Mʉpʉnganagɨ 36

Isau bikini na lɨvananza kakɨ ka mugi ma Seili

1 Puponogo ka Isau nɨnɔ bamakaga ndɨ gɔnɨ bɛ Edhomu nɨyɨ. 2 Isau ʉva ndɨ Babakanana baba : Adha, mika Eloni nɨnɔ a ndɨ Muhiti, kumbuso yi ava Oholibhama mika Ana na miko-mika Sibheoni nɨnɔ a ndɨ Muhivi. 3 Ava ndɨ gɔnɨ Bhasemati mika mamakɨ abhakɨ\f + \fr 36.3 \fq mamakɨ abhakɨ: Kabyɛnɛnɛ na yɨgya kabʉ, bavananagatʉ ndɨ kʉsɔ wa lɨvananza ka mugi mi nɨmɔ. bɛyɔ ka Isimaeli. Ɨyɨ Bhasemati a ndɨ mamakɨ Nebhayoti. 4 Adha abʉkʉtɨlya ndɨ Isau Elifazi, Bhasemati abʉkʉtɨlya Leueli, 5 Oholibhama abʉkʉtɨlya ɨyɨ Yeusi, Yalamu sɛ kʉwa Kola. Bomika Isau nɨbɔ ʉbʉkʉtaga ndɨ ka mugi ma Kanana nɨbɔ.

6 Isau ʉva kʉwa ndɨ bokakɨ, bomikakɨ balʉkʉ na nɨbɔ boko bi, batʉ ba ndabʉ kakɨ basɨ, bangɔmbɛ kakɨ na banyama bagɔgɔ basɨ. Na ava ndɨ gɔnɨ mukumbo kakɨ masɨ nɨmɔ inisono ndɨ na imu ka mugi ma Kanana, aga ndɨ kaiko ka mugi magɔgɔ, byɨ na mamakɨ bɛyɔ ka Yakɔbɔ. 7 Ka lɨngʉnʉ, bakakwananɨgʉ ndɨ kaiko pa imoti, kyɛ mukumbo kabʉ a kʉwa ndɨ makpʉ kʉgbɛ. Na mugi nɨmɔ bikogo ndɨ mino abhɛ bobhiko, a kʉwa ndɨ gɔnɨ makɛdɛ ka budhingi ba bambaza ka banyama kabʉ. 8 Kinili Isau nɨnɔ bamakaga ndɨ gɔnɨ bɛ Edhomu, ɨnda ndɨ kaiko ka iwili ya bangʉpa ba ya Seili.

Puponogo ka bomika Isau

9 Isau a ndɨ tɨtakɨ Baedhomu, lɨvananza kakɨ ka mugi ma ngʉpa ya Seili nɨlɨ. 10 Mino ka bomika Isau na bomiko-mikakɨ ndɨ nɨma : Elifazi nɨnɔ mukakɨ bɛyɔ ka Adha abʉkutɨlya ndɨ, na Leueli ninɔ mukakɨ wagɔgɔ bɛyɔ ka Bhasemati abʉkʉta ndɨ. 11 Bomika Elifazi ndɨ nɨ Temani, Omali, Sefo, Gatamu na Kenazi. 12 Elifazi a ndɨ na muko wagɔgɔ nɨnɔ ina ndɨ bɛ Timuna. Ɨyɨ Timuna abʉkʉtɨlya ndɨ mbʉnyakɨ miki nɨnɔ balʉka ndɨ bɛ Amaleki. Bomiko-mika Isau na mukakɨ bɛyɔ ka Adha ndɨ nɨbɔ. 13 Bomika Leueli ndɨ nɨba : Nahati, Zela, Sama na Miza. Bomiko-mika Isau na mukakɨ bɛyɔ ka Bhasemati ndɨ nɨbɔ. 14 Oholibhama mika Ana na miko-mika Sibheoni, abʉkʉtɨlya ndɨ mbʉnyakɨ bɛyɔ ka Isau bomiki basaa : Yeusi, Yalamu na Kola.

15 Bangama ka lɨvananza ka Isau nɨba :Elifazi nɨnɔ a ndɨ pʉta ka Isau, ʉbʉkʉtaga ndɨ bangama Temani, Omali, Sefo, Kenazi, 16 Kola, Gatamu na Ameleki. Bangama nɨbɔ Elifazi ʉbʉkʉtaga ndɨ nɨbɔ ka mugi ma Edhomu. Ɨbʉ basɨ ba ndɨ bomiko-mika Adha, muka Isau. 17 Bangama nɨbɔ Leueli mika Isau ʉbʉkʉtaga ndɨ nɨba : Ngama Nahati, Zela, Sama na Miza. Bangama nɨbɔ Leueli ʉbʉkʉtaga ndɨ nɨbɔ ka mugi ma Edhomu. Ɨbʉ basɨ ba ndɨ bomiko-mika Bhasemati, muka Isau. 18 Bomika Oholibhama, muka Isau ndɨ nɨba : Ngama Yeusi, Yalamu na Kola. Bangama nɨbɔ Oholibhama, mika Ana, muka Isau ʉbʉkʉtaga ndɨ nɨbɔ.

