Yakɔbɔ utikini bomikakɨ ka Misili
42
1 Nɨyɔ Yakɔbɔ ʉkana bɛ nganʉ wa lɨgabhʉ a ka Misili, ʉbɨkya bomikakɨ bɛ : « Ko bhulyo ɨkɨ yɔ mikononi, manandanana bɛyɔ ? 2 Nukoni bi bɛ nganʉ mʉgabha a ka Misili. Windoni, matiluulyo ko bhulyo ya ɔbɨlɨ kusu. Takolumwogonitɔgʉ na banza. » 3 Bamamakɨ Yɛzɛfʉ tɛkɛbɛ baga kʉwa ndɨ kalʉwo nganʉ ka Misili. 4 Yakɔbɔ kasɨlyagʉ ndɨ Bhenyamini, nɨnɔ mamakɨ Yɛzɛfʉ lɨgʉndʉ pa imoti na bɛngɛnɨ. A ndɨ kaɨbɨkya bɛ : « Lɨkpʉmʉka lagɔgɔ kasilyoni kʉ bɛyɔ. » 5 Kʉwa wa, bomika Ɨzɛlɛlɨ bosilyono kʉ, pa imoti na batʉ bagɔgɔ kaluwo nganʉ. Ka lɨngʉnʉ, ayʉndɨ a ndɨ nɨ oumini mugi ma Kanana.
Yɛzɛfʉ akaʉgya bamamakɨ yapʉpʉ
6 Yɛzɛfʉ a kʉwa ngama ka mugi. Ɨyɨ nɔ ugobhisilyogo ndɨ bambanzʉ basɨ nganʉ. Bamamakɨ bosilo ndɨ, bodhidhiko kadhwɛ kʉ kwa kʉ ka lɨtɔmbʉ kambwa kakɨ. 7 Ngbingo yi nɨnɔ Yɛzɛfʉ ʉmɨna ndɨ mino bamamakɨ, umibho. Luki limoti, ɨgya abhɛ kɛgʉ kaumibho na ʉnzɨnya ndɨ na dɨya bikiba-kiba. Umuuso ndɨ bɛ : « Mapʉnya yanɨ ? » Basikisyo bɛ : « Tapʉnya ka mugi ma Kanana. Todhuku koluwo malɨlɨ. »
8 Kʉwa wa, Yɛzɛfʉ umibho ndɨ bamamakɨ bɨnza luki limoti, ɨbʉ bakamibhogʉ ndɨ. 9 Atamana kʉwa ndɨ bonziki nɨbayɔ alʉtaga ndɨ ko bhulyo kabʉ, ʉbɨkya bɛ : « Ma batʉ (banyɛ / ba balʉmɨ) ! Modhuku kakɨsa kaibho bʉpɔ ba mugi kusu. » 10 Basikisyo ndɨ bɛ : « Kɛgʉ bɛyɔ ngamaaa. Ta bosunzu kakʉ, na todhuku ibusu koluwo malɨlɨ aka. 11 Ibusu basɨ ta bomika mʉlʉkʉ bemoti, ta batʉ bongbingbili. Bosunzu kakʉ bakɛgʉ batʉ banyɛ/ba balʉmɨ. » 12 Luki limoti Yɛzɛfʉ otiolyo ndɨ kaʉbɨkya bɛ : « Kɛgʉ bɛyɔ ! Modhuku kakɨsa kaibho bʉpɔ ba mugi kusu. » 13 Basikisyo ndɨ bɛ : « Ibusu bosunzu kakʉ ta ndɨ tɛkɛbɛ na baba. Ta bomika mʉlʉkʉ ka mugi ma Kanana. Mbɨya wanʉ, mupipilo botigoliku na bhabha na wagɔgɔ obungogoni ndɨ. » 14 Yɛzɛfʉ igilyoku bata bɛ : « A bɛyɔ aka yɔ namubikyi bi mino ambɛ ma batʉ banyɛ/ba balʉmɨ ! 