Yakɔbɔ asilyini Bhenyamini lɨgʉndʉ bɛ aga ka Misili
43
1 Ayʉndɨ a kʉwa ndɨ kaisisilogo wapʉ aka ka mugi ma Kanana. 2 Nɨyɔ Yakɔbɔ na lɨvananza kakɨ bama ndɨ kalya nganʉ nɨnɔ bodhoku ndɨ na ɨyɨ ka Misili, ɨyɨ Yakɔbɔ ʉbɨkya bomikakɨ bɛ : « Timindilyoni bata ka Misili katiluulyo mino malɨlɨ. » 3 Yudha asikisyo ndɨ bɛ : « Yɛ bha, bɛyɔ aka yɔ tubikyi bi mino ambɛ, alʉkʉ nɨnɔ ngama wa mugi kʉ atɨbɨkya ndɨ bɨngbanganya bɛ : ‹ Kabhaɨlyɨgʉ bata katɨmɨna kambwa kakɨ nɨ takɛgʉ na momosu bɛyɔ ka Bhenyamini. › 4 Wakabhaɨlya bɛ taga pa imoti na ɨbʉ, tɨndatʉ kauluulyo malɨlɨ. 5 Luki limoti wakakya, takɨndɨgʉ. Kyɛ alʉkʉ nɔ abɨkya ndɨ bɛ : ‹ Kabhaɨlyɨgʉ bata katɨmɨna kambwa kakɨ nɨ takɛgʉ na momosu. › » 6 Ɨzɛlɛlɨ abɨkya ndɨ bɛ : « Ko bhulyo ɨkɨ yɔ mabɨkya ndɨ mino alʉkʉ nɔ bɛ ma bata na momonu wagɔgɔ ? Ka lɨngʉnʉ, megyi bi bɨnyɛ . » 7 Basikisyo ndɨ bɛ : « Alʉkʉ nɔ atimuusogo ndɨ makpʉmʉka makpʉ kʉgʉ kusu na kʉgʉ wa lɨvananza kusu. Atimuuso ndɨ bɛ : ‹ Obhonu atʉ bata ka ɔbɨlɨ ? Matʉ na momonu wagɔgɔ ? › Tasikisyo ndɨ ka yuuso kakɨ aka. Takwanana kʉwa ndɨ kaibho lɨkɨ bɛ akatɨbɨkya bɛ : ‹ Tadhulyiku na momosu ? › »8 Yudha abɨkya kʉwa ndɨ Ɨzɛlɛlɨ bɛ : « Yɛ bha, ɨsɨlya miki taga na ɨbʉ. Kabuulyogo ɔbɨlɨ kusu na bɛvananza kusu, okwononi bɛ taga bɨkwa. Takɛgʉ kabhaɨlya kolumwogo ! 9 Ɨmɨ bɨkpɛ nobhinikini buti kakɨ. Imuuso banʉ ɨmɨ kiko nɨ nakumigisyigʉ. Lasɨ ɛmɨgɨlya ɨmɨ kadhwɛ ndɛkɛ ka mulibo ma ɔbɨlɨ kamɨ. 10 Takiki bi kalya ngbingo wakpʉ wanʉ, ibho tiginiku ka nganga ya yɨba. »
11 Kʉwa wa, abhabʉ bɛyɔ ka Ɨzɛlɛlɨ ʉbɨkya ndɨ bɛ : « Kiko nɛkɨ nɨ a bɛyɔ, mokyoni ka basaki kunu makpʉmʉka manzanza ma mugi kusu, mɨnda kapá Mumisili yi nɨnɔ kʉ. Mumindilyoni na mikya molingo, ikya nzuki, adhʉdhʉ, ndiko na makpʉmʉka magɔgɔ ma sʉ yanza. 12 Vonito buyi nɨbɔ bamakya ndɨ ka basaki kunu ba nganʉ, kyɛ okwononi kaigiso. Yagɔgɔ mʉtʉ bemoti amakya ndɨ nɨ kɛgʉ kaibho. Na migwinonogo na bagɔgɔ. 