Lɨmbɛngɨ Lotu usyilini babɨbya
2
1 Nɨyɔ lɨsyɛ la Patɨkɔtɨ ɨtʉlyana, babɨbya basɨ ba ndɨ bʉmʉmʉkana pa imoti. 2 Ko ngbingo bemoti, mungbi obuko ndɨ kotʉkyoku kʉgʉ wa lɨsyɛ mʉdɔngɔnɨ abhɛ muvivi mapʉ, otumo bɨdɛ ka ndabʉ yasɨ nɨyɔ ba ndɨ mino bakikonono. 3 Bɨna kʉwa ndɨ luki anipupisoku abhɛ madada mo buku. Ɨgbananaga ndɨ, ibhisogo limoti-limoti kʉgʉ ka mʉmbanzʉ yɨkaka-yɨkaka. 4 Ɨbʉ basɨ botumo ndɨ na Lɨmbɛngɨ Lotu, bapʉnga kanzɨna masasʉ magɔgɔ mʉdɔngɔnɨ bɛyɔ Lɨmbɛngɨ li nɨlɔ a ndɨ mino kaʉkpamya.5 Wɨna sɛ, Bayudha nɨbɔ botukyoku ndɨ ko giyo yasɨ ya ɔbɨlɨ, bikogo ndɨ ka Yelusalɛma wa. Babangaga ndɨ Kunzi kʉgbɛ. 6 Ngbingo yi nɨnɔ bʉkana ndɨ mino mungbi mi nimɔ, bamʉmʉkana ambaza bemoti. Ɨbʉ basɨ banombomboyo kʉgbɛ, kyɛ mʉtʉ bemoti-bemoti lugo kabʉ a ndɨ kaʉmʉkana babɨbya nɨ bakanzɨna ka lɨsasʉ kakɨ bɨkpɛ. 7 Lɨkpʉmʉka lɔ ʉmbanga ndɨ kʉgbɛ, botumo na ombombo bɨdɛ, babɨkya bɛ : « Batʉ nɨbana bakanzɨna ba, bakɛgʉ mbɛyɨ basɨ asɨ Bagalilaya aka ? 8 Igyonoso kʉwa bʉnɨ bɛ mʉtʉ yɨkaka-yɨkaka lugo kusu ʉmʉkanɨ kanzɨna lɨsasʉ kakɨ la kɨbʉkʉta ? 9 Atʉ ndɨ na bambanzʉ nɨbɔ botukyoku ndɨ ka mugi ma Palatɨ, Medhi, Ɛlamʉ, Mezopotamia, Yudhɛa, Kapadhokia, Poto na ka iwili ya Azia, 10 Fuligia, Pamufilia, Misili, ka pa yimoti ya Libhia nɨyɔ a buwobhi na gʉdʉ yi nɨnɔ ina bɛ Kuleni. Atʉ ndɨ na nɨbɔ botukyoku ndɨ ka gʉdʉ wa Lʉma, 11 ka mugi ma Kɛlɛtɛ na nɨmɔ ma Bangwana. Lugo kabʉ, atʉ ndɨ na Bayudha bɨkpɛ, na bagɔgɔ nibɔ bagyaga mʉtʉʉ ka Musa. Wɨna sɛ, ibusu basɨ takaʉmʉkana kanzɨna makpʉmʉka mʉmbanga-mbanga ko Kunzi ka masasʉ kusu. »
12 Bombomboyo ndɨ basɨ, lɨkpʉmʉka ʉmbanga kʉgbɛ. Buusono bɛ : « Isi ya lɨkpʉmʉka lɨna pɨyɛ nɨ ɨkɨ ? » 13 Luki limoti, bagɔgɔ bapʉnga kaʉtɨbha babɨbya, banabɨkya bɛ : « Nɨbana bokwini lɨbhʉma ! »
Pɛtɛlɛ akanzɨna kambwa wa ambaza ka bambanzʉ
14 Kʉwa wa, Pɛtɛlɛ amaga ndɨ pa imoti na batʉtʉmbwa tɛkɛbɛ na bemoti, apʉnga ndɨ kabɨkya na lɨyʉ lapʉ bɛ : « Ibunu bomikya Bayudha, na ibunu basɨ nɨbɔ mikogo ka Yelusalɛma, pongoni motili, mibho nɨlɨ, mʉkana bɨnza nɨlɔ nakamʉbɨkya. 15 Batʉ nɨbana bakɛgʉ na lɨbhʉma bɛyɔ mo mino kaʉmɨna yɨ, kyɛ mɔnɨ a mbɛyɨ ka saa-tatʉ ya bʉsɔbɨ aka. 16 Luki limoti, lɨkpʉmʉka nɨlɔ mugyalandʉ Yueli abɨkya ndɨ, a kʉwa kaigyonoso mbɨya wanʉ :
17 ‹ Kunzi akabɨkya bɛ : Ka masyɛ ma mulibo,
nudukulyo ndɛkɛ bambanzʉ basɨ Lɨmbɛngɨ kamɨ;
bomikunu, balʉkʉ na boko bi biko ndɛkɛ bogyalandʉ,
bawanza na bambɔkʉ-mbɔkʉ kunu balʉtaga ndɛkɛ bonziki.
