30
1 Nobahaꞌ hi Raheli, kotane moꞌanaꞌ ka hi Akoꞌ, horiana io mohiriꞌ pe kokaꞌna tiꞌo, katoꞌo notiꞌi pe hi Akoꞌ, “Ipaꞌaniꞌa moꞌanaꞌ, ane hawaꞌi, agingku mahimoluꞌa!” 2 Katoꞌo mehupaꞌ kobukotane hi Akoꞌ pe hi Raheli hei io mantiꞌi, “Akureꞌi pampohawane Pueꞌ Ala, to mohida bolaꞌ anaꞌma?” 3 Notiꞌi hi Raheli, “Hintuꞌe hi Bilha, hawiꞌku towoweꞌe, ipoloꞌorimo, hingkeꞌna ka io aku pahua oꞌanaꞌ.” 4 Horiana nopepaꞌanikimo hi Bilha, hawiꞌne tiꞌo, pe hi Akoꞌ mewali hantambina katoꞌo hi Akoꞌ mampoloꞌori hawiꞌ tiꞌo. 5 Hi Bilha mehinonaꞌi, katoꞌo mampoꞌanaꞌki haduo oꞌanaꞌ tomaꞌani ka hi Akoꞌ. 6 Mololitamo hi Raheli, “Pueꞌ Ala mepaꞌanimo pampomombaha kotangku masalaꞌna, hei Nopehoromuamo perapiꞌku hei Nopaꞌanikimoꞌa haduo oꞌanaꞌ tomaꞌani.” Iomo horiana nokokeneꞌi anaꞌ tiꞌo hi Dan. 7 Uko tiꞌo hi Bilha mehinonaꞌi womo, hei moꞌanaꞌ haduo tomaꞌani. 8 Notiꞌi hi Raheli, “Tuꞌu-tuꞌu mosilumbaꞌa hante kokaꞌku hei penaniꞌa,” iomo horiana anaꞌ tiꞌo nikokeneꞌi hi Natali. 9 Hi Lea nopekokiri hamboaꞌmo intu moꞌanaꞌ, io horiana nopaꞌaniki hi Akoꞌ hawiꞌne hi Silipa nopohantambi. 10 Hei hi Silipa hawiꞌna hi Lea, moꞌanaꞌ haduo oꞌana tomaꞌani. 11 Notiꞌi hi Lea, “Morasiꞌa” katoꞌo io mangkokeneꞌi anaꞌ tiꞌo hi Gati. 12 Katoꞌo hi Silipa hawiꞌna hi Lea moꞌanaꞌ womo tomaꞌani, 13 honiꞌi notiꞌi hi Lea, “Motanaꞌa, hinewowoꞌena lekiꞌ-lekiꞌna towoweꞌe hingkiꞌ mantiꞌi koꞌakuna to motanaꞌ.” Io horiana anaꞌ tiꞌo nokokeneꞌi hi Aser. 14 I tempo pekina, hi Rube nolou matotengkaꞌ i popada hei pahua halangkaꞌ wuaꞌ dudaim, katoꞌo nokomi pe hi Lea, inoꞌna. Notiꞌi hi Raheli pe hi Lea, “Ipaꞌaniꞌa kaiaꞌ hangkiuꞌ wuaꞌ dudaim to nohua anaꞌmu.” 15 Mehoniꞌ hi Lea, “Hawaꞌi tene ipohampaꞌ moroako maꞌaningku, hinewoꞌena hingkiꞌ iroa womo wuaꞌ loti to nohua anaꞌku?” Notiꞌi hi Raheli, “Ane ipaꞌanikiꞌa wuaꞌ loti tiꞌo, i wini hieꞌe wadiluko moloꞌori hante hi Akoꞌ.” 16 Ikohupaꞌnalu hi Akoꞌ kononewa ka popada, toloumo hi Lea mampohidupaꞌkiꞌi, hei notiꞌi, “Ingko hangangaa turuko moꞌawa aku wini hieꞌe, alaꞌ ukomo kupehoroiki hante wuaꞌ loti to nohua anaꞌku pe hi Raheli.” Katoꞌo wini tiꞌo hi Akoꞌ moloꞌori hante hi Lea. 17 Mehinonaꞌi womo hi Lea, alaꞌ Pueꞌ Ala mampehoromua pekokaena, katoꞌo moꞌanaꞌ womo haduo tomaꞌani kolimona. 