprus. 5 Kohupaꞌra i bolaꞌ Salamis, mampowutemohi Boona Pueꞌ Ala i tambi-tambi penombahara toYahudi. Hi Yohanes Markus mampororuihi i lali jamara tiꞌo.
6-8 Suro tiꞌo motengkaꞌihi i leowuta ka tampaꞌna wute pe tampaꞌna wutehi i bolaꞌ ngkodeꞌ Paposi. Itoꞌo mampohidupaꞌkihi haduo toYahudi to nikokeneꞌi hi Baryesu. I wiharo Yunani konaꞌna hi Elima. Hi Elima tiꞌo haduo toaꞌ to woriꞌ bahaꞌna, hei notiꞌi koꞌiona nabina Pueꞌ Ala. Io awana gubenuru to uwaꞌ i peꞌohaꞌa tiꞌo, konaꞌna Gubenuru tiꞌo hi Segiu Paulu. Io haduo toaꞌ to mapande mpololeke. Mewaliꞌ, kohupaꞌra hi Baranaba hante hi Saulu, gubenuru tiꞌo mowowoihi, alaꞌ mangkodokoꞌi pahori Pohawaꞌna Pueꞌ Ala. Angkana hi Elima moꞌewa hi Baranaba hante hi Saulu, mosapuaka pepoturuꞌra hingkeꞌna Gubenuru tiꞌo hawaꞌi mampoꞌohi hi Yesu. 9 Angkana hi Saulu, to rotiꞌi woꞌo hi Paulu, nokuasaꞌi Inohaꞌ Mangkolehi, hei io mampenotoꞌ toaꞌ to woriꞌ bahaꞌna tiꞌo. 10 Notiꞌikihi, “Ee! mowutiko mpuꞌu. Waliamu tiꞌo moꞌewa lekiꞌ-lekiꞌna to tuꞌu. Waliamu hibali Belisiꞌ! Mahamporeꞌi hinaꞌ iwolihi nturusi pepoturuꞌne Pueꞌ Ala to mononto? 11 Hinewowoꞌena Nohukuko Pueꞌ! Mepongka hinewowoꞌena hingkiꞌ biloko, hei hawaꞌko hingkiꞌ pangkiꞌ haꞌumbora ando komoruene!”
Hampale mokorindi romo peꞌelene hi Elima, hibali uwaꞌ oroꞌ to moꞌiti mohida matana, koꞌukoana mokoreroꞌi romo mampaliꞌ toaꞌ to morandaꞌi. 12 Konoꞌokiꞌnalu Gubenuruꞌ hapo to mewali tiꞌo, hoko mpuꞌu, alaꞌ mombahamo kuasaꞌne hante pepoturuꞌna Pueꞌ Ala, katoꞌo io mepoꞌohimo pe Pueꞌ Yesu.
Hi Paulu hante hi Baraba i Antiokia i woiꞌ Pisidia
13 Hi Paulu hante awanahi mehendeꞌhi kapalaꞌ tahiꞌ ka bolaꞌ Paposi nolouhi pe kota Pega i woiꞌ Pampilia. I kota tiꞌo, hi Yohanes Markus mampolihimohi nolou pe Yerusale. 14 Katoꞌo hi Paulu hante awanehi mampololiu womo patengkaꞌara ka Pega wute i kota Antiokia i woiꞌ Pisidia. I ando penombahara toYahudi, akomohi mahura i tambi penombaha. 15 ToYahudi to morampu itoꞌo mobasahi ka Suraꞌna hi Musa hante ka suraꞌna nabi-nabi. Uko tiꞌo, tadulako-tadulako tambi penombaha morumbaꞌ haꞌumbora toaꞌ nolou meꞌitano pe hi Baranaba hante pe hi Paulu, rotiꞌi “Halali-halali, ane uwaꞌ lolitami to mampomaroho lalira, hinewowoꞌena wadilu ipowutekei.”