18 Iyo, ka masyɛ mi nɨmɔ,
noduko ndɛkɛ Lɨmbɛngɨ kamɨ
kʉgʉ ka bagya-ligubho kamɨ boko na balʉkʉ bi,
biko kʉwa ndɛkɛ bogyalandʉ.
19 Nagya ndɛkɛ makpʉmʉka mʉmbanga-mbanga kʉgʉ wa lɨsyɛ
na mokingyosi mʉpá ombombo ka ɔbɨlɨ wa.
Mɨna ndɛkɛ bangʉ,
buku na muki bindegbungbu.
20 Mɔnɨ opiyo ndɛkɛ bipi,
tɨmba angbamya bɨngbʉ abhɛ bangʉ.
Nɨmɔ igyonoso ndɛkɛ kambwa wa lɨsyɛ nɨlɔ Mombukwono-dhosu odhoku ndɛkɛ mino,
lɨsyɛ li nɨlɔ lidhingi na la ɨbhɨbha.
21 Kʉwa wa, mʉtʉ wasɨ nɨnɔ ɨgama ndɛkɛ no lino ko Mombukwono-dhosu, inisono ndɛkɛ na muukuso. ›
22 Ibunu bomikya Bɛzaleli, ukononi bɨnza lɨkpʉmʉka nɨlɨna nakamʉbɨkya lɨ : Kunzi amuwonisotʉ ndɨ bɛ Yeso nɨnɔ mʉtʉ wa Nazalɛti nɨ wanɨ. Makaibho bɨnza bɛ Kunzi agya ndɨ lugo kunu, pisi ka Yeso, makpʉmʉka makpʉkpʉ, mʉmbanga-mbanga na mokingyosi mʉpá ombombo. 23 Basʉta ndɨ alʉkʉ yi nɨnɔ ka mabɔkʉ kunu, Kunzi a ndɨ kaibho nɨlɔ kambwa aka, abhaɨlya bɛ igyonosi bɛyɔ. Mamwɔ ndɨ pisi kabhongisiso ka mʉsalabha ka mabɔkʉ ka batʉ bi nɨbɔ bakamibhigʉ Kunzi. 24 Luki limoti, Kunzi, akʉlaga ndɨ ka mʉzʉzʉla ma kukwakʉ pisi kapupiso ka mbʉkʉ, kyɛ kukwakʉ kakwananɨgʉ ndɨ kakʉkʉmɨlyaga. 25 A bɛyɔ, Dhaudhi anzɨna ndɨ ko bhulyo kakɨ bɛ :
‹ Namɨnaga ndɨ Mombukwono-dhosu kambwa kamɨ bongbingo basɨ.
a buwobhi na ɨmɨ kyɛ nakomomonitɔgʉ.
26 Kinili, lɨmbɛngɨ kamɨ a na mazɨyɔ,
mʉnɔkʉ kamɨ amutumo na magyagya bɨdɛ,
gʉtʉgʉ nzʉyɨ kamɨ iko ndɛkɛ yakɨtʉlya ka mʉtamanagɨ,
27 a bɛyɔ, wakasɨgʉ ndɛkɛ lɨmbɛngɨ kamɨ kozingo ka babhɨlɨ,
wakasɨgʉ ndɛkɛ mʉgya-ligubho kakʉ Wotu kapɔ.
28 Wewoniso ndɨ bopisi ba ya ɔbɨlɨ wa lɨngʉnʉ,
wetumiso ndɛkɛ na magyagya bɨdɛ wa tiko mino na ɨwɛ. ›
29 « Bomika-mama, nakwanana kamʉbɨkya lɨngʉnʉ ko bhulyo ka titosu bɛyɔ ka Dhaudhi bɛ : okwoni ndɨ, balumbo. Mbʉkʉ kakɨ a mbɛyɨ bata wa aka wa kadhwɛ na lɨsyɛ li nɨlɨ. 30 Luki limoti, a ndɨ mugyalandʉ, ibho ndɨ bɛ Kunzi akʉlya ndɨ silika bɛ amomoso ndɛkɛ miki bemoti lugo wa lɨvananza kakɨ nɨnɔ alya ndɛkɛ bʉngama ka pa kakɨ. 31 Dhaudhi ɨna ndɨ kambwa aka bɛ Kilisito opupokuto ndɛkɛ ka mbʉkʉ ngbingo yi nɨnɔ abɨkya ndɨ mino bɛ :
‹ Kunzi kasɨgʉ ndɛkɛ kozingo ka babhɨlɨ,
na nzʉyɨ kakɨ kapʉgʉ ndɛkɛ. ›
32 Kunzi apupisotʉ ndɨ Yeso yi nɨnɔ nakanzɨna ko bhulyo kakɨ ka mbʉkʉ, ibusu basɨ ta badhɛmʉ ba lɨkpʉmʉka li nɨlɔ. 33 Kʉwa wa, Kunzi adokiso ndɨ kʉgʉ, alikiso ka kʉmbanzɨkanɨkɔ kakɨ. Apá ndɨ Lɨmbɛngɨ Lotu mʉdɔngɔnɨ bɛyɔ awanyaga ndɨ mino. Yeso atitikilyoku ndɨ. A nɨlɔ makaɨna na kaʉkana mbɨya wanʉ. 34 A bɛyɔ, Dhaudhi kadakagʉ ndɨ ɨyɨ kʉgʉ wa lɨsyɛ, luki limoti abɨkya ndɨ bɛ :
Mombukwono-dhosu Kunzi abɨkya ndɨ Mombukwono-dhamɨ bɛ :
dhawiki ka kʉmbanzɨkanɨkɔ kamɨ,
35 kadhwɛ kʉ kwa kʉ nubhiso mino bomuyoniso kakʉ kusili wa bakagba kakʉ.
