Yakɔbɔ na lɨvananza kakɨ bogoni ka Misili
46
1 Kʉwa wa, Ɨzɛlɛlɨ atʉpa ndɨ mukumbo kakɨ masɨ bingbufu, apʉngaga ndɨ lɨgʉndʉ ka Misili. Nɨyɔ osilo ndɨ ka Bheli-Sebha, apá Kunzi ka abhakɨ bɛyɔ ka Isaka bapɛpɛ. 2 No bhiti yi nɨyɔ aka yɔ, Kunzi anzɨnɨlya ndɨ Ɨzɛlɛlɨ ko nziki, amaka bɛ : « Yakɔbɔ ! Yakɔbɔ ! » Yakɔbɔ asikisyo ndɨ bɛ : « Ɨmɨ nɨmʉ. » 3 Kunzi abɨkya kʉwa ndɨ bɛ : « Ɨmɨ nɨ Kunzi, Kunzi ka abhakʉ. Wakobongonitɔgʉ kaaga ka Misili. Kʉ bɛyɔ, nʉgya ndɛkɛ bɛ wɨɨtɨ lɨvananza lidhingi. 4 Takaɨnda pa imoti na ɨwɛ ka Misili, na ɨmɨ gɔnɨ aka nɔ numigisoku ndɛkɛ kʉnʉ. Ngbingo yi nɨnɔ wokwo ndɛkɛ mino, Yɛzɛfʉ nɔ utikyo ndɛkɛ miso. » 5 Yakɔbɔ atʉkya kʉwa ndɨ ka Bheli-Sebha. Bomikakɨ babhɨnɨka ndɨ, bʉbhɨnɨkaga ndɨ gɔnɨ bomikabʉ nɨbɔ bawɛsɛ na boko kabʉ ka bamasuwa nɨbɔ bapunda bulutogo ndɨ nɨbɔ ngama mudhingi wa Misili ʉtɨka ndɨ kaʉbyɛgɛ. 6 Bʉva ndɨ gɔnɨ banyama kabʉ na lɨngama lasɨ nɨlɔ binisono ndɨ nolu ka mugi ma Kanana, baga ndɨ ka Misili. Yakɔbɔ aga ndɨ ka Misili na lɨvananza kakɨ lasɨ bingbufu : 7 bomikakɨ, bomiko-mikakɨ, ɨnda ndɨ na ɨbʉ basɨ ka Misili.Mino ka batʉ ba lɨvananza ka Yakɔbɔ
8 Mino ka batʉ ba lɨvananza ka Ɨzɛlɛlɨ nɨbɔ bogulyo ndɨ ka Misili akaɨbɨkya bɛ Yakɔbɔ, bomikakɨ na bomiko-mikakɨ nɨma :
10 Simeoni na nɨbɔ kakɨ bɛyɔ ka Yemueli, Yamini, Ohadhi, Yakini, Sohali na Sauli. Amakɨ Sauli a ndɨ ɨyɨ wa Bakanana.
11 Lawi na nɨbɔ kakɨ bɛyɔ ka Gelisoni, Kohati na Melali.
12 Yudha na nɨbɔ kakɨ bɛyɔ ka Eli, onani, Sela, Pelesi na Zela. Luki limoti, Eli ɨbʉ na Onani bokwo ndɨ ka mugi ma Kanana. Pelesi ʉbʉkʉta ndɨ ɨyɨ bomiki baba aka : Esiloni na Amuli.
13 Isakali na nɨbɔ kakɨ bɛyɔ ka Tola, Puwa, Yasubu na Simuloni.
14 Zebhuloni na nɨbɔ kakɨ bɛyɔ ka Seledhi, Eloni na Yaleli.
15 Bomiki nɨbɔ Yakɔbɔ ʉbʉkʉtaga ndɨ na Lɛya ngbingo yi nɨnɔ ba ndɨ mino ka Padhani-Alamu nɨbɔ. Ba ndɨ gɔnɨ pa imoti na mikabʉ nɨnɔ mukoyi bɛyɔ ka Dhina. Ɨbʉ basɨ, bomikakɨ nɨbɔ balʉkʉ na nɨbɔ boko bi, bomiko-mikakɨ, ba ndɨ bambanzʉ batɛkɛbɛ basaa na basaa.
16 Gadhi na bomikakɨ bɛyɔ ka Sifioni, Agi, Suni, Esibhoni, Eli, Alodhi na Aleli.
17 Aseli na nɨbɔ kakɨ bɛyɔ ka Imuna, Isiwa, Isiwi, Bheliya na mamabʉ muko yi Sela. Bheliya ʉbʉkʉtatʉ ndɨ gɔnɨ ɨyɨ bomiki baba : Ebheli na Malikieli.
18 Bomiki tɛkɛbɛ na madɨya nɨbɔ Yakɔbɔ ʉbʉkʉtaga ndɨ na Zilipa nɨbɔ. Ɨyɨ Zilipa a ndɨ mʉgya-ligubho ka Lɛya nɨnɔ abhakɨ bɛyɔ ka Labhani apá ndɨ.
19 Muko Yakɔbɔ nɨnɔ ina ndɨ bɛ Lakeli abʉkʉtɨlya ndɨ bomiki balʉkʉ bi baba : Yɛzɛfʉ ɨbʉ na Bhenyamina. 20 Kʉ ka Misili, Yɛzɛfʉ ʉbʉkʉta ndɨ ɨbʉ na mukakɨ bɛyɔ ka Asenati bomiki baba : Manase na Efulaimu. Ɨyɨ Asenati a ndɨ mika Mumisili Potifela nɨnɔ ikogo ndɨ kumu ka gʉdʉ wa Oni. 21 Bhenyanima ʉbʉkʉta ndɨ bomiki tɛkɛbɛ : Bhela, Bhekeli, Asibheli, Gela, Namani, Ehi, Losi, Mupimu, Upimu, na Aladhi. 22 Bomiki tɛkɛbɛ na bakwanganya nɨbɔ Yakɔbɔ ʉbʉkʉtaga ndɨ na Lakeli nɨbɔ. 23 Dhani abʉkʉta ndɨ miki bemoti aka bɛyɔ ka Usimu.
24 Nafutali ʉbʉkʉtaga ndɨ : Yaseli, Guni, Yeseli na Silemu.
25 Bomiki madɨya na ɨka nɨbɔ Yakɔbɔ ʉbʉkʉtaga ndɨ na Bhilia nɨbɔ. Ɨyɨ Bhilia a ndɨ mʉgya-ligubho ka Lakeli nɨnɔ abhakɨ bɛyɔ ka Labhani apá ndɨ.
26 Bambanzʉ basɨ nɨbɔ bopupo ndɨ ka mʉma ka Yakɔbɔ, nɨbɔ aga ndɨ na ɨbʉ ka Misili nɨ takutwigʉ mbɛyɨ bozyakɨ, ba ndɨ basɨ bambanzʉ batɛkɛbɛ madɨya na madɨya. 27 Kʉ ka mugi ma Misili, Yɛzɛfʉ a ndɨ nɨ ubukutini bomiki baba. Batʉ basɨ ba lɨvananza ka Yakɔbɔ nɨbɔ biko kʉwa ndɨ ka Misili ba ndɨ batɛkɛbɛ madɨya na ɨka.
Yakɔbɔ bosilini ka Misili
28 Yakɔbɔ atɨka kʉwa ndɨ Yudha kambwa kʉ ka Yɛzɛfʉ bɛ bosilyoni na ɨyɨ ka iwili ya Goseni. Nɨyɔ Yakɔbɔ na lɨvananza kakɨ bosilo ka Goseni, 29 Yɛzɛfʉ adaka ndɨ kʉgʉ wa masuwa kakɨ nɨnɔ punda alutogo ndɨ, ɨnda ndɨ katɨlya abhakɨ. Nɨyɔ asilyo ndɨ abhakɨ, apututo, agama ndɨ bɨndɨ nɨ a na ɨyɨ mupututo aka. 30 Ɨzɛlɛlɨ abɨkya kʉwa ndɨ bɛ : « Mbɨya wanʉ nakwanana kokwo, kyɛ numinini na wa mbɛyɨ bata ka ɔbɨlɨ aka ! » 31 Yɛzɛfʉ ʉbɨkya ndɨ bamamakɨ na batʉ basɨ ba lɨvananza ka abhakɨ bɛ : « Nakaɨnda katʉmbʉlyaga ngama mudhingi wa Misili bɛ bomika-mama na lɨvananza ka bhabha lasɨ nɨlɔ a ndɨ ka mugi ma Kanana, bodhunuku kɛtakanya. 32 Natʉmbʉlyagatʉ gɔnɨ bɛ ma bobubulyo ka banyama. Mubuulyogo bambaza ka banyama. Modhukuto na bamɛmɨ, bakɔndɔlɔ, bangɔmbɛ na mukumbo kunu magɔgɔ masɨ. » 33 Na gɔnɨ, ngama Mudhingi kamʉmaka na kamumuuso bɛ magyaga ligubho tino ? 34 Musikisyoni bɛ : « Katʉkya ka limiki kusu na kadwɛ mbɨya wanʉ, bagya-ligubho kakʉ ba bobubulyo ka banyama abhɛ batɨtabʉ. Kʉwa wa, makwanana kaiko ka iwili ya Goseni. Ka lɨngʉnʉ, Bamisili bakʉpagɨgʉ bobubulyo ba banyama. »