Bomika Yakɔbɔ bigisini likosi ka mamabʉ Dhina
34
1 Lɨsyɛ limoti, Dhina miki mukoyi nɨnɔ Yakɔbɔ babʉkʉta ndɨ na Lɛya, ɨnda ndɨ kaɨnanaga magʉ kʉ ka boko ba mʉsɛngɨ. 2 Sekemu a ndɨ mika Hamoli Muhivi nɨnɔ a ndɨ ngama mudhingi wa mugi mi nɨmɔ. Nɨyɔ Sekemu amɨna Dhina, agwi, asyɛ na ɨyɨ ko ngu. 3 Luki limoti, lɨmbɛngɨ ka Sekemu ɨtʉlyana ndɨ ka Dhina mika Yakɔbɔ, apa ndɨ kʉgbɛ na apʉnga kabulisyogo. 4 Atʉmbʉlyaga ndɨ abhakɨ bɛyɔ ka Hamoli, abɨkya bɛ : « Ɨvɨlyanɔ baka mʉsɨka yi nɨmʉ, iki muko kamɨ. »5 Yakɔbɔ ʉkana bɛ Sekumu a ndɨ nɨ aputini mikakɨ Dhina, luki limoti kaɨna bɛ bomikakɨ balʉkʉ bi ba ndɨ ka syʉngbʉ kaulyoliso banyama, adhaka ndɨ kadhwɛ kʉ kwa kʉ bigoku ndɨ mino. 6 Sekumu ɨbʉ na abhakɨ bɛyɔ ka Hamoli bɨnda ndɨ kanzɨna na Yakɔbɔ. 7 Nɨyɔ bomika Yakɔbɔ bigoku kʉ ba ndɨ mino ka syʉngbʉ, bʉkana mongoni mi nɨmɔ. Bɨmʉkana ndɨ bɛ bugyini bɨnyɛ na mambɛngɨ ʉkandɨkanaga ndɨ bɨsʉlʉ-sʉlʉ. Kyɛ Sekumu agya ndɨ lɨkpʉmʉka lidhingi ka Ɨzalɛlɨ kasyɛ na mika Yakɔbɔ. Lɨkpʉmʉka li nɨlɔ kakwananɨgʉ ndɨ kaigyonoso ! 8 Hamoli ʉbɨkya kʉwa ndɨ bɛ : « Mikamɨ Sekumu aponi mikunu na lɨmbɛngɨ limoti, kikiliki muponi iki mukakɨ. 9 Tokuni lɨganza ko pisi yo vononi; matipoku ibusu basɨka kunu na ibusu tamʉpá bo kusu. 10 Miko pa imoti na ibusu na miko kʉsɔ wa mazɨyɔ ka mugi mi nɨma. Wikoni mino, gyoni bumbula, moluwo bapa. »
11 Kʉwa wa, Sekumu abɨkya ndɨ abhakɨ na bamamakɨ Dhina bɛ : « Ninisoninɔ baka na bʉnza ko miso kunu. Ɨmɨ, namʉpátʉ luki lasɨ nɨlɔ mɛkʉnga ! 12 Ikoni mukumbo makpʉ na apɛpɛ mudhingi, nakalya bɛyɔ aka yɔ mabɨkya mino, luki limoti iponiku mʉsɨka yi nɨmʉ iki muko kamɨ ! »
13 Luki limoti, bomika Yakɔbɔ basikisyo ndɨ Sekumu na abhakɨ bɛyɔ ka Hamoli na bokoli, kyɛ Sekemu a ndɨ nɨ aputini mamabʉ bɛyɔ ka Dhina. 14 Babɨkya ndɨ bɛ : « Takakwananɨgʉ kavisiso momosu ka mʉlʉkʉ yi nɨnɔ kɛgʉ mʉkɔ kyɛ iko suni kukusu. 15 Tʉkanana na ibunu ko pisi imoti aka nɨyɨ : Wiitoni abhɛ ibusu na ukusisoni balʉkʉ basɨ. 16 Kʉwa wa tamʉpátʉ basɨka kusu na tʉva bokunu. Tiko kʉwa pa imoti, tɨɨta luki limoti. 17 Luki limoti, makatimukoni na makikusisi, tavatʉ momosu, taga. »
18 Tamanaga kabʉ abosilo ndɨ Hamoli ɨbʉ no mikakɨ Sekemu. 19 Alʉkʉ nɔ kolipyagʉ kagya bɛyɔ ɨbɨkya ndɨ mino, kyɛ a ndɨ kapa mika Yakɔbɔ. Na ɨyɨ gɔnɨ nɔ a ndɨ miki mʉpaka kʉgbɛ kaʉkɨtaga basɨ ka ndabʉ ka abhakɨ.
20 Kʉwa wa, Hamoli ɨbʉ no mikakɨ Sekemu, bɨnda ndɨ ka mupumi ma gʉdʉ kabʉ, bʉbɨkya ndɨ bamamabʉ bɛ : 21 « Balʉkʉ bi nɨbɔ ba na ibusu na mazɨyɔ, biki ka mugi kusu, bagyɨ bumbula, mugi a mahʉ kʉgbɛ ko bhulyo kabʉ. Tiki kavanana lugo kusu na ɨbʉ. 22 Luki limoti, bapatʉ kaiko na ibusu, na kaɨɨta na ibusu luki limoti ko pisi ya yʉkanana yi nɨyɨ : Tʉkɔ balʉkʉ basɨ lugo kusu, mʉdɔngɔnɨ bɛyɔ ɨbʉ bikusisogo mino. 23 Takabhaɨlya pisi yi nɨyɔ bobikyi, bodhoku kaiko pa imoti na ibusu. Na bambaza ka banyama kabʉ, mukumbo kabʉ, bangɔmbɛ kabʉ biko kʉwa bokusu. » 24 Batʉ basɨ nɨbɔ ba ndɨ kopupo kunzi wa gʉdʉ, bʉmʉkana Hamoli ɨbʉ no mikakɨ bɛyɔ ka Sekemu. Balʉkʉ basɨ nɨbɔ bikogo ndɨ kʉsɔ wa gʉdʉ, bikusiso ndɨ.
25 Kumbuso wa masyɛ maba, ko ngbingo yi nɨnɔ balʉkʉ bi nɨbɔ ba mbɛyɨ ndɨ mino kʉsɔ wa mʉzʉzʉla aka, bomika Yakɔbɔ baba Simioni na Lawi bamamakɨ Dhina, bava badhʉkpa, bingyo ka gʉdʉ lɨmbɛngɨ bipisiii na bʉmwɔ ndɨ balʉkʉ basɨ. 26 Bamwɔ ndɨ gɔnɨ Hamoli ɨbʉ no mikakɨ Sekemu na badhʉkpa, banyogoku ndɨ Dhina ka ndabʉ ka Sekemu, baga. 27 Bomika Yakɔkɔ bagɔgɔ boyikoso ndɨ bamanda bikpungbulu-kpungbulu, batʉpa lɨngama lasɨ bingbufu ka gʉdʉ kyɛ ba ndɨ nɨ baputini mamabʉ. 28 Bʉva ndɨ bakɔndɔlɔ na bamɛmɨ kabʉ, bangɔmbɛ na bapunda na makpʉmʉka masɨ nɨmɔ a ndɨ kʉsɔ wa gʉdʉ na ka botiko. 29 Bugwi ndɨ boko na bomikabʉ, batʉpa lɨngama kabʉ lasɨ na makpʉmʉka masɨ nɨmɔ a ndɨ kʉsɔ wa bandabʉ kabʉ.