Kunzi abuulyogini Lɔtɨ
19
1 Na bʉgɔgɔ, Lɔtɨ a ndɨ wakiko ka mupumi ma gʉdʉ wa Sɔdhɔmʉ ngbingo yi nɨnɔ bamalaika baba bosiloku ndɨ mino. Nɨyɔ ʉmɨna, amaga, ɨnda kaʉtɨlya. Obuno moli kambwa kabʉ, odhidhiko kadhwɛ kʉ kwa kʉ ka lɨtɔmbʉ. 2 bɨkya ndɨ bɛ : « Kikiliki, bamombukwono dhamɨ, ɨmɨ na mʉgya-ligubho kunu. Makwanana kogulyo ka ndabʉ kamɨ, mɨsʉkʉsa magʉ, masyɛ wa. Kumbuso yi, na bʉsɔbɨ bibo, midhukulogo na lɨgʉndʉ kunu. » Luki limoti, ɨbʉ basikisyo bɛ : « Kalɨ, ibusu takasyɛ wa aka wanʉ kunzi. » 3 Lɔtɨ ɨgama ndɨ na ɨbʉ kʉgbɛ, ka mulibo babhaɨlya, baga ndɨ kʉ kakɨ. Kʉwa wa, ʉmbambɨlya ndɨ malɨlɨ, usumbilyo mukati mokofulu, balyalya ndɨ.4 Ba mbɛyɨ ndɨ nɨ bakanololigʉ, balʉkʉ basɨ ba Sɔdhɔmʉ ba ndɨ wa, bokungulo ndɨ ndabʉ ka Lɔtɨ bikululu. Katʉkya ka bawanza kadhwɛ ka bambɔkʉ-mbɔkʉ, gʉtʉgʉ mʉtʉ bemoti aka kasɨkanagʉ ndɨ. 5 Bamaka ndɨ Lɔtɨ, bamuuso bɛ : « Batʉ bi nɨbɔ bogulyiku bi no bhiti ya lɨsyɛ li nɨlɨ kʉ kakʉ, ba yanɨ ? Hunyoku. Takapa bɛ biki boko kusu. »
6-7 Kʉwa wa, Lɔtɨ upupilyo ndɨ, otikyo ndɨ mupumi, ʉbɨkya bɛ : « Kikiliki, bomika-mama, makogyonitɔgʉ bʉnyɛ bi nɨbɔ ! 8 Ukononi mbɛyɨ ! Na na basɨka baba nɨbɔ bakanibhigʉ lɨkpʉmʉka ka balʉkʉ, nakwanana kamʉpá, magya na ɨbʉ bɛyɔ mobhoilyi mino. Luki limoti, makudhwonitɔgʉ balʉkʉ bi nɨbɔ kyɛ ba bobhiko kamɨ okwononi bɛ nubuulyogi bɨnza. » 9 Luki limoti, batʉ ba Sɔdhɔmʉ basikisyo ndɨ bɛ : « Tʉkya wa ! Ɨwɛ, wamubhiko wanʉ, wakapa kaibhiso zozi ! Takwanana kaʉgyagya kʉgbɛ kaʉkɨtaga ɨbʉ ! » Kʉwa wa, batindikogo ndɨ Lɔtɨ na gilito, bidhukulogo ndɨ kobuno mupumi bɨkpwa ! 10 Luki limoti, bobhiko baba bi nɨbɔ bananɨlya ndɨ Lɔtɨ mabɔkʉ, badapwa ndɨ bɨkya ! Bamakya gɔnɨ ndɨ ka ndabʉ, badhʉla mupumi. 11 Kumbuso yi, buitiso ndɨ na kolobu ya mamɔmɔ bawanza na bambɔkʉ-mbɔkʉ nɨbɔ ba ndɨ bʉmʉmʉka ka mupumi ma ndabʉ. Na bakakwananagʉ ndɨ bata kaɨna mupumi.
