ToSarani pedeꞌ nipopoꞌioꞌio
12
1 I tempo tiꞌo, Datu Herode Agripa mepongkamo mampoperima-rima haꞌumbora toaꞌ to mepoꞌohi pe Pueꞌ Yesu. 2 Hei noperumbaꞌki woꞌo hingkeꞌna hi Yakobus, kokaꞌna hi Yohanes, nirokoꞌ hante piho. 3 Hapo to nowali Datu Herode tiꞌo ropomotanaꞌ toYahudihi. Iomo hinaꞌ datu Herode morumbaꞌmohi toaꞌ mohokiꞌ hi Peturuꞌ. Tiꞌo mewali i ando ngkodeꞌra toYahudi to rotiꞌi Posusaꞌa Roti to Hawaꞌi Niragiꞌi. 4 Nihokiꞌmo mpuꞌu hi Peturuꞌ hei nitarungkuꞌ. Iba dolaꞌ surodadu niparentaihi mampodaꞌi. Hantibura-hantibura surodadu, iba-iba duohi. Tungkaihana datu Herode hingkeꞌna hi Peturuꞌ nibutusi i hinarora toaꞌ to woriꞌ ane liumo Posusaꞌ Pokalintora. 5 Mewaliꞌ, hi Peturuꞌ uwaꞌ i lali petarungkuꞌa, angkana jumaꞌa to mepoꞌohi pe Pueꞌ Yesu mekokaehi nturusi pe Pueꞌ Ala, mampekokaeki hi Peturuꞌ.Hi Peturuꞌ nipolohoꞌ ka petarungkuꞌa
6 I hamini, hi Peturuꞌ kolentuꞌana toturu nopoꞌilumbui roduo surodadu, hei korawena potimbali nirante honiꞌi ropehiluꞌki i korawera surodadu to mampodaꞌi. Uwaꞌ woꞌo surodadu ntaniꞌna to mampoꞌodaꞌ wambaꞌ petarungkuꞌa. Tungkaihana datu Herode, hingkeꞌna poꞌonina mehoꞌolu io nikomi pe hinarora toaꞌ to woriꞌ. 7 Angkana hangkaꞌ-hangkaꞌ romo uwaꞌ to mewanta i lali petarungkuꞌa, alaꞌ mehupaꞌ haduo malaꞌekana Pueꞌ. Malaꞌeka tiꞌo moluke hi Peturuꞌ, notiꞌi malaꞌeka tiꞌo, “Hohiꞌko meꞌaro!” Hangkaꞌ-hangkaꞌ romo rante moꞌuweꞌ ka korawena. 8 Notiꞌi malaꞌeka tiꞌo pe hi Peturuꞌ, “Mebaduꞌmoko, hei ipakeꞌmo sanalaꞌma!” Nopetuntuimo mpuꞌu hi Peturuꞌ hawaꞌne, hei uko tiꞌo, notiꞌi womo malaꞌeka, “Iroamo kokumbama hei metuntumoko pe aku.” 9 Mesuwumo mpuꞌu hi Peturuꞌ hei metuntumo pe malaꞌeka tiꞌo. Angkana hawaꞌi tene nobahaꞌ hapo to mewali ba tuꞌu-tuꞌuꞌi mpuꞌu mewali. Notiꞌiae tiꞌo halangkaꞌ peponoꞌokiꞌilu. 10 Matengkaꞌmohi moliu i surodadu to mampoꞌodaꞌ wambaꞌ to uluꞌ-uluꞌna hei wambaꞌ koroꞌonuna, honiꞌi hupaꞌmohi i wambaꞌ besi i lala nolou pe kota. Wambaꞌ besi tiꞌo moweaꞌ hadoduona. Moliuhi i wambaꞌ tiꞌo nolou pe tampaꞌ lala. Hawaꞌi tene morue matengkaꞌ, katoꞌo malaꞌeka tiꞌo hampale romo mengkowuli mampolihi hi Peturuꞌ.
11 Katoꞌo, motopaꞌmo hi Peturuꞌ notiꞌi, “Tuꞌu mpololeke! Pueꞌ to morumbaꞌ malaꞌekaNa humei mampolohoꞌa ka kuasaꞌna datu Herode hei hingkeꞌna toYahudi hawaꞌhi mowali to kodake pe aku.” 12 Ikomotopaꞌnalu hi Peturuꞌ, liu nolou pe tambina hi Maria, inoꞌna hi Yohanes to rotiꞌi woꞌo hi Markus. I tambi tiꞌo, woriꞌhi toaꞌ to kolentuꞌara mekokae. 13 Katoꞌo, hi Peturuꞌ mokokadoꞌmo wambaꞌ i tambi tiꞌo. Noloumo haduo towoweꞌe to majama itoꞌo, to rokokeneꞌi hi Rode, ako moweaꞌ wambaꞌ. 14 Korohorinalu loaꞌne hi Peturuꞌ motanaꞌ mpololeke hi Rode. Nokomi komotanaꞌna, hawaꞌi kaliuꞌ noweaꞌ wambaꞌ, angkana hohiꞌ mekahi huliꞌ pe lali, notiꞌi, “Hi Peturuꞌ uwaꞌ i wambaꞌ!”
