9
1 Notiꞌi womo hi Yesu, “Ipehoromuakei moromiꞌ hapo to Kutiꞌikikei hieꞌe. Uwaꞌ i lumbumi to hawaꞌi hingkiꞌ mahi ane handoaꞌi tene pangkiꞌ Pueꞌ Ala meparenta hante kuasaꞌNa.”Hi Yesu nipokodeꞌ i womboꞌ biri
2 Oni ando katoꞌo, hi Yesu mangkomihi tolu topeguruNa, iomo hi Peturuꞌ, hi Yakobus hei Yohanes hineeꞌna, nolouhi pe womboꞌ biri to dingkaoꞌ. Ioluhi, hawaꞌi uwaꞌ toaꞌ ntaniꞌna. Itoꞌo roꞌokiꞌ lentene hi Yesu tewolihi. 3 Baduꞌna mewali popuhiꞌ hei manakiꞌ; hawaꞌi uwaꞌ haduo toaꞌ i duniaꞌ hieꞌe to wadi mowaheꞌ baduꞌ wute hatoꞌo kopopuhiꞌne mpololeke. 4 Katoꞌo roꞌokiꞌ topeguruNa, roduo nabi to mololita hante hi Yesu. Nabi to roduo tiꞌo iomo hi Musa hante Elia. 5 Katoꞌo, notiꞌi hi Peturuꞌ pe hi Yesu, “Guru. Moromiꞌ mpololeke koꞌiheꞌente. Aginamo kiwali tolu onu bambaruꞌ: haꞌanu Ingko Pueꞌ, haꞌanu hi Musa, hei haꞌanu woꞌo hi Elia.” 6 Kotuꞌuana, hawaꞌi nobahaꞌ hi Peturuꞌ hapo to notiꞌi nokomi komorokaꞌra.
7 Hangkaꞌ-hangkaꞌ romo, noputuꞌhi kini. Ka lali kini tiꞌo, rohorimo loaꞌ to mantiꞌi, “Hieꞌemo AnaꞌKu to Kupokarima. Ipehoromuakei lolitaNe!”
8 Katoꞌo roꞌele mantuleliꞌ, hawaꞌi uwaꞌ toaꞌ ntaniꞌna moꞌawa hante iohi; Hi Yesu romo hadoduoNa. 9 Pengkohoura ka womboꞌ biri tiꞌo, notiꞌikihi hi Yesu, “Inioꞌ duluna itiꞌi-tiꞌikei pe hihimolu hapo to iꞌokiꞌkei hingkenia, ane handoaꞌi tene nipopeꞌaro Anaꞌ Manusiaꞌ ka komahia.”
10 LolitaNa ropetuntui mpuꞌu. Hawaꞌi rololita pe hihimo hapo to mewali tiꞌo, angkana mometonoi-tonoihi hapo tungkaihane hi Yesu mantiꞌi “Hingkiꞌ tuwuꞌ huliꞌ ka komahia” 11 Meꞌitanohi pe hi Yesu, rotiꞌi, “Wulika. Mahamporeꞌi hinaꞌ rotiꞌi guru agama, nabi Elia hangangaa medulu mehupaꞌ, honiꞌiwae mehupaꞌ Datu Topohompoꞌ?”
12 Nohoniꞌhi hi Yesu, “Tuꞌu to rotiꞌi. Nabi Elia hangangaa medulu mehupaꞌ, alaꞌ io to mampatimomo lekiꞌ-lekiꞌna. Angkana hohumbo Anaꞌ Manusiaꞌ? Mahamporeꞌi hinaꞌ teꞌukiꞌ i lali Suraꞌ Mangkolehi, Io woꞌo hingkiꞌ pahua woriꞌ komaporiꞌ hei hingkiꞌ ropononaꞌa toaꞌ? 13 Hei Kutiꞌikikei, hupaꞌmo nabi Elia, angkana toaꞌ mampoperima-rimaꞌi motuntuni peleira, hibali to teꞌukiꞌ i lali Suraꞌ Mangkolehi.”
Hi Yesu mampokoꞌoriꞌ haduo oꞌanaꞌ to nopekahii lomoa
14 I tempo tiꞌo, hi Yesu hante totolu topeguruNa mahuliꞌmohi ka womboꞌ biri nolou mampohidupaꞌki topeguruNa to ntaniꞌna. Kowuteralu itoꞌo, roꞌokiꞌ woriꞌ toaꞌ to motuleliꞌi topeguruNa, hei haꞌumbora duohi guru agama kolentuꞌara momehoniꞌ hante iohi. 15 Koroꞌokinalu toaꞌ woriꞌ hi Yesu, hokomohi hei mehilaihi nolou mampohidupaꞌkiꞌI. 16 Meꞌitano hi Yesu pe topeguruna, “Hapo to ipomehoniꞌikei hante guru-guru agama?”
