Inioꞌkei mosalaꞌi toaꞌ
7
1 “Inioꞌkei mosalaꞌi toaꞌ ntaniꞌna, hingkeꞌna hawaꞌkei woꞌo nosalaꞌi Pueꞌ Ala. 2 Alaꞌ hohumbo lalami mosalaꞌi toaꞌ, lala tiꞌo woꞌo to hingkiꞌ nopakeꞌ Pueꞌ Ala pe ingkei.3 Mahamporeꞌi hinaꞌ iꞌokiꞌkei kowilohane awami, hantaro rangka loti to i matami hawaꞌkei iꞌokiꞌ? 4 Hohumbomo kowadimi mampatiꞌiki awami, ‘Mai, kupopolaiꞌi kowilohama,’ ane uwaꞌi tene rangka loti i matamu. 5 Ingkei to mampehantoniꞌ! Hangangaa ipopolaikei duluna rangka to uwaꞌ i matami hadoduomi hingkeꞌna iꞌokiꞌkei mampopolai kowilohane awami.”
6 Uko tiꞌo, hi Yesu mampowute womo pandiri' hieꞌe, Notiꞌi, “Hapo to mangkolehi nioꞌkei ipaꞌaniki ahu, inioꞌna intu ahu tiꞌo hingkiꞌ meholibaꞌ motiokei. Hei inioꞌkei mampaꞌani parewa to masuliꞌ pe boeꞌ, alaꞌ boeꞌ tiꞌo hingkiꞌ modihaꞌ-dihaꞌ ntooꞌlu parewa tiꞌo.”a
Merapiꞌ pe Pueꞌ Ala
7 “Merapiꞌmokei pe Pueꞌ Ala,
hingkeꞌ Nopaꞌanikei.
Mampaliꞌmokei
hingkeꞌ pahuakei,
mangkokadoꞌmokei wambaꞌ,
hingkeꞌ niweaꞌkikei.
8 Alaꞌ hihimo to merapiꞌ hingkiꞌ mantorimo.
Hihimo to mampaliꞌ hingkiꞌ pahua.
Hihimo to mangkokadoꞌ wambaꞌ, hingkiꞌ niweaꞌki.
9-10 Ka lumbumi, ba uwaꞌreꞌi haduo umoꞌ to mampaꞌani watu pe anaꞌna ane merapiꞌi roti? Ba uwaꞌkei to mampaꞌani ule ane anaꞌmi merapiꞌ bouꞌ? Hawaꞌi! 11 Kehapoꞌi kodake walimi, ibahaꞌkei tene mampaꞌani hapo to moromiꞌ pe anaꞌmi. Hapona tene Umoꞌmi to i suruga! Nobahaꞌ mpololeke mepaꞌani hapo to moromiꞌ pe hihimolu to merapiꞌ pe Io.”
Lala to mononto
12 “Hapo-hapolu to ileikei rowali toaꞌ pe ingkei, hangangaa iwalikei dulu pe toaꞌ ntaniꞌna. Tiꞌomo ohine Hawaꞌna hi Musa hante pepoturuꞌ ka nabi-nabi.
13-14 Hohopiꞌ wambaꞌ hei masusa lala to menonto pe kotuwuꞌ to wolaꞌ, hei hawaꞌi woriꞌ toaꞌ to moliu i lala tiꞌo. Wambaꞌ hante lala to menonto pe naraka koroba, hei woriꞌ toaꞌ to motuntuni lala tiꞌo. Mewaliꞌ mekahikei moliu wambaꞌ to hohopiꞌ, hingkeꞌna tuwuꞌkei nturusi moꞌawa hante Pueꞌ Ala.”
Nabi-nabi to mepomonawuꞌ mombaha ka waliara
15 “Majaga-jagakei i nabi-nabi to mampowute poturuꞌ to salaꞌ, hupaꞌhi pe lumbumi hantoniꞌhi hibali gimba, hantaro hibalihi serigala to mohiaꞌ. 16 Hingkiꞌ ibahaꞌkei powutire ka wuaꞌna pajamara. Katimaraꞌ hawaꞌi mampowuaꞌki anggoroꞌ hei rui hawaꞌi mampowuaꞌki wuaꞌ ara. 17 Hatoꞌo woꞌo lekiꞌna loti to tuwuꞌ moromiꞌ, moromiꞌ woꞌo powuaꞌne hei lekiꞌna loti to hawaꞌi tuwuꞌ moromiꞌ, hawaꞌi woꞌo moromiꞌ powuaꞌne. 18 Hawaꞌi uwaꞌ loti to moromiꞌ, kodake powuaꞌne, hei hawaꞌi uwaꞌ loti to kodake, moromiꞌ powuaꞌne. 19 Lekiꞌ-lekiꞌna loti to hawaꞌi mowuaꞌ moromiꞌ, hingkiꞌ nitowi hei nitube pe lali api. 20 Hatoꞌo woꞌo, hingkiꞌ ibahaꞌkei himo nabi to mepomonawuꞌ, alaꞌ mombaha ka wuaꞌna pajamara.
21 Hawaꞌi ka lekiꞌna toaꞌ to mowowoiꞌA Pueꞌ to hingkiꞌ mekahi pe lali poparentana UmoꞌKu to uwaꞌ i suruga, angkana toaꞌ to mowali peleihana UmoꞌKu to hingkiꞌ mekahi pe lali PoparentaNa. 22 I ando pobutusi i kotutuana duniaꞌ, woriꞌ toaꞌ hingkiꞌ mantiꞌi pe Aku, ‘Pueꞌ! Hawaꞌireꞌi Ibahaꞌ i lali konaꞌMu kipowutemo Pohawaꞌne Pueꞌ Ala? Mobuemoka lomoa i lali konaꞌMu, hei woriꞌ woꞌo tandaꞌ kuasaꞌ to kiwali i lali konaꞌMu.’
23 Tempo tiꞌo, hingkiꞌ Kuhoniꞌhi, ‘Hawaꞌkei Kubahaꞌ! Polaikei kaseꞌe, ingkei to kodake waliami.’ ”
Pandiriꞌ noniuꞌ roduo toaꞌ to moꞌaro tambi
24 “Hihimo to mampehoromua lolitangKu hei nopetuntui, wadi nipandiriꞌ hibali haduo toaꞌ to buhaꞌ pekiri to moꞌaro tambina i womboꞌ watu to kodeꞌ mpololeke hei maroho. 25 I tempona meparowo hei ura makaja, uwai kodeꞌ. Parowo morumpa tambi tiꞌo, angkana hawaꞌi modungka alaꞌ tambi tiꞌo niꞌaro i womboꞌ watu.
26 Angkana toaꞌ to mampehoromua lolitangKu hieꞌe hei hawaꞌi nopetuntui, wadi nipandiriꞌ hibali haduo toaꞌ tobebe to moꞌaro tambina i womboꞌ woꞌoni. 27 I tempona meparowo hei ura makaja, uwai kodeꞌ. Tambi tiꞌo norumpa woꞌo parowo, liu modungka hei mokero.”