Yeso akaukuso zɛgɛsɨ
5
1 Kʉwa wa, Bayudha ba ndɨ no dhumo ka Yelusalɛma, Yeso aga ndɨ kʉ gɔ kʉ. 2 Kʉ bɛyɔ, a ndɨ na ziwa bemoti buwobhi na mupumi ma gʉdʉ yi nɨnɔ, nɨmɔ balɨkyaka bɛ ‹ mupumi ka Bakɔndɔlɔ ›. Ziwa yi nɨnɔ a ndɨ na bangbangba kubukumuti ka bakpɔlɔ-kpɔlɔ bi. Bamakaga ndɨ ziwa yi nɨnɔ ka Libhelenia bɛ ‹ Bhɛtɛsaidha ›. 3 Kʉsɔ wa bangbangba bi nɨbayɔ, batʉ ba bokolobu budhingi bikogo ndɨ bakanganana wa. Ikogo ndɨ na batʉ ba bokolobu ba ya mamɔmɔ, nɨbɔ ba dhɨlɨ na bazɛgɛsɨ. [ Bikogo ndɨ kabʉnda bɛ libo obhunzikoni, 4 a bɛyɔ, malaika ka Mombukwono dhosu osyogoku ndɨ bongbingo bemoti-bemoti ka ziwa yi nɨnɔ kabhunzo. Mʉtʉ wo kolobu wa mambwa nɨnɔ osyogo ndɨ ko libo li nɨlɔ kanɨ malaika obhunzini, aukaga ndɨ lɨngʉnʉ. ] 5 Lugo kabʉ, a ndɨ na alʉkʉ bemoti nɨnɔ a ndɨ no kolobu kʉsɔ wa byanga batɛkɛ basaa na bʉgɨna. 6 Nɨyɔ Yeso amɨna wakanga, ʉkana ndɨ gɔnɨ bɛ a ndɨ no kolobu kʉsɔ wa masyɛ mudhingi, amuuso kʉwa ndɨ bɛ : « Watʉ kapa kaʉka ? »7 Alʉkʉ nɔ asikisyo ndɨ bɛ : « Mombukwono dhosu, nakikogɨgʉ na mʉmbanzʉ nɨnɔ esiso ko libo ngbingo yi nɨnɔ bobhunzogo mino. Nɨyɔ nakɨngɨlaga ambɛ nosyi kʉ bɛyɔ, mʉtʉ wagɔgɔ osyo kambwa kamɨ. »
8 Yeso abɨkya ndɨ bɛ : « Wamaga, va kalagba kakʉ na wakpakyana ! » 9 Wa aka wa, alʉkʉ nɔ aʉka ndɨ. Ava kalagba kakɨ, apʉnga ndɨ kakpakyana.
Lɨkpʉmʉka li nɨlɔ igyonoso ndɨ ka lɨsyɛ la kimumbiso. 10 Bayudha babɨkya kʉwa ndɨ mʉtʉ yi nɨnɔ aʉka ndɨ nɔ bɛ : « Lɨsyɛ li nɨlɨ, a lɨsyɛ la kimumbiso. Wakakwananɨgʉ kabhɨnɨka kalagba kakʉ. »
11 Usikisyo ndɨ bɛ : « Mʉtʉ yi nɨnɔ eukusi nɔ ebikyi bɛ : ‹ Va kalagba kakʉ, wakpakyana. › »
12 Bamuuso kʉwa ndɨ bɛ : « Mʉtʉ tino nɔ ubikyi bi bɛ : ‹ Va kalagba kakʉ, wakpakyana ? › »
13 Luki limoti, alʉkʉ yi nɨnɔ aʉka ndɨ nɔ kɛgʉ ndɨ kamibho Yeso. A bɛyɔ, Yeso a ndɨ nɨ olimikogini kʉsɔ wa ambaza nɨnɔ a ndɨ wa.
14 Kumbuso yi, Yeso atakanya ka ndabʉ ko Kunzi, abɨkya bɛ : « A bɛyɔ, mbɨya wanʉ woukini. Wakogyonitɔgʉ bata bʉnyɛ, kyɛ wigyogyiso kʉwa kakɨtaga bɛyɔ wo bi mino. »
15 Mʉtʉ yi nɨnɔ ɨnda ndɨ kaʉbɨkya Bayudha bɛ Yeso nɔ aukuso ndɨ. 16 Kinili, bapʉnga ndɨ mino kakɨsa kagyogyiso Yeso, kyɛ aukuso ndɨ mʉmbanzʉ ka lɨsyɛ la kimumbiso. 17 Yeso usikisyo ndɨ bɛ : « Bhabha agyaga ligubho bongbingo basɨ, ɨmɨ na gɔnɨ mino aka bilubhi. »
18 Nɨyɔ Bayudha bʉkana mʉnzɨna mi nɨmɔ, bidhukulogo kʉwa ndɨ bata kakɨsa Yeso bɨvaka-vaka kamwɔ. Ba ndɨ kagya bɛyɔ, kɛgʉ asɨ kyɛ Yeso ɨnaga ndɨ lɨsyɛ la kimumbiso payaya, luki limoti, kyɛ abɨkyaga ndɨ gɔnɨ bɛ Kunzi nɨ abhakɨ bɨkpɛ, na ɨyɨ mombukwono dhakɨ a mʉdɔngɔnɨ no Kunzi.
Kunzi apá ndɨ Mikakɨ ngu yasɨ
19 Yeso ubikyoku ndɨ bata Bayudha bɛ : « Nakamʉbɨkya lɨngʉnʉ ambɛ, Miki kakwananɨgʉ kagya luki na mʉtamanagɨ kakɨ, kiki nɨlɔ aka lɔ ɨnaga na Abhakɨ. Nɨlɔ Bhabha agyaga, Miki agya mʉdɔngɔnɨ bɛgɛyɔ. 20 A bɛyɔ, Bhabha apagatʉ Miki, na awonisilogo masɨ nɨmɔ agyaga. Awonisilo kʉwa ndɛkɛ bata makpʉmʉka mudhingi-dhingi kʉgbɛ, kʉwa wa gɔ wa, nɔkʉ amʉdhɨka ndɛkɛ bɨdhɛ. 21 Mʉdɔngɔnɨ bɛyɔ Bhabha ubhililisogo mino bamanda, ʉpá ɔbɨlɨ, ka lɨngʉnʉ, Miki ʉpága batʉ nɨbɔ ɨyɨ ʉbhaɨlyaga bɛgɛyɔ. 22 Na gɔnɨ, Bhabha kakɔgɨgʉ ngbanga ka mʉmbanzʉ, luki limoti, apóni ndɨ Miki ngu yi nɨyɔ yasɨ, 23 kyɛ batʉ basɨ babangɨ Miki mʉdɔngɔnɨ bɛyɔ babangaga mino Bhabha. Mʉtʉ yi nɨnɔ kabangagɨgʉ Miki, kabangagɨgʉ gɔnɨ Bhabha nɨnɔ atikoku.
24 « A bɛyɔ, nakamʉbɨkya ambɛ : mʉtʉ wasɨ nɨnɔ ʉkanaga lɨkpʉmʉka kamɨ, na abɨnɨkyana nɨnɔ etikoku ndɨ, a na ɔbɨlɨ wa bɛnzɛ na bɛnzɛ. Bakamakyɨgʉ ndɛkɛ ka mʉngɨmbɔ, luki limoti, otukyoni ka kukwakʉ akɨtaga ka ɔbɨlɨ. 25 Iyo, nakamʉbɨkya lɨngʉnʉ ambɛ : ngbingo akodhoku, na a kʉwa gɔnɨ wakɨtʉlyana aka, nɨnɔ bamanda bʉkana ndɛkɛ mino lɨyʉ ko Miko-Kunzi. Na nɨbɔ bʉkana ndɛkɛ, binisonotʉ na ɔbɨlɨ. 26 A bɛyɔ, mʉdɔngɔnɨ bɛyɔ ɔbɨlɨ wasɨ o mino ka mabɔkʉ ka Bhabha, apá gɔnɨ Miki, ɔbɨlɨ yi nɨnɔ wasɨ a kʉwa gɔnɨ ka mabɔkʉ ko Miki. 27 Apá ndɨ Miki ngu yɨkɔ bangbanga, kyɛ a Mika-mʉmbanzʉ. 28 Makombomboyonitɔgʉ, kyɛ ngbingo akodhoku nɨnɔ bamanda bayasɨ nɨbayɔ a ka bambʉkʉ bʉkana ndɛkɛ mino lɨyʉ ko Mika-mʉmbanzʉ, 29 bopupogoku. Nɨbɔ bagyaga ndɨ bʉnza, bopupoku ndɛkɛ kainisoniso na ɔbɨlɨ, luki limoti, nɨbɔ bagyaga ndɨ bʉnyɛ, bopupoku ndɛkɛ kaingyo ka mʉngɨmbɔ. »
30 Yeso omotiloku ndɨ bɛ : « Nakakwananɨgʉ kagya luki gʉtʉgʉ limoti aka no ngu kamɨ. Nakɔgɔ ngbanga kabyɛnɛnɛ na nɨlɔ bhabha ɛkpamyaga, na ngbanga kamɨ ikogo wongbingbili kyɛ nakakɨsagɨgʉ kagya sɨpananɨsɔ kamɨ, luki limoti, nɨsɔ ka mʉtʉ yi nɨnɔ etikoku.
Miko-Kunzi a na badhɛmʉ budhingi
31 Yeso omotiloku ndɨ kʉwa bɛ : « Nakiko dhɛmʉ kamɨ mombukwono dhakɨ yi, bʉdhɛmʉ kamɨ kɛgʉ ba lɨngʉnʉ. 32 Luki limoti, mʉtʉ wagɔ nɔ a dhɛmʉ kamɨ, na nakaibho ambɛ bʉdhɛmʉ kakɨ kʉgʉ kamɨ a ba lɨngʉnʉ. 33 Ibunu, mʉtɨkatʉ ndɨ batʉtʉmbwa kʉ ka Yuani, na bʉdhɛmʉ kakɨ kʉgʉ kamɨ a ndɨ ba lɨngʉnʉ. 34 Ɨmɨ, nakɛgʉ na nza ya bʉdhɛmʉ ka mʉmbanzʉ. Luki limoti, nakabɨkya bɛyɔ kyɛ winisononi na muukuso. 35 Yuani a ndɨ abhɛ tala mʉtʉna na mʉnzɛ. Ibunu, mabhaɨlya ndɨ kazananɨlyaga bʉngbanganya bi nɨbɔ ko ngbingo mʉkɛdɛ aka.
36 Luki limoti, bʉdhɛmʉ kamɨ a budhingi kʉgbɛ kakɨtaga nɨbɔ ka Yuani. A bɛyɔ, mogubho nɨmɔ Bhabha ɛpá ndɨ bɛ nagyagɨ, imu mɔ nagyaga, na imu mɔ epupilyogo bʉdhɛmʉ na kowoniso bɛ Bhabha nɔ etikoku ndɨ. 37 Na Bhabha nɨnɔ etikoku ndɨ a gɔnɨ dhɛmʉ kamɨ. Makanukonigʉ ndɛkɛ lɨyʉ kakɨ ikanɨ kamɨna. 38 Makobuulyogigʉ lɨkpʉmʉka kakɨ kʉsɔ wa mambɛngɨ kunu, kyɛ makabɨnɨkyanagʉ mʉtʉ yi nɨnɔ atikoku ndɨ. 39 Mikogo bakidukufo bigubu katangʉlaga Mobiso Motʉ, kyɛ matamanaga bɛ makiko kagya bɛyɔ, makwanana kainisono na ɔbɨlɨ wa bɛnzɛ na bɛnzɛ. Luki limoti, dhɛmʉ kamɨ nɨ Mobiso mi nɨmɔ gɔnɨ mɔ. 40 Luki limoti, makya kodhoku kʉ kamɨ kainisono na ɔbɨlɨ. »
41 « Nakakɨsagɨgʉ ɨbhɨbha kotukyoku ka bambanzʉ, 42 luki limoti, nakamumibho : kʉsɔ kunu, makɛgʉ na sɨpananɨsɔ ko Kunzi. 43 Ɨmɨ, nodhoku ndɨ ko lino ka Bhabha, luki limoti, makapagɨgʉ kɛtɨlya. Mʉtʉ wagɔ kodhoku ko lino kakɨ bɨkpɛ, matɨlyatʉ ndɛkɛ. 44 Makwanana kabɨnɨkyana lɨkɨ ? Ibunu mapánanaga ɨbhɨbha lugo kunu aka nɨ makɛgʉ kakɨsa nɨyɔ otukyogoku ko Kunzi yɨkaka.
45 « Makotomononitɔgʉ bɛ ɨmɨ, namʉpɨ́lyagatʉ ndɛkɛ bangbanga ka Bhabha. Musa nɨnɔ mobhiso ndɨ bhaya kunu kʉgʉ kakɨ, ɨyɨ nɔ amʉpɨ́lyaga ndɛkɛ. 46 A bɛyɔ, makabɨnɨkyana ndɨ Musa, ibha mebinikyononi gɔnɨ, kyɛ ɨyɨ, okpikogotʉ ndɨ mongoni kʉgʉ kamɨ. 47 Luki limoti, kiko nɨ makɛgʉ kabɨnɨkyana mobiso kakɨ, makwanana kʉwa kabɨnɨkyana mʉnzɨna kamɨ lɨkɨ ? »