17 Haduo ka toaꞌ to woriꞌ tiꞌo mantiꞌi, “Guru! Hieꞌe anaꞌka kukomi hingkeꞌna Ipokoꞌoriꞌi. Io hawaꞌi hohumbo mololita alaꞌ nopekahiꞌi lomoa. 18 Ane nopekahiꞌi lomoa, metanoli-noli i woiꞌ, hei mewowiriꞌ omeꞌne, mopakoiꞌ nihine, hei matodoꞌ wotane. Kuperapiꞌmo i topeguruMu hingkeꞌna mampopolaihi lomoa tiꞌo, angkana hawaꞌi robiaꞌ.”
19 Katoꞌo notiꞌikihi hi Yesu, “Hohumbokei rope hieꞌe to tuwuꞌ tempo hieꞌe? Mahamporeꞌi hinaꞌ handoaꞌi tene maroho pepoꞌohimi? Haꞌumbo tene komoruene hingkiꞌ Kupoꞌawakei honiꞌkei mepoꞌohi? Haꞌumbo tene komoruene hangangaa sabaraꞌA mampeꞌele waliami? Komi humei oꞌanaꞌ tiꞌo!”
20 Rokomimo mpuꞌu oꞌanaꞌ tiꞌo pe hi Yesu. Konoꞌokiꞌnalu lomoa hi Yesuno, io mampomororidiꞌ wotana oꞌanaꞌ tiꞌo wute modungka metanoli-noli, mewowiriꞌ omeꞌne hei wotana matodoꞌ. 21 Meꞌitano hi Yesu pe umoꞌna anaꞌ tiꞌo, Notiꞌi, “Moruemoto waheꞌe?”
Notiꞌi umoꞌne, “Mepongka ka kokokiuꞌana tene. 22 Woriꞌ mpiha lomoa hingkiꞌ morokoꞌi hante modungka pe lali api hante pe lali uwai. Ane Ibiaꞌi Guru, kuperapiꞌ hingkeꞌna Ipokarimaka hei Isulungika wongkenaꞌ!”
23 Notiꞌi hi Yesu, “Mahamporeꞌi hinaꞌ itiꞌi ‘Ane ibiaꞌI?’ Lekiꞌ-lekiꞌna mewali i toaꞌ to mepoꞌohi.”
24 Mehoniꞌ umoꞌne anaꞌ tiꞌo nopokobue, “Mepoꞌohiꞌa pe Ingko, Isulungiꞌa hingkeꞌna pedeꞌ maroho pepoꞌohingka.”
25 Konoꞌokiꞌna hi Yesu woriꞌ toaꞌ hingkiꞌ hirampu, Io mokamoroki lomoa tiꞌo, Notiꞌi, “Hee! Lomoa to mepobonoꞌ hei mepobebe! Pesuwu ka oꞌanaꞌ hieꞌe, hei hampoliꞌmoko mekahi huliꞌ.” 26 Moloaꞌ-loaꞌ tokodake, mampomororidiꞌ oꞌanaꞌ tiꞌo, honiꞌi mesuwumo. Ikopesuwunalu lomoa tiꞌo, oꞌanaꞌ tiꞌo hamboaꞌmo mengkaduiꞌ-duiꞌ hibalimo to mahi, iomo horiana woriꞌ toaꞌ mantiꞌi, “Mahimo!” 27 Angkana hi Yesu motiko koraweꞌna hei Nopopetotiꞌi. Metotiꞌimo mpuꞌu oꞌanaꞌ tiꞌo alaꞌ moꞌoriꞌmoꞌi!
28 Uko katoꞌo, hi Yesu hante topeguruNa mekahihi i lali tambi. Katoꞌo, meꞌitanomohi topeguruNe pe Io, rotiꞌi, “Guru, mahamporeꞌi hinaꞌ hawaꞌi kibiaꞌ mampopesuwu to kodake tiꞌo hingkenia?”
29 Nohoniꞌhi, “Lomoa to hatoꞌo, hawaꞌi hohumbo nibue hatoꞌolu, sangadina hante pekokae.”
Korompihana hi Yesu mampololita noniuꞌ ikohingkiꞌ mahiNa
30 Hi Yesu hante topeguruNa mampololiu patengkaꞌara moliu i woiꞌ Galilea. Hei hi Yesu hawaꞌi hiniꞌ robahaꞌ toaꞌ woriꞌ koꞌuwaꞌre i Galilea, 31 alaꞌ i tempo tiꞌo, kolentuꞌana mampoturuꞌ topeguruNa hei Notiꞌikihi, “Anaꞌ Manusiaꞌ hingkiꞌ nipewei pe kuasaꞌna manusiaꞌ hei hingkiꞌ nirokoꞌ. Angkana ikotolu andona Io hingkiꞌ tuwuꞌ huliꞌ.” 32 Angkana topeguruNahi hawaꞌi robahaꞌ tungkaihane lolitana hi Yesu, hei hawaꞌhi woꞌo podehoꞌ meꞌitano pe Io.