19 Bomika Isau ndɨ nɨbɔ. Ɨbʉ bɔ ba ndɨ bangama ka Baedhomu.

Batʉ ba mambwa kaiko ka mugi ma Edhomu

20 Batʉ ba mambwa kaiko ka mugi ma Edhomu ndɨ nɨ lɨvananza ka Muholi bɛyɔ ka Seili. A ndɨ nɨ Lotani, Sobhali, Sibheoni, Ana, 21 Dhisoni, Eseli na Dhisani. Bomika Seili ndɨ nɨbɔ, bangama ka Baholi ka mugi ma Edhomu.

22 Bomika Lotani ndɨ nɨ Holi na Hemani. Timuna a ndɨ mʉsalɨ ka Lotani.23 Bomika Sobhali ndɨ nɨ Aluwani, Manahati, Ebhali, Sefo na Onamu.24 Bomika Sibheoni ndɨ nɨ Aya na Ana. Ana nɔ ɨna ndɨ lɨkpakpa nɨlɔ opupisogo ndɨ libo lazʉ, ngbingo yi nɨnɔ a ndɨ mino kaubuulyogo bapunda ka abhakɨ bɛyɔ ka Sibheoni ka ɨsa.25 Bomika Ana nɨnɔ a ndɨ mika Seili nɨ Dhisoni na nɨnɔ mukoyi bɛyɔ ka Oholibhama.26 Bomika Dhisoni nɨnɔ a ndɨ mika Seili nɨ Hemudhani, Esibhani, Itilani na Kelani.27 Bomika Eseli ndɨ nɨ Bhilihani, Zawani na Akani.28 Bomika Dhisani ndɨ nɨ Usi na Alani.

29 Bangama ka Baholi ndɨ nɨba : Ngama Lotani, Sobhali, Sibheoni, Ana, 30 ngama Dhisoni, Eseli na Dhisani. Bangama ka Baholi ndɨ nɨbɔ kabyɛnɛnɛ na modu kabʉ ka mugi ma Seili.

Bangama budhingi-dhingi ka mugi ma Edhomʉ

31 Kambwa kamomoso ngama mudhingi kaʉnda bomikya Baɨzɛlɛlɨ, bangama budhingi-dhingi nɨbɔ bosyononogo ndɨ ka mugi ma Edhomʉ nɨba :

32 Bhela, mika Bheoli, alya ndɨ bʉngama kakɨ nɨ anikogo ka gʉdʉ wa Dhinihabha.33 Ngbingo yi nɨnɔ okwo ndɨ mino,Yobhabhu mika Zela alya ndɨ bʉngama ka pa kakɨ. Ɨyɨ Yobhabhu a ndɨ mʉtʉ wa gʉdʉ wa Bhosila.34 Nɨyɔ Yobhabhu okwo, Usamu mʉtʉ wa mugi ka Batemani, alya ndɨ bʉngama ka pa kakɨ.35 Ngbingo yi nɨnɔ Usamu okwo ndɨ mino, Adhadhi mika Bhedhadhi alya ndɨ bʉngama ka pa kakɨ. Ɨyɨ nɔ ʉbhʉma ndɨ Bamidhiani ka mugi ma Moabhu. Gʉdʉ mudhingi kakɨ ndɨ nɨ Awiti.36 Nɨyɔ Adhadhi okwo, Samula mʉtʉ wa gʉdʉ wa Masileka, alya ndɨ bʉngama ka pa kakɨ.37 Ngbɨngo yi nɨnɔ Samula okwo ndɨ mino, Sauli mʉtʉ wa mugi ma Lehobhoti nɨmɔ a ndɨ ka kpɔlɔ-kpɔlɔ wo libo lidhingi la Fulati, alya ndɨ bʉngama ka pa kakɨ.38 Nɨyɔ Sauli okwo, Bhali-Anani mika Akibholi, alya ndɨ bʉngama ka pa kakɨ.39 Ngbingo yi nɨnɔ Bhali-Anani mika Akibholi okwo ndɨ mino, Adhali alya ndɨ bʉngama ka pa kakɨ. A ndɨ mʉtʉ wa gʉdʉ wa Pau. Mukakɨ ina ndɨ bɛ Mehetabheli. A ndɨ mika Matiledhi na miko-mika Mezahabha.

40 Mino ka bangama basɨ ka Baedhomu, kabyɛnɛnɛ na modu kabʉ na bapa nɨbayɔ bikogo ndɨ mino nɨma : Timuna, Aluwa, Yeteti, 41 Oholibhama, Ela, Pinoni, 42 Kenazi, Temani, Mibhusali, 43 Magidhieli na Ilamu. Bangama ka Baedhomu ndɨ nɨbɔ, kabyɛnɛnɛ na bewili dhidhidhi nɨbɔ bikogo ndɨ mino kʉsɔ wa mugi. Isau nɨ tɨtakɨ Baedhomu.