Kunzi alumwisogini gʉdʉ wa Sɔdhɔmʉ
12 Kʉwa wa, bamalaika baba bi nɨbɔ bamuuso ndɨ Lɔtɨ bɛ : « Watʉ bata na mʉtʉ nagɔgɔ nɨnɔ wa lɨvananza kakʉ wanʉ ? Ikanɨ bomikakʉ balʉkʉ bi ? Ikanɨ nɨbɔ basɨka bi ? Ikanɨ bambʉnyabʉ ? Lɨvananza kakʉ lasɨ nɨlɔ a ka gʉdʉ yi nɨmʉ, nyɔ bɨgala-gala. 13 Ka lɨngʉnʉ, takalumwisogo gʉdʉ yi nɨmʉ. Yawe ukonini bangbanga budhingi ka batʉ ba gʉdʉ yi nɨmʉ. Na ɨyɨ nɔ atitikiku bɛ todhuku kalumwisogo. » 14 Kʉwa wa, Lɔtɨ opupo, ɨnda ndɨ kaʉbɨkyaga bambʉnya bomikakɨ bɛ : « Tukyoni wanʉ bɨgala-gala kyɛ Yawe akagyogyiso gʉdʉ yi nɨmʉ. » Luki limoti, ba ndɨ ɨbʉ kaɨna abhɛ kiko kagya bakpɨba.
15 Ko mbolugo, bamalaika botiwolyo ndɨ, babɨkya bata Lɔtɨ bɛ : « Wamaga, mʉva mukakʉ na bomikakʉ basɨka bi nɨbana baba ba. Wakogyi bɛyɔ, molumwogotʉ ko bhulyo ya bʉnyɛ ka batʉ ba gʉdʉ yi nɨmʉ. » 16 Lɔtɨ a ndɨ na botumo aka, luki limoti Yawe akwilyo ndɨ kumbu. Kʉwa wa, bamalaika bava ndɨ, bava gɔnɨ mukakɨ, bomikakɨ basɨka bi baba, bʉnyɔ ndɨ kunzi wa gʉdʉ.
17 Ngbingo yi nɨnɔ bʉnyɔ ndɨ mino kunzi wa gʉdʉ, bemoti ka bamalaika abɨkya ndɨ Lɔtɨ bɛ : « Pɨkɨta kaukuso ɔbɨlɨ kakʉ. Wakikwenitɔgʉ kumbuso ikanɨ kaamaga gʉtʉgʉ ka iwili yi nɨyɨ. Pɨkɨta kʉgʉ wa ngʉpa kyɛ makolumwogonitɔgʉ. » 18 Lɔtɨ asikisyo ndɨ bɛ : « Ezeee ! Kɨgyananɨgʉ, kikiliki, Mombukwono dhamɨ ! 19 A lɨngʉnʉ bɛ ɨmɨ, mʉgya-ligubho kakʉ ninisononi ndɨ na mazɨyɔ ko miso kakʉ, na ɨwɛ wewoniso sɨpananɨsɔ sidhingi kʉgbɛ kabuulyogo ɔbɨlɨ kamɨ. Ɨmɨ, nakakwananɨgʉ kapɨkɨta kadhwɛ ka ngʉpa nɨ kukwakʉ kanedhundigʉ, nokwo. 20 Kikiliki, watʉ kamɨna mikya gʉdʉ yi nɨnɔ kʉ ? Nakwanana kapɨkɨta mino kyɛ kɛgʉ byɨ. Na mugi mi nɨmɔ kɛgʉ mahʉ, ɨsɨlya pisi napɨkɨtɨ kʉ bɛyɔ, kabuulyogo ɔbɨlɨ kamɨ. » 21 Malaika asikisyo ndɨ Lɔtɨ bɛ : « A bɛyɔ, nukonini bata mʉgamʉ kakʉ, nakagyogyisigʉ gʉdʉ yi nɨnɔ wawonyi nɔ. 22 Tʉkyoni wanʉ bɨgala-gala, misumoku kʉ bɛyɔ. Ka lɨngʉnʉ, nakagyɨgʉ luki kambwa bɛ madhwɨ. » Kinili balɨkyaga gʉdʉ yi nɨnɔ bɛ Soali.\f + \fr 19.22 \ft Ka Kiebhalania, lino la
Soali: \ft isi yi nɨ « yɨkɛdɛ ».\f*
23 Mɔnɨ a ndɨ kasanzaga nɨ Lɔtɨ anadhwɛ ka Soali. 24 Kʉwa wa, katʉkya kʉgʉ wa lɨsyɛ, Yawe olukuso ndɨ matamʉ mongido-ngido no buku abhɛ mbwayɨ ka bagʉdʉ ba Sɔdhɔmʉ na Gɔmɔlɔ, 25 ugyogyiso ndɨ bagʉdʉ bi nɨbɔ, iwili, bamombukwono dhabʉ, na mapakʉ masɨ. 26 Luki limoti, muko Lɔtɨ a ndɨ kabɨbya kumbuso. Nɨyɔ ɨyɨ muko ɨkwɛ kumbuso,a ɨɨta kʉwa ndɨ ititi.