16 Metotiꞌimo hi Paulu hei mohini korawena mampokonondiiꞌhi, honiꞌi notiꞌi, “Halali-halalingku, hei ingkei woꞌo to handoꞌio toYahudi angkana to menombakei pe Pueꞌ Ala, ipehoromuakei. 17 Pueꞌ Ala to topenombai, moꞌuwiꞌmo tododulunta toSaraeli, hei Nopopemuleꞌhi alana woriꞌhi mpololeke muleꞌre to meꞌohaꞌ i woiꞌ Masiri mewali to mehupaꞌ. Katoꞌo, noponoꞌokiꞌkihi kuasaꞌNe to maroho i konorandara molai ka Masiri. 18 Uko tiꞌo, i lali iba mpuluꞌ ntoꞌana komoruene, sabaraꞌ tene Pueꞌ Ala i pesapuakara kolentuꞌara matengkaꞌ i popada woꞌoni. 19 Pitu kodatua i woiꞌ Kanaꞌa nolobuꞌi Pueꞌ Ala, hante woiꞌra Nodolaꞌ-dolaꞌkihi toYahudi hingkeꞌna iohi to moꞌompuino. 20 Lekiꞌ-lekiꞌna tiꞌo mewali i lali kira-kira 450 ntoꞌa komoruene.
Uko tiꞌo, Pueꞌ Ala mohini haꞌumborahi topebutusi wute-wute pe nabi Semuel. 21 I tempo tiꞌo, toYahudi merapiꞌhi pe Pueꞌ Ala hingkeꞌna noparentahi haduo datu. Horiana, Nohinimo mpuꞌu haduo datu, to nikokeneꞌi hi Saul, anaꞌna hi Kisi muleꞌna hi Benami. Hi Saul tiꞌomo to mewali datuna toYahudi i lali 40 ntoꞌa komoruene. 22 Angkana koꞌukoana, io Nopopengkohou Pueꞌ Ala ka pahura kodatuana, hei hi Daudi to Nohini mewali datura toYahudi. Hieꞌemo lolitane Pueꞌ Ala noniuꞌ i hi Daudi, ‘Hi Daudi, anaꞌna hi Isai, iomo toaꞌ to mampomotanaꞌ lalingKu hei to mowali lekiꞌ-lekiꞌna peleihangKu.’
23 Ka pemuleꞌana hi Daudi tiꞌomola, Pueꞌ Ala mampatimomomo haduo to mewali Topohompoꞌ Dosa pe ingkiꞌ toSaraeli, hintotoꞌ hante hapo to Nodandimo hampiha, Iomo hi Yesu. 24 Ikohandoaꞌana tene hi Yesu mampemoluka jamana, hi Yohanes Toperiu mampowute pe lekiꞌ-lekiꞌna toSareili hingkeꞌna mengkatobaꞌhi ka dosara hante niriuhi. 25 Hingkiꞌ tutumo jamane, hi Yohanes mampatiꞌikihi toaꞌ to woriꞌ, ‘Aku hieꞌe handoꞌioꞌa Datu to ipekaukei. Ane tutumoꞌi jamangka, Datu to ipekaukei hingkiꞌ hupaꞌmo. Howeꞌlu moꞌuweꞌ pehiluꞌ sanalaꞌNa, hawaꞌa masipatoꞌ.’
26 Halali-halalingku, muleꞌna hi Burahima, hei ingkei woꞌo to handoꞌiokei toYahudi angkana to menombakei pe Pueꞌ Ala. Pe ingkiꞌmo hinewowoꞌena nipowute kareba to mampokononto lalana Pueꞌ hingkeꞌna tepohenteki ka pehuku dosanta. 27 Alaꞌ tumpu bolaꞌ Yerusale hei tadulako-tadulakora hawaꞌhi pobahaꞌ kohihimona hi Yesu tiꞌo. Hawaꞌhi pobahaꞌ palaihana lolitara nabi-nabi to robasa i ando-ando penombaha. Iomo hinaꞌ hi Yesu nihuku mahi. Angkana hapo to rowali tiꞌo mewali hingkeꞌna tepobuhoꞌi hapo to rotiꞌi nabi-nabi hampiha. 28 Kehapoꞌi hawaꞌi rohua salaꞌNe to hintotoꞌ nipahukuiꞌI mahi, angkana tontona roperapiꞌ pe hi Pilatu hingkeꞌna rorokoꞌI. 29 Koꞌukona tepobuhoꞌi lekiꞌ-lekiꞌna to teꞌukiꞌ hampiha, wotaNa ropopengkohoumo ka loti momehulepe honiꞌi rotawu. 30 Angkana Pueꞌ Ala mampotuwuꞌI huliꞌ ka komahia. 31 Hei uko tiꞌo, i lali haꞌumbora ando, hi Yesu mampepemombahamo wotaNa pe toaꞌ-toaꞌ to metuntu pe Io, mepongka ka Galilea wute-wute i Yerusale. Iomohi to mewali sabiꞌ-sabiꞌNa hinewowoꞌena pe lekiꞌ-lekiꞌna toYahudi hante mampowutekihi noniuꞌ hapo to rohuamo hei hapo to roꞌokiꞌ noniuꞌ Yesu Datu Topohompoꞌ.
