Lugubho ka batʉtʉmbwa bɛyɔ Luka okpikogo ndɨ mino
Luka akatʉmbʉlaga lɨkpʉmʉka la kɨtabʉ kakɨ
1
1 Ambɔkʉ Tiofilo, kʉsɔ wa kɨtabʉ kamɨ ya mambwa, natʉmbʉlaga ndɨ makpʉmʉka masɨ nɨmɔ Yeso apʉnga ndɨ kagya na kowonisilo katʉkya ka bʉndɛlɨ, 2 na kadhwɛ ka lɨsyɛ li nɨlɔ Kunzi adokiso ndɨ mino kʉgʉ wa lɨsyɛ. Yeso a ndɨ nɨ upunogini batʉtʉmbwa, kambwa kadaka kʉgʉ wa lɨsyɛ, ʉpá mʉtʉʉ pisi ka Lɨmbɛngɨ Lotu.
Yeso uwonyogini batʉtʉmbwa Lɨmbɛngɨ Lotu
3 A bɛyɔ, kumbuso wa kukwakʉ kakɨ, Yeso upuponilyo ndɨ batʉtʉmbwa kauwonisilo bɨngbanganya ko bopisi dhidhidhi bɛ opupiniku bi ka mbʉkʉ. Kʉsɔ wa masyɛ batɛkɛbɛ bakwanganya, Yeso upuponilyogo ndɨ, anʉnzɨnɨlya ko bhulyo Bʉngama ko Kunzi. 4 Lɨsyɛ limoti, ngbingo yi nɨnɔ ba ndɨ mino kalyalya pa imoti, ʉgbɨtyaga ndɨ bɛ : « Makotukyonitɔgʉ kaYelusalɛma wa. Luki limoti, mubundogoni apɛpɛ nɨnɔ aka nɔ Bhabha amʉwanyaga ndɨ. Apɛpɛ yi nɨnɔ ɨmɨ mombukwono-dhakɨ namʉpá ndɨ mongoni mi. 5 A bɛyɔ, Yuani obotiso ndɨ ko libo. Luki limoti, ibunu, kumbuso wa masyɛ makɛdɛ, bamubotiso banʉ na Lɨmbɛngɨ Lotu. »
Yeso akadaka kʉgʉ wa lɨsyɛ
6 Kʉwa wa, batʉtʉmbwa nɨbɔ ba ndɨ bʉmʉmʉkana pa imoti na Yeso, bamuuso ndɨ bɛ : « Mombukwono-dhosu, wakaumigisilyo Bɛzalɛlɨ Bʉngama mbɨya wanʉ ? » 7 Yeso usikisyo ndɨ bɛ : « Kɛgʉ bhulyo kunu kaibho ngbingo ikanɨ lɨsyɛ nɨlɔ lɨkpʉmʉka li nɨlɔ igyonoso ndɛkɛ mino. Bhabha yɨkaka aka nɔ akaibho ko ngu kakɨ. 8 Luki limoti, motumo banʉ no ngu ngbingo yi nɨnɔ Lɨmbɛngɨ Lotu amusilyo mino. Miko badhɛmʉ kamɨ ka gʉdʉ yi nɨnɔ ina bɛ Yelusalɛma, kʉsɔ wa iwili ya Yudhea na Samalia wasɨ na kadhwɛ ka mondu ma ɔbɨlɨ wasɨ. »
9 Kumbuso wa mʉnzɨna mi nɨmɔ, Kunzi adokiso ndɨ Yeso kʉgʉ wa lɨsyɛ nɨ batʉtʉmbwa kakɨ banamɨna. Kʉwa wa, ɨkʉba adiko ndɨ biwadi nɨ bakaminigʉ bata.
10 Ko ngbingo yi nɨnɔ bazwa kabʉ ba mbɛyɨ ndɨ mino bakɨtʉlya aka kʉgʉ wa lɨsyɛ kʉ Yeso a ndɨ mino kaaga, batʉ baba bakimokisyogo botu bitutu bupuponilyoku ndɨ bigbututu. 11 Bʉbɨkya ndɨ batʉtʉmbwa bɛ : « Ibunu batʉ ba Galilaya, ko bhulyo ɨkɨ yɔ momononi mino bigwo, mananda asɨ kʉgʉ wa lɨsyɛ aka bɛyɔ ? Yeso nɨnɔ Kunzi atumbi lugo kunu kadokiso kʉgʉ wa lɨsyɛ, igoku ndɛkɛ mʉdɔngɔnɨ bɛgɛyɔ mamini mino kaaga yi. » 12 Kʉwa wa, batʉtʉmbwa batʉkya ka ngʉpa nɨyɔ balɨkyaga ndɨ bɛ ngʉpa ya Mizeituni, bɨga ka Yelusalɛma. Ngʉpa yi nɨyɔ kɛgʉ ndɨ byɨ na gʉdʉ, a ndɨ abhɛ kilomɛtɛlɛ imoti aka. 13 Ngbingo yi nɨnɔ bosilo mino ka Yelusalɛma, badaka ndɨ ka ndabʉ ya kʉgʉ nɨyɔ bamʉmʉkanaga ndɨ. A ndɨ nɨ Pɛtɛlɛ, Yuani, Zaki, Andɨlɨya, Filipi, Tʉma, Bhatulumei, Matayɔ, Zaki mika Alʉfayɔ, Simoni nɨnɔ a ndɨ kakɨsa ɨpandasɨ ka mugi kabʉ na Yudha mika Zaki. 14 Ɨbʉ basɨ bamʉmʉkanaga ndɨ masyɛ masɨ kalʉmba pa imoti na mʉtamanagɨ mimoti. Balʉmbaga ndɨ na boko, na Malia amakɨ Yeso, na bamamakɨ Yeso.
