Noha-rai Asyur letlawanni Niniwe ntuin la' yawa
2
Makden Niniwe miy re, mitlina! Mak kiwra kweyata-kwaniawu miy rmai wie!Mitiak reria yaro'wa genmi re!
Mitiak reria loi-talla!
Mpiahi'a makodi keki-rautu mak karuri-ka'orta re totpa mi'ar wa!
2 Mere Orgahi-Orha'a hota Nala Yakopa duratni-waitni (makden Israel) re, arwalli la' yawa,
me Nhi' Israel nohoni-raini totpa nwali owa'an pa naruri-nalai owa'an wa
pa emeknekama Israel ululu
la' ler maka arwalli edonna rma pa rweyata-rwaniawu ma'ta
Israel nohananni-taniaratni rora nhyi'ini-tlunanni re honona.
3 Mimkek ee!
Niniwe arwalli kekni-rautnu rma ra'ara de rnairi hadom totpa natiak inonni maka horni (warna tameng) mermera
me polli-rayanni emeknekama rar mermera.
Ine! Rwahi' targ olek la' wnialerna
pa keret ya'arni mnotanni liplipa-kamka'ma.
Ne kuda riwra pleta-plet pa rawlar lia ar ralma.a
4 La' talla ralamni tamkek nana kereta re meranni.
Rla'a-rmai die, idma rhokr ida.
Itamkeka de emeknekama obor maka kmormiori,
ne meranni emeknekama hita-tliena.
5 Makden Niniwe keki-rautu re o'tani-matni rpolu mak katu ka'ara re totpa rler la gaini,
totpa ratiaka ir let lawanni.
Mere mak katu ka'ara re rawlar die pala diunatni (rdunti).
Ramkek nan memna ir arwalli re rmai die rodi meranni pa rokru leta lutur lawanni (tembokni),
rnairi keliau-halwa'an (tameng) mak kaheu reri ira.
6 La' dodo'ondi makden Niniwe arwalli rhi' ger wawuawu liawna la letlawan Niniwe ralamni
pa nlunni-nweran mommuoga re totpa rala la' yawa.
Pede makden ray Niniwe istanni de ramta'at nande humra-kailia.
7 Edon nalo'on wali ne arwalli re rtoran nan oleka ray hawni pa rodia,
nhi'nande hopopanni re rko'a-rkakru emeknekama ma'nu loktieru,
me rteman rer lia ihranu rapolu-ratnianni.
8 Itamkeka de Niniwe limni-rorni re ema rtiwria rawria (rawlari talamburan),
emeknekama ger mak kwau pua nkeran lolol wa.
Na'nama riy rpolga riwa: “Ee! Yan miwlari, yan miwlari!”
Mere riy id mana edon natlin la yoma ramta'ata rawali.
9 Noma Niniwe arwalli re idma nakot la ida niwra:
“Ee! Twarui-twate'la leli-maha me maha wawahra (perakni) re honona!
Yoma re'a-tniaru la' let di de harahu memna!”
10 Ine! Niniwe letlawan de rweyata-rwaniawua,
limni-rorni rawlar mommuou oleka la wa,
me re'eni-tniarnu arwalli rwarui-rwate'la nan momuoga.
Honona reyahru olek wa!
Pede makden ma't la hande edonna rparani olekwa
pa inonni re rmatlioi-rmatliawra me rdiwdiwra
me gaini rlakputputi.
11 Ululu de, let de emeknekama lien maka ohpora-ahu diawra genni,
de gen miaka ralla ohpora-ahu diawra a'na re ra'ana-remnu,
ne gen miaka ohpora-ah diawra muanu-rara rokria
totpena rora upni-a'nani ramtiertierun wa.
Mere la' dodo'ondi de letlawan de etla meni?!
12 La' ululu de ir emeknekama ohpora-ah diawra re pa rtitin nana ya'ana-yemannu,
me rhawi' erawria pa rala la'a rara me a'nani re ra'ana,
me korni re rapenua lien maka rdella de.
13 Mere la' dodo'ondi de Orgahi-Orha'a Makodi Plolli la hya'a-hya' to'a wawannu, Nakot la Niniwe, Niwra:
“Mitlin reri o! A' di de arwalmi.
Keret ya'armi de hota A tiutin doin momuoga re.
Makodi keki-rautu re hota rmolu-rmat lia'a ara ralamni.
Pede la' dodo'ondi de re'a-tniaru niutni-niutni maka mrieyahru la lodna-hairi harahu re rmol momuou.
Ne ta'enniana mhiopna riy rodi kota la lodna-hairi re owa'ana totpa mhi' ir pa ramta'ata.”