23
1 Pɔlɔ ʉnda ndɨ batʉ ba Bhasa-Yidhingi bɨngbangbangba, ɨyɨ aka na ɨbʉ bɛ : « Bomika-mama, lɨmbɛngɨ kɛgʉ kɛdhwa ka ligubho lasɨ nɨlɔ nagyɨlya Kunzi kadhwɛ na lɨsyɛ li nɨlɨ. » 2 Luki limoti, kumu-kumu Anania ʉkpamya ndɨ batʉ nɨbɔ ba ndɨ buwobhi na Pɔlɔ bɛ babɨtɨ. 3 Kʉwa wa, Pɔlɔ abɨkya ndɨ bɛ : « Kunzi nɔ ʉbɨta kʉwa banʉ ɨwɛ, ɨwɛ nɨnɔ abhɛ likingyosi la ikubhasʉ sa ndabʉ si nɨsɔ bodingogo na pɛmbɛ. Wa wakiko kesombiso bɛyɔ mʉtʉʉ abɨkyaga mino, wɨna sɛ, ɨwɛ bɨkpɛ wobunini mʉtʉʉ bɛyɔ webitisisi mino yi ! » 4 Batʉ nɨbɔ ba ndɨ buwobhi na Pɔlɔ wa, babɨkya ndɨ bɛ : « Kumu-kumu ko Kunzi nɔ wakabubiso bɛyɔ ! » 5 Pɔlɔ osikisyo ndɨ bɛ : « Bomika-mama, nakɛgʉ bi kaibho ambɛ kumu-kumu nɔ. A bɛyɔ, ikpiko ka Mobiso Motu bɛ : ‹ Wakatumbwonitɔgʉ ngama wa lɨvananza kakʉ. › »6 Pɔlɔ a ndɨ kaibho bɛ bambanzʉ bagɔgɔ kʉsɔ wa Bhasa-Yidhingi wa, ba ndɨ Basadhukayɔ na bagɔgɔ Bafalisayɔ. Kinili, abɨkya ndɨ na lɨyʉ lapʉ kambwa kabʉ bɛ : « Bomika-mama, ɨmɨ na Mufalisayɔ, mikya-bafalisayɔ. Kiko nɨ nakasamba, a kyɛ na na mʉtamanagɨ ambɛ batʉ nɨbɔ bokwogo ndɨ, bopupokuto ndɛkɛ ka bambʉkʉ. » 7 Nɨyɔ abɨkya bɛyɔ, Bafalisayɔ bapʉnga ndɨ kasaana na Basadhukayɔ, bambanzʉ bɨgbananaga ndɨ. 8 A bɛyɔ, Basadhukayɔ babɨkyaga bɛ kumbuso wa kukwakʉ, bakopupogigʉ ka mbʉkʉ. Bomotiloku gɔnɨ bɛ bamalaika bakɛgʉ, gʉtʉgʉ babhɨlɨ aka. Luki limoti, Bafalisayɔ babɨnɨkyanagatʉ ɨbʉ makpʉmʉka mi nɨmɔ masɨ. 9 Gbʉngbʉ aka ndɨ bihooo ! Bowonisili ba mʉtʉʉ bagɔgɔ ka lidu ka Bafalisayɔ bamanana ndɨ bigwo, bagya ndɨ bodongoso yapʉ, ɨbʉ aka ndɨ bɛ : « Takaɨna abhɛ alʉkʉ yi nɨmʉ kogyigʉ luki lanyɛ gʉtʉgʉ limoti aka. Abhɨlɨ ikanɨ malaika sɛ nɔ anzinilyi bi ? » 10 Nɨyɔ dongoso atʉkya kʉwa ka bakpɨba, ngama ka basʉdha abanga ndɨ bɛ bakasinzogonitɔgʉ Pɔlɔ. Kinili, ʉkpamya ndɨ basʉdha kosyo lugo ka batʉ nɨbɔ bamʉmʉkana ndɨ wa, banyoku, bamigiso ka mʉkɔbɔ. 11 No bhiti yi nɨyɔ aka yɔ, Mombukwono-dhosu apuponilyo ndɨ Pɔlɔ, abɨkya bɛ : « Wigwinɔ lɨmbɛngɨ aka ! Mʉdɔngɔnɨ bɛyɔ wabɨkyaga ndɨ mino lɨkpʉmʉka kamɨ ka Yelusalɛma, okwononi kagya bɛgɛyɔ ka Lʉma. »
