Pewaliana 31

Hi Akoꞌ mehilai mampolihi hi Laba

1 Nohori hi Akoꞌ lolitane anaꞌna hi Laba mantiꞌi, “Hi Akoꞌ moroamo pinatuwuꞌna umoꞌta, lekiꞌ-lekiꞌna kopebiaꞌna mampeluka ka umoꞌta!” 2 Noꞌokiꞌmo woꞌo hi Akoꞌ pambiarane ponianana kahohuruamo pe io hamboaꞌmo hibali hampiha. 3 Mepongka katoꞌo notiꞌi Pueꞌ pe hi Akoꞌ, “Mahuliꞌmoko pe halalimu pe woiꞌna todulumu, hei Aku hingkiꞌ moꞌowoniko.” 4 Katoꞌo hi Akoꞌ morumbaꞌmo toaꞌ ako mowowoi hi Raheli hante hi Lea hingkeꞌna mohidupaꞌhi i popada polambaꞌana bekeꞌ hante gimba. 5 Kohupaꞌnalu hantambine itoꞌo, notiꞌi hi Akoꞌ, “Kuꞌokiꞌmo pangkomine umoꞌmi kahohuruamo pe aku hamboaꞌmo hibali hampiha. Angkana Pueꞌ Ala to nopenombai umoꞌku, Iomo to mampoꞌowoniꞌa. 6 Ibahaꞌlukei komadorine jamangku i umoꞌmi. 7 Angkana kehapoꞌi hatoꞌo, woriꞌ mpihaꞌa noꞌakalai, alaꞌ hampuluꞌ mpihamo nowolihi harongka, ka hapo to nodandikiꞌa. Angkana Pueꞌ Ala hawaꞌi mampotedehi umoꞌmi mowali dake pe aku. 8 Ane notiꞌi umoꞌmi, ‘pinatuwuꞌku to lolobaꞌ iomo haroma lekiꞌ-lekiꞌna, katoꞌo pinatuwuꞌna moꞌanaꞌhi to lolobaꞌ hei ane notiꞌi umoꞌmi pinatuwuꞌku to boburiꞌ mewali haroma, lekiꞌ-lekiꞌna pinatuwuꞌna moꞌanaꞌhi to boburiꞌ.’ 9 Hatoꞌo lalane Pueꞌ Ala moroa pinatuwuꞌna umoꞌmi hei Nopaꞌanikiꞌa.” 10 Hampiha, i tempora pinatuwuꞌ mohantambi, mepototuruꞌa kuꞌokiꞌ lekiꞌna bekeꞌ laki to mahantambi tiꞌo, bororikoꞌ, boburiꞌ, hei lolobaꞌ, 11 hei Malaꞌekana Pueꞌ Ala mololita pe aku i lali pepototurungku notiꞌi, “Akoꞌ!” Katoꞌo mehoniꞌa, “Hieꞌeluꞌa Pueꞌ.” 12 Notiꞌi womo malaꞌeka tiꞌo eleꞌi, lekiꞌ-lekiꞌna bekeꞌ to mepohantabi tiꞌo bororikoꞌ, boburiꞌ hei lolobaꞌ. Kubarakatiko hatoꞌo, alaꞌ kuꞌokiꞌmo lekiꞌ-lekiꞌna waliana hi Laba pe ingko. 13 Akumo Pueꞌ Ala to ipenombai i Beteli uluꞌana. Itoꞌomo ipopetotiꞌiꞌi haꞌanu watu hei ibobohi hante bokaꞌ Saitu mewali watu penombaha pe aku. Itoꞌo woꞌo mokamboaꞌko pe Aku, hei hinewowoꞌena hangangaa mangkolodohimoko hei mahuliꞌmoko pe woiꞌ konipoꞌanaꞌakimu. 14 Mehoniꞌ hi Raheli hante hi Lea, “Hamboaꞌmo uwaꞌ lumane umoꞌki to hingkiꞌ kiꞌompui. 15 Hareꞌi ingka hieꞌe hibalimoka to mehupaꞌlu alaꞌ ingka to nibaluꞌmoka. Nopopomaꞌanika hante ingko, hei dolaꞌki to ukomo nidolaꞌkika nopoꞌukomo noroa lekiꞌ. 