Yuani 4

Yeso bakanzɨna na Wabasamalia bemoti

1 Nɨyɔ Yeso ibho bɛ Bafalisayɔ bukonini bɛ ɨsabʉ ka babɨbya kakɨ akobhwo kʉgbɛ, na akaubotiso bambanzʉ kakɨtaga Yuani, 2 ( a bɛyɔ, kɛgʉ Yeso mombukwono dhakɨ nɔ ubotisogo ndɨ, luki limoti, babɨbya kakɨ. ) 3 Atʉkya ndɨ ka Yudhɛa, ɨga bata ka Galilaya. 4 Kadhwɛ kʉ bɛyɔ, akwanana ndɨ kakɨtaga pisi ka Samalia.

5 Adhwɛ kʉwa ndɨ ka gʉdʉ bemoti wa Samalia, nɨnɔ ina bɛ Sikali, buwobhi no tiko nɨyɔ Yakɔbɔ apá ndɨ mikakɨ bɛyɔ ka Yɛzɛfʉ. 6 Lɨkɔ ka Yakɔbɔ a ndɨ kʉ bɛyɔ. Yeso a ndɨ nɨ upini na lɨgʉndʉ bɨdhapada, iko kʉwa ndɨ ka kpɔlɔ wa lɨkɔ. A ndɨ bhanda mɔnɨ ka mʉsɨkatʉ.

7 Wabasamalia bemoti odhoku ndɨ katʉga libo, Yeso abɨkya bɛ : « Yɛ ma, imusonɔ baka mino libo. » 8 Ko ngbingo yi nɨnɔ, babɨbya kakɨ ba ndɨ nɨ bogoni koluwo malɨlɨ ka gʉdʉ. 9 Wabasamalia aka ndɨ na ɨyɨ bɛ : « Eze ! Muyudha bɛyɔ wo mino yɨ, wakaɨkpʉnda kɛkʉnga ɨmɨ Wabasamalia libo lɨkɨ ? » ( A bɛyɔ, Bayudha bakʉkanananɨgʉ ndɨ na Basamalia. ) 10 Yeso asikisyo ndɨ bɛ : « Wakamibho bi apɛpɛ nɨnɔ Kunzi apága, wibho bɛ wanɨ nɔ akaʉkʉnga libo, ibha ɨwɛ nɔ wakungi bi. Winisono bi no libo nɨlɔ apága ɔbɨlɨ. » 11 Muko yi nɨnɔ abɨkya ndɨ bɛ : « Mombukwono dhosu, wakɛgʉ no luki lɨtʉga libo na libulu a lodhu kʉgbɛ. Wakwanana kʉwa kainisono no libo li nɨlɔ la ɔbɨlɨ lɔ lɨkɨ ?   12 Tɨtosu bɛyɔ ka Yakɔbɔ nɔ atɨsɨlya ndɨ ibusu lɨkɔ li nɨlɨ. Ɨyɨ bɨkpɛ nɔ omwogo ndɨ, iki bomikakɨ gʉtʉgʉ bambaza ka banyama kakɨ aka. Wakaɨmɨna abhɛ ɨwɛ nɔ wakitogi Yakɔbɔ ? » 13 Yeso asikisyo ndɨ bɛ : « Mʉtʉ wasɨ komwo libo li nɨlɨ, ɨmʉkanatʉ banʉ bata mʉsasa. 14 Luki limoti, nɨnɔ omwo ndɛkɛ libo nɨlɔ ɨmɨ napá, kɨmʉkanɨgʉ ndɛkɛ bata mʉsasa gʉtʉgʉ iki yi aka. Libo li nɨlɔ ɨɨta ndɛkɛ kʉsɔ kakɨ lɨkpakpa nɨlɔ iko kopupiso libo la ɔbɨlɨ wa bɛnzɛ na bɛnzɛ. » 15 Muko nɔ abɨkya ndɨ bɛ : « Mombukwono dhosu, ipóku nɛkɨ libo li nɨlɔ, ibha nakimukononitɔgʉ ndɛkɛ bata mʉsasa. Kʉwa wa gɔ wa, nakodhukugʉ ndɛkɛ bata wanʉ katʉga libo. » 16 Yeso aka ndɨ na ɨyɨ bɛ : « Wɨnda kamokoku mbʉnyakʉ, modhoku na ɨyɨ wanʉ. » 17 Muko nɔ asikisyo bɛ : « Nakɛgʉ ɨmɨ na mʉlʉkʉ. » Yeso aka ndɨ na ɨyɨ bɛ : « Wobikyi lɨngʉnʉ bɛ wakɛgʉ na mulʉkʉ; 18 kyɛ wa kʉwa na bovononi kubukumuti. Nɨnɔ ma na ɨyɨ mbɨya wanʉ, kɛgʉ mbʉnyakʉ. Wobikyi lɨngʉnʉ. » 19 Kʉwa wa, muko abɨkya ndɨ bɛ : « Mombukwono dhosu, nakaɨna abhɛ wa mugyalandʉ. 20 Botitosu babhibhisogo ndɨ Kunzi kʉgʉ wa ngʉpa yi nɨyɨ. Ibunu, mabɨkyaga bɛ pa nɨyɔ okwononi mino kabhibhiso Kunzi nɨ Yelusalɛma aka. » 21 Yeso abɨkya ndɨ bɛ : « Ma, ɨbɨnɨkyana nɔ. Ngbingo odhokuto nɨnɔ makɨndɨgʉ ndɛkɛ mino kabhibhiso Bhabha kʉgʉ wa ngʉpa yi nɨyɨ ikanɨ ka Yelusalɛma. 22 Ibunu Basamalia, mabhibhisogo Kunzi nɨ makɛgʉ kamibho. Ibusu Bayudha, tabhibhisogo nɨ tanamibho, kyɛ muukuso akotukyoku ka Bayudha. 23 Luki limoti, ngbingo akodhoku, na itulyonini, nɨnɔ batʉ bi nɨbɔ babhibhisogo mino Kunzi ka lɨngʉnʉ, babhibhisogo ndɛkɛ Bhabha ka Lɨmbɛngɨ na lɨngʉnʉ. A bɛyɔ, Bhabha ʉkɨsaga inguo ya batʉ bi nɨbɔ. 24 Kunzi nɨ Lɨmbɛngɨ, na batʉ bi nɨbɔ babhibhisogo, okwononi bɛ babhibhisi ka Lɨmbɛngɨ na ka lɨngʉnʉ. » 25 Muko nɔ abɨkya ndɨ bɛ : « Nakaibho bɨnza ambɛ Masiya akodhoku ( nɨnɔ bamakaga bɛ Kilisito ). Wa odhoku ndɛkɛ mino, ɨyɨ, atɨtʉmbʉlyagatʉ masɨ. » 26 Yeso asikisyo ndɨ bɛ : « Ɨmɨ nɨ Kilisito, nɨnɔ nakaʉnzɨnɨlya nɔ. »

27 Ko ngbingo yi nɨnɔ aka nɔ, babɨbya ka Yeso bigoku ndɨ. Ba ndɨ kombomboyo kyɛ bamɨna ndɨ Yeso kanzɨna na muko. Wɨna sɛ, gʉtʉgʉ mʉtʉ bemoti aka kamuusogʉ ndɨ muko nɔ bɛ : « Wakakɨsa ɨkɨ ? » Ikanɨ kamuuso Yeso bɛ : « Wakanzɨna na ɨyɨ ko bhulyo ɨkɨ ? » 28 Muko nɔ asa kʉwa ndɨ mbɨkɛ wa, ɨga, utumbulyogoku ndɨ bambanzʉ bɛ : 29 « Dhoniku kamɨna ! Alʉkʉ bemoti a kʉ, etumbulyogi masɨ nɨmɔ nogyoni. Kɛgʉ sɛ banʉ bi Kilisito nɨnɔ ? »   30 Batʉkya kʉwa ndɨ wa, bɨnda kamɨna Yeso.

31 Kʉwa wa, babɨbya bɨtatanaga ndɨ na Yeso bɛ : « Muwonisili, lyalya mbɛyɨ ! » 32 Luki limoti, ʉbɨkya ndɨ bɛ : « Ɨmɨ, nakalya malɨlɨ nɨmɔ makɛgʉ ibunu kaibho. » 33 Babɨbya bapʉnga kʉwa ndɨ kauusono bɛ : « Mʉtʉ bemoti sɛ kʉwa nɔ odhuku kapá malɨlɨ ? » 34 Yeso ʉbɨkya ndɨ bɛ : « Malɨlɨ kamɨ nɨ kagya sɨpananɨsɔ ka nɨnɔ etikoku ndɨ na kotulyoso ligubho nɨlɔ ɛpá ndɨ. 35 Makabɨkyagɨgʉ mbɛyɨ ibunu bamombukwono dhonu bɛ : ‹ Osikoni batɨmba bakwanganya ngbingo mubhuulyo ɨtʉlyana ? › Luki limoti, ɨmɨ nakamʉbɨkya ambɛ, wikweni, winoni botiko. Malɨlɨ ongotini, a kʉwa kakʉnga kobhuulyo. 36 Mʉtʉ nɨnɔ akobhuulyo inisonini ɨyɨ na mʉkalya kakɨ, a kʉwa kamʉmʉla masɔlɔ ko bhulyo ya ɔbɨlɨ wa bɛnzɛ na bɛnzɛ. Kʉwa wa, mʉkʉkʉna na mʉtʉ mubhuulyo bogwo magyagya ɨbʉ basɨ baba. 37 A bɛyɔ, a lɨngʉnʉ nɨlɔ babɨkyaga bɛ : ‹ Mʉtʉ bemoti nɔ akʉnaga, wagɔgɔ obhuulyo. › 38 Ɨmɨ, namʉtɨka ndɨ kobhuulyo ko tiko nɨyɔ makagyagʉ ndɨ mino ligubho. Batʉ bagɔgɔ bɔ bɨkɔ ndɨ mino bungu bɨkya, ibunu modhoku kobhuulyo masɔlɔ ma ligubho kabʉ aka. »

39 Basamalia bakpʉ ka gʉdʉ yi nɨnɔ babɨnɨkyana ndɨ Yeso, kyɛ muko yi nɨnɔ ʉbɨkya ndɨ bɛ : « Etumbulyogi masɨ nɨmɔ nogyoni. » 40 Kinili, nɨyɔ Basamalia bodhoku ndɨ buwobhi na ɨyɨ, bɨtatanaga ndɨ na ɨyɨ bɛ kogonitɔgʉ mbɛyɨ. Agya ndɨ bata wa masyɛ maba. 41 Batʉ bagɔgɔ budhingi kʉgbɛ babhaɨlya ndɨ ko bhulyo ya lɨkpʉmʉka nɨlɔ a ndɨ kabɨkya. 42 Babɨkyaga kʉwa ndɨ muko nɔ bɛ : « Takobinikyonigʉ ko bhulyo ya nɨyɔ aka yɔ watibikyi, luki limoti, kyɛ timukyonili kʉwa nɨ ibusu aka. Tibhini lɨngʉnʉ ambɛ ɨyɨ nɔ a Muukuso wa ɔbɨlɨ. » 

Yeso akaukuso mika ngama ka basʉdha

43 Nɨyɔ Yeso agya masyɛ maba ka mugi mi nɨmɔ, atʉkya ndɨ wa, aga ka Galilaya. 44 Ɨyɨ Yeso mombukwono dhakɨ bɨkpɛ abɨkya ndɨ bɛ : « Mugyalandʉ kɛgʉ na ɨbhɨbha kʉ kabʉ. » 45 Nɨyɔ osilo ka Galilaya, batʉ bi nɨbɔ kʉ batɨlya ndɨ, kyɛ bɨndatʉ ndɨ gɔnɨ ɨbʉ ka yɨnga wa Pasɨka ka Yelusalɛma, bɨna ndɨ masɨ nɨmɔ Yeso agya ndɨ kʉ.

46 Yeso ɨga kʉwa ndɨ ka Kana kʉ ka Galilaya, kʉ oikoso ndɨ mino libo kaɨɨta vinya. Kʉ bɛyɔ, a ndɨ na ngama bemoti ka basʉdha nɨnɔ mikakɨ mʉlʉkʉ yi a ndɨ no kolobu kʉ ka Kapɛlɛnaumu. 47 Nɨyɔ ʉkana ndɨ bɛ Yeso otukyiniku bi ka Yudhɛya, a kʉwa ka Galilaya, odhoku ndɨ kamɨna. Ɨtatanaga kʉwa ndɨ na ɨyɨ bɛ ɨndɨ nɔ baka ka Kapɛlɛnaumu kaukusilyo mikakɨ nɨnɔ a ndɨ buwobhi kosiso lɨmbɛngɨ. 48 Yeso abɨkya ndɨ bɛ : « Makini ndɛkɛ ibunu mokingyosi na makpʉmʉka mʉmbanga-mbanga aka, makabɨnɨkyanɨgʉ ndɛkɛ gʉtʉgʉ iki yi aka. » 49 Ngama yi nɨnɔ asikisyo ndɨ bɛ : « Mombukwono dhosu, taganɔ baka kʉkamɨ kanɨ miki kanodhokigʉ. » 50 Yeso aka ndɨ na ɨyɨ bɛ : « Wɨga, miki oukini. »

Alʉkʉ nɔ ʉkana ndɨ nɨlɔ Yeso abɨkya ndɨ, ɨga. 51 Ngbingo yi nɨnɔ a mbɛyɨ ndɨ mino ko pisi aka, babhangana na bagya-ligubho kakɨ, babɨkya ndɨ bɛ : « Miki oukini. » 52 Kʉwa wa, umuuso ndɨ bɛ : « Ouki bi ngbingo tino ? » Basikisyo ndɨ bɛ : « Ouki bi isyeiku bi, na saa-saba ya mʉsɨkatʉ. » 53 Bhabha nɔ ibho kʉwa ndɨ bɛ o bi ko ngbingo nɨnɔ aka nɔ Yeso abɨkya ndɨ mino bɛ : « Miki oukini. » Kʉwa wa, ngama nɔ na ndabʉ kakɨ yasɨ babɨnɨkyana ndɨ Yeso. 

54 Nɨlɔ a ndɨ lɨkpʉmʉka lɨmbanga la yɨba nɨlɔ Yeso agya ndɨ. Agya ndɨ ngbingo yi nɨnɔ igoku ndɨ mino ka Galilaya kotukyoku ka Yudhɛa.