36 Kinili, bɛvananza bayasɨ ba ya Ɨzalɛlɨ bokwononi kaibho bɨnza bɛ Yeso yi nɨnɔ mabhangɨlaga ndɨ ka mʉsalabha, Kunzi aitiso ndɨ Mombukwono-dhosu na Kilisito ! »
Bambanzʉ bɛlɔfʉ basaa babhoilyini Kunzi
37 Nɨyɔ bambanzʉ bʉkana mino lɨkpʉmʉka li nɨlɔ bɛyɔ, bogwo ndɨ ombombo kʉgbɛ. Bamuuso Pɛtɛlɛ na batʉtʉmbwa bagɔgɔ bɛ : « Bomika-mama, tagya nɨlɨna bʉ ? » 38 Pɛtɛlɛ usikisyo bɛ : « Ikosoni mambɛngɨ na mʉmbanzʉ yɨkaka-yɨkaka ogwo ibatiso ko lino ka Yeso-Kilisito, Kunzi amʉpɨlyatʉ bʉnyɛ kunu, amʉpá Lɨmbɛngɨ Lotu. 39 A bɛyɔ, agɔmɛ ko Kunzi a ko bhulyo kunu na bomikunu. A ko bhulyo ka batʉ basɨ nɨbɔ ba byɨ, na basɨ nɨbɔ Mombukwono-dhosu Kunzi ʉmaka ndɛkɛ. »
40 Pɛtɛlɛ idhukulogo bata ndɨ kaʉtʉmbʉlyaga makpʉmʉka magɔgɔ kaʉpá mʉsasa ka bhaya na kautumiso mambɛngɨ, anabɨkya bɛ : « Puponi ka mʉdɔngɔ ka batʉ ba lɨsyɛ li nɨlɨ kyɛ ba banyɛ, Kunzi amuusogotʉ. » 41 Budhingi lugo kabʉ babhaɨlya ndɨ mʉnzɨna ka Pɛtɛlɛ, bogwo ibatiso. Lɨsyɛ li nɨlɔ, bambanzʉ abhɛ bɛlɔfʉ basaa babhaɨlya ndɨ, bɨmatɨla ka lidu ka batʉ ba bhaya.
Ɔbɨlɨ ka batʉ ba bhaya ikogo ndɨ bʉnɨ ?
42 Bikogo ndɨ bakɨtʉlya bongbingo basɨ kaʉkana mʉtɨwɨ ka batʉtʉmbwa, ɔbɨlɨ kabʉ ikogo ndɨ abhɛ bomika-muko, banalyalya pa imoti+\fr 2.42 \fq Kalyalya pa imoti\ft : Akwananatʉ kaiko ka mɨza ka Mombukwono-dhosu, ikanɨ kalya komonyo, ikanɨ kalya malɨlɨ aka bɨkpɛ. na banalʉmba pa imoti. 43 Mʉmbanzʉ yɨkaka-yɨkaka lugo kabʉ ikogo ndɨ na kʉbangakʉ, kyɛ Kunzi agyaga ndɨ makpʉmʉka mʉmbanga-mbanga makpʉ pisi ka batʉtʉmbwa. 44 Bikogo ndɨ ɨbʉ basɨ luki limoti, banobhiso mukumbo kabʉ pa imoti. 45 Bagabhaga ndɨ lɨngama na mukumbo kabʉ, bagbananaga buyi bi lugo kabʉ basɨ kabyɛnɛnɛ na yangya ka mʉtʉ wasɨ yɨkaka-yɨkaka. 46 Lɨmbɛngɨ limoti, bamʉmʉkanaga ndɨ masyɛ masɨ ka ndabʉ ko Kunzi, banalyalya pa imoti+\fr 2.46 \fq Kalyalya pa imoti\ft : Akwananatʉ kaiko ka mɨza ka Mombukwono-dhosu, ikanɨ kalya komonyo, ikanɨ kalya malɨlɨ aka bɨkpɛ.. Balyalyaga ndɨ na magyagya, na mambɛngɨ makisiso ka bandabʉ kabʉ. 47 Babhibhisogo ndɨ Kunzi, bambanzʉ basɨ banʉpa. Masyɛ masɨ Mombukwono-dhosu ʉmatɨlaga ndɨ ka lidu kabʉ, bambanzʉ nɨbɔ binisonogo ndɨ na muukuso.