Abhalahamu abuni Abhimeleki
20
1 Abhalahamu na lɨvananza kakɨ lasɨ batʉkya ka iwili nɨyɔ ba ndɨ mino ka Mamule, bɨnda ndɨ ka iwili ya Negebhu. Iko lugo wa Kadhesi na Suli, kumbuso yi ɨnda ndɨ kaiko ko ngbingo mʉnda ka Gelali. 2 Ngbingo yi nɨnɔ a ndɨ mino kʉ, Abhalahamu ʉbɨkya ndɨ bambanzʉ bɛ mʉkakɨ bɛyɔ ka Sala a mamakɨa. Kʉwa wa, bavɨlya ndɨ Abhimeleki, ngama wa Gelali Sala. 3 Luki limoti, Kunzi apuponilyo ndɨ Abhimeleki no bhiti ko nziki, abɨkya bɛ : « Muko yi nɨnɔ wavi bi a muko mʉmbanzʉ, ɨwɛ wakokwo ko bhulyo kakɨ. »4 Abhimeleki a mbɛyɨ ndɨ nɨ bakanokpokyonigʉ na Sala abhɛ muko na mʉlʉkʉ, asikisyo bɛ : « Mombukwono dhamɨ, ulumwisogo kʉwa batʉ nɨbɔ bakogyigʉ bʉnyɛ ? 5 Abhalahamu bɨkpɛ nɔ ebikyi bi bɛ a mamakɨ muko yi, na ɨyɨ abɨkya gɔnɨ bi bɛ Abhalahamu a mamakɨ. Kinili nogyi bi bɛyɔ lɨmbɛngɨ bɨdhɛɛɛ, nakɛgʉ bi na bʉnyɛ. »
6 Luki limoti, Kunzi asikisyo ndɨ kʉsɔ wo nziki yi nɨyɔ aka yɔ bɛ : « A bɛyɔ. Nakaibho bɛ wogyi bi bɛyɔ lɨmbɛngɨ bɨdhɛɛɛ. Ɨmɨ gɔnɨ nɔ nupokyi bi bɛ wakogyonitɔ bʉnyɛ ko miso kamɨ, kinili nakukpomyigʉ bi bɛ kpakyanatʉ na muko yi nɨnɔ. 7 Mbɨya wanʉ, mumigiso kʉ ka mbʉnyakɨ. Abhalahamu a mʉgyalandʉ na akaʉkʉngɨlya kyɛ winisoni na ɔbɨlɨ. Luki limoti, wakamigisyi, wibho ka lɨngʉnʉ ambɛ wokwatʉ na batʉ ba lɨvananza kakʉ lasɨ. »
8 Kʉwa wa, Abhimeleki ozuzuko ndɨ na bʉsɔbɨ bibo, ʉmaka bambɔkʉ basɨ nɨbɔ bagyaga ndɨ na ɨbʉ ligubho na ʉtʉmbʉlyaga ndɨ lɨkpʉmʉka li nɨlɔ. Bambɔkʉ bi nɨbɔ babanga ndɨ kʉgbɛ. 9 Kumbuso yi, Abhimeleki amaka Abhalahamu, abɨkya ndɨ bɛ : « Watigyi bi bɛyɔ ko bhulyo ɨkɨ ? Nʉgyɨlya ndɨ bʉnyɛ tino kyɛ wemakyɨ ka bʉkpɛkɨ-kpɛkɨ, ɨmɨ na batʉ bi nɨbɔ nʉndaga ? Ka lɨngʉnʉ, wegyilyi bi lɨkpʉmʉka lɨmbanga. » 10 Abhimeleki amuuso ndɨ bɛ : « Luki tino lɔ ukpomyi bi kagya bɛyɔ ? »
11 Kʉwa wa, Abhalahamu asikisyo ndɨ Abhimeleki bɛ : « Nogyi bi bɛyɔ kyɛ na bi katamana ambɛ kɛgʉ na nɨnɔ abangaga Kunzi ka pa yi nɨyɨ, na makwanana bi kɛmwɔ ko bhulyo ka muko kamɨ. 12 Na gɔnɨ, a lɨngʉnʉ mika-mama, topupo na ɨyɨ bhabha bemoti. Luki limoti, bomosu ba dhidhidhi na ɨɨta kʉwa ndɨ muko kamɨ. 13 Ngbingo yi nɨnɔ Kunzi ɛnyɔ ndɨ mino ka ndabʉ ka bhabha, naga kaamama, nabɨkya ndɨ Sala bɛ : ‹ Pa yasɨ kʉ taga ndɛkɛ mino, kikiliki bɨkyaga bɛ na ɨmɨ mamakʉ. › »
14 Ka mulibo, Abhimeleki ʉva ndɨ bakɔndɔlɔ, bangɔmbɛ, bagya-ligubho balʉkʉ na boko bi apá ndɨ Abhalahamu, na amigisyo gɔnɨ mukakɨ bɛyɔ ka Sala. 15 Abɨkya ndɨ bata bɛ : « Wɨna, mugi mi nɨmana masɨ a ma kamɨ, wiko ka pa nɨyɔ lɨmbɛngɨ kakʉ opo mino. » 16 Kumbuso abɨkya ndɨ Sala bɛ : « Kaʉtʉmba suni ko miso ka batʉ basɨ nɨbɔ mikogo na ɨbʉ na kowonisilo bɛ wakɛgʉ na bʉnyɛ, nakapá mamakʉ bambʉma ɛlɔfʉ. »
17-18 Kaɨna lɨkpʉmʉka li nɨlɔ asilyo ndɨ Sala muko Abhalahamu, Yawe uitiso ndɨ boko basɨ ka ndabʉ ka Abhimeleki bandʉya. Kʉwa wa, Abhalahamu akʉnga ndɨ Kunzi, na Kunzi akʉlaga ndɨ Abhimeleki. Mukakɨ na bagya-ligubho kakɨ boko bi bakwanana kʉwa ndɨ bata kapʉnga kabʉkʉtaga.