NAHUM
Orgahi-Orha'a Nawenan la'a Niniwe, noha-rai Asyur letlawanni de
1
Hadi de puka mak kakot nohora Nahum yamkekni. Nahum di, makwohorulu-ktatrulu id mak kwatiawu Elkos. Pa lera ida ne Orgahi-Orha'a Nwahaur nohora la'a Nahum la'a hya' maka makden letlawna Niniwe re hota rlernana. Nnio'oni de emkadi:2 Orgahi-Orha'a Nahmen memna riy rkola tieru-rawur nehla la uplera-upmati.
Hota he' ed maka kmalawna la' E'a de hankeranni-ralmha'arni ntuin memna la' ir wawannu.
Niukmua maka ir rlernana werwerta.
3 Plola pa Orgahi-Orha'a edonna plet pa Nawenna.
Emkade ho'mana E' mak kodi plolli pede he' maka khi'a yatyata-halala de
hota e' edonna nlewan la' Orgahi-Orha'a niukamnuu.
La' meni-meni to'a Orgahi-Orha'a Nala' de, la' hande anin lawna nteni,
emkade wallia E Nhapar la gen mieni de koda-awu nwallia wowta-kakma.
4 Orgahi-Orha'a Nawenna la' tah'i totpa nkerna,
pede gerlawna honona de Nhi'a gerni pa nkerna-nhau.
Tamkeka de wo'ora Karmel me rai mtatanni la' Basan de rkerna-rhau.
me la' Libanon de ora-au ror wutga hadeutnu honona rapliau.
5 Wo'ora re rruru la' E gaini ralamni,
me uhu-dari re honona rmadgera.
La'pa Orgahi-Orha'a Nhari inonni de noha nruru,
noha nruru me rimormiori honona rdiwra-rda'ala.
6 La'pa Orgahi-Orha'a Nawenna hota he' maka ktahan nana?!
La' riy id mana edonna nlewan la'a Orgahi-Orha'a ralmha'arni!
La'pa E Nalharia hankeranni-ralmha'arni de watu ramkoha-ramnanna
pa rwalia koda-awu la' E gaini ralamni.
7 Itmatromlawanni ralamni de samuoga,
E Nliwan reria-nma'at reria mutnu-rahanu mak kler la' susa ralamni,
ne E Natiaka riy mak kaliwan rer lia' E'a.
8 Mere Nweyata-nwaniaga E' arwalli re pa emeknekama ger wuawuau liawna.
Riy mak kparan pia ra'o'ta-wat lia' E'a de E Nlawgernia de rmati-rmolu.
9 Ralma-riora hya' maka rnairia pa rmalawan la' Orgahi-Orha'a de hota edon nler la' ga'a.
Hota ralam mehrani ntuin meman la ira pede ta'enniana rmalawna owa'an la E'a.
10 Pede hota makden Niniwe rtuinia wa
pa emeknekama riy mak ktuin la ruwnu-ahla rururi-kiarkiarti letgarni
na'nama wewna kerkerna me ruwnu-ahla de rtutin doinia.
Yoma Orgahi-Orha'a hankeranni-ralmha'arni ntuin meman la Niniwe pa nweyata-nwaniawua.a
11 La' let lalawanmi Niniwe de, riy id maka ralma-rior yatyata-halala nden rer lia kirkirni-ralma riorni.
La' ralma-riorni emkade pede nmalawna la' Orgahi-Orha'a.
12 Pede Orgahi-Orha'a Nakot la'a E rimormiorni makden Yehuda re Niwra:
“La' emkameni la makden Niniwe raruri-ra'orta me la' walia limni-rorni riy harahu,
mere hota Aghi'a pa ramkoha-ramnanna miy letmi me limmi-rormi hota rmati-rmol pa rhoru wua.
Ee! A lodnu-hai'ru Yehuda miy re, Aghi' olek miy pia mlier la'a kropna-krieutu
mere hota A'g edonna ghi'a emkade owa'ana.
13 La' dodo'ondi de A ghi' etia tali wutwutu-kokuohu la' miy
pa Agaldoinia miy lia'a Niniwe tiorna-riatnu.”b
14 Mere hadi ed maka Orgahi-Orha'a Nakottarga la'a makden Niniwe:
“Hota mikleha durti-waiti pa radurti-rawait la miy nohomi-raimi.
Uplera-upmati mak kdella uplermi re romni ralamni nekde
hota Awueyata-wuaniaga pa ramkoha-ramnanna.
Ne Aghi'a pa rhoplial miy inon mak mati re la hoi-kietra ralamni c
yoma yatyatmi-halalmi nhi'nande ta'enniana mmiormiori!”
15 Makden Yehuda, mimkek ee! Hopopna ida nlola wo'ora-wuranni wawannu re pa nmai,
nmai die nodia kot kalwieda-paitiota,
niwra arwalmi ratowar nan oleka la' yawa.
Pede makden Yehud miy re, mhi'a owa'ana la Uplerlawna ler lalawanni re
me miodia hare honona maka mikottarg oleka la Orgahi-Orha'a re pa miala la E'a.
Yoma nohomi-raimi de hota riy yatyata-halala edonna rwalerna owa'ana
yoma rweyata-rwaniawu momuou olek wa.