32-33 Mewaliꞌ halali-halali, ingkamo to mampowutekikei Kareba Moromiꞌ hieꞌe. Hapo to Nodandi Pueꞌ Ala pe tododulunta hampiha, Nopotongawamo pe ingkiꞌ pemuleꞌana. Pueꞌ Ala mampotuwuꞌ huliꞌ hi Yesu ka komahia hibali to teꞌukiꞌ i lali Masmur to koroꞌonuna:
‘Ingkomo AnaꞌKu.
Ando hieꞌe Kupoꞌanaꞌko.’ \rq (Mas. 2:7)
34 Hi Yesu tiꞌo nopotuwuꞌmo mpuꞌu Pueꞌ Ala, hei bateꞌna hamboaꞌmo mahi ba mewali morere i lali petowua. Iomo palaihane lolita hieꞌe to teꞌukiꞌ i lali Suraꞌ Mangkolehi:
‘Lekiꞌ-lekiꞌna dandi to Mangkolehi
to Kudandi pe datu Daudi hampiha,
bateꞌna Kupobuhoꞌi pe ingkei.’ \rq (Yes. 55:3)
35 Uwaꞌ woꞌo lolitane hi Daudi noniuꞌ i Pueꞌ Yesu, to teꞌukiꞌ waheꞌe:
‘WotangKu hawaꞌi hingkiꞌ Nopotedehi i lali petowua wute morere,
alaꞌ Akumo ToaꞌMu to mangkolehi.’ \rq (Mas. 16:10)
36 Halali-halali, handoꞌio wotana hi Daudi to notungkai lolita tiꞌo. Alaꞌ hi Daudi mowali lekiꞌ-lekiꞌna to norumbaꞌkiꞌi Pueꞌ Ala, hei tutumo tuwuꞌne i duniaꞌ hieꞌe. Wotana nitawu i hirina petowuana tododuluna hei bateꞌna moreremo. 37 Angkana hi Yesu, to nopatuwuꞌ huliꞌ Pueꞌ Ala, hawaꞌi mewali morere i lali petowua. 38 Hingkeꞌna ibahaꞌkei: ala kohiYesuna, iomo hinaꞌ nipowutekikei kareba to mantiꞌi dosami wadi niꞌampuni. 39 Hawaꞌki wadi himpolohoꞌ ka dosanta kehapoki motuntuni hawaꞌna hi Musa. Angkana ane mepoꞌohiki pe hi Yesu bateꞌna hingkiꞌ himpolohoꞌki ka dosa-dosanta hei mewaliki toaꞌ to nipomaniuꞌ.
40 Angkana majaga-jagakei, hingkeꞌna hawaꞌi mewali pe ingkei hibali to ropowute nabi-nabi hampiha, to mantiꞌi waheꞌe:
41 ‘Ingkei to mampononaꞌa lolitana Pueꞌ,
hingkiꞌ hokokei pangkiꞌ waliangKu,
angkana koꞌukoana hingkiꞌ nihukukei mahi.