13 Mbɨya wanʉ, muvoni momonu bɛyɔ ka Bhenyamini, maga kamɨna alʉkʉ nɔ. 14 Kunzi wo ngu kʉgbɛ ogulyi kʉsɔ kakɨ, amʉmɨnya kumbu, amʉsɨlya Simioni ɨbʉ na Bhenyamini kaigoku. Kʉ kamɨ, miki bemoti ekwilyoni ndɨ na bagɔgɔ ba bata ko pisi yilumwogo ! »
Yɛzɛfʉ binononini na bamamakɨ ka nganga ya yɨba
15 Kʉwa wa, bomika Ɨzɛlɛlɨ bʉmʉmʉlaga ndɨ bapɛpɛ, bava buyi bakpʉ kakɨtaga nɨbɔ ba lɨgʉndʉ la mambwa, baga ndɨ ka Misili pa imoti na Bhenyamini. Ngbingo yi nɨnɔ badhwɛ ndɨ mino, basilyo ndɨ Yɛzɛfʉ. 16 Nɨyɔ Yɛzɛfʉ ɨna bɛ Bhenyamini odhuku pa imoti na ɨbʉ, abɨkya ndɨ zamu kakɨ bɛ : « Ubhisoku batʉ nɨbana kʉkamɨ. Bamwɨ nyama bemoti na bambamba, kyɛ talyalya na ɨbʉ na mʉsɨkatʉ. » 17 Zamʉ agya ndɨ mʉdɔngɔnɨ bɛyɔ bakpamya ndɨ mino, ubhisoku bobhiko bɔ ka ndabʉ ka Yɛzɛfʉ. 18 Ba ndɨ kabanga ngbingo yi nɨnɔ bʉbɨkya ndɨ mino bɛ bogulyi ka ndabʉ ka Yɛzɛfʉ. Banɨbɨkya bɛ : « Bakatɨmakya kʉnʉ ko bhulyo ya buyi nɨbɔ bamakya ndɨ ka basaki kusu ba nganʉ ka lɨgʉndʉ la mambwa. Batɨgyogyisotʉ, batɨbhʉma, batɨkʉpya bapunda kusu na batiitiso bosunzu. 19 Ngbingo yi nɨnɔ ba kʉwa ndɨ mino kogulyo, bakpudoku zamu, babɨkya ndɨ bɛ : 20 « Yɛ bha, kikiliki ! Todhokuto ndɨ ya mambwa wanʉ koluwo malɨlɨ. 21 Kaɨga kusu, wa timumbiso ndɨ mino no bhiti, mʉmbanzʉ yɨkaka-yɨkaka akʉlaga ndɨ sakɨ kakɨ wa nganʉ na atakanya ndɨ buyi ka mʉnɔkʉ mi. Buyi bi nɨbɔ a ndɨ mʉdɔngɔnɨ ka nɨbɔ toluwo ndɨ nobu nganʉ wa. Mbɨya wanʉ todhukuto na buyi bi nɨbɔ. 22 Todhukuto bata no buyi bagɔgɔ koluwo malɨlɨ. Takibhigʉ ambɛ wanɨ nɔ igiso ndɨ buyi kʉsɔ wa basaki ba nganʉ kusu. » 23 Luki limoti zamʉ ka Yɛzɛfʉ osikisyo bɛ : « Pilisoni mbɛyɨ mambɛngɨ bipisiii na makobongonitɔgʉ. Kunzi yi nɨnɔ kunu, Kunzi ka obhonu nɔ igiso ndɨ buyi kʉsɔ wa basaki ba nganʉ kunu. Nɨbɔ moluwo ndɨ nobu nganʉ, navatʉ ndɨ ɨmɨ. Kumbuso yi, akulogoku ndɨ Simioni.
