Yakɔbɔ bobhongonini na Isau
33
1 Nɨyɔ lɨsyɛ asyɛ, Yakɔbɔ ʉmaka ndɨ bazwa, ɨna bɛ Isau akodhoku pa imoti na balʉkʉ bamɨya bakwanganya. gbananaga ndɨ bomiki, apá Lɛya, Lakeli sɛ kʉwa bagya-ligubho baba boko bi. 2 Ubhiso ndɨ kambwa bagya-ligubho boko bi na bomikabʉ, kumbuso yi Lɛya na bomikakɨ, na ka mulibo Lakeli na mikakɨ bɛyɔ ka Yɛzɛfʉ. 3 Ɨyɨ mombukwana dhakɨ akɨtaga ndɨ kambwa, obuno moli na odhidhiko kadhwɛ ka lɨtɔmbʉ ka nganga ya mambwa, amaga. Ɨgɨlya ndɨ bata bɛyɔ nganga madɨya kambwa kadhwɛ buwobhi na mamakɨ. 4 Isau opikitoku ndɨ katɨlya, ava, ɨdɨkɨta ko singasʉ kakɨ, aputito. Kumbuso yi, bapʉnga ndɨ kagamana. 5 Kʉwa wa, Isau ʉmaka ndɨ bazwa, ʉmɨna boko na bomiki. Abɨkya bɛ : « Ba wanɨ bɔ ma na ɨbʉ bɔ ? » Yakɔbɔ asikisyo bɛ : « Bomiki nɨbɔ Kunzi apá ndɨ mʉgya-ligubho kakʉ. » 6 Bagya-ligubho boko bi bisisiloku ndɨ, ɨbʉ na bomikakʉ, kumbuso yi bobuno ndɨ moli na bodhidhiko. 7 Lɛya isisiloku ndɨ gɔnɨ ɨbʉ na bomikakɨ, bobuno ndɨ moli na bodhidhiko. Ka mulibo, Yɛzɛfʉ isisiloku ɨbʉ na Lakeli, bobuno ndɨ gɔnɨ moli na bodhidhiko.
8 Kʉwa wa, Isau uuso bɛ : « Bambaza basɨ nɨbɔ nobhongoni bi na ɨbʉ, wo bi kapa kagya na ɨbʉ ɨkɨ ? » Yakɔbɔ osikisyo bɛ : « No bi kapa kainisono na bʉnza ko miso ka mombukwana dhamɨ. » 9 Luki limoti, Isau abɨkya bɛ : « Mika-mama, na na mukumbo makpʉ, nɨmɔ kakʉ, buulyogo ko bhulyo kakʉ aka. » 10 Yakɔbɔ abɨkya bɛ : « Kikiliki ! Kɨgyananɨgʉ bɛyɔ, kiko nɨ ninisonini na bʉnza ko miso kakʉ, mʉva apɛpɛ kamɨ. Ka lɨngʉnʉ, nini bi miso kakʉ mʉdɔngɔnɨ abhɛ miso ko Kunzi na wetilyi bi bɨnza. 11 Va nɛkɨ apɛpɛ nɨnɔ nudhulyiku na ɨyɨ, kyɛ Kunzi ewonisiloni bʉnza na na mukumbo makpʉ. » Otiwolyo ndɨ na Isau ava.
12 Kʉwa wa, Isau abɨkya bɛ : « Totukyini na togoni, takpakyana pa imoti. » 13 Luki limoti, Yakɔbɔ asikisyo bɛ : « Mombukwana dhamɨ wakayibho bɛ bomiki bakɛgʉ no ngu na okwononi nubuulyogi bakɔndɔlɔ na bomoyi ba bangɔmbɛ nɨbɔ bakaulunguso bomiki, takukpokyoniso bɨndɨ gʉtʉgʉ ka lɨsyɛ limoti aka, banyama basɨ bi nɨbɔ bakwanana kokwogo. 14 Mombukwana dhamɨ akɨtagɨ kambwa ka mʉgya-ligubho kakɨ. Ɨmɨ, niko kakpakyana bɨwɛsɛ mʉdɔngɔnɨ bɛyɔ ambaza ka banyama na bomikamɨ nɨbɔ ba kambwa kamɨ biko mino kakpakyana, na kʉ kwa kʉ nadhwɛ mino ka mombukwana dhamɨ ka Seili. » 15 Isau abɨkya kʉwa bɛ : « Nakaʉsɨlya mino bambanzʉ bi nɨbɔ tokpokyoni na ɨbʉ ! » Luki limoti Yakɔbɔ osikisyo bɛ : « Ko bhulyo ɨkɨ bɛyɔ ? Ninisoninɔ ɨmɨ aka na bʉnza ko miso ka mombukwana dhamɨ ! »
16 Na lɨsyɛ li nɨlɔ aka lɔ, Isau apʉngaga ndɨ bata lɨgʉndʉ miso ka Seili. 17 Luki limoti, Yakɔbɔ ɨnda ndɨ ka Sukoti kʉ ipikilya ndɨ mino ndabʉ na agya bangbangba ko bhulyo ya ambaza ka banyama kakɨ. Kinili pa yi nɨyɔ balɨkyaga bɛ Sukoti isi yo lino li nɨlɔ nɨ « Bangbangba. »
Yakɔbɔ a ka Kanana
18 Kotukyoku ka mugi ma Padhani-Alamu,Yakɔbɔ igoku ndɨ wapʉpʉ na nzʉyɨ yanza. Osilo kʉwa ndɨ ka gʉdʉ wa Sekemu nɨnɔ a ka mugi ma Kanana. Opiko ndabʉ kakɨ buwobhi na gʉdʉ yi nɨnɔ. 19 Yakɔbɔ olyuwo ndɨ mikya pa na bambumaa mɨya bemoti ka mabɔkʉ ma lɨvananza ka Hamoli, abhakɨ Sekemu. Na opiko ndɨ mino ndabʉ kakɨ. 20 Apikilyo ndɨ Kunzi gbɔgbɔ wa, alɨkya bɛ « Eli, Kunzi wa Ɨzalɛlɨ ».