Alaꞌ majamaꞌA i tempo hieꞌe
mowali tandaꞌ to makuasaꞌ,
angkana kehapoꞌi uwaꞌmo to mampokonontokikei lekiꞌ-lekiꞌna tiꞌo,
hawaꞌi mpuꞌu hingkiꞌ ipoꞌohikei!’” \rq (Hab. 1:5)
42 Kohingkiꞌ polaira hi Paulu hante hi Baranaba, toaꞌ i tambi penombaha merapiꞌmohi hingkeꞌna humei womohi i ando penombahara toYahudi to hingkiꞌ hupaꞌ, hingkeꞌna mampokonontokihi huliꞌ pepoturuꞌra tiꞌo 43 Uko tiꞌo, molaimohi ka tambi penombaha, hei woriꞌhi toYahudi metuntumo pe hi Paulu hante hi Baranaba. Uwaꞌhi woꞌo toaꞌ to handoꞌio toYahudi to metuntumo iohi, hei mekahimohi i agama Yahudi. Hi Paulu hante hi Baranaba mampoturuꞌhi hingkeꞌna maroho nturusi pepoꞌohire pe Pueꞌ Ala to mampaꞌanihi kotuwuꞌ to wolaꞌ ka Rima NgotuwuꞌNa.
44 Haminggu katoꞌo, i ando penombahara, tumpu bolaꞌ hingkiꞌ morampu humalekiꞌra, alaꞌ mangkodokoꞌihi mampehoromua Pohawaꞌna Pueꞌ Ala noniuꞌ Pueꞌ Yesu to ropowute hi Paulu hante hi Baranaba. 45 Koroꞌokiꞌnalu tadulako-tadulako toYahudi koworiꞌna toaꞌ to nolou mampehoromua lolitana hi Paulu, mowahiꞌhi, io hinaꞌ mepokokeniꞌahi hei mosapuakahi mpololeke lekiꞌ-lekiꞌna lolitana. 46 Angkana hi Paulu hante hi Baranaba wuranihi mpuꞌu mampatiꞌikihi, “Tuꞌu mpololeke! Pohawaꞌne Pueꞌ Ala uluꞌ-uluꞌna kipowute pe ingkei halali-halali, angkana hawaꞌkei hiniꞌ mantorimo. Ingkei hadoduomi to mampokononto kohawaꞌmi hiniꞌ pahua kotuwuꞌ to hawaꞌi mokoꞌukoa. Iomo hinaꞌ hingkiꞌ kipolihikei nolou pe toaꞌ to handoꞌio toYahudi! 47 Alaꞌ watoꞌomo hawaꞌne Pueꞌ Ala pe ingka:
‘Kuꞌuwiꞌmoko mewali pewanta
to mampokobaro lalira toaꞌ to handoꞌiohi toYahudi,
hingkeꞌna moliu i ingko Pueꞌ Ala hingkiꞌ mamposalamaꞌ
lekiꞌna toaꞌ i humanele duniaꞌ.’ ” \rq (Yes. 49:6, 42:6)
48 Korohorina toaꞌ to handoꞌiohi toYahudi lolitane tiꞌo, motanaꞌmohi mpuꞌu hei mampokodeꞌhi Pohawaꞌna Pueꞌ. Hei hihimolu to ukomo Noꞌuwiꞌ Pueꞌ Ala pahua kotuwuꞌ to hawaꞌi mokoꞌukoa, iomo to mepoꞌohi pe Pueꞌ Yesu. 49 Horiana Pohawaꞌna Pueꞌ tekarebamo i humanele woiꞌ tiꞌo.
50 Angkana tadulako-tadulako toYahudi i bolaꞌ ngkodeꞌ tiꞌo mampomolahohi lalira towoweꞌe-towoweꞌe topebiaꞌ to mengkoruꞌ pe Pueꞌ Ala, hante tomotodi-tomotodi itoꞌo horiana iohi mampopoꞌioꞌio hi Paulu hante hi Baranaba hei nibuehi ka woiꞌ tiꞌo. 51 Iomo hinaꞌ hi Paulu hante hi Baranaba mokuntahi awu to uwaꞌ i kapuꞌra, tandaꞌ kohandoꞌiona iohi to hingkiꞌ nohuku Pueꞌ Ala angkana tumpu bolaꞌ to hingkiꞌ Nohuku. Hei uko tiꞌo, noloumohi pe kota Ikonium. 52 To mepoꞌohi pe Pueꞌ Yesu i Antiokia, nokuasaꞌihi Inohaꞌ Mangkolehi hei motanaꞌ mpuꞌu lalire.