Himo to mengkaꞌiwowoiꞌ, iomohi to i womboꞌ tuwuꞌra
33 Hi Yesu hante topeguruNa hupaꞌmohi mpuꞌu i bolaꞌ Kapenau. Tempora uwaꞌ i lali tambi, meꞌitanomo hi Yesu pe topeguruNa, Notiꞌi, “Hapo to ipomehoniꞌikei nturusi i lumbu lala hingkenia?” 34 Angkana hawaꞌhi mehoniꞌ, alaꞌ to ropomehoniꞌi i lumbu lala iomo noniuꞌ himo to i womboꞌ ka lumbura. 35 Katoꞌo, mahuramo hi Yesu hei mowowoi topeguruNa to hampuluꞌ roduo, honiꞌi Notiꞌikihi, “Himo to mangkodokoꞌi hingkeꞌna i womboꞌ ka lumbumi, hangangaa mengkaꞌiwowoiꞌ pe lekiꞌ-lekiꞌna toaꞌ, hei hangangaa mewali toperewu i lekiꞌ-lekiꞌna toaꞌ.” 36 Uko tiꞌo, Io moroa haduo oꞌanaꞌ, Nopopetotiꞌi i hinarora, Nobobaleꞌ, honiꞌi Notiꞌikihi topeguruNa, 37 “Himo to mantorimo haduo toaꞌ i lali konaꞌKu tepekahi toaꞌ to i wowoiꞌ tuwuꞌna hibali oꞌanaꞌ hieꞌe, palaihana Akumo to notorimo. Hei himo to mantorimoꞌA, handoꞌio Akulu to notorimo, angkana hibalimo woꞌo mantorimo Pueꞌ Ala to morumbaꞌA humei.”
38 Uko tiꞌo, notiꞌi hi Yohanes, “Guru, uwaꞌ kiꞌokiꞌ haduo toaꞌ to mampopesuwu lomoa i lali konaꞌMu, angkana kiꞌopi alaꞌ io handoꞌio tinaꞌ ka ingkiꞌ.”
39 Notiꞌi hi Yesu, “Inioꞌ niꞌopi, alaꞌ toaꞌ to mowali tandaꞌ kuasaꞌ i lali konaꞌKu, hawaꞌi hingkiꞌ mampokokeniꞌa konaꞌKu. 40 Toaꞌ to hawaꞌi moꞌewaki, iomohi to tinaꞌ ka ingkiꞌ. 41 Kutiꞌikikei: Himolu to mosulungikei nokomi petuntumi pe Datu Topohompoꞌ, kehapoꞌi hasangkiriꞌlu uwai ntooꞌ nopaꞌanikikei, io hingkiꞌ pahua howonina ka waliana to moromiꞌ.
42 Angkana himo to mampokonawuꞌ haduo oꞌanaꞌ to hibali oꞌanaꞌ hieꞌe, alana hamboaꞌmo mepoꞌohi pe Aku, hingkiꞌ makaja mpololeke pehukune Pueꞌ Ala i toaꞌ tiꞌo. Aginamo nilewului nohu watu to kodeꞌ i dokoꞌna honiꞌi nitube pe lali tahiꞌ.
43 Ikororomiꞌikei hingkeꞌna inioꞌkei madosa. Ane rapaꞌna korawemu hambali mangkomiko mowali dosa, ibokuꞌmolu. Aginamo hambalilu korawema, asalana pahuako kotuwuꞌ to wolaꞌ moꞌawa hante Pueꞌ Ala, hintina rombali korawemu, angkana koꞌukoana nitubeko pe lali naraka. Itoꞌo uwaꞌ api to makiꞌ nturusi. [ 44 Itoꞌo, api makiꞌ nturusi, hei iliꞌ hawaꞌi hingkiꞌ mahi.] 45 Ane rapaꞌna kapuꞌmu hambali mangkomiko mowali dosa, ibokuꞌmolu. Aginamo hambalilu kapuꞌma, asalana pahuako kotuwuꞌ to wolaꞌ moꞌawa hante Pueꞌ Ala, hintina rombali kapuꞌmu, angkana koꞌukoana nitubeko pe lali naraka. [ 46 Itoꞌo, api makiꞌ nturusi, hei iliꞌ hawaꞌi hingkiꞌ mahi.] 47 Hei ane rapaꞌna matamu hambali mangkomiko mowali dosa, idungkiꞌmolu. Aginamo hambalilu matama, asalana mewaliko toaꞌna Pueꞌ Ala i lali poparentaNa, hintina rombali matamu, angkana koꞌukoana nitubeko pe lali naraka. 48 Itoꞌo, api makiꞌ nturusi, hei iliꞌ hawaꞌi hingkiꞌ mahi.
49 Lekiꞌna toaꞌ hori-hori nipomangkolehi hante api, hibali popenomba to nipomangkolehi hante bure. 50 Bure modumbuꞌ mpololeke, angkana ane motobemoꞌi, hohumboreꞌi tene nipomobure huliꞌ? Hatoꞌo woꞌo, ingkei to metuntu i Aku hangangaa modumbuꞌkei nturusi hibali bure, hei hangangaa mohintuwuꞌkei nturusi haduo hei haduo.”