Bandungini kɔpɔ ka Yɛzɛfʉ ka saki ka Bhenyamini
44
1 Kumbuso yi, Yɛzɛfʉ akpamya ndɨ zamʉ kakɨ bɛ : « Utumisogo basaki ka batʉ nɨba na nganʉ mʉdɔngɔnɨ bɛyɔ bakwananatʉ mino kaʉbhɨnɨkaga. Na wabhisilyo gɔnɨ mʉtʉ yɨkaka-yɨkaka buyi ka mʉnɔkʉ ma saki kakɨ. 2 Kʉsɔ wa saki ka mupipilo, bhiso buyi kakɨ pa imoti na kɔpɔ yi nɨmʉna kamɨ mʉ nɨnɔ bagya ndɨ ka ngwɛyɨ ya lɨgabhʉ lapʉ. » Alʉkʉ nɔ agya ndɨ mʉdɔngɔnɨ bɛyɔ Yɛzɛfʉ akpamya ndɨ mino.3 Na bʉgala bi, nɨyɔ lɨsyɛ asyɛ, bʉsa ndɨ balʉkʉ bɔ kaaga pa imoti na bapunda kabʉ. 4 Batʉkya ndɨ ka gʉdʉ, luki limoti ba ndɨ nɨ banidhukulogɨgʉ na lɨgʉndʉ. Kʉwa wa, Yɛzɛfʉ abɨkya ndɨ zamʉ kakɨ bɛ : « Wamaga ! wɨnda mbangʉ kaʉbyɛ balʉkʉ bi nɨbɔ, ʉtakanyaga, umuuso bɛ : ‹ Ko bhulyo ɨkɨ yɔ migisyi bi mino bʉnyɛ ka bʉnza ? 5 Ko bhulyo ɨkɨ yɔ mabibi bi kɔpɔ nɨnɔ mombukwono dhamɨ omwogo mino libo na kaʉkɨma banɛkɔ ? Ka lɨngʉnʉ, nɨlɔ mogyi bi lɔ a yanyɛ ! › » 6 Nɨyɔ zamʉ yi nɨnɔ ʉtakanyaga, ʉtʉmbʉlyaga ndɨ lɨkpʉmʉka li nɨlɔ. 7 Luki limoti, ɨbʉ basikisyo ndɨ bɛ : « Yɛ mbɔkʉ ! Ko bhulyo ɨkɨ yɔ wo mino katɨbhɨnɨkɨlya lɨkpʉmʉka bɛyɔ ? Ibusu bagya-ligubho kakʉ takakwanɨgʉ kagya inguwo ya lɨkpʉmʉka li nɨlɔ ! 8 Tumigisyito bi buyi nɨbɔ tɨna ndɨ wa tʉkʉlaga ndɨ mino basaki ba ya nganʉ kusu kʉ ka mugi ma Kanana. Akwanana pɨyɛ lɨkɨ bɛ tibi bata buyi ikanɨ ɔlɔ ka ndabʉ ka mombukwono dhakʉ ? 9 Kiko nɨ kɔpɔ yi nɨnɔ inisonini kʉsɔ wa makpʉmʉka ka bemoti kusu, okwononi kamwɔ. Na ibusu tɨɨta kʉwa bosunzu kakʉ. »
10 Kʉwa wa, zamʉ yi nɨnɔ abɨkya ndɨ bɛ : « A bɛyɔ ! Takagya bɛyɔ aka yɔ mobikyi mino. Mʉtʉ yi nɨnɔ bandʉnga na kɔpɔ, ɨyɨ ɨɨta kʉwa musunzu kamɨ, na bʉsa batʉ bagɔgɔ. » 11 Bɨgala-gala, mʉtʉ yɨkaka-yɨkaka asiso ndɨ sakɨ kakɨ, na akʉlaga. 12 Zamʉ ʉkpʉlaga ndɨ basaki basɨ bɨkpɔlɔ-kpɔlɔ, kapʉnga ka pʉta na kadhwɛ kʉ kwa kʉ ka nɨnɔ ka mupipilo. Ka mulibo, atakanya ndɨ kɔpɔ kʉsɔ wa saki ka Bhenyamini. 13 Nɨyɔ bɨna bɛyɔ, bɨyɨbaga ndɨ botu* bɨswɛswɛswɛ, mʉtʉ yɨkaka-yɨkaka abhinikiso ndɨ punda kakɨ saki, bɨganana ndɨ bata kʉ ka gʉdʉ.
Yudha akabhʉmanɨlya Bhenyamini
14 Yɛzɛfʉ a mbɛyɨ ndɨ kʉ kakɨ aka ngbingo yi nɨnɔ Yudha ɨbʉ na bamamakɨ basilyo ndɨ mino. Kʉwa wa, bodhidhiko ndɨ kambwa kakɨ kadhwɛ kʉ kwa kʉ ka lɨtɔmbʉ. 15 Ɨyɨ Yɛzɛfʉ umuuso ndɨ bɛ : « Ko bhulyo ɨkɨ yɔ mogyi bi mino bɛyɔ ? Makɛgʉ bi kaibho bɛ ɨmɨ na no ngu kaʉkɨma banɛkɔ ? » 16 Yudha asikisyo ndɨ bɛ : « Ngama, tabɨkya sɛ pɨyɛ ɨkɨ ? Tatʉmbʉlaga ɨkɨ kowoniso bɛ tokogyigʉ bʉnyɛ ? Kunzi ondungini bʉnyɛ kusu. Tiko kʉwa bosunzu kakʉ aka na gʉtʉgʉ mʉtʉ yi nɨnɔ bamini kɔpɔ ka saki kakɨ. » 17 Luki limoti, Yɛzɛfʉ abɨkya ndɨ bɛ : « Kalɨ, ɨmɨ nakakwananɨgʉ kagya bɛyɔ ! Nɨnɔ aka nɔ bandungi na kɔpɔ, ɨyɨ aka nɔ iko musunzu kamɨ. Ibunu bagɔgɔ, wigoni na mazɨyɔ ka obhonu. »
18 Yudha akpudoku kʉwa ndɨ Yɛzɛfʉ, abɨkya bɛ : « Ngama, wa mʉdɔngɔnɨ abhɛ ngama mudhingi wa Misili. Kikiliki, wakediilyonitɔgʉ baka, ɨsɨlya mbɛyɨ bata mino mʉnzɨna makɛdɛ. 19 Ngama, watimuuso ndɨ ibusu bagya-ligubho kakʉ bɛ : ‹ Tatʉ na obhosu ikanɨ momosu wagɔgɔ ? › 20 Na ibusu tʉtʉmbʉlyaga ndɨ bɛ : ‹ Tatʉ na mbɔkʉ-mbɔkʉ wa bhabha na mupipilo kusu. Bhabha apaga kʉgbɛ na abʉkʉta ndɨ nɨ a kʉwa bɨzɛngɛ. Ya dhakɨ bɨkpɛ okwoni ndɨ na otigoloni kʉwa yɨkaka aka ka amakɨ. › 21 Ngama, watɨbɨkya ndɨ ibusu bosusu kakʉ bɛ : ‹ Todhuku na ɨyɨ kyɛ wamɨnɨ. › 22 Tusikisyo ndɨ bɛ : ‹ Ɨyɨ miki kakwananɨgʉ katʉkya buwobhi na abhakɨ, kyɛ katʉkya, abhakɨ okwotʉ ! › 23 Luki limoti, watɨbɨkya ndɨ bɛ : ‹ Tokodhuku pa imoti na ɨbʉ, wakabhaɨlyɨgʉ bata bɛ tingyi kʉ kakʉ. ›
24 Nɨyɔ tadhwɛ ndɨ kʉ ka mʉgya-ligubho kakʉ bɛyɔ ka bhabha, tatʉmbʉlyaga ndɨ. 25 Atɨbɨkya ndɨ bɛ : ‹ Tigiku bata kʉnʉ koluwo malɨlɨ. › 26 Tasikisyo ndɨ bɛ : ‹ Takakwananɨgʉ bata kaɨga ka Misili takiki na mupipilo kusu. Kyɛ takɨkpʉnda, ɨyɨ ngama wa Misili yi nɨnɔ katɨtɨlyɨgʉ bata. › 27 Bhabha atɨbɨkya ndɨ bɛ : ‹ Mibhogotʉ bɛ muko kamɨ bɛyɔ ka Lakeli ɛbʉkʉtɨlya ndɨ bomiki balʉkʉ bi baba aka. 28 Bemoti esoni ndɨ. Na natamanaga bɛ nyama wo tutu nɔ ayɨbaga ndɨ bɨswɛswɛswɛ na katʉkya wa aka wa, nakamɨnagʉ bata. 29 Makapa bata kɛvɨlya nɨmʉ ! Lɨkpʉmʉka lanyɛ kasilyo kʉ, ɨmɨ na kʉwa mbɔkʉ-mbɔkʉ, nokwo na lɨmbɛngɨ lɨtʉla ko bhulyo kunu. ›
30 « Ngama ! Mbɨya wanʉ, takakwnanɨgʉ kaɨga kʉ ka bhabha nɨ tagɛgʉ no miki. Ɔbɨlɨ ka bhabha awakɨgʉmya kʉgbɛ ka ɔbɨlɨ ko miki yi nɨmʉ, 31 kamini miki, okwotʉ ! Ibusu kʉwa bɔ tabhɨnɨka mʉkɔmbʉ bɛ tamwisisi na lɨmbɛngɨ lɨtʉla ka bʉmbɔkʉ-mbɔkʉ kakɨ. 32 Na gɔnɨ, ɨmɨ nɔ nɨbɨnɨkya ndɨ ko miso ka bhabha bɛ nabuulyogotʉ miki, nabɨkya ndɨ bɛ : ‹ Nakumigilyiku na Bhenyamini, bʉnyɛ bi ɛmɨgɨlya kʉwa ɨmɨ ko ɔbɨlɨ kamɨ wasɨ. › 33 Kikiliki Ngama ! Mbɨya wanʉ, ɨmɨ nɔ notigoli musunzu ka pa ko miki. Mʉsa ɨyɨ bɨgɨ pa imoti na bamamakɨ. 34 Nakwanana kaɨga kʉ ka bhabha lɨkɨ nɨ nakɛgʉ no miki ? Nakakwananɨgʉ kaɨna bʉkpɛkɨ-kpɛkɨ nɨbɔ asilyo bhabha ! »