15 Nakamʉkɨngɨla kaibho ambɛ makabɨkya lɨngʉnʉ. Ko lino ka ngama mudhingi wa Misili, nakamʉkʉlya silika ambɛ makopupigʉ ka mugi nɨmana, kadhwɛ kʉ kwa kʉ mupipilo kunu osiloku ndɛkɛ mino wanʉ. 16 Mutikoni mʉtʉ bemoti lugo kunu ɨndɨ kavoku momonu. Ko ngbingo yi nɨnɔ, batʉ bagɔgɔ biko ka ligbito. Kʉwa wa, nakwanana kaibho ambɛ mebikyi bi lɨngʉnʉ. Kiki bɛyɔ, ko lino ka ngama mudhingi wa Misili, nakɔ silika ambɛ ma batʉ banyɛ/ ba balʉmɨ ! »
17 Yɛzɛfʉ ʉmakya ndɨ basɨ ka ligbito kʉsɔ wa masyɛ masaa. 18 Kumbuso wa masyɛ masaa, ʉbɨkya ndɨ bɛ : « Makapa kaiko na ɔbɨlɨ kunu, makwanana kagya nɨlɔ nakamʉbɨkya. Ɨmɨ, nabangagatʉ Kunzi. 19 Makiko bongbingbili, bemoti kunu asɨkanɨ ka ligbito wanʉ. Batʉ bagɔgɔ bɨnda kapá malɨlɨ ka bɛvananza kunu nɨbayɔ akolumwogo na banza. 20 Kumbuso yi, memigilyoku na mupipilo kunu. Nakwanana kʉwa wa kaibho ambɛ mebikyi bi lɨngʉnʉ na makokwigʉ bata. » Babhaɨlya ndɨ kagya bɛyɔ. 21 Bapʉnga ndɨ kaɨnzɨnzɨnya lugo kabʉ banabɨkya bɛ : « Ka lɨngʉnʉ, takaigyogyiso na lɨsyɛ li nɨlɨ ko bhulyo nɨlɔ tagyɨlya ndɨ momosu bɛyɔ ka Yɛzɛfʉ. Tɨnatʉ ndɨ bʉtʉla ba yigomisogo kakɨ na bɛyɔ a ndɨ mino kaɨtatanaga na ibusu bɛ takamwonitɔgʉ baka. Luki limoti takamɨnɨlyagʉ ndɨ kumbu. Kinili mbɨya wanʉ, ibusu takainisono na inguo ya yigomisogo yi nɨyɔ. » 22 Lubheni ʉbɨkya ndɨ bɛ : « Nakamʉbɨkyagʉ sɛ mbɛyɨ ndɨ ambɛ takagyogyisonitɔgʉ miki ? Na makɛmʉkanagʉ ndɨ. Ɛɛɛ, mbɨya wanʉ, takaigyogyiso ko bhulyo ya bangʉ kakɨ. » 23 Bakɛgʉ ndɨ kaibho bɛ Yɛzɛfʉ akaʉkana lasɨ nɨlɔ ba ndɨ kabɨkya, kyɛ mʉtʉ bemoti nɔ a ndɨ kaukitisyogo/kauyikosilyo masasʉ kabʉ. 24 Kʉwa wa, Yɛzɛfʉ ɨtɛ, agama ndɨ no kumbu. Kumbuso yi igoku ndɨ kanzɨna na ɨbʉ. Ava ndɨ Simioni, akondisiso ko miso kabʉ aka wa.