Bapunogini Matɨasɨ kagya ligubho ka pa ka Yudha
15 Ka masyɛ mi nɨmɔ aka mɔ, bambanzʉ abhɛ mɨya na batɛkɛbɛ-baba nɨbɔ babhaɨlya ndɨ, bamʉmʉkana ndɨ. Pɛtɛlɛ amaga ndɨ lugo ka ɨbʉ, ɨyɨ aka bɛ : 16 « Bomika-mamaaa, okwononi bi bɛ ɨtʉlyanɨ nɨlɔ Lɨmbɛngɨ Lotu abɨkya ndɨ kʉsɔ wa Mobiso. Lɨmbɛngɨ li nɨlɔ anzɨna ndɨ kambwa kʉsɔ ka Dhaudhi ko bhulyo ka Yudha. Ɨyɨ Yudha nɔ ɨɨta ndɨ kʉwa mʉlanga ka batʉ bi nɨbɔ bagwi ndɨ Yeso. 17 Yudha a ndɨ bemoti kusu, ikogo ndɨ gɔnɨ na ligubho mʉdɔngɔnɨ abhɛ ibusu. 18 Oluwo ndɨ tiko no buyi bi nɨbɔ bakalya ndɨ na ɨbʉ ko bhulyo ya lɨkpʉmʉka lanyɛ li nɨlɔ agya ndɨ lɔ. Kʉ bɛyɔ, ogwoku ndɨ na mʉ bɨpɛ, mʉma amalɨka, basɔpʉ bayasɨ ayobhuko ndɨ bigbondo. 19 Batʉ basɨ ba Yelusalɛma bʉkana ndɨ mongoni mi nɨmɔ. Kinili balʉka ndɨ tiko yi nɨyɔ ka lɨsasʉ kabʉ bɛ : « Akɛlɨdhamʉ », isi yi nɨ : « Tiko ya Bangʉ. » 20 Wina sɛ, ikpikogo kʉsɔ wa kɨtabʉ ya Mambʉ ka Bayudha bɛ :
‹ Pa kakɨ iki ndɛkɛ ngundu,
mʉmbanzʉ gʉtʉgʉ bemoti aka kikigʉ ndɛkɛ mino. ›
Ikpiko gɔnɨ bɛ :
‹ Mʉtʉ nagɔgɔ nɔ avɨ ndɛkɛ pa ya ligubho kakɨ. ›
21-22 Kinili, okwononi bɛ mʉtʉ bemoti ogulyi lugo kusu, kaiko dhɛmʉ wo pupo ka Mombukwono-dhosu Yeso ka mbʉkʉ. Iki bemoti ka nɨbɔ tikogo ndɨ na ɨbʉ bongbingo basɨ, wa tolingyogo ndɨ mino giyo pa imoti na Bamombukwono-dhosu Yeso, katʉkya ko ngbingo yi nɨnɔ Yuani abotiso ndɨ mino, na kadhwɛ ka lɨsyɛ li nɨlɔ Kunzi adokiso ndɨ mino kʉgʉ wa lɨsyɛ. »
23 Kʉwa wa, bumomoso ndɨ batʉ baba : A ndɨ nɨ Yɛzɛfʉ, nɨnɔ bamakaga ndɨ bɛ Bhalasabha, balʉka ndɨ gɔnɨ bɛ Yusuto sɛ kʉwa Matɨasɨ. 24 Kumbuso yi, batʉ nɨbɔ bamʉmʉkana ndɨ wa, balʉmba bɛ : « Mombukwono-dhosu, ɨwɛ nɨnɔ wibho mambɛngɨ ka batʉ basɨ, tiwonisilo nɨnɔ wapunogi lugo ka batʉ baba bi nɨba, 25 iki atʉtʉmbwa ka Yeso, agyɨ banʉ ligubho li nɨlɔ Yudha osi bi ɨyɨ, ɨmagalya ka pa yi nɨyɔ kakɨ. » 26 Kʉwa wa, batwa ndɨ lɨbɛsɛ. Lɨbɛsɛ awanya Matɨasɨ nɨnɔ bamakya ndɨ ka mʉdɔngɔ ka batʉtʉmbwa tɛkɛbɛ na bemoti.