18 Notiꞌi hi Lea, “Nopaꞌanimoꞌa Pueꞌ Ala huliꞌna, alaꞌ hi Silipa kupaꞌaniki maꞌaningku.” Iomo horiana nokokeneꞌi anaꞌ tiꞌo hi Isakari. 19 Katoꞌo hi Lea mehinonaꞌi womo, hei moꞌanaꞌ tomaꞌani to ka onina. 20 Notiꞌi hi Lea, “Nopaꞌaniꞌa Pueꞌ Ala parase to manobaꞌ. Hinewowoꞌena maꞌaningku hingkiꞌ moꞌadaꞌiꞌa, alaꞌ onimo anaꞌka hamoloꞌ tomaꞌani.” Iomo horiana anaꞌ tiꞌo nokokeneꞌi hi Sebulo. 21 Uko tiꞌo moꞌanaꞌ womo hi Lea towoweꞌe, hei anaꞌ tiꞌo nokokeneꞌi hi Dina. 22 Uko katoꞌo Pueꞌ Ala mangkolowoimo hi Raheli, hei nopehoromuamo pekokaene. Io horiana nowuraꞌmo bolaꞌ anaꞌne hingkeꞌna nopoꞌanaꞌmo. 23 Katoꞌo mehinonaꞌimo hi Raheli hei moꞌanaꞌmo haduo tomaꞌani. Notiꞌi hi Raheli, “Nopahimo Pueꞌ Ala komohilingka. 24 Kuperapiꞌ hingkeꞌna norononihi tene Pueꞌ Ala anaꞌka tomaꞌani.” Io horiana anaꞌ tiꞌo nokokeneꞌi hi Yusuf.Pinatuwuꞌna hi Akoꞌ terononihi
25 Ikonipoꞌanaꞌakinalu hi Yusuf, notiꞌi hi Akoꞌ pe hi Laba, “Ipoliumoꞌa molai, hingkeꞌna kupahuliꞌmo pe bolaꞌ konipoꞌanaꞌangkiku. 26 Ipoliumo hantambingka hante anaꞌkuhi to mewali harongku, kukomi molai. Umoꞌ ibahaꞌlu komadorine jamangku i ingko.” 27-28 Angkana notiꞌi hi Laba pe hi Akoꞌ, “Tontoluko meꞌohaꞌ iseꞌe, ipokonontokimoꞌa ba haꞌumboꞌi haroma to hangangaa kubaiarikiko, alaꞌ tongawamo Pueꞌ Ala mobarakatiꞌa alaꞌ ingko.” 29 Mehoniꞌ hi Akoꞌ, “Umoꞌ, ibahaꞌ hadoduomu kopadorine jamangku i ingko wute tetambai pinatuwuꞌma, alaꞌ aku to morewahi. 30 Ikohandoaꞌangku tene mehupaꞌ i hieꞌe, pinatuwuꞌmu handoaꞌi tene woriꞌ, angkana nokomi koꞌakuna horiana Pueꞌ mobarakatiko, wutemoko mewali toaꞌ topebiaꞌ, angkana ingka hohumbomoka, alaꞌ hinewowoꞌena hangangaa mampajamakiꞌa hantambingku hante anaꞌkuhi.” 31 Notiꞌi hi Laba, “Hade hapomo to kupaꞌanikiko?” Hi Akoꞌ mehoniꞌ, “Hampoliꞌmoꞌa ipaꞌani hapo-hapo. Ane majamaꞌa tene i ingko morewahi pinatuwuꞌmu, halangkaꞌlu to kuperapiꞌo, 32 ando hieꞌe ipoliuꞌa moroa lekiꞌ-lekiꞌna gimba hante bekeꞌ to moꞌiti hei to lolobaꞌ iolu harongka to kuperapiꞌ. 33 I kamuri intu mombaha kohawaꞌka masalaꞌ. Ane iparesaꞌi pinatuwuꞌka, hei ane rapaꞌna ihua hambaꞌa gimba tota moꞌiti ba hambaꞌa bekeꞌ to hawaꞌi lolobaꞌ, palaihana tiꞌo to kunako.” 34 Mehoniꞌ hi Laba, “Kuponiuꞌ mpololeke lolitama tiꞌo.” 35 Katoꞌo nopotaniꞌmo mpuꞌu hi Laba i ando tiꞌo, lekiꞌ-lekiꞌna bekeꞌ laki to lolobaꞌ, hante lekiꞌ-lekiꞌna bekeꞌ lunaro to lolobaꞌ hante boburiꞌ hei bororikoꞌ, hante nopotaniꞌ woꞌo lekiꞌna gimba to moꞌiti. Uko tiꞌo nopohawaꞌkimohi anaꞌne molambaꞌ pinatuwuꞌ tiꞌo. 36 Uko katoꞌo molaimohi hi Laba hante anaꞌna, ako mampontaniꞌ lekiꞌ-lekiꞌna pinatuwuꞌ to noperapiꞌ hi Akoꞌ, honiꞌi rokaꞌa moꞌela ka hi Akoꞌ, komoꞌelana tolu ando nipatengkaꞌi. Hei pelobiana bekeꞌ hante gimba io romo to norewahi hi Akoꞌ. 37 Kotoꞌo hi Akoꞌ moroa tolu langkaꞌ daꞌa loti hawar, badam hante berangan honiꞌi nolepaꞌ koliꞌne hingkeꞌna noborikoꞌ. 38 Loti tiꞌo noporia i paꞌinuana gimba hante bekeꞌ hingkeꞌna roꞌokiꞌi ane akohi maꞌinu, alaꞌ i tempora maꞌinu rolei mohantambi. 39 Alaꞌ ane bekeꞌ ba gimba mohantambi mohinoroi loti to nolelaꞌ tiꞌo anaꞌra intu hingkiꞌ bororikoꞌ, boburiꞌ hei lolobaꞌ, 40 honiꞌi pinatuwuꞌ tiꞌo, noroa hi Akoꞌ nopotaniꞌ, mewaliꞌ pinatuwuꞌna, i iliꞌna gimbana hi Laba uwaꞌ tene to mororondoꞌ hante to moꞌiti. Katoꞌo ane hingkiꞌ momepohantambihi, gimbana hi Laba nopemehinoroihi hante pinatuwuꞌ to nopotaniꞌ. Hatoꞌo konojamane hi Akoꞌ hingkeꞌna notetambai gimbane, hei gimba tiꞌo nokaꞌa ka gimbana hi Laba. 41 Ane pinatuwuꞌ to maroho hingkiꞌ mohatambi, noroa womo hi Akoꞌ daꞌane loti to nolepaꞌ noporia i paꞌinuara. 42 Angkana ane pinatuwuꞌ to molau hingkiꞌ mohantambi, hawaꞌi nowali hatoꞌo. Katoꞌo pinatuwuꞌ to moreko tiꞌo mewaliꞌ dolaꞌna hi Laba hei pinatuwuꞌ to maroho mewaliꞌ dolaꞌna hi Akoꞌ. 43 Hatoꞌo pepongkane hi Akoꞌ horiana pebiaꞌ, woriꞌmo bekeꞌne, gimbana, unta, kalide hante woriꞌ hawiꞌne.