Bomika Yakɔbɔ banɨga ka Kanana
25 Kumbuso yi, Yɛzɛfʉ ʉkpamya ndɨ bagya-ligubho kakɨ bɛ butumisi basaki kabʉ na nganʉ, bigiso buyi ka mʉmbanzʉ yɨkaka-yɨkaka kʉsɔ wa saki kakɨ na bʉpá malɨlɨ mʉlya ko pisi. Bagya-ligubho bagya ndɨ masɨ nɨmɔ. 26 Bamamakɨ Yɛzɛfʉ bubhinikisogo ndɨ bapunda kabʉ basaki ba nganʉ, baga ndɨ. 27 Ngbingo yi nɨnɔ ba ndɨ mino kaimumbiso no bhiti, bemoti kabʉ akʉla ndɨ saki kakɨ kyɛ apí punda malɨlɨ, atakanya buyi kakɨ kʉsɔ wa saki. 28 bɨkya bamamakɨ bɛ : « Bemigisilyito bi buyi kamɨ ! A wanʉ kʉsɔ wa saki kamɨ ! Nɨyɔ bʉkana bɛyɔ, bombomboyo na babanga ndɨ kʉgbɛ. Bimuuso ndɨ lugo kabʉ bɛ : « Lɨkpʉmʉka tino lɔ Kunzi atigyilyi lɔ ? » 29 Nɨyɔ basilyo ndɨ abhabʉ ka mugi ma Kanana, batʉmbʉlyaga masɨ nɨmɔ akɨtanaga ndɨ na ɨbʉ. 30 Babɨkya ndɨ bɛ : « Alʉkʉ nɨnɔ ngama wa mugi nɨmɔ kʉ, o bi katɨnyakɨlya bɨnyaka-nyaka. Anatɨmɨna abhɛ ta batʉ banyɛ/ba balʉmɨ ka mugi kakɨ. 31 Tasikisyo ndɨ bɛ : ‹ Ta batʉ bongbingbili. Takɛgʉ batʉ banyɛ/ba balʉmɨ. 32 Ta ndɨ tɛkɛbɛ na baba, bomika mʉlʉkʉ. Momosu bemoti obungogoni ndɨ. Mbɨya wanʉ, mupipilo botigoliku na bhabha ka mugi ma Kanana. › 33 Alʉkʉ nɔ, ngama wa mugi nɔ, atɨbɨkya kʉwa ndɨ bɛ a kapa katɨkɨngɨla, kaibho ikanɨ ta batʉ ba lɨngʉnʉ. Atɨbɨkya ndɨ bɛ : ‹ Bemoti kunu asɨkanɨ pa imoti na ɨmɨ wanʉ, batʉ bagɔgɔ bɨnda kapá malɨlɨ ka bɛvananza kunu nɨbayɔ akolumwogo na banza. 34 Imigilyoniku sɛ na mupipilo kunu aka, nibho kʉwa ambɛ makɛgʉ batʉ banyɛ/ba balʉmɨ, luki limoti batʉ bongbingbili. Kʉwa wa, namumigisyo momonu bɛyɔ ka Simioni, miko kʉwa bikpo kakpakyana kʉsɔ wa mugi nɨma. › »
35 Kumbuso yi, bapʉnga ndɨ kanyɔgɔ / kaʉpanzaga basaki kabʉ. Ngbingo yi nɨnɔ ba ndɨ mino kagya bɛyɔ, mʉmbanzʉ yɨkaka-yɨkaka atakanya kʉsɔ wa nɨnɔ kakɨ, libuki la buyi. Ɨbʉ basɨ babanga ndɨ, gʉtʉgʉ abhabʉ aka bɛyɔ ka Yakɔbɔ. 36 Ɨyɨ abhabʉ ʉbɨkya ndɨ bɛ : « Megbonosoni ndɨ na bomiki baba : Yɛzɛfʉ ɨbʉ na Simioni bakɛgʉ bata. Makapa kɛvɨlya bata Benyamini ! Nɨyɔ yasɨ a ka mʉ kamɨ aka ( Ɨmɨ obhonu nɔ nakaigyogyiso. Kɛgʉ ibunu ) ! »
37 Luki limoti, Lubheni abɨkya ndɨ abhakɨ bɛ : « Nakumigilyiku na Benyamini, wakwanana gʉtʉgʉ banʉ kaʉmwɔ bomikamɨ baba. Ɨsɨlya yakakɨ, numigilyokuto na ɨyɨ. » 38 Yakɔbɔ osikisyo bɛ : « Kalɨ, mikamɨ kɛgʉ kaɨnda na ibunu. Mamakɨ okwoni ndɨ. Esikonilyi kʉwa ɨyɨ yɨkaka aka ka amabʉ. Na kʉwa ɨmɨ mbɔkʉ-mbɔkʉ kʉgbɛ. Lɨkpʉmʉka lanyɛ kasilyo ka lɨgʉndʉ kunu kʉ, nokwo na lɨmbɛngɨ lɨtʉla kunu. »