15 Notiꞌi toaꞌ to itoꞌo, “Magilako!” Angkana nopoliulu lolitane to mantiꞌi kohiPeturuꞌna to uwaꞌ i wambaꞌ. Iomo hinaꞌ rotiꞌiki, “Handoꞌio hi Peturuꞌ tiꞌo, angkana malaꞌekana.”a
16 Kolentuꞌana hi Rode nolou pe lali tambi, hi Peturuꞌ mokokadoꞌ nturusi wambaꞌ. Roweaꞌmo mpuꞌu wambaꞌ tiꞌo, hei roꞌele hi Peturuꞌ. Rokoꞌoloi mpololeke. 17 Katoꞌo, hi Peturuꞌ mohini korawena mampokondiꞌhi, honiꞌi mololita hohumbo lalana Pueꞌ mampolohoꞌi ka lali petarungkuꞌ. Nopololiu hi Peturuꞌ lolitane honiꞌi nopemai hingkeꞌna hapo to mewali tiꞌo ropowute pe hi Yakobus hei pe halali hampepoꞌohira. Uko tiꞌo, molaimo hi Peturuꞌ nolou pe peꞌohaꞌa ntaniꞌna.
18 Poꞌonina mehoꞌolu, mewalimo pomesalaꞌpaha i lumbura surodadu topampodaꞌ. Ropowuli hei rokorokaꞌ hapo to mewali pe hi Peturuꞌ. 19 Datu Herode morumbaꞌmo toaꞌ mampaliꞌ hi Peturuꞌ, angkana hawaꞌi rohua. Iomo hinaꞌ datu Herode morumbaꞌ surodaduna to mampoꞌodaꞌ hi Peturuꞌ hingkeꞌna niparesaꞌhi hei nirokoꞌhi. Uko tiꞌo, datu Herode molai ka woiꞌ Yudea nolou meꞌohaꞌ i kota Kaisarea.
Datu Herode mahi
20 Datu Herode makaja kobukotane pe toaꞌ to meꞌohaꞌ i kota Tiru hante Sido. Iomo hinaꞌ hampekokirimohi tumpu bolaꞌ tiꞌo hei haꞌumbora duo toaꞌ nirumbaꞌ nolou pe kota Kaisarea ako modame hante Datu Herode, alaꞌ toTiru hante toSido tiꞌo pahuahi pangkara ka woiꞌ to noparentai datu Herode. Iohi mampenonohoꞌi hi Balastu hingkeꞌna nosulungihi modame hante datu Herode. Hi Balastu tiꞌo iomo haduo to moꞌatoroꞌ tambina datu hei nopoꞌohi woꞌo datu Herode. 21 Katoꞌo, i ando to nipokonontomo, datu Herode mebaduꞌ datu hei mahura i pahura kodatua, hei mololita pe toaꞌ to woriꞌ. 22 Moloaꞌ-loaꞌmohi toaꞌ to woriꞌ mampomotanaꞌ lalina datu Herode, rotiꞌi, “Loaꞌ hieꞌe handoꞌio ka toaꞌ. Hapo to notiꞌi, hibali hante loaꞌna Pueꞌ Ala.”
23 Alaꞌ kopampokokodeꞌna, hawaꞌi nolei datu Herode mangkopundai ba mampokodeꞌ Pueꞌ Ala. Iomo hinaꞌ hangkaꞌ-hangkaꞌ romo notampele malaꞌekana Pueꞌ horiana io mahi noꞌoka kolindohiꞌ.
24 I tempo tiꞌo, tetambaimo toaꞌ to mampehoromua Pohawaꞌna Pueꞌ, hei tetambaimo woꞌo koworiꞌre to mepoꞌohi pe hi Yesu.
25 Ukomo jamare hi Baranaba hante hi Saulu i Yerusale, mahuliꞌmohi nolou pe Antiokia, hei mangkomihi woꞌo hi Yohanes to rotiꞌi hi Markus moꞌawa-awa hante iohi.