27 Na bʉsɔbɨ bibo, Abhalahamu aga ndɨ ka pa nɨyɔ banzɨna ndɨ mino na Yawe. 28 Ɨkwɛ ndɨ miso ya Sɔdhɔmʉ, Gɔmɔlɔ na ka bapa bayasɨ ka iwili. Ɨna ndɨ muki katʉkya ka lɨtɔmbʉ, anadaka kʉgʉ mʉdɔngɔnɨ abhɛ bakʉbhʉsya bofulu.
29 Ngbingo yi nɨnɔ Kunzi ugyogyiso ndɨ mino bagʉdʉ na iwili yi nɨyɔ Lɔtɨ ikogo ndɨ mino, atamanatʉ ndɨ gɔnɨ Abhalahamu. Na anyɔgɔ ndɨ gɔnɨ Lɔtɨ kyɛ bakolumwogonitɔgʉ, wa a ndɨ mino kaugyogyiso bagʉdʉ bi nɨbɔ.
Puponogo ka Bamoabhu na Baamoni
30 Kʉwa wa, Lɔtɨ abanga ndɨ kaiko ka gʉdʉ wa Soali. Atʉkya ndɨ wa na bomikakɨ boko bi baba, bɨnda ndɨ kaiko kʉsɔ wa kʉkʉmakʉ nɨkwɔ ɨkpɔ ndɨ ka lɨtalʉ lidhingi kʉgʉ wa ngʉpa.
31 Lɨsyɛ limoti, miki muko yi nɨnɔ a ndɨ pʉta abɨkya nɨnɔ miki yi bɛ : « Bhabha a mbɔkʉ-mbɔkʉ, na kɛgʉ gɔnɨ na mʉlʉkʉ ka iwili yi nɨyɨna nɨnɔ akwanana katɨva bɛyɔ ɨgyananaga mino ka bapa bayasɨ. 32 Dhoku, tamwisi vinya wakpʉ, kumbuso yi takpakyana na ɨbʉ abhɛ mʉlʉkʉ. Kʉwa wa, takwanana kabʉkʉtɨlyaga bomiki. » 33 Na bʉgɔgɔ bi nɨbɔ aka bɔ, bamwiso ndɨ abhabʉ vinya wakpʉ. Mʉsɨka nɨnɔ mbɔkʉ yi bakpakyana ndɨ na abhakɨ. Luki limoti, Lɔtɨ kibhogʉ ndɨ lɨkpʉmʉka gʉtʉgʉ limoti aka : iki ngbingo yi nɨnɔ miki ogulyo ndɨ mino ikanɨ nɨnɔ atʉkya ndɨ mino.
34 Nɨyɔ lɨsyɛ asyɛ, miki nɨnɔ puta yi abɨkya miki bɛ : « Isyekubi no bhiti, ɨmɨ, tokpokyonito bi na bhabha abhɛ mʉlʉkʉ. Na bʉgɔgɔ ba lɨsyɛ li nɨlɨ, tamwisi bata vinya. Na ɨwɛ wɨnda kʉwa kakpakyana gɔnɨ na ɨyɨ. Kʉwa wa, takwanana kabʉkʉtɨlyaga bomiki. » 35 Na bʉgɔgɔ bi nɨbɔ, bomika Lɔtɨ bamwiso ndɨ bata vinya. Mikakɨ nɨnɔ miki yi bakpakyana ndɨ na ɨyɨ. Luki limoti, Lɔtɨ kibhogʉ ndɨ lɨkpʉmʉka gʉtʉgʉ limoti aka : iki ngbingo yi nɨnɔ miki ogulyo ndɨ mino ikanɨ nɨnɔ atʉkya ndɨ mino.