Bayudha bakagyɨlya Pɔlɔ dhikidi
12 Bʉgala bagɔgɔ, Bayudha bemoti-bemoti bagya ndɨ dhikidi bɨpɛlɛ. Bakɔ ndɨ silika bɛ bakalyalyɨgʉ ikanɨ komwo luki kadhwɛ kʉ kwa kʉ bamwɔ mino Pɔlɔ. 13 Batʉ bi nɨbɔ bakɔ bagya ndɨ dhikidi yi nɨyɔ, ba ndɨ kakɨtaga batɛkɛbɛ bakwanganya. 14 Baga ndɨ ka bokumu-kumu na bazɛɛ, bʉbɨkya bɛ : « Ibusu, takuni bi silika ambɛ takalyɨgʉ luki kanɨ takanamwigʉ Pɔlɔ. 15 Mbɨya wanʉ, ukonononi na batʉ ba Bhasa-Yidhingi, mabikyoku ngama ka basʉdha bɛ amunyulyiku Pɔlɔ kyɛ makapa kakpɨma lɨkpʉmʉka kakɨ bɨnza. Tiko kʉwa ibusu bakɨlɨka kamosisyo kanɨ kanosilikugʉ wanʉ.
16 Luki limoti, mʉbhʉbhʉgʉ bemoti ka Pɔlɔ ʉkana ndɨ dhikidi yi nɨyɔ. Aga ndɨ ka mʉkɔbɔ, ogulyo, atʉmbʉlyaga ndɨ lɨkpʉmʉka li nɨlɔ. 17 Kʉwa wa, Pɔlɔ amaka ngama ka basʉdha bemoti, ɨyɨ aka na ɨyɨ bɛ : « Mubhisoku mbɛyɨ mʉwanza nɨmʉ kʉ ka kʉmanda kyɛ a na lɨkpʉmʉka kabɨkya. » 18 Ngama ka basʉdha yi nɨnɔ, baga ndɨ na mʉwanza nɔ kʉ ka kʉmanda, abɨkya bɛ : « Mʉtʉ wa bhɔlɔkɔ nɨnɔ ina bɛ Pɔlɔ, emoki, ɛbɨkya bɛ nodhuku no mikya-bawanza yi nʉmʉna kʉnʉ kyɛ a na lɨkpʉmʉka kauzukilyogo. » 19 Kʉmanda amaka ndɨ mʉwanza nɔ bɨkɛdɛ, amuuso bɛ : « A sɛ bʉnɨ ? » 20 Asikisyo ndɨ bɛ : « Bayudha bukononi bi bɛ bakaʉkʉnga Pɔlɔ na bʉgala, upupisilyoku kambwa ka batʉ ba Bhasa-Yidhingi abhɛ bakiko kapa bakpɨmɨ lɨkpʉmʉka kakɨ bɨnza. 21 Luki limoti, wakukononitɔgʉ. A bɛyɔ, bambanzʉ kakɨtaga batɛkɛbɛ bakwanganya lugo kabʉ ba na ɨyɨ mʉlɨka. Baku bi silika bɛ bakalyalyɨgʉ ikanɨ komwo luki kanɨ bakanamwigʉ. Mbɨya wanʉ, ba bakɨtʉlya kabʉndaga kʉwa nɨlɔ aka lɔ wabɨkya. » 22 Kʉwa wa, kʉmanda basanana ndɨ na mʉwanza yi nɨnɔ nɨ agbityogini bɛ katumbulyogonitɔgʉ mʉmbanzʉ lɨkpʉmɨka li nɨlɔ.
Batikini Pɔlɔ ka ngama wa iwili bɛyɔ ka Felisi
23 Kʉwa wa, kʉmanda ʉmaka ndɨ bangama ka basʉdha baba lugo ka nɨbɔ bagɔgɔ, ʉbɨkya bɛ : « Uvoni basʉdha bamɨya baba, mʉva batɛkɛbɛ madɨya na ɨka nɨbɔ babhʉmanaga kʉgʉ wa bapunda na bamɨya baba nɨbɔ babhʉmʉnaga na bosyogbu. Biki bakɨtʉlya kaɨnda ka Kaisalia na saa-tatʉ yo bhiti. 24 Mubungusilyogonito gɔnɨ Pɔlɔ bapunda nɨbɔ bakpokyoniso, badhwiso bɨnza kʉ ka ngama Felisi. » 25 Kumbuso yi, akpiko ndɨ balʉwa bɛ :
26 « Ɨmɨ Kɔlɔdhɛ Lusiasi, numuusogito ɨwɛ ngama wa ɨbhɨbha kʉgbɛ bɛyɔ ka Felisi. 27 Bayudha bo bi nɨ bagwini alʉkʉ yi nɨmʉna nutikilyi mʉ, bo bi kapa kamwɔ. Nɨyɔ nukoni bi bɛ a Mʉlʉma, nasingyo bi na basʉdha kamɨ, naukusogo. 28 Yɛkɨ no bi kapa kaibho ambɛ Bayudha basungulyi ko bhulyo ɨkɨ, naga bi na ɨyɨ ka Bhasa-Yidhingi kabʉ. 29 Nini bi ambɛ bo bi kagya bodongoso na Bapɔlɔ ko bhulyo ya mʉtʉʉ kabʉ. Luki limoti, kɛgʉ na ɨbɔ gʉtʉgʉ yimoti aka nɨyɔ bakwanana mino kamwɔ ikanɨ kagwi. 30 Nɨyɔ nukoni bi bɛ Bayudha bakagyɨlya dhikidi kyɛ bamwɨ, nʉtɨkɨlya bi bɨgala-gala. Nʉbɨkya bi batʉ bi nɨbɔ basʉngʉlyi bi ambɛ bɨndɨ na ngbanga yi nɨnɔ kʉ kakʉ. »
31 Basʉdha bagya ndɨ bɛyɔ aka yɔ bʉkpamya ndɨ mino. Bava ndɨ Pɔlɔ, baga na ɨyɨ no bhiti yi nɨyɔ aka yɔ kadhwɛ kʉ kwa kʉ ka gʉdʉ wa Atipatilisi. 32 Bʉgala bi, basʉdha bi nɨbɔ ba ndɨ na magʉ bigononoku kʉwa ndɨ ɨbʉ ka mʉkɔbɔ, bʉsa ndɨ nɨbɔ ba ndɨ kʉgʉ wa bapunda kaidhukulogo na Bapɔlɔ. 33 Nɨyɔ aka yɔ bosilo ka Kaisalia, bapá ndɨ ngama Felisi balʉwa, bawanya kʉwa gɔnɨ ndɨ Pɔlɔ. 34 Ngama atangʉlaga ndɨ, amuuso Pɔlɔ bɛ : « Wa mʉtʉ wa iwili tino ? » Nɨyɔ ʉkana ndɨ bɛ Pɔlɔ a mʉtʉ wa Kilikia, 35 ɨyɨ aka ndɨ na ɨyɨ bɛ : « Tanda lɨkpʉmʉka kakʉ ngbingo yi nɨnɔ batʉ nɨbɔ bʉsʉngulyi bi, bosiloku banʉ mino. » Akpamya ndɨ bɛ babuulyogi Pɔlɔ ka ndabʉ nɨyɔ Ɛlɔdhɨ Mbɔkʉ opikisiso ndɨ.