Bupunogini bambanzʉ madɨya na ɨka kausingyo batʉtʉmbwa
6
1 Ka masyɛ mi nɨmɔ, yɛkɨ babɨbya ba ndɨ kobhwo kʉgbɛ, Bayudha nɨbɔ banzɨnaga Ligiliki bapʉnga ndɨ kaɨgama na nɨbɔ banzɨnaga Liebhalania, banabɨkya bɛ masyɛ masɨ, ngbingo mʉgbananaga malɨlɨ, bakʉpágɨgʉ bowoko kabʉ malɨlɨ bɨnza. 2 Kʉwa wa, batʉtʉmbwa tɛkɛbɛ na baba bʉmʉmʉla ndɨ babɨbya bagɔgɔ basɨ, bʉbɨkya bɛ : « Kokwononigʉ bɛ tasɨ kabɨkyaga Mongoni Manza ko bhulyo yɨgbananaga malɨlɨ. 3 Kinili, bomika-mama, upunogoni bambanzʉ madɨya na ɨka lugo kunu nɨbɔ ba yɨgya yanza, butumo na Lɨmbɛngɨ Lotu na yimibho. Tʉpá ɨbʉ ligubho li nɨlɔ. 4 Ibusu, togulyonogo malʉmba na kabɨkyaga Mongoni Manza. » 5 Lɨkpʉmʉka lɔ uboso ndɨ batʉ basɨ. Bʉpʉnaga kʉwa ndɨ batʉ bi nɨba : Etieni, mʉtʉ wa bhaya yidhingi na mutumo na Lɨmbɛngɨ Lotu, Filipi, Pɔlɔkɔlɔ, Nikanɔlɔ, Timoni, Palamɛna sɛ kʉwa Nɨkʉla, mʉtʉ wa Atiokia nɨnɔ abhaya ndɨ ka kanisa ka Bayudha. 6 Kumbuso yi, bodhoku ndɨ na ɨbʉ kambwa ka batʉtʉmbwa, bubhisilyo mabɔkʉ, bʉlʉmbɨlya.7 Mongoni Manza ko Kunzi a kʉwa ndɨ kaisisilogo aka. Ka Yelusalɛma, babɨbya bobhwo ndɨ bakpʉ na bokumu budhingi babɨnɨkyana ndɨ Yeso.
Bagwini Etieni
8 Etieni nɨnɔ Kunzi adukulyo ndɨ bʉbʉnga, atumiso no ngu, agyaga ndɨ makpʉmʉka mʉmbanga-mbanga na mokingyosi makpʉkpʉ lugo ka bambanzʉ. 9 Kʉwa wa, batʉ bagɔgɔ bapʉnga ndɨ bodongoso na Etieni. Batʉ bi nɨbɔ ba ndɨ batʉ ba ndabʉ ya likungoni nɨyɔ balɨkyaga ndɨ bɛ « Bosunzu bʉkʉlɨkanaga. » A ndɨ Bayudha ba gʉdʉ wa Kulene, nɨyɔ ya Alesandulia, sɛ kʉwa nɨbɔ ba iwili ya Kilikia na nɨyɔ ya Azia. Ɨbʉ bɔ ba ndɨ kobhiso bodongoso na Etieni, 10 luki limoti, bakakwananagʉ ndɨ kakɨtaga kyɛ a ndɨ kanzɨna na yimibho nɨyɔ Lɨmbɛngɨ Lotu apága ndɨ. 11 Kʉwa wa, bʉkalyaga ndɨ bambanzʉ kyɛ babɨkyɨ bɛ : « Tamukoni bi nɨ anatʉmbwa Musa no Kunzi. » 12 Buvikimosogo ndɨ bambanzʉ, bagʉgʉ na bowonisili ba mʉtʉʉ. Kʉwa wa, bodhoku ndɨ kagwi Etieni, baga na ɨyɨ ka Bhasa-Yidhingi. 13 Bodhokuto ndɨ gɔnɨ na badhɛmʉ ba bɔngɔ nɨbɔ ba ndɨ kabɨkya bɛ : « Alʉkʉ mʉna kɛgʉ kaɨga kumbuso na mʉnzɨna manyɛnyɛ ko bhulyo ndabʉ yotu ko Kunzi na ko bhulyo mʉtʉʉ ka Musa ! 14 A bɛyɔ, tamukonito bi nɨ anabɨkya bɛ Yeso yi nɨnɔ mʉtʉ wa Nazaleti apanza banʉ ndabʉ ko Kunzi yi nɨyɨna, ogomosyono yɨgya nɨyɔ Musa atɨsɨlya ndɨ. »
15 Batʉ basɨ nɨbɔ ba ndɨ ka Bhasa-Yidhingi ba ndɨ kanda Etieni bɨngbangbangba. Bɨna ndɨ miso kakɨ mʉdɔngɔnɨ abhɛ nɨmɔ ka malaika.