16 Leki-lekiꞌna kosugiꞌana umoꞌki noroamo Pueꞌ Ala honiꞌi nopaꞌanikiko, iomo woꞌo to mewaliꞌ dolaꞌki hei dolaꞌna anaꞌki. Aginamo iwali hapo to notiꞌikiko Pueꞌ Ala.” 17 Katoꞌo mangkolodohimo mpuꞌu hi Akoꞌ, honiꞌi nopopehendeꞌmohi hantambine hei anaꞌna i unta, 18 honiꞌi molaimohi pe woiꞌ Kanaꞌa, woiꞌna hi Isaki umoꞌna. Lekiꞌ-lekiꞌna penatuwuꞌra hei lumara to rohua i woiꞌ Pada-Aram roporinti woꞌo. 19 I tempo tiꞌo kolentuꞌana tene hi Laba mogundi gimba i popada. Katoꞌo hi Raheli manako watu ntoaꞌna umoꞌna to ropenombai hei to ropoꞌohi mampoꞌodaꞌ tambira. 20 Hi Akoꞌ moꞌakalai hi Laba toAram tiꞌo hante molai ngkonondiiꞌ hante hawaꞌi notiꞌi-tiꞌi kopolaine. 21 Hatoꞌola kopolaine hi Akoꞌ mangkomi lekiꞌna lumana, hei molaimohi hohiꞌ-hohiꞌ mewute i uwai Epara menontohi pe biri-biri i woiꞌ Gilea.

Hi Laba modapaꞌ hi Akoꞌ

22 Ikotolu andonamo nipekarebakimo pe hi Laba pesilaꞌremo hi Akoꞌ hantambi. 23 Katoꞌo nowowoi halalinehi, modapaꞌ hi Akoꞌ. Pitu andomohi matengkaꞌ, honiꞌi rohua i biri i woiꞌ Gilea. 24 Angkana ihampolumbu wini mehupaꞌ Pueꞌ Ala pe hi Laba i lali pepototuruna Notiꞌi, “Moromiꞌ-romiꞌko, anioꞌko mowiharo ngkodake pe hi Akoꞌ.” 25 Kohupaꞌnalu hi Laba itoꞌo, hi Akoꞌ hantino mobambaruꞌmohi i biri-birina Gilea, katoꞌo hi Laba hante toaꞌnahi mobambaruꞌhi woꞌo dodungku itoꞌo. 26 Uko tiꞌo hi Laba ako mampomehuaki hi Akoꞌ hei notiꞌi, “Mahamporeꞌi hinaꞌ ipampowowutikiꞌa hei mampehilaikiko anaꞌku hibalihi toaꞌ to nitarungkuꞌ? 27 Mahamporeꞌi hinaꞌ iꞌakalanika? Molai ngkonondiiꞌko, hawaꞌko mesabiꞌ-sabiꞌ. Ane kemesabiꞌluko kekupopewotuko moromiꞌ, hei kuposusaꞌiko duluna, nipolingakiko hante kanda, kacapi, honiꞌko wae molai. 28 Ngkohoweꞌ wora moꞌumaꞌa anaꞌkuhi hei oꞌuweꞌkuhi tandaꞌ pokaꞌangki, hamboaꞌmo hampakaꞌ. Mehohoꞌa pe ingkei. Hawaꞌi moromiꞌ waliama tiꞌo. 29 Kotuꞌuana wadiꞌa mowali to kodake pe ingko angkana hiwowini Pueꞌ Ala to nopenombai umoꞌmu mampopangkolowoiꞌa hingkeꞌna hawaꞌko kukasaraꞌi, 30 hei kubahaꞌlu kopahuliꞌma alaꞌ popundamoko pe umoꞌmu hei pe halalimuhi, angkana mahamporeꞌi hinaꞌ inako watu ntoaꞌka to mampoꞌodaꞌ tambingku?” 31 Katoꞌo hi Akoꞌ mehoniꞌ, “Molai mpewowunika alaꞌ kukorokaꞌ itahahi intu anaꞌma, hingkeꞌna hawaꞌhi metuntu aku. 32 Noniuꞌ watu ntoaꞌmu to itiꞌi hingkonia, ane rapaꞌna ihuaꞌi i ingka, himo to manakono hangangaa nirokoꞌ i hinarona halalintahi hieꞌe, iparesaꞌ duluna ane uwaꞌi irodiꞌmo.” Hantaro hawaꞌi nobahaꞌ hi Akoꞌ kohiRaheline to manako watu ntoaꞌ tiꞌo. 33 Uluꞌ-uluꞌna mekahimo hi Laba pe bambaruꞌna hi Akoꞌ mampaliꞌ watu ntoaꞌna, uko tiꞌo mekahi womo pe bambaruꞌna hi Lea, hei pe bambaruꞌna roduo hawiꞌna, angkana hawaꞌi nohua. Koꞌukoana mekahi pe bambaruꞌna hi Raheli, 34 ikohandoaꞌana mekahi umoꞌne, hi Raheli morodiꞌ watu ntoaꞌ tiꞌo nopolihuduꞌ i lali lampina unta to uwaꞌ i lali bambaruꞌna, honiꞌi nopahurai. 35 Notiꞌi hi Raheli pe umoꞌna, “Umoꞌ hawaꞌko bukota, hawaꞌa hohumbo metotiꞌi modupaꞌko, alaꞌ kolentuꞌangku nohua.” Watu ntoaꞌ tiꞌo nopaliꞌ mpololeke hi Laba angkana hawaꞌi nohua. 36 Mowiriꞌmo hi Akoꞌ hei notiꞌi, “Dake hapomo to kuwali? Hapo salaꞌka horiana idapaꞌa? 37 Hinewowoꞌena ukomo iparesaꞌ lekiꞌ-lekiꞌne parewangku. Ane uwaꞌreꞌi parewama to ihua kinako moromiꞌ ane parewa tiꞌo ibunta i hinaronta, hingkeꞌna roꞌokiꞌi halalintahi, hei hingkeꞌna robahaꞌi lekiꞌ-lekiꞌna ba himoꞌi to tuꞌu. 38 Merompuluꞌ ntoꞌamoꞌa meꞌoha i ingko, gimba hei bekeꞌmu kurewuhi moromiꞌ wutehi memuleꞌ-muleꞌ. Hawaꞌi uwaꞌ podo hambaꞌa bekeꞌmu to kurereꞌ hei kuꞌoka. 39 Ane hambaꞌa mahi nohokiꞌ pinatuwuꞌ to moꞌilo hawaꞌi hampiha kukomikiko wotane pe ingko, akumo to mampohawa ka pinatuwuꞌku, ane uwaꞌi woꞌo to ninako ando ba wini poko ipopepohawa ka pinatuwuꞌku, 40 majamaꞌa nturusi i ingko. Ane andoꞌi nokohuneiꞌa hei ane winiꞌi hoholeꞌa, woriꞌ mpihaꞌa hawaꞌa toturu. Hatoꞌo komadorine jamangku i ingko. 41 Merompuluꞌ ntoꞌamoꞌa meꞌohaꞌ i ingko, majamaꞌa hampuluꞌ iba ntoꞌa i ingko hingkeꞌna ipaꞌaniꞌa meroduo anaꞌmu kupohantambi. Majama womoꞌa oni ntoꞌa i ingko honiꞌa pahua harongku gimba hei bekeꞌ. I lali pajamangku i ingko hampuluꞌ mpihamo iwolihi harongka ka hapo to idandimokiꞌa. 42 Ane kehawaꞌa nopoꞌowoni Pueꞌ Ala to nopenombai uweꞌku hi Burahima hei to noꞌadaꞌi umoꞌku hi Isaki, kemahuliꞌ ntooꞌ-ntooꞌ hante korawe hoo. Angkana Pueꞌ Ala noꞌokiꞌmo komaporiꞌne pajamangku, iomo horiana hiwowini nokamorokiko i lali pepototurumu.”

Hi Laba modandi hante hi Akoꞌ

43 Uko tiꞌo mehoniꞌ hi Laba notiꞌi, “Hantambimuhi iomo anaꞌkuhi, anaꞌra iomo oꞌuweꞌkuhi, hei lambaꞌa tiꞌo hanungkulu. Kotuꞌuana, hinangkana to iꞌokiꞌ iseꞌe aku tumpune lekiꞌna. Angkana aku hawaꞌa wadi mowali hapo-hapo motaha anaꞌku hei oꞌuweꞌkuhi. 44 Agina mampoꞌuwaꞌki podandi. Topomehuntu-huntu watu hieꞌe mewaliꞌ tandaꞌ podandianta.” 45 Uko katoꞌo, noroamo hi Akoꞌ haꞌanu watu honiꞌi nopopetotiꞌi mewaliꞌ watu pampekolowoi. 46 Honiꞌi norumbaꞌhi toaꞌ morampu watu honiꞌi roꞌodoꞌ moromiꞌ itoꞌo, hei mangkahi moꞌawa-awa dodungku i watu tiꞌo. 47 Watu to roꞌodoꞌ tiꞌo nokokeneꞌi hi Laba watu Yegar-Sahaduta, angkana hi Akoꞌ mangkokoneꞌi Galet. 48 Notiꞌi hi Laba pe hi Akoꞌ, “Watu to niꞌodoꞌ hieꞌe mewali sabiꞌ podandinta,” iomo horiana watu tiꞌo nikokeneꞌi Galet. 49 Watu tiꞌo rokokoneꞌi woꞌo Mispa palaihana, “Pebolaꞌa Pueꞌ mosobiꞌiki kehapoki momekoꞌela”. 50 Ane mowaliko to kodake i anaꞌkuhi to ipohantambi, ba iroa towoweꞌe ntaniꞌna ipohantambi, kehapoꞌi hawaꞌi uwaꞌ to pobahaꞌo alaꞌ ingkiꞌ momekoꞌelaki, moromiꞌ-romiꞌko alaꞌ Pueꞌ Ala to mosobiꞌiki. 51 Notiꞌi hi Laba pe hi Akoꞌ, “Watu to mohuntu-huntu hieꞌe mewali tandaꞌ popangkolowointa. 52 Hingkeꞌna hawaꞌa mowali to kodake pe ingko, hatoꞌo woꞌo ingko hawaꞌko mowali to kodake pe ingka. 53 Pueꞌ Ala to nopenombai uweꞌmu hi Burahima, hei hi Nahor umoꞌku, hei to nopenombai woꞌo umoꞌra, iomo to mampelumbui podandinta hieꞌe.” Uko tiꞌo hi Akoꞌ mosumpa i lali konaꞌna Pueꞌ Ala to noꞌadaꞌi hi Isaki umoꞌna. I podandina nopokononto hangangaa nopetuntui dandire. 54 I wombo' biri tiꞌo, norokoꞌmo hambaꞌa pinatuwuꞌ nopopenomba pe Pueꞌ Ala. Uko tiꞌo nowowoimohi lekiꞌ-lekiꞌra hingkeꞌna mangkahi moꞌawa-awa, hei ukohi mangka haminimohi itoꞌo. 55 Ikopoꞌonina mihoꞌolu-olu hi Laba moꞌumaꞌmo anaꞌnahi hante oꞌuweꞌnahi hei notororakamohi, honiꞌi hi Laba hante toaꞌnahi mahuliꞌmohi pe peꞌohaꞌara.