24 Kʉwa wa, zamʉ nɔ ʉmakya ndɨ ka ndabʉ ka Yɛzɛfʉ. pá libo la magʉ na ʉpá bapunda malɨlɨ. 25 Bʉmʉmʉlaga ndɨ bapɛpɛ kabʉ kabʉndaga Yɛzɛfʉ. Ka lɨngʉnʉ, ba ndɨ nɨ bukonini bɛ bakalyalya pa imoti na ɨbʉ na mʉsɨkatʉ.
26 Ngbingo yi nɨnɔ Yɛzɛfʉ osiloku ndɨ mino kʉ kakɨ, bapá bapɛpɛ nɨbɔ bodhoku ndɨ nobu bɔ. Kumbuso yi bodhidhiko ndɨ kadhwɛ kʉ kwa kʉ ka lɨtɔmbʉ kambwa kakɨ. 27 Luki limoti Yɛzɛfʉ umuuso ndɨ bɛ : « A mazɨyɔ gɔnɨ ? » Kumbuso yi omotiloku bɛ : « Mɛbɨkyatʉ ndɨ lɨkpʉmʉka kʉgʉ ka mbɔkʉ-mbɔkʉ wa obhonu. Atʉ bɨnza ? Atʉ bata ka ɔbɨlɨ ? » 28 Bosikisyo ndɨ bɛ : « Iyo, musunzu kakʉ, obhosu a bɨnza. A mbɛyɨ bata asɨ ka ɔbɨlɨ aka. » Bobuno ndɨ moli, bodhidhiko bata kadhwɛ kʉ kwa kʉ ka lɨtɔmbʉ. 29 Nɨyɔ Yɛzɛfʉ ʉmaka ndɨ mino bazwa, amɨna mamakɨ bɨkpɛ bɛyɔ ka Bhenyamini. Uuso ndɨ bɛ : « Mupipilo kunu nɨnɔ mɛbɨkya ndɨ bhulyo kakɨ nɨnɔ kʉ ? » Kumbuso yi, abɨkya Bhenyamini bɛ : « Mikamɨ, Kunzi udukulyi bʉbʉnga ! »
30 Ngbingo yi nɨnɔ Yɛzɛfʉ amɨna ndɨ mino mamakɨ bɛyɔ, nzʉyɨ atwa bɨkyakyakya, opupo ndɨ bɨgala-gala kyɛ bomomiso-miso ba ndɨ nɨ batumini bɨdɛ. Ogulyo ndɨ ka ndabʉ kakɨ ya busisini kagama. 31 Kumbuso yi, ɨsʉkʉsa ndɨ miso, opupoku bata. Igwi lɨmbɛngɨ, ʉkpamya ndɨ batʉ ba ndabʉ kakɨ bɛ bodhuku na malɨlɨ. 32 Bagbalya ndɨ Yɛzɛfʉ makakɨ dhi, nɨmɔ ka bamamakɨ dhi. Bʉgbalya ndɨ gɔnɨ Bamisili nɨbɔ ʉmaka ndɨ kʉ kakɨ dhi. Ka lɨngʉnʉ, Bamisili na Baebhalania bakakwananɨgʉ ndɨ kalyalya pa imoti kabyɛnɛnɛ no pisi ya bhaya kabʉ. 33 Bamamakɨ Yɛzɛfʉ bikonono ndɨ kambwa kakɨ. Bulikisogo ndɨ kabyɛnɛnɛ na yɨbʉkʉta kabʉ, kapʉnga na pʉta na kadhwɛ ka mupipilo. Ba ndɨ kaandanana nɨ banombomboyo kʉgbɛ. 34 Yɛzɛfʉ akpamya ndɨ bɛ bʉpɨ bamamakɨ malɨlɨ ka nɨmɔ a ndɨ makakɨ. Luki limoti nɨmɔ ka Bhenyamini a ndɨ makpʉ nganga kubukumuti kakɨtaga nɨmɔ ka batʉ bagɔgɔ basɨ. Bomwo ndɨ na